سندس سالح سلێڤانه‌یی:
ڤان سالێن دووماهیێ لبه‌ركرنا جلكێن كوردی ژلایێ گه‌نجان ڤه ب رەنگەکێ بەرچاڤ زێدە بوویە، سەرەڕای گرانیا بهایێ وان، گەنج د هەموو هەلکەفتان دا وەفادارییا خۆ بۆ کلتوور و ڕەسەنایەتییا باب و باپیرێن خۆ نیشان ددەن.
هه‌نا عه‌بدولجه‌بار، ده‌رچویا زانكۆیێ یە بۆ ئه‌ڤرۆ گۆت: جلكێن كوردی بۆ من تنێ پارچه قوماشەک نینه، بەلکو هێمایێ جوانی و شانازیێ نه، بدیتنا من ئه‌ڤ ساله كچان زێده‌تر حه‌ز ل سه‌ر مۆدێلێن كه‌ڤن و ره‌سه‌ن هەیە.
هەنایێ گۆتژی: ئه‌ز هه‌رده‌م حه‌ز دكه‌م جلكێن نوی بخۆ بكڕم، به‌لێ هه‌كه بهایێ وان یێ گران بوو، بێگومان ب كرێ دئینم، ئەڤە چاره‌سه‌ریه‌كا باشه دا كو ئه‌ز ژ جوانییا ره‌نگێن جلكێن كوردی بێ به‌هر نه‌بم.
هودا سه‌لاح، ده‌رچویا په‌یمانگه‌هێ یە دیار کر، جوانیا جلكێن كوردی د وێ چه‌ندێ دایه كو چو جاران كه‌ڤن نابن، ئه‌ڤرۆ گه‌نج یێ ده‌ست ب ڤه‌گه‌ڕیانێ بۆ جلكێن كه‌ڤن دكه‌ن، چونكی ره‌سه‌نایه‌تییه‌كا تایبه‌ت دناڤ دا هه‌یه كو جلكێن بیانی ناده‌نه مرۆڤی.
هودایێ گۆت: لبه‌ركرنا جلكێن كوردی نیشانا وێ چه‌ندێ یه كو نڤشێ نوی یێ گرێدایه ب كه‌لتورێ خۆڤه، مه‌ره‌ما مه ژی ئه‌وه ئه‌ڤ جوانیه هه‌رده‌م یا زیندی بیت.
سالار مەجید، خودانێ به‌رگدوریا بابێ ئایێ دیار کر نوكه بازاڕێ جلوبه‌رگێن كوردی یێ گه‌رمه نه به‌س دانعه‌مر، بەلکو پشكه‌كا زۆر یا گه‌نجان داخوازیه‌كا مه‌زن ل سه‌ر درینا جلكێن كوردی هه‌یه، ئه‌وا جهێ سه‌رنجێ، مودێلێن كه‌ڤن یێن جاران دیسا دزڤرنەڤە.
سالا گۆتژی: ئه‌و كوردێن ل ده‌رڤه‌ی وه‌لاتی دژین، ده‌مێ دهێنه كوردستانێ كۆمەکا جلكێن كوردی ددرن بخۆ و وه‌ك دیاری ژی دگه‌ل خۆ دبه‌نه ده‌رڤه، ئه‌ڤه ژی نیشانا وێ چه‌ندێیه كو جلكێن مه ل هه‌موو جیهانێ بووینه جهێ گرنگیێ.
ئه‌دیبا محه‌مه‌د، خودانا دكانه‌كا كرێكرنا جلكێن كوردیە لدور هەمان بابەت گۆت: مه بفه‌ر دیت دكانه‌كێ تایبه‌ت بو كرێكرنا جلکێن کوردی ڤه‌كه‌ین، چونكی ئافرەت حه‌ز دكه‌ن بۆ هه‌ر هه‌لكه‌فته‌كێ مودێله‌كێ جودا ل به‌ر خۆ بكه‌ن، لێ كڕینا وان گران دكه‌ڤیت، لەوا ب کرێ بو وان باشترە.
ئه‌دیبایێ لدور بها و جۆرێن خزمه‌تگوزاریێ گۆت: بهایێن مه گه‌له‌ك د گونجایی نه و ژ ١٥ هزاران ده‌ست پێ دكه‌ن هه‌تا ٦٠ هزاران، ئه‌ڤه ژی ل سه‌ر جۆرێ مودێلی دمینیت. مه جلكێن بیكا، یێن ئاهه‌نگان و یێن سه‌یرانان ژی هه‌نه. هه‌ر ده‌سته‌كێ جلكی پشتی دزڤریته‌ڤه، ئه‌م ب شێوه‌یه‌كێ ستاندارد پاقژ دكه‌ین و دشۆین داكو بۆ كرێدارا دی یێ ئاماده بیت.
نيشاندان