د. عەلی تەتەر، پارێزگارێ دهۆكێ و حەمید عەلی، ئەندامێ كۆمیتەیا ناڤین یا پارتی، دوهی 18/2/2026 و ب هەلكەفتا 18ی شواتێ‌ و 73 سالیا دامەزراندنا هەردو ڕێكخراوێن ئێكەتیا قوتابی و لاوێن دیموكراتا كوردستانێ سەرا لقێ دهۆك یێ ئێكەتیا قوتابی و لاوان دا و ژ لایێ گۆلستان وەسفی، بەرپرسا لقێ دهۆك یێ ئێكەتیا قوتابی و لاوێن دیموكراتا كوردستانێ و كارگێری و ئەندامێن هەردو ڕێكخراوان ڤە هاتنە پێشوازی كرن.
پارێزگارێ دهۆكێ د كۆنگرەكێ ڕۆژنامەڤانی دا پیرۆزباهی ل سكرتێر و ئەندامێن سكرتاریەتێ و هەموو لاوان و قوتابیان و بەرپرس و كادر و ئەندامێن وان كر و ڕۆلێ قوتابی و لاوان د شۆڕەشێن ئیلۆن و گولان و چەندین قووناغێن خەباتێ‌ دا و د هەمی بیاڤان دا هەتا ئەڤرۆ بلند هەلسەنگاند و هیڤیا بەردەوامیێ و سەركەفتنێ بۆ خواست.

دهۆك، دلۆڤان ئاكرەیی:

پەیڤدارێ بەرەڤانیا باژێری ل هەرێما كوردستانێ دیاركر، ل سەر فەرمانا مەسرور بارزانی، سەرۆكێ حكومەتا هەرێما كوردستانێ، وەزارەتا ناڤخۆ سێ تاوەرێن پێشكەفتی یێن ئاگرڤەمراندن و رزگاركرنێ ب بلنداهیا 100 مەتران بۆ رێڤەبەریێن بەرەڤانیا باژێری ل هەولێر، سلێمانی و دهۆكێ دابینكرن و دبێژیت: ئەڤ پێنگاڤە وەك كارەكێ ستراتیژی یە بۆ وێ چەندێ بشێین ل گەل گەشەیا تەلارسازیێ بگونجین و سلامەتیا وەلاتیان د ناڤ ئاڤاهیێن بلند دا بپارێزین.
سەركەفت كاڕەش، پەیڤدارێ بەرەڤانیا باژێری ل هەرێما كوردستانێ بۆ رۆژنامەیا ئەڤرۆ گۆت: «ئەو سێ تاوەرێن نوو یێن ئاگرڤەمراندنێ ژ وەلاتێ ئیتالیا هاتینە كڕین و گەهشتینە هەرێما كوردستانێ، نوكە تیمێن بەرەڤانیا باژێری یێن هەر سێ پارێزگەهان ل پەیمانگەها بەرەڤانیا باژێری مژوولی راهێنانێن چڕن بۆ بكارئینانا ڤان تاوەران، داكو د دەمێ روودانێن نەخواستی دا ب زووترین دەم و ب نووترین تەكنەلۆژیا بگەهنە بلندترین خالێن ئاڤاهیان و ژیانا وەلاتیان رزگار بكەن».
گۆتژی: «بڕیارە د پاشەرۆژەكا نێزیك دا سیستەمێ درۆن ژی بۆ ئاگرڤەمراندن و چاڤدێریكرنا جهێ روودانان بكەڤیتە د خزمەتێ دا و ئەڤ چەندە ژی دێ گوهۆڕینەكا مەزن د شیانێن تیمان دا بۆ بەرهنگاربوونا كارەساتان پەیدا كەت».

دهۆك، لەزگین جۆقی:

بەرپرسێ راگەهاندنا سەرۆكاتیا باژێڕڤانیا دهۆكێ دیار كر، دەست ب قێركرنا جادەیا د ناڤ بازارێ‌ دهۆكێ دا دێ هێتە كرن، د دەمێ چەندین رۆژان دا دێ تەمام بیت و كەڤیتە د خزمەتا وەلاتیان دا.
شێروان حەسەن، بەرپرسێ راگەهاندنا سەرۆكاتیا باژێڕڤانیا دهۆكێ بۆ رۆژناما ئەڤرۆ گۆت: «ل دەستپێكا حەفتیا بهێت دەست ب قێركرنا جادەیا د ناڤ بازارێ‌ دهۆكێ دا دێ هێتە كرن، بۆ دەمێ چەندین رۆژان كار د قێركرنا جادەیا د ناڤ بازارێ دهۆكێ دا دێ هێتە كرن، كو باشترین جۆرێ‌ قێری دێ هێتە بكارئینان، ئەڤ پرۆژە ل 21/2/2026 هەتا رۆژا 26/2/2028 دێ بەردەوام بیت، هەمی جادە دێ هێتە قێركرن و كەڤیتە د خزمەتا وەلاتیان دا».

دلڤین رەشید:

پارێزەر جیهان حسێن مەحمود بۆ رۆژناما ئەڤرو دیاركر، رێكخراوا كۆمەلا ژنێن بەغدایێ‌ ئۆفیسا دهۆكێ‌ پڕۆژەیەك بناڤێ‌ (سلامەتیێ‌) راگەهاند و دبێژیت: ئارمانجا سەرەكی ژ ڤی پڕۆژی، ب هێزكرنا شیانان و رێگریكرنە ل توندوتیژیا دژی ژنان و كچان و باشترین خزمەت پێشكێشی رزگاربوویێن توندوتیژیێ‌ بهێتە كرن.
ناڤهاتیێ‌ گۆت: «ئەڤی پڕۆژی گرنگیەكا تایبەت ژبۆ پشتەڤانیكرنا دەروونی و جفاكی هەیە، راوێژكاریا یاسایی ب شێوەكێ‌ خۆبەخش و بێ‌ بەرانبەر پێشكێشی وەلاتیان دكەین، ژ بۆ پاراستنا مافێ‌ قوربانیێن توندوتیژیێ‌«.
گۆت ژی: «رێكخراوا كومەلە ژنێن بەغدایێ‌، داخوازێ‌ ژ وەلاتیان دكەت د دەمێ‌ پێدڤی دا پەیوەندی ب ڤان هژماران بكەن ب رێكا هژمارا هێلا گەرم یا سلامەتیێ‌: شیرەتێن یاسایی ل سەر ڤێ‌ هێلێ‌ (07725855039) و پشتەڤانیا دەروونی و جڤاكی ل سەر ڤێ‌ هێلێ‌ (07883116265)یە».

ئامێدیێ، مەحمود نهێلی:

د بەردەوامیا چێكرنا پڕۆژەیێن خزمەتگوزاری دا ل ناوچەدارییا چەمانكێ یا سەر ب دەڤەردارییا ئامێدیێ ڤە و گەهاندنا جادەیان، هەژمارەكا پڕۆژەیێن خزمەتگوزاری ل وێ ناوچەداریێ هاتنە ئەنجامدان، ژ وان ژی: پڕۆژەیێ چێكرنا رێكێن ناڤخوەیی ل سەنتەرێ‌ ناوچەداریێ‌ و پڕۆژە ب دووماهی هاتیە.
ئیسماعیل حەمید، رێڤەبەرێ ناوچەداریا چەمانكێ بۆ رۆژناما ئەڤرۆ دیاركر، هەژمارەكا پڕۆژەیێن خزمەتگوزاری ل دەڤەرێ‌ دهێنە بجهئینان، ژ وان ژی: پڕۆژەیێ‌ چێكرنا جادەیێن ناڤخوەیی ل چەمانكێ و گۆت: «ئەڤ پڕۆژەیە ژ چێكرنا جاەیێن ناڤخۆ یێن سەنتەرێ ناوچەداریێ‌ و دەوروبەران پێك دهێت، كو پڕۆژەكێ‌ باش و سەردەمیانەیە».
ناڤهاتی ئاشكرا ژی كر، پڕۆژە ب دوماهی هاتیە و كەفتیە د خزمەتا خەلكێ وێ دەڤەرێ دا و ب چێكرنا ڤان جادەیان هاتنوچوونا وەلاتیان خوەشتر لێ هاتیە و جوانیەكا دیتر دایە باژێری و گۆت: «د بەرنامەیێ‌ مە دایە چەندین پڕۆژەیێن دیترێن خزمەتگوزاری ل ناوچەداریا چەمانكێ‌ بهێنە بجهئینان، مینا: پڕۆژەیێن جادیێن دەرڤە و چێكرنا پاركەكا گشتی».

هەولێر، قائید میرۆ:

رێكخەرێ راسپاردەیێن نێڤدەولەتی ل هەرێما كوردستانێ ئاشكرا كر، ل هەرێما كوردستانێ چار هزار و 600 كەس ب تۆمەتا ماددەیێن هۆشبەر هاتینە دەستەسەركرن و حوكمدان و دبێژیت: ڤەكۆلین ل گەل تۆمەتبارێن ماددەیێن هۆشبەر دهێتە كرن.
دیندار زێباری، رێكخەرێ راسپاردەیێن نێڤدەولەتی ل هەرێما كوردستانێ راگەهاند، ل هەر شەش چاكسازیێن هەرێما كوردستانێ هزار و 800 كەس هەنە و ب تۆمەتا ب كارئینان و بازرگانیكرنێ ب ماددەیێن هۆشبەر هاتینە سزادان و حوكمدان و گۆت: «زێدەتری هزار ژ وان كەسێن هاتینە حوكمدان بازرگانێن ماددەیێن هۆشبەرن، ئەڤە ژی ئامارێن مەترسیدارن و كاریگەریێن خراپ ل سەر جڤاكی هەنە».
دیندار زێباری گۆت ژی: «ل سەر ئاستێ دەزگەهێن ئەمنی یێن پارێزگەهێن هەرێما كوردستانێ هەتا دووماهیا سالا بۆری دو هزار و 700 كەس د ناڤا زیندانێن دەزگەهێن ئەمنی دا هەنە و ڤەكۆلین د گەل دا دهێتە كرن، پشتی دهێنە پشتڕاستكرن بۆ دادگەهێ دهێنە هنارتن و ل گورەی قانوونێ دهێنە سزادان».