ل درەنگییا شەڤا ئێكشەمبییا بۆری لژنەیا دێسپلینێ‌ ل فدراسیۆنا فوتبۆلا ئیراقێ‌ كۆمەكا بڕیارێن توند دژی هەردو یانەیێن پارێزگەهێ‌ دهۆك و زاخۆ دەركرن، دەرئەنجامێ روودانێن یارییا دووماهییا كۆپا ئئیراقێ‌ ئەوا ل مەها بۆری ل یاریگەها ئەلشەعب ل پایتەختێ‌ ئیراقێ‌ بەغدا هاتییە كرن.
بڕیارێن هاتینە دەركرن بڤی شێوەیی بوون.
1- ب كۆژمەیێ‌ 25 ملیۆن دیناران یانەیا زاخۆ هاتە سزادان
2- ب كۆژمەیێ‌ 25 ملیۆن دیناران یانەیا دهۆكێ‌ هاتە سزادان.
3- بێ بەهركرنا پشتەڤانێن یانەیا دهۆك بۆ ناڤ یاریگەهێ‌ دا بۆ ماوەیێ‌ ئێك وەرز ئانكو نەهـ یارییێن دناڤ ئەردێ‌ خوە دا بێ‌ بەهرە ژ دیتنا یارییان.
4- ب هەمان شێوە بێ‌ بەهركرنا پشتەڤانێن یانەیا زاخۆ بۆ ناڤ یاریگەهێ‌ دا.
5- سزادانا ڕاهێنەرێ‌ زاخۆ عەبدولغەنی شەهەد ب كۆژمەیێ‌ سێ‌ ملیۆن دیناران.
6- سزادانا هاریكارێ‌ زاخۆ عودەی عمران ب كۆژمەیێ‌ دو ملیۆن دیناران و دو یارییان دگەل تیمێ‌ نابیت.
7- سزادانا ئەمجەد عتۆان یاریزانێ‌ یانەیا زاخۆ بۆ دو یارییان و كۆژمەیێ‌ پێنچ ملیۆن دیناران.
8- سزادانا خالد موشیر سەرپەرشتێ‌ تیما یانەیا دهۆك ب دو ملیۆن دیناران و دو یارییان دگەل تیما خوە نابیت.
9- سزادانا چارەسەرێ‌ تیمێ‌ نەبی كرڤان ب پێنچ ملیۆن دیناران و دوورئێخستنا وی دگەل تیمێ‌ بۆ شەش هەیڤان.
10- سزادانا شرۆڤەكارێ‌ ڤێدیۆیێ‌ یێ‌ تیما زاخۆ محەمەد ناسر ب دو ملیۆن دیناران و دوورئێخستنا ژ تیمێ‌ بۆ دو یارییان.
11- سزادانا یاریزانێ‌ زاخۆ یوسف ئەلرائید ب دو ملیۆن دیناران و دوورئێخستنا وی ژ تیمێ‌ بۆ دو یارییان.
12- دەمەكێ‌ دی دا دێ‌ قەبارێ‌ زیانێن دناڤ یاریگەها شەعب و دەرڤە هێتە ڕاگەهاندن و بەرپرسیارەتی دیاربیت بۆ كیش لایەن دێ‌ قەرەبووكەت.
پشتی دەركرنا ئەڤان سزایان پێلەكا نەڕازیبوونێ‌ ژلایێ‌ وەرزشڤان و پشتەڤانێن هەردو یانەیێن پارێزگەهێ‌ هاتییە پێش و هەموو بووچوون ب غەدرەكا مەزن دژی هەردو یانەیان ئاماژە ددەن و دخوازن هەردو یانەیە تانێ‌ ل سەر ڤان بڕیارا بدەن، رۆژنامەیا ئەڤرۆ بووچوونێن شرۆڤەكار و لایەنێن پەیوەندیدار وەرگرتینە.
ل دەستپێكێ‌ سلێمان زەكی شرۆڤەكارێ‌ وەرزشی ل پارێزگەها دهۆكێ‌ گۆت: ئەڤ سزایە نە ل دووڤ قەبارێ‌ ئەوان روودانان بوو بەلكو د ژوارن و بێ‌ ڕامانن و مەرم پشت هەیە، دڤێت هەردو یانە خوە بێدەنگ نەكەن و هەرزوو پارێزەرێن خوە فرێكەنە بەغدا بۆ تانە دانا ڤان بڕیارا، ب دیتنا من ئەڤ بڕیارە دكەڤنە د قالبێ‌ فەرقوجوداهی و دژاتیكرنێ‌ دا، نە یا بەرعاقلە هەردو یانە د ماوەیێ‌ وەرزێ‌ بوری یا خولا ستێرێن ئیراقێ‌ باشترین شێوە و جوانترین كەڤالێ‌ جەماوەری روویەكێ‌ جوان دابوو خولێ‌ ئەو بخوە ژی سەرسۆرمان بوون، هەردو یانە ئێكانە بوون خودان مەزنترین پشتەڤان ل سەر ئاستێ‌ خولێ‌، شیابوون هێزەكێ‌ بدەنە هەڤڕكییان.
هەروەسان ناڤهاتی گۆت: داخوازێ‌ هەردو یانەیان دكەین نە ڕاوەستێن و پارێزەرێن خوە ڕاسپاردینن و جیهەتێن بلند یێن حوكمەتا هەرێما كوردستانێ‌ و ئیراقێ‌ بینە سەر هێل بۆ هەلوەشاندنا ڤان بڕیاران یان كێمكرنا وێ‌، هەكە چو نە هاتە كرن ژی بلا ل دادگەها كاس ژی بزاڤێ‌ بكەن، هیچ د خولەكا جیهانێ‌ دا چێنەبوویە ب روودانێن كێم سزایێن مەزن و نە بەرعاقل بهێنە دان.
ژلایێ‌ خوەڤە موشیر دوسكی پشتەڤانێ‌ یانەیا دهۆكێ‌ گۆت: بۆ من بخوە ژی ئەڤ بڕیارە سەیرن و نە ل دووڤ روودانێن یاریێ‌ بوون، شكاندنا كورسیان و ئەو ئالۆزییا دناڤبەرا چەند كەسەكان دناڤ یاریگەهێ‌ دا مە پێشبینی دكر دێ‌ سزایێن كێم هەبن بوو نموونە دو یارییا یانەی بێ‌ پشتەڤان، یان سزایێن دارایی و سزادانا ئەو كەسێ‌ ئالۆزیكری دناڤبەرا یاریەك یان دو یارییان لێ‌ سزادانا هەردو یانەیان ب پارەكێ‌ مەزن، دوورئێخستنا پشتەڤانان ژ یاریگەهان بۆ ئێك قووناع ئانكو نێزیكی نەهـ یارییان تیم بێ‌ جەماوەر بیت، ئەڤە غەدەرەكا دیرۆكییە دهێتە كرن، ددەمەكی دا پشتەڤانێن هەردو یانەیان روویەكێ‌ شارستانی و پێشكەڤتی دا خولا ستێرێن ئیراقێ‌، دەرئەنجامێ‌ وێ‌ فدراسیۆنا فوتبۆلا ئیراقێ‌ توندترین سزایێ ل هەردو یانەیان بكەن.
هەروەسان ناڤهاتی هیڤی خواست هەردو یانە بێ‌ دەنگ نەبن و گۆت: هیڤییا من ئەوە بێدەنگ نەبن و تانێ‌ ل سەر بڕیارا بدەن و هەكە نەچار ژی بن ل فدراسیۆنا جیهانێ‌ و دادگەها كاس نەڕازیبوونا خوە دیار بكەن، ئەم وەكو جەماوەر قەبوول ناكەین ئەڤ غەدرەیا هند مەزن ل مە هاتییە كرن، بدیتنا من ئەڤ سزایە وەكو بوهانەیەك بخوە دانایە دا وەرزشا كوردستانێ‌ لاواز بكەن.

عەلی حاجی:

سەرپەرشتێ یاریگەها زاخۆ یا نێڤدەولەتی بۆ رۆژنامەیا ئەڤرۆ دیار کر نووژەنکرنا یاریگەها زاخۆ یا نێڤدەولەتی دێ ب دو قوناغا دا دەرباز بیت.
زێدەتر جەمیل رەشید گۆت: پشتی ڕاکرنا چیمەنێ کەڤن یێ یاریگەها زاخۆ یا نێڤدەولەتی د نوکە دا کار ل سەر بنیاتێ وێ دهێتە کرن وەکو ئاڤرێژ و بوریێن ئاڤێ و هندەک کارێن دیتر، دووڤدا دێ دەست ب دانانا چیمەنێ هێتە کرن، کارەکێ بلەز د یاریگەهێ دا بەردەوامە و پێدڤییە ژبەر نێزیکبوونا ژڤانێ یاریێن وەرزێ نوو یێ خولا ستێرێن ئیراقێ یا فوتبۆلێ,
هەروەسان گۆت: پێدڤییە کار ل ١٠ی مەها بهێت ب دووماهی بهێت دا یانەیا زاخۆ بشێت یاریێن خوە تێدا ئەنجام بدەت، گرنگ د نوکە دا ئەم بشێن قووناغا ئێکێ ب دووماهی بینن، قووناغا دویێ دێ دناڤ یاریگەهێ خوە دا بیت وەکو ژورێن یاریزان و جهێن روینشتنا پشتەڤانان.
جەمیل رەشیدی گۆت ژی: نووژەنکرنا یاریگەها مە دێ گەلەک گرنگ بیت ژبەرکو دەمەکێ درێژ بوو ئەڤ یاریگەهە نەهاتیە نووژەنکرن و دێ شێت خزمەتا هەمی یانەیێن کوردستانی و ئیراقی کەت.

شاهۆ فەرید:

دوهی پشككێشانا وەرزێ‌ نوو یا قارەمانییا كۆپا كەنداڤی 2025-2026ێ‌ ل وەلاتێ‌ قەتەر هاتە ئەنجامدان، ئەوا هەشت یانەیێن كەنداڤی دێ‌ پشكداربن و هاتینە بەلاڤكرن ل سەر دو كۆما، یاریێن قووناغا ئێكێ‌ دێ‌ ل ناڤەڕاستا مەها بهێت دەستپێكەت
كۆما ئێكێ‌: زاخۆ، ئەلعەین یا ئیماراتی، سترە یا بەحرێنی، قادسییە یا كۆێتی.
كۆما دویێ‌: شەباب یا سعۆدیێ‌، ریان یا قەتەری، ئەلنەهزە یا عومانی، تەزامن حەزرمەوت یا یەمەنی.

بۆ زانین ل وەرزێ‌ بۆری تیما یانەیا دهۆك بۆ جارا ئێكێ‌ د دیرۆكا خوە و ئیراقێ‌ دا ناسناڤێ‌ كۆپا كەنداڤی ب دەستڤە ئینابوو، پشتی د یارییا دووماهیێ‌ و یا دویێ‌ دا ب سەركەڤتی ل سەر یانەیا ئەلقادسییە یا كۆێتی ب گۆلەكێ‌ بێ‌ بەرانبەر، د یارییا ئێكێ‌ یا چارچووڤەیێ‌ فینالێ‌ دا ل كۆێتێ‌ وەكهەڤ بوون ب گۆلەكێ‌.

قەیس وەیس:

مێركاتۆیا هاڤینێ‌ ل سەر ئاستێ‌ یانەیێن خولا ستێرێن ئیراقێ‌ یا فوتبۆلێ‌ گەهشتیە قۆناغێن پێش دووماهیێ‌ و پرانییا یانەیان دەست ب بەرهەڤییان بۆ وەرزێ‌ نوو دكەن ئەوا بڕیارە ل 13ێ‌ مەها بهێت دەستپێبكەت، هەر یانەیەك بزاڤێ‌ دكەت پێكهاتیێ‌ تیما خوە و ڕاهێنەرێن شارەزا بینە دناڤ ڕێزێن یانەیا خوە دا، دگەل نڤێسینا ڤی بابەتی پرۆسێسا ڤەگۆهاستنا یاریزانان دووماهی پێشهاتە بوون ئەوا دگوهۆڕین دەمی دا دهێنە كرن.
پشتی چاڤەڕێ‌ بوونێ‌ ب شێوەیەكێ‌ فەرمی كارگێرییا یانەیا دهۆكێ‌ گرێبەستا سێرجیۆ ڤارباس ڕاهێنەرێ‌ بەرازیلی یێ‌ 58 سالی ڕاگەهاند، ئەوێ‌ پێشتر ڕاهێنەر بوو ل یانەیێن كازمییە یا كۆێتی، ئۆم سەلال و خۆر یێن قەتەری، ئەهلی سعۆدییی و هیلال یا سودانی، وەسلا ئیماراتی، دیسان ڕاهێنەرێ‌ هەلبژارتیێ‌ لاوێن بەرازیلی ژی بوویە، هەروەسان كارگێریێ‌ خۆیاكر كو سلێمان رەمەزن دێ‌ بیتە ڕاوێژكارێ‌ هونەر یێ‌ تیمێ‌، دیسان واگنەر ئەندرادی هاریكارێ‌ ئێكێ‌، هەرژەنگ بابەكر هاریكارێ‌ دویێ‌، خالد موشیر سەرپەرشت و جاسم محەمەد حاجی ڕێڤەبەرێ‌ تیمێ‌، دیسان گرێبەستا گۆلپارێزێ‌ هەلبژارتیێ‌ ئیرانێ‌ ل بن 16 سالی دا هۆمان شێروان ڕاگەهاند ئەوێ‌ ژ یانەیا كۆهسار یا خولا ئیرانی هاتی، ژلایەكێ‌ دووڤە چوونا ستێرێ‌ دهۆكێ‌ یێ‌ بەرازیلی ماسێس ئارتین بۆ یانەیا تەلەبە هاتە ئێكلاكرن.
هەرچەندە ڕاهێنەرێ‌ لەشسڤكیێ‌ و كوڕێ‌ باژێرێ‌ دهۆكێ‌ هەرژەنگ بابەكر بوویە ڕاهێنەرێ‌ دویێ‌ یێ‌ تیما دهۆكێ‌ لێ‌ رووهنكرنە دایە د پەیچێ‌ خوە یێ‌ فەرمی دا بڤی شێوەیی: پشتی دو سال و دو مەهان كاركرن دناڤ خولا ئیراقێ‌ دا دگەل تیما ئێكێ‌ ل یانەیا دهۆك و چار ستاڤێن جودا یێن ڕاهێنەران، ل ڤێرە من دڤێت دیاركەم هەر دەستپێكەكێ‌ دووماهییەك هەیە، ژبەر ماندیبوونا دو وەرزان و كاودانان نەشێم بەردەوامبم دگەل تیمێ‌، من دڤێت سۆپاسییا كارگێرییا یانەیا دهۆكێ‌ بكەم وەكو گەنجترین ڕاهێنەر دو سالان باوەری دایە من و شیانێن خۆ د بلندترین ئاست دا تاقی بكەم و ئەنجام مە شیا تیمێ‌ بكەهینە كۆپا كەنداڤی و بووجارا ئێكێ‌ ناسناڤێ‌ دیرۆكی بینن و كۆپا ئیراقێ‌ دەستڤە بینن، هەروەسان لایەنەكی دی دا گۆت: هەمی گاڤا جەماوەرێ‌ دهۆكێ‌ جهەكێ‌ تایبەت ددلێ‌ من دا هەیە، وەكو ڕاهێنەرەكێ‌ گەنج هاتم وەكو قارەمانێ‌ كۆپا كەنداڤی و كۆپا ئیراقێ‌ دەركەتم.