قەیس وەیس:
فدراسیۆنا فوتبۆلا ئیراقێ ب فەرمی یاریێن گەڕا ئێكێ ژ وەرزێ نوو 2025-2026 یا خولا ستێرێن ئیراقێ ڕاگەهاند، ئەوا بڕیارە هەڤڕكیێن وێ ل 13ێ ڤێ مەهێ ب پشكدارییا 20 یانەیان ژ وانا چار یانەیێن كوردستانی نە، ئەوا دهێتە هژمارتن دناڤا جادا وەرزشی دا دێ وەرزەكێ ئاگرین و هەڤڕكی بیت بۆ دەستڤەئینانا ناسناڤی.
یاریێن گەڕا ئێكێ دێ بڤی شێوەیی بن.
رۆژا شەمبی 13- 9- 2025
ئەمانەت بەغدا- دیالا ، یاریگەها ئەلكەرخ ل دەمژمێر شەشێ ئێڤاری.
تەلەبە- زاخۆ، یاریگەها ئەلمەدینە ل دەمژمێر 8:30 شەڤ.
نەورۆز- كارەبا، یاریگەها نەورۆز ل دەمژمێر 8:30 شەڤ.
رۆژا ئێكشەمبی 14- 9- 2025.
نەفت میسان- مینا، یاریگەها میسان ل دەمژمێر شەشی ئێڤاری.
ئەلقاسم- نەفت، یاریگەها نەجەف، ل دەمژمێر شەشی ئێڤاری.
دهۆك- ئەلگەرمە، یاریگەها دهۆك، ل دەمژمێر 8:30 شەڤ.
یارییا زەورا دگەل شورتە هاتە پاشئێخستن بۆ دەمەكێ دی.
رۆژا دوشەمبی 15- 9- 2025.
ئەلغراف- مووسل، یاریگەها ناسریە ل دەمژمێر شەشێ ئێڤاری.
هەولێر- نەجەف، یاریگەها زاخۆ، دەمژمێر 8:30 شەڤ.
ئەلكەرخ- جەوییە، یاریگەها كەرخ، ل دەمژمێر 8:30 شەڤ.
دهۆك گەشبینە وەرزەكێ سەرفەراز ببەت
تیما یانەیا دهۆك ئەوا بۆ وەرزێ نوو نێزیكی نیڤا پێكهاتیێ خوە دگەل كادرێ راهێنەران گوهارتی گەشبینە ب شێوەیەكێ باشتر و سەركەڤتی دەست ب هەڤڕكییان بكەت، ئەلهۆیێن چیا ب سەرپەرشتییا ڕاهێنەرێ خوە یێ بەرازیلی سێرجیو ڤاراس دەست ب بەرهەڤییان كربوو دگەل كەمپەكێ ڕاهێنانێ ل باژێرێ پیرمام یا هەولێرا پایتەخت چەند یاریێن هەڤالینی ئەنجامدابوون، گەشبینە بۆ وەرزێ ئەڤ سالە وەكو یا پار ناسناڤ و دەستكەڤتان بینن، ئێكەم یارییا وێ بەرانبەر ئەلگەرمە ئەو یانەیان گرێبەستێن مەزن دگەل كۆمەكا ستێران ئیمزاكری ژ وانا هێرشبەرێ ئیراقی ئەیمەن حسێن، دیسان چار یاریزانێن هەلبژارتیێ ئوردنێ، لێ دناڤ ئەردێ خوە دایە و یانەیا دهۆك ب جەماوەرێ خوە یا پشت گەرمە.
جەنگاوەرێن دهۆكێ كینە؟
ل دووڤ دووماهی لیستا هاتییە بەلاڤكرن یاریزانێن یانەیا دهۆكی پێكهاتینە ژ هارۆن ئەحمەد، سیابەند عەگید، بەیار ئەبۆ بەكر، زانا عەلی، ئەحمەد عەلی، پاشەنگ عەبدوللا، ئەحمەد بەشار، پیتەر گۆرگیس، بلند ئازاد، پێشەكارێ كۆتیڤۆاری یانیك زاكێری، سەعەد ناتق، موستەفا نەواف، یوسف ئەلئیمام، یێ لوبنانی كەریم دەرویس، ئەحمەد وەجیه، ئاندرێ ساناتی، سەدیق جەمال، عەلی یاسین، حەسەن عیماد، مونتەزر محەمەد، هۆمان شێروان، پیشەكارێ بەرازیلی لیۆ كۆستا، یێ سینیگالی جەوهەر خادم، ژلایەكێ دووڤە یێ بەرازیلی جواو كابال دوهی هاتە دورئێخستن.
زاخۆد وەرزەكێ دیرۆكی دایە و یارییا ئێكێ ئاگرینە
ژلایێ خوەڤە تیما یانەیا زاخۆ ئەوا كەمپێ خوە یێ دەرڤە ڤەگوهاستیە توركیا ئەوێ ژی كۆمەكا باش یا یاریزانێن نوو ئیناینە دناڤ ڕێزێن تیما خوە دا و چەند یاریزان ژی دوورئێخستینە، كوڕێن خابووری ب سەرپەرشیتییا ڕاهێنەرێ قەتەری یێ نوو ویسام ڕزق دێ بەرانبەر ئاستەنگێن مەزن بن تایبەت ب هەبوونا دو قارەمانیێن ژێكجوودا، خولا ستێرێن ئیراقێ و كۆپا كەنداڤی كو دبیتە وەرزەكێ دیرۆكی بۆ زاخۆییان، ل دووڤ زانیاریان وەرزێ نوو زاخۆ دڤێن دەستكەڤتەكێ مەزن د وەرزێ ئەڤ سالە دا بینن و كارگێریێ هەر تشتەكێ پێدڤی بۆ تیما خوە تەرخانكریە.
جەنگاوەرێن زاخۆییان كینە؟
ل دووڤ دووماهی لیستەیا پێكهاتیێ تیما یانەیا زاخۆ بڤی شێوەیە، ئەمجەد عتۆان، شڤان جەمیل، حەمید حاجی، هادی سالح، سیداد حاجی، ئەحمەد ئیبراهیم، شێركۆ كەریم، ئوسامە رەشید، عەباس یاسین، حەمید عەلی، مەهدی كامل، عەلی عەبوود، هادی سالح، یێ ئوردنی یوسف ئەلئالوسی یێ یەمەنی ناسر محەمەدو، یێ بەرازیلی ئیگیتا دیبیۆتی، یێ بەرازیلی ئالییۆ ئادەم، یێ بەرازیلی جوزێڤ ماوریسیۆ، یێ غینیا محەمەد یاتارا، یێ بەرازیلی ئۆرینیۆ، گۆلپارێزان عەلی كازم، عیماد عیسا و حسێن عەدنان.
شرۆڤەكارەكێ وەرزشی بۆچوونا خوە هەبوو
پشتی دیاركرنا یاریێن گەڕا ئێكێ ژ هەڤڕكیێن خولا ستێرێن ئیراقێ رۆژنامەیا ئەڤرۆ بۆچوونا سلێمان زەكی شرۆڤەكارێ وەرزشی ل پارێزگەها دهۆكێ وەرگرت ئەوێ بڤی شێوەیی گۆت: دهێتە پێشبینیكرن وەرزێ ئەڤ سالە ب هێزتر بیت ژ یا بوری تایبەت بۆ یانەیێن كوردستانێ و ژبەر چەند ئەگەران، یا ئێكێ یانەیێن ناڤەڕاستا ئیراقێ وەكو زەورا، شورتە، تەلەبە و جەوییە بەرهەڤیێن باشتر كرینە ب ئینانا یاریزانێن خودان شیان و چوونا كەمپێن دەرڤە، هەروەسان یانەیێن وەكو ئەلگەرمە و هندەك ژ باشۆرێ ئیراقێ یاریزانێن خودان شیان و ستێر ئیناینە دناڤ ڕیزێن تیما خوە ئەڤەژی دێ هێزەكا دی دەتە هەڤڕكیان، یا دویێ ل وەرزێ بۆری یانەیا دهۆك شیابوو دو ناسناڤان بینت، لێ وەرزێ ئەڤ سالە یانەیێن بەغدایی هەموو بزاڤان دكەن هیچ یانەیەكا كوردستانی چو دەستكەڤتان نەبەت.
هەروەسان ناڤهاتی گۆت: یا سێیێ گرنگی پێدانەكا تایبەت ژلایێ دەزگەهێن ڕاگەهاندنێ تایبەت یێن دەرڤە دێ بۆ خولێ هێتە دانان و ئەڤە ژی خالەكا بەرچاڤە بۆ هەڤڕكییان، یا چارێ ل دووڤ پێزانینان چاڤدێرییەكا باشتر دێ بۆ سیستەمێ ڤارێ و بەرهنگاربوونا هەر توندوتیژەیەكێ و دانا سزایێن مەزن چو ژلایێ پشتەڤانان ڤە یان یاریزان و كادرێ تیمێ ڤە، لەوما ژی ئەز هوسا دبین وەرزێ ئەڤ سالە دێ بهێزتر بیت و هەڤڕكی بۆ خالێن یارییا شەرەكێ دی بیت.
سلێمان زەكی ئەوچەندە ژی گۆت: سەبارەت یانەیێن كوردستانی وەرزێ ئەڤ سالە بۆ وان ب سانەهی نابیت ژبەركو گوهۆڕینێن مەزن د پرانییا پێكهاتیێن تیمان دا هاتینە كرن و یارییا ئێكێ نا بیتە پیڤەر بۆ خوسارەتی یان سەركەڤتان هەر تیمەكێ، ژبەركو هاتنا یاریزانێن نوو پێدڤی ب دەمی هەیە، لێ ب گشتی بۆ یانەیێن كوردستانی بزەحمەتە تایبەت دهۆكێ ئەوا ل وەرزێ بۆری دو ناسناڤ دەستڤە ئینایین وزاخۆ ئەوا دو قارەمانی ل پێشییا وێ نە، یا گرنگ بوو مە ئەم داخوازا سەركەڤتنێ بۆ هەرچار یانەیێن مە یێن كوردستانی دخوازین.
23 یاریزان ژ 12 وەلاتێن جودا یاریێ بۆ یانەیێن كوردستانی دكەن
بۆ وەرزێ نوو یێ خولا ستێرێن ئیراقێ هەموو یانەیێن پشكدار د خولێ دا، هەر یانەیەكا پشكدار د خولێ دا مافێ ئینانا شەش یاریزانێن پیشەكار هەیە، یانەیێن كوردستانی كۆمەكا یاریزانێن پیشەكار ئیناینە د ناڤ ڕێزێن تیمێن خوە دا كو دگەهنە 21 یاریزانان ژ 12 وەلاتێن جودا و بڤی شێوەیی.
یانەیا دهۆك.
یێ كرواتی ئێڤان نێڤۆسیلیچ ل هێلا بەرەڤانیێ یاریێ دكەت، یێ لوینانی كەریم دەرویش ل هێلا هێرشبەریێ، یێ كۆتیڤۆاری یانیك زاكێری ل هێلا ناڤین، یێ بەرازیلی لیۆ كۆستا ل هێلا ناڤین یێ سینیگالی خادم رەسوول ل هێلا بەرەڤانیێ.
یانەیا زاخۆ
یانەیا زاخۆ حەفت یاریزانێن پیشەكار ئیناینە لدووڤ ڕێنمایێن فدراسیۆنا فوتبۆلا ئیراقێ مافێ هەیی ژبەركو دێ پشكداریێ د قارەمانییا كۆپا كەنداڤی دا كەت و ئەو یاریزان بڤی شێوەیی نە، یێ غینیا محەمەد یاتارا ل هێلا هێرشبەریێ یاریێ دكەت، یێ سووریا عەلائەدین دالی ل هێلا هێرشبەریێ، یێ بەرازیلی ئۆرینیۆ ل هێلا بەرەڤانیێ، یێ یەمەنی ناسر محەمەدوو ل هێلا هێرشبەریێ، یێ نێجیری ئالیۆ ئادەم ل هێلا ناڤین، یێ نێجیری ئیچیتا دیپۆتی ل هێلا هێرشبەریێ، یێ بەرازیلی جۆسێب ماوریسیۆ ل هێلا بەرەڤانیێ.
یانەیا هەولێر
یێ نێجیری مامادو دیارا ل هێلا بەرەڤانیێ، یێ نێجیری جونیۆر هاریسن ئیندۆكا ل هێلا ناڤین، یێ ئۆزپاكستانی شێرزۆد تێمیرۆڤ.
یانەیا نەورۆز
یێ فرەنسی نۆلار ئێمبیمیا ل هێلا بەرەڤانیێ، یێ سربی فلیپ مالباسیچ ل هێلا ناڤین، یێ بۆسنی كریستیان تۆیچ ل هێلا بەرەڤانیێ، یێ سربی ئۆگنیێت مرشیچ ل هێلا بەرەڤانیێ، یێ بەرازیلی كلاودیۆ مارادۆنا ل هێلا هێرشبەریێ.
نيشاندان