ئەمریکا مەیدانا سووریێ بۆ روسیا و ئیرانێ چۆل دکەت
ئەڤرۆ نيوز:
سەرۆکێ روسیا پشتی سەرکەڤتنا دۆنالد ترامپ بۆ جارا دویێ ب تەلەفۆنێ ل گەل سەرۆکێ نوو یێ ئەمریکا ئاخڤی و راگەھاند کو ئەو دخوازیت روو ب روو ل گەل ترامپی بئاخڤیت و ل گەل ئەمریکا ھەڤالبەندیەکا نوو دروست بکەن.
ڤیلادەمیر پوتین سەرۆکێ روسیا پشتی ترامپ وەک سەرۆکێ نوو یێ ئەمریکا ھاتە ھەلبژارتن بۆ جارا دویێ تەلەفۆنا وی کر و داخواز ژ ترامپە کر کو پێکڤە ھەڤالبەندیەکا نوو دروست بکەن و بزاڤا چارەکرنا پرسگرێکان بدەن. پوتین پشتی پەیوەندیا تەلەفۆنی ل گەل ترامپی بۆ دەزگەھێن راگەھاندنێ دیار کر و گۆت: (ئەم ھەردەم ئامادەینە ل گەل ئەمریکا و ھەر وەلاتەکی د پەیوەندیێن وەکھەڤ و دۆستانە دروست بکەین و دڤێت ھەر ئالیەک رێزێ ل کارو بارێن ناڤخوە بگریت و د چارچۆڤێ رێزگرتنێ دا بزاڤ بکەت).
پوتین ئاشکرا ژی کر دێ پەیوەندیێن وی ل گەل ترامپی بەردەوام ھەبن و دەمێ ب فەرمی بوو سەرۆکێ ئەمریکا ژی دخوازیت ھەڤدیتنەکا دو ئالی ل گەل دا ساز بکەت و گۆت: (ئەم بۆ ئارامیا جیھانێ ھەول ددەین و دشێین ل گەل ئەمریکا پێکڤە بۆ چارەکرنا پرسگرێکان کار بکەین و ئەو یەک د بەرژەوەندا مە ھەردو ئالیان دایە).
ل ئالیێ دی چاڤدێرێن سیاسی وەسا دبینن کو دۆنالد ترامپ سەرۆکێ نوو ھەلبژارتیێ ئەمریکا ناخوازیت د قۆناغا دەستپێکێ دا زێدە دەستێوەردانێ د رەوشا سووریێ دا بکەت و مەیدانا سووریێ دێ بۆ روسیا و ئیرانێ بجە ھێلیت، د ھەمان دەمی دا ھندەک چاڤدێر ژی وەسا دبینن کو سیاسەتا ئەمریکا ل دۆر سووریێ گوھۆرینێ ب خوە ڤە نابینیت لێ دبیت کو ئەمریکا ل گەل روسیا بۆ دیتنا چارەکا سیاسی بزاڤێن خوە بەرفرەھتر بکەت.