بڕیارە ئەڤرۆ ئەو پێنچ یاریێن مایی ژ هەڤڕكیێن گەڕا 34ێ‌ یا خولا ستێرێن ئیراقێ‌ بۆ یارییا فوتبۆلێ‌ بهێنە ئەنجامدان، یانەیا زاخۆ دێ‌ ل بن كڤاشتنێن جودا مێڤاندارییا یانەیا دیالا كەت و مووسل ل یاریگەها دهۆكێ‌ تەلەبە مێڤانكەت و هەولێر و نەورۆز ژ دەرڤەیی یاریگەهێن خوە چاڤ ل سەركەڤتنانە.
كوڕێن خابۆری بەرانبەر تاقیكرنەكا ب هێز دانە
چاڤەڕێ‌ دهێتە كرن ئەڤرۆ ل دەمژمێر هەشتی شەڤ تیما یانەیا زاخۆ ل یاریگەها خوە یانەیا دیالا د یارییەكا بهێز دا بەرانبەر جەماوەرێ‌ خوە یێ‌ توورە مێڤان بكەت، كووڕێن خابۆری ئەوێن نوكە د ڕێزا شەشێ‌ دهێت ژ 54 خالان كو ڤەڕێژا 15 سەركەڤتن، نەهـ وەكهەڤی و هەشت خوسارەتیانە، یاریزانێن وێ‌ 43 گۆل تۆماركرینە د بەرانبەر دا 31 گۆل ل سەر هاتینە تۆماركرن بۆ زانین یارییەكا زاخۆ هاتییە پاشئێخستن بەرانبەر مینا كو د وی دەمی دا پشكداری كۆپا كەنداڤی بوو، ژلایێ‌ خوەڤە یانەیا دیالا ل ڕێزا 11ێ‌ دهێت ب كۆمكرنا 43 خالان.
زاخۆ د كاودانەكێ‌ هەستیار دایە
تیما یانەیا زاخۆ د كاودانەكێ‌ نەباش دا دەرباز دكەت، تایبەت پشتی خوسارەتییا گەڕا بۆری بەرانبەر كەرخێ‌ 3-1 گۆلان و دیسان بایكۆدا یاریزانان بۆ ڕاهێنانان ل دەمێ‌ بۆری دەرئەنجامێ‌ نە وەرگرتنا مووچەیێ‌ خوە و ژلایەكێ‌ دووڤە جەماوەرێ‌ وەرزشی یێ‌ نەڕازی ل سەر ئاست و ئەنجامێن تیمێ‌ كو ئەڤچەندە بوویە گڤاشتن ل سەر تیمێ‌ و كارگێرییا یانەیێ‌ سەربای دەنگۆیێ‌ جارەسەركرنا ئاریشەیا مووچەیان لێ‌ هەتا سەركەڤتن نەهێت لبن گڤاشتنان قورتال نابیت.
ڕاهێنەر ب هیڤییە
د پرێسكۆنفرانسێ‌ رۆژنامەڤانیێ بەری یاریێ‌ دا ئەیۆب ئۆدیشۆ ڕاهێنەرێ‌ تیما یانەیا زاخۆ گۆت: ئێك ژ هەستیارترین دەم دا یە تیما مە د بۆرینیت، یارییا ئەڤرۆ ب سانەهی نابیت و پێدڤییە جەماوەرێ‌ خوە ئاشت بكەین، لەوما ژی دڤێت یاریزان د ئاستێ‌ بەرپرسیارەتیێ‌ دابن و بگەهنە گۆلا هەڤڕك ژبۆ سەركەڤتنێ‌، راستە كاودانێن مە د باش نینن لێ‌ ڕامانا وێ‌ ئەو نینە تیما مە دێ‌ یا ئاست و ئەنجام خراب بیت، ب هیڤیی مە یارییا ئەڤرۆ ب ئەنجامێ سەركەڤتن ڤەگەڕینە هەڤڕكییان.
هەولێرییان سەركەڤتن دڤێت
ژلایێ‌ خوەڤە یانەیا هەولێر ئەوا د دەمەكێ‌ باش دا دەرباز دكە تدێ‌ ل یاریگەها نەجەف دەمژمێر 5:30 ئێڤاری بیتە مێڤانا وێ‌، یانەیا پایتەختێ‌ كوردستانێ‌ خودانا 67 خالانە ل ڕێزا سێیێ‌ دهێت ژ 19 سەركەڤتن، 10 وەكهەڤی و چار خوسارەتییان، ژلایێ‌ خوەڤە یانەیا مێڤاندار ل ڕێزا 19ێ‌ و بەری دووماهیێ دهێت ب كۆمكرنا 16 خالان و د مەترسییا داكەڤتنێ‌ دایە.
شیرزۆد هێزا هەولێریێ یە
تیما یانەیا هەولێر دێ‌ هێتە دناڤ یاریێ دا ب پشت بەستن ل سەر گۆلكەرێ‌ خوە و خودانێ‌ سەرێ‌ لیستا گۆلكەرێن خولێ‌ یێ‌ ئۆزپاكستانی شیرزۆد ئیمیرۆڤ ئەوێ‌ 26 گۆل تۆماركرین، نێزكترین هەڤڕكێ‌ عەلا ئەلدالی خودانێ‌ 16 گۆلانە، ژلایێ‌ خوەڤە یانەیا نەجەف دێ‌ شەڕێ‌ سەركەڤتنێ‌ كەت.
نەورۆز ل بەغدایە
ژلایێ‌ خوەڤە یانەیا نەورۆز دێ‌ ل یاریگەها زەورا بیتە مێڤانا یانەیا كارەبا ل پایتەختێ‌ ئیراقێ‌ بەغدا ئەوا دێ‌ ل دەمژمێر 5:30 ئێڤاری هێتە كرن، یانەیا باژێرێ‌ سلێمانیێ 47 خال كۆمكرینە ل ڕێزا نەهێ‌ دهێت ب 14 سەركەڤتن، پێنج وەكهەڤی و 14 خوسارەتی هەنە، ژلایێ‌ خوەڤە یانەیا كارەبا 28 خال هەنە ل رێزا 18ێ‌ دهێت.
ژ یاریێن دی یێن ئەڤرۆ
یانەیا كەرخ ل یاریگەها خوە یانەیا ئەمانەت بەغدا ل دەمژمێر 5:30 ئێڤاری مێڤان كەت، یانەیا مووسل دێ‌ یانەیا تەلەبە ل دەمژمیر هەشتی شەڤ ل یاریگەها دهۆكێ‌ مێڤان كەت.

هەرهین محەمەد:

د دیدارەكا كورت دا ئۆمێد ئەحمەد جەبار ڕاهێنەرێ‌ تیما فوتبۆلا یانەیا تەناهی دیار كر وەرزێ‌ ئەڤ سالە سەرباری ئاستەنگێن كەڤتینە د ڕێیا واندا ل دووماهیێ شیان مانا خوە د خولا پلا ئێكا كوردستانێ‌ دا ب پارێزین و بۆ وەرزێ‌ بهێت دێ‌ بزاڤێن باشتر خوە بەرهەڤكەن.
زێدەتر ناڤهاتی بۆ رۆژنامەیا ئەڤرۆ گۆت: وەرزێ‌ ئەڤ سالە بوو مە گەلەك ب زەحمەت بوو و كاودانێن جودا ل سەر تیمێ‌ ڕا دەربازبوون، مە گەلەك ئاستەنگ بۆراندن چو ژلایێ‌ دارایی ڤە یان ژی لایەنێ‌ هونەری ڤە تایبەت دەمێ‌ یاریزانەك تووشی هنگاڤتنێ‌ یان دووركەڤتنێ‌ دبیت، ل دەستپێكێ‌ بەرهەڤیێن مە د باش نەبوون و نیڤا وەرزی ژی مە هندەك یاریزان ئینا چار ژ وان پیشەكار بوون و دو ژوان یاریزانان ژی نەمانە ل گەل تیمێ‌ كو ئەڤچەندە ژی تا ڕادەیەكی ئاریشە بۆ تیما مە پەیداكر.
هەروەسان ئۆمێد ئەحمەد گۆت: تیما مە ب پشت گەرمییا یاریزانێن گەنج و خەلكێ‌ پارێزگەهێ‌ دكر ئەو یاریزانێن سەرەكی ژی دەمێ‌ تووشی ئاریشەكێ‌ بان ئێكسەر كارتێكرن ل پلان و ئاستێ‌ تیما مە دكر، لەوما ژی د وەرزێ‌ ئەڤ سالە یا پلا ئێك دا بوو من گەلەك یا ب زەحمەت بوو و هەڤڕكییەكا بهێز دهاتە كرن، چار تیم ب سەر دكەفتن بۆن ایاب و چار تیم پاشڤە دچنە پلا دویێ‌ و بەرهەڤیێن گەلەك یانەیێن پشكدار ژ مە باشتربوون و دبیت بەرهەڤیا مە وەكو یا پێدڤی نەبوو و نە شیاین ئەنجامێن گەلەك باش ب دەستخوە ڤە بینین.
ئومێدی گۆت: دخولا ئیراقێ‌ دا ژلایێ‌ مادی ڤە یا باشە هەتا رادەكی، بەلێ‌ د خولا كوردستانێ‌ چ پارێ‌ وەسا نادەن و ئەڤ چەندە ژی بۆ چەند ئەگەرا ڤەدگەریت و نوكە یانەیێن مە هەموو ب حكوومەتێ‌ ڤە د گرێداینە و چ كومپانی نینن پشتەڤانیێ‌ ل ئەڤێ‌ یانەیێ‌ بكەن و حكومەت ژی وەكو پێدڤی دبیت پارەكی بۆ یانەیان نا مەزێخیت و ژلایەكێ‌ دی ڤە چو دەستكەفتێن مەزن نین هەتا یانە بشێن پارەكێ‌ مەزن بینن.

كوڕێ‌ باژێرێ‌ دهۆكێ‌ و یاریزانێ‌ هەلبژارتیێ‌ ئیراقێ‌ بۆ یارییا باسكێت بۆلێ‌ فەرید رەعدی ب فەرمی گرێبەستا یانەیا زاخۆ بۆ وەرزێ‌ نوو یێ‌ خولا نایابا ئیراقێ‌ و ئەو هەموو گرێبەستێن ژ یانەیێن بەغدایی و چەندد یانەیێن دی ڕەدكرن بۆ خاترا یانەیا زاخۆ.
فەرید رەعد د دووماهی وەرزێ‌ بۆری دا یاریزانێ‌ یانەیا كەرخ یا بەغدایی بوو و گرێبەستا وی هەتا دو سالان هاتبوو ئیمزاكرن، لێ‌ بۆ وەرزێ‌ ئەڤ سالە بڕیار دا و ل سەر داخوازییا كارگێرییا یانەیا زاخۆ و ڕاهێنەرێ‌ تیمێ‌ گرێبەستا یانەیا زاخۆ ئیمزابكەت وەكو وەفادارییەك بۆ یانەیا خوە یا پێشتر یاری بۆ ئەنجامدایی و ئەو هەموو گرێبەستێن پێتشر ژ چەند یانەیێن ئیراقی و كوردستانی تایبەت یێن بەغدایی ڕەدبكەن بۆ خاترا یانەیا زاخۆ كو دێ‌ ل وەرزێ‌ ئەڤ سالە یاریێ بۆ ئەنجامدەت.
د داخویانیەكێ‌ دا فەرید رەعد بۆ رۆژنامەیا ئەڤرۆ گۆت: سەرباری چەندین گرێبەست ژ یانەیێن جودا بۆ من هاتبوون لێ‌ من پێخوەشحالبووم ئەز وەرزێ‌ ئەڤ سالە ڤەگەریمە یانەیا خوە یا پێشتر من خزمەتا وێ‌ كری، یانەیا زاخۆ وەكو مالا منا دویێ‌ یە، دێ‌ كەیفخوەشبم دگەل هەڤالێن خوە و كادرێ‌ ڕاهێنانێ‌ بۆ ناڤێ‌ زاخۆ وەكو نوونەرا بەهدینان د خولا ئیراقێ‌ دا ب چەنكین و سەركەڤتنان بینن، لەوما ژی ئیمزاكرنا گرێبەستی بۆ من دگەل زاخۆ یا تایبەتمەندە و دیرۆكی یە.
بۆ زانین فەرید رەعدی پێشتر یاری بۆ یانەیێن دهۆك، دووڤدا زاخۆ، پاشان یانەیێن نەفت، دیفاع ئەلجەوی، ئەلكەرخ یێن بەغدایی كرینە و ئەڤە بوو ماوەیێ‌ زێدەتری 12 سالانە وەكو یاریزانێ‌ هەلبژارتیێ‌ ئیراقێ‌ پشت بەستن ل سەر دهێتە كرن.

یێ‌ ئەرجەنتینی لیۆنێل مێسی ستێرێ‌ یانەیا ئینتەر میامی یا ئەمریكی تیما خوە بەر ب سەركەڤتنێ‌ بر پشتی گۆلەك تۆماركری و دو گۆل دروستكرین ئەوا یاری ب4-2 ب سەركەڤتن بەرانبەر تۆرنیتۆ د خولا ئەمریكا دا ب دووماهی هاتی.
مێسی ڕیكۆردا بلەزترین یاریزان كو ب گەهیتە 100 گۆلێن دروستكری د خولا ئەمریكا دا پشتی 64 یارییان و ڕیكۆردەكا یێ‌ ئیتالی سیباستیان جۆڤینكۆ یاریزانێ‌ تۆرنیتۆ بشكێنیت ئەوێ‌ د95 یارییان دا 100 گۆل دورستكرین، هەروەسان وەكو باشترین گۆلكەرێ‌ خولێ‌ ژی هاتییە دەستنیشانكرن ب تۆماركرنا 35 گۆلان.

د دیدارەكا رۆژنامەڤانی دا لویس دی لافۆینتی ڕاهێنەرێ‌ هەلبژارتیێ‌ ئسپانیا ڤەگەڕیانا ستێرێ‌ گەنج یێ تیمێ‌ لامین یامال بۆ نالإ ڕێزێن تیما وی دا بەری دەستپێكرنا مۆندیالا جیهانی 2026ێ‌ ب كۆمان دا زانین لێ‌ بۆ گەشبینە ل دووڤ بەرنامەیێ‌ چارەسەریێ و ڕاهێنانان ئەو بگەهیتە مۆندیالێ‌ و یارییان ژی بكەت.
لویس دی لافۆنینی گۆت: هنگاڤتنا لامینی د ڕانێ‌ وی یێ‌ چەپێ‌ دا كو ماسولینكا پێ وی تووشی دربەكی بوویە ل 22ێ‌ نیسانا بۆری ژ خولا ئسپانیا، كادرێ‌ نۆژداری یێ هەلبژارتیێ‌ ئسپانیا و یانەیا بەرشەلۆنا و ڕاهێنەرێ‌ جەستەیی بەرنامەیەكێ‌ تایبەت بوو دانایە، رۆژانە كار پێ دهێتە كرن پێخەمەت بۆ مۆندیالێ‌ بەرهەڤبیت، ئێكەم یارییا مە ل 15ێ‌ مەها بهێت دێ‌ ئەنجامدەین، هێشتا مەهەك و چەند رۆژەك ماینە، ئانكو دەلیڤە بەردەستە لێ‌ دبیت د یارییا ئێكێ‌ د گومانێ‌ دا بیت، هەرچەوابیت كارەكێ‌ مەزن یێ‌ دهێتە كرن ئەو بەرنامە ب سەركەڤیت، ب هیڤی نە لامین یامال بۆ هەموو یارییان بەرهەڤبیت.