هەولێر، قائید میرۆ:

وەزیرێ پیشەسازی و بازرگانی یێ حوكمەتا هەرێما كوردستانێ ئاشكرا كر، هەتا نوكە بەغدا ل سەر وەرگرتنا 292 تەنێن گەنمێ هەرێما كوردستانێ رازیبوویە و دبێژیت: وەزارەتا بارزانی بەرهەڤی بۆ وەرگرتنا گەنمێ ئەڤ سالە كرینە و هەموو سایلۆ د بەرهەڤن بۆ وەرگرتنا گەنمێ‌ جۆتیاران.
كەمال موسلم، وەزیرێ پیشەسازی و بازرگانی بۆ رۆژناما ئەڤرۆ دیاركر، هەموو بەرهەڤی بۆ وەرگرتنا بەرهەمێ گەنمێ جۆتیارێن هەرێما كوردستانێ هاتینە كرن و سایلۆ د بەرهەڤن بۆ وەرگرتنا گەنمی و گۆت: «هندەك سایلۆیان هێشتا گەنمێ‌ سالا بۆری تێدا مایە، بەلێ مە ئاریشەیا جهی نابیت، چونكی ژبلی سایلۆیان تانكێن تایبەت ب عمباركرنا گەنمی ژی هەنە و هەردەمێ پرۆسەیا وەرگرتنێ بڕێڤە بچیت وەزارەتا بازرگانی یا بەرهەڤە بۆ وەرگرتنا گەنمێ جۆتیاران».
ل دۆر رێژەیا وەرگرتنا گەنمی كەمال مسلم گۆت: «هەتا نوكە حوكمەتا ئیراقێ رازیبوونا خۆ ل سەر وەرگرتنا 292 تەنێن گەنمێ‌ جۆتیارێن هەرێما كوردستانێ دیاركریە».

ئامێدیێ، مەحمود نهێلی:

ل سەر فەرمانا جەنابێ سەرۆك بارزانی و پشتی سەرەدانا جەنابێ وی بۆ دەڤەرێ، دەست ب چێكرنا ئاڤاهیەكی بۆ دادگەها بەرایی یا ئامێدیێ هاتە كرن، نوكە كار كرن تێدا بەردەوامە و رێژەیا پتر ژ 80% كار تێدا ب دووماهی هاتیە.
وارشین سەلمان، دەڤەردارێ ئامێدیێ بۆ رۆژناما ئەڤرۆ دیار كر، پشتی سەرەدانا جەنابێ سەرۆك بارزانی و ل سەر داخوازییا وەلاتیێن دەڤەرێ دەست ب چێكرنا ئاڤاهیێ دادگەها ئامێدیێ هاتە كرن و گۆت: «كاركرن تێدا بەردەوامە، لێ ژ بەر رەوشا دارایی كار بلەز تێدا ناهێتە كرن، نوكە گەهشتیە قووناغێن دووماهیێ‌«.
گۆت ژی: «پڕۆژە ب گوژمێ ئێك ملیار و 700 ملیۆن دیناران ل سەر بودجا پارێزگەها دهوكێ و ب كوالیتیەكا باش دهێتە بجهئینان، بڕیارە د دەمەكێ نێزیك دا ئەڤ ئاڤاهیە ب دووماهی بهێت و بكەڤیتە د خزمەتا خەلكێ دەڤەرێ و دادگەها ئامێدیێ دا».

رەمەزان زەكەریا:

د چارچۆڤێ كارنامەیا چاكسازیا ئابووری یا كابینەیا نەهێ یا حوكمەتا هەرێما كوردستانێ دا ب سەرۆكاتیا مەسرور بارزانی، دەستەیا وەبەرهێنانێ سەركەفتنەكا مەزن د راكێشانا سەرمایێ بیانی و ناڤخۆیی دا تۆمار كریە.
ل دویڤ ئامارێن دەستەیا وەبەرهێنانێ‌، هەرێما كوردستانێ شیایە قەبارەیێ سەرمایێ وەبەرهێنانێ بگەهینیتە زێدەتر ژ 27 ملیار دۆلاران، ئەڤ سەرمایە ژی ل سەر 835 پڕۆژەیێن جودا و د كەرتێن جودا دا هاتیە بەلاڤكرن، دیسا ب مەرەما ب هێزكرنا پێگەهێ كوردستانێ ل بازاڕێن جیهانێ، زێدەتر ژ 50 شاندێن ئابووری بۆ دەرڤەی وەلاتی هاتینە هنارتن.
ئاشكرا ژی كریە كو ئێك ژ ئارمانجێن سەرەكی یێن حوكمەتێ ژ ڤان پڕۆژەیان، پشتەڤانیكرنا گەنجان و كێمكرنا بێكاریێ یە، كو زێدەتر ژ 74 هزار دەلیڤەیێن كاری بۆ وەلاتیان هاتینە دابینكرن.
دەستەیا وەبەرهێنانێ جەخت ل سەر وێ یەكێ كر كو ئەڤ دەستكەفتە ب سەرپەرشتیا راستەوخۆ یا سەرۆكێ حوكمەتێ هاتینە بجهئینان و كارنامەیا وان دێ بەردەوام بیت بۆ گوهۆڕینا ئاراستەیێ ستراتیژیێ هەرێمێ بەرەڤ خۆشگوزەرانیەكا هەردەمی.

هەولێر، قائید میرۆ

رێڤەبەرێ گشتیێ ئاڤا هەرێما كوردستانێ ئاشكراكر، پڕۆژەیەك بۆ كێمكرنا ئاڤا ب هەدەر دچیت دهێتە ئەنجامدان و ئاماژەكر، رێژەیەكا زۆر زێدە یا ئاڤا پاقژ ل هەرێما كوردستانێ ب هەدر دچیت و زێدەگاڤی ل سەر هێلێن ڤەگوهاستنا ئاڤێ هاتینەكرن. هەروەسا دبێژیت: چو پارە هەمبەر ئەڤی پڕۆژەی ژ وەلاتیان ناهێتە وەرگرتن و حوكمەتا هەرێما كوردستانێ و رێكخراوا یونسێف ئەڤی پڕۆژەی ئەنجامددەن.

ئاری ئەحمەد قادر، ڕێڤەبەرێ گشتیێ ئاڤ و سولینان بۆ رۆژناما ئەڤرۆ دیار كر «حوكمەتا هەرێما كوردستانێ ب هەماهەنگی دگەل رێكخراوا یونسێف مژوولی ئەنجامدانا پرۆژەكیە ژ بۆ، كۆنتڕۆلكرنا ئاڤا بە هەدەر دچیت ل هەرێما كوردستانێ، چونكە ل گۆرەی ڤەكۆلینێن هاتینە كرن ل هەرێما كوردستانێ نێزیكی 40%ێ یا ئاڤا دهێتە بەرهەمئینان بۆ ڤەخوارنێ ب رێیێن جودا ب هەدەر دچیت.
ئەڤە د دەمەكی دایە ل گۆرەی ستانداردێن جیهانی نابیت ئاڤا ب هەدەر بچیت و رێژا وێ 10%ێ زێدەتر بیت، ئەم ژی یێ كار دكەین بۆ كێمكرنا ئاڤا ب هەدر دچیت و رێژە بهێتە كێمكرن بۆ ستانداردێ جیهانێ، لەوڕا ژی بۆ ڤێ مەرەمێ نوكە مە دەڤەرەك دیاركریە و پڕۆژە ب رێیا تیمێن شارەزا یێ كار ل سەر دكەن ب رێیا دانانا ئامیرێن پێشكەفتی، هەتا بزانین ئەو ئاڤا دهێتە هلێن بەلاڤكرنێ ب چ رێكەكێ ب هەدەر دچیت و بهێتە كێمكرن، ئەگەر پڕۆژە یێ سەركەفتی بیت و سەربگریت قۆناغا ل دووڤدا دێ ب رێیا ئەندازیار و شارەزایێن ئاڤێ ل هەموو دەڤەران هێتە ئەنجامدان، پڕۆژە زۆر یێ پێشكەفتیە و بەریا چەندین سالان ل وەلاتێن جیهانێ هاتیە بكارئینان، حوكمەتا هەرێما كوردستانێ ژی ب رێیا ئامیرێن سەردەمیانە و پێشكەفتی دێ ئەڤی پڕۆژەی ئەنجامدەت.
ئاری ئەحمەد قادر گۆت ژی» پڕۆژە نوكە ب شێوەیێ ئەزموونی كەفتیە د بیاڤێ كاری دا، ئەم دێ رێژا سەركەفتێ تۆمار بكەین، مخابن ب هەدر دانا ئاڤێ نابیت ب ڤی شێوەیێ نوكە بمینیت، چونكە حوكمەتا هەرێما كوردستانێ مەزاختیێن زۆر ل سەرن هەتا ئاڤا پاقژ دهێتە بەرهەمئینان و بەلاڤكرن ل سەر وەلاتیان، ل چەند سالێن بۆری هێلێن ئاڤێ هاتینە سەخبێركرن و بەلاڤكرن، بزاڤێن مە د بەردەوامن بۆ سەخبێركرنا هەموو تۆڕێن ئاڤێ و دێ بەردەوامبین.
زێدەتر گۆت: هندەك پرۆپاگندە دهێنە بەلاڤكرن دناڤا وەلاتیان و ب رێیا سۆشیال میدیایێ كو هەمبەر ئەنجامدانا ئەڤی پڕۆژەی دێ پارە ژ وەلاتیان هێنە وەرگرتن، بەلێ ئەم وەلاتیان پشتڕاست دكەین، چو گوژمەكێ پارەی ژ وەلاتیان ناهێتە وەرگرتن، بەرۆڤاژی پارەیێ پێدڤی بۆ ئەنجامدانا پڕۆژەی ژلایێ حوكمەتا هەرێما كوردستانێ هاتیە مەزاختن و هەڤبەشێن ئاڤێ چو پارەیەكی نادەن.

دلۆڤان ئاكرەیی

سەرۆكێ فەرمانگەها میدیا و زانیاری ل حكومەتا هەرێما كوردستانێ دیاركر، پڕۆژەیێ ئاڤا خانكێ ب ئێك ژ پڕۆژەیێن گرنگ و ستراتیژی ل پارێزگەها دهۆكێ دهێتە هەژماردن، كو ب گوژمەیێ 3.5 ملیار دیناران ل سەر بەنداڤا مووسڵ دهێتە بجهئینان و ئارمانجا سەرەكی یا ڤی پڕۆژەی، دابینكرنا ئاڤا پاقژ و چارەسەركرنا كێشەیا كێمئاڤیێ یە ل ناحیا خانكێ و دەڤەرێن دەوروبەر.

د.جوتیار عادل، سەرۆكێ فەرمانگەها میدیا و زانیاری ل حكومەتا هەرێما كوردستانێ بۆ رۆژنامەیا (ئەڤرۆ) گۆت: پرۆژەیێ ئاڤا خانكێ ژ چەندین پشكێن ئەندازیاری و تەكنیكی یێن پێشكەفتی پێكدهێت كو باشترین خزمەتگوزاری پێشكێشی وەلاتیان دكەت و پڕۆژە ب درێژاهیا 250 مەتران پرا بالتوون و تەواف بالتوون بخۆڤە دگریت و د ڤی پرۆژەی دا ئەنبارەكا ئاڤێ ب قەبارەیێ 1000 مەتر سێجا هاتیە ئاڤاكرن و سیستەمێ پەمپێن ئاڤێ یێ پڕۆژەیی دشێت د هەر دەمژمێرەكێ دا 3400 مەتر سێجا ئاڤێ پاڵ بدەت.
جوتیار ئاشكراكر، كار ل سەر كێشانا هێلێن ئاڤێ ب قەبارەیێن 900 ملم و 400 ملم هاتیە كرن، دگەل دانانا وێستگەكا تایبەت یا كارەبێ بۆ پڕۆژەیی و قۆناغێن كاركرنێ و دەڤەرێن سوودمەند، كار ل سەر ڤی پڕۆژەی ب پێشكەفتنەكا بەرچاڤ دهێتە كرن، ب شێوەیەكێ كو:
قۆناغا ئێكێ: ڕێژەیا بجهئینانێ گەهشتیە 95% و چاڤەڕێ دهێتە كرن د نێزیكترین دەم دا ب دوماهی بهێت.
قۆناغا دووێ: د ڤێ قۆناغێ دا، دێ مفایێ پڕۆژەیی بەرفەرهتر لێ هێت و ئاڤ دێ گەهیتە سەنتەرێ قەزایا سێمێل، و دەڤەرێن تەناهی و مێسیریكێ.
ناڤبری زێدەتر گۆت: ب دووماهی هاتنا ڤی پڕۆژەی، دێ گۆڕانكاریەكا مەزن د دابینكرنا ئاڤا ڤەخوارنێ دا ل ناحیا خانكێ و دەوروبەرێن وێ پەیدا بیت، كو دێ خزمەتەكا بەرچاڤ گەهینیتە هزاران وەلاتیێن دەڤەرێ.

زاخۆ، دلۆڤان هالۆ:

ل تاخێ جووهییان یێ سەر ب ئیدارەیا سەربخوە یا زاخۆڤە، ئاڤاهیەكێ شوونواری هەیە كو ژبەری 100 سالان هاتیە ئاڤاكرن، لێ د نوكە دا ژبەر كەڤناتیا ئاڤاهی و كاریگەریا هاتنا بارانان مەترسیا هەڕفینێ ل سەر وی ئاڤاهیێ شوونواری هەیە، لەورا وەلاتیێن وی تاخی داخوازا نووژەنكرنێ دكەن.

ناجی ئەحمەد، وەلاتیەكێ وی تاخی یە بۆ ڕۆژناما ئەڤرۆ دیار كر، مەترسیا هەڕفینا ڤی ئاڤاهی ل سەر زاڕۆیێن مە هەیە، چونكو بەردەوام زاڕۆكێن مە ل كولانێ بۆ خوە یاریان دكەن، لەورا ئەم دترسین ئەڤ ئاڤاهیە ل سەر زاڕۆكێن مە دا بكەڤیت، چونكو بانێ‌ وێ ژی هاتیە هاتیە خوار، ژبەر هندێ ئەم دخوازن ئەڤ ئاڤاهیە بهێتە نووژەنكرن.
ئەكرەم عیسا، وەلاتیەكێ دی یێ هەمان تاخی یە گۆت:»خودانێ ڤی ئاڤاهی ڕازی نابیت كو خانیێ وی بهێتە ڕاكرن، ب تنێ ب مەرجەكێ ئەگەر قەرەبوویا خانیێ وی بدەنێ، مادەم ڕێڤەبەریا شوونواران خوە لێ دكەت خودان، بلا ژ لایێ وان ڤە بهێتە نووژەنكرن و وەكو شوونوار بمینیت، دا كو مەترسیا هەڕفینێ ل سەر نەمینیت و خەلك وەكو جهەكێ شوونواری سەرەدانێ بۆ بكەن».