بەرپرسێ‌ مەكتەبا رێكخستنا پارتی ل بەهدینان ب هەلكەفتا سەركەفتنا پرۆسەیا دەنگدانێ‌ و سەركەفتنا مەزن یا لیستا 275 یا پارتی و ب دەستڤەئینانا پتر ژ ملیۆن دەنگان، پەیامەك بەلاڤكر و تێدا هاتیە: پشتی ئەنجامێن بەڕاهیێ یێن هەلبژارتنێن خولا شەشێ یا پەرلەمانێ ئیراقێ هاتینە زانین، مە دڤێت مزگینیا سەركەفتنێ ل دەڤەرا بەهدینان رابگەهینین و ژ دل و جان سوپاسیا خەلكێ جوامێر و دلسۆز و خۆڕاگرێ دەڤەرا خۆ بكەین، بۆ وێ باوەریا مەزنا دوبارە دایە پارتی دیموكراتی كوردستان.
دیسا د پەیاما بەرپرسێ‌ مەكتەبا رێكخستنا پارتی دا ل بەهدینان هاتیە: «خەلكێ مە سەرەرای هەمی فشارێن سیاسی و ئابووری ل سەر وان، لێ هەر باوەری ب رێبازا بارزانی و پارتی هەیە، ژ بەر هندێ ئێك ئێكە دەستێن هەوە ماچی دكەین، خوزی پەیڤەك هەبایە ژ هەژی هەوەیێن عەزیز و خوشتڤیبا، سۆز بیت ئەوا د شیانێن مەدابیت د قووناغێن بهێن دا بكەینە د خزمەتا هەوەیێن هێژا دا، هەوە هەمیان ب هەمی تەخ و چین ڤە، مللێن خو دانە بەر و ل دووڤ داخوازی و گازییا مە هاتن، هەوە خۆ ل پارتی و رێبازا بارزانی كرە خودان».
ل دووماهیێ‌ گۆتیە: «هنگ د گەل مە دا و ئەم د گەل هەوە دا و ئەم هەردو بۆ پاراستن و خزمەتا كوردستانەكا بهێز دێ‌ كاركەین».

دهۆك، دلۆڤان ئاكرەیی:

رێڤەبەرێ دیوانا وەزارەتا ناڤخۆ دیاركر، بۆ ڕێكخستن و ئێكخستنا شێوازێ تابلۆیێن ترۆمبێلان، ل دووڤ ستانداردێن نێڤدەولەتی، هەمی ترۆمبێلێن میری ل ڕێڤەبەریێن هاتنوچوونێ یێن پارێزگەهان ب شێوازەكێ نوو، تابلۆ دێ پێ هێنەدان.
دكتور هێمن میرانی، رێڤەبەرێ دیوانا وەزارەتا ناڤخۆ بۆ رۆژنامەیا ئەڤرۆ گۆت: «د بەردەوامیا بزاڤێن وەزارەتا ناڤخۆ یا حوكمەتا هەرێما كوردستانێ دا، بۆ ڕێكخستن و ئێكخستنا شێوازێ تابلۆیێن ترۆمبێلان، ل دووڤ ستانداردێن نێڤدەولەتی، د نوكە دا ئێكخستنا تابلۆیێن ترۆمبێلێن میری یێن تایبەت ب وەزارەت و فەرمانگەهـ و دام و دەزگەهێن حكومەتا هەرێمێ دەست پێ كریە، هەمی ترۆمبێلێن میری ل ڕێڤەبەریێن هاتنوچوونێ یێن پارێزگەهان ب شێوازەكێ نوو تابلۆ دێ پێ هێنەدان و هەر وەزارەت و دەستەیەك ژی ژبلی ژمارەیێ، دو پیتێن تایبەت ب خۆ ڤە دێ هەبن و ناڤێ وەزارەتان ل سەر تابلۆیان نامینیت».

‌ئامێدیێ، مەحمود نهێلی:

بۆ دەمێ‌ سێ سالایە فەستیڤالا تەحینا ئامێدیێ دهێتە گێڕان، بۆ ئەڤ سالە ژی بەرهەڤی ژ بۆ ئەنجادانا ڤێ‌ فەستیڤالێ‌ هاتینە كرن.
وارشین سەلمان، دەڤەردارێ ئامێدیێ بۆ رۆژناما ئەڤرۆ دیار كر، بۆ سالا سێیێ یە فەستیڤالا تەحینێ‌ ل ئامێدیێ دهیتە كرن و گۆت: «بۆ ئەڤ سالە بەرهەڤی بۆ ئەنجامدانا فەستیڤالا تەحینا ئامێدیێ ژی هەڤال و فەرمانگەهێن گرێدایی ڤی كاری هاتینە راسپاردان و دو جهـ هاتینە دەستنیشانكرن و بەرهەڤی هاتینە كرن و ب تنێ رۆژا دەستپێكرنا وێ هێشتا نەهاتیە دەستنیشاكرن، لێ ل ناڤەراستا ڤێ‌ مەهێ‌ ب ئانەهیا خودێ دێ‌ هێتە گێڕان».
ناڤهاتی گۆتژی: «ڤان جۆرە فەستیڤالا گەلەك گرنگی هەیە و جۆتیار و خەلكێ دەڤەرێ دشێن د ڤان فەستیڤالان دا بەرهەمێن خوە نیشا بدەن و بكڕان بۆ خوە پەیدا بكەن، ئەڤە ژ بلی دێ روویەكێ جوانێ گەشتیاری ژی دەتە دەڤەرێ و بۆ ڤەژاندنا ئابۆرێ وەلاتیان و ژ بۆ خەلكێ دەڤەرێ گرنگیەكا تایبەت هەیە».

هەولێر، قائید میرۆ:

بەرپرسەكێ وەزارەتا بازرگانی و پیشەسازی خویاكر، بازاڕەكێ ئەرزان بۆ خەلكێ هەژار دێ هێتە ڤەكرن و بهایێ كەلوپەلان ب بهایێ گونجای، كو ئەرزانتربیت ژ بازاڕی دێ‌ دەنە وەلاتیێن هەژار و كێم ئەندامان.
نەوزاد شێخ كامل، رێڤەبەرێ گشتیێ بارزگانی بۆ رۆژناما ئەڤرۆ دیاركر، پڕۆژەیەكێ گرنگ ژ لایێ وەزارەتا بازرگانیا هەرێما كوردستانێ ڤە دێ هێتە ڤەكرن و تێدا بەرهەمێن خوارنێ ب بهایەكێ ئەرزان دەنە وەلاتیان، ب تایبەتی ژی وەلاتیێن خودان پێدڤێین تایبەت و هەژار، چونكی ئەو بازاڕێ دهێتە ڤەكرن، دێ بهایێ وان كەلوپەلێن تێدا ب بهایێ پشتەڤانیكری بیت.
نەوزاد شێخ كامل گۆت: «ئەف پڕۆژە ب هاریكاریا رێكخراوا خوارنا جیهانی یا سەر ب نەتەوێن ئێكگرتی ڤە دێ‌ هێتە ئەنجامدان، وەزارەتا بازرگانی بۆ ڤێ مەرەمێ ل گەل هەژمارەكا بازرگانان كۆمبوویە، هەتا وەكو هاریكاری كەلوپەلێن خوارنێ ب بهایێ گونجای بگەهیننە وەلاتیان».