په‌روين سه‌لاح:

د پێنگاڤه‌كا نوو دا، كۆمپانيا سناپ ئينك خودانا سناپ چاتى راگه‌هاند كو ئێدێ ئه‌و نه‌شێن وه‌كو پێشتر خزمه‌تا گێگابايتێن بێ به‌رامبه‌ر پێش كێشى بكارئينه‌ران بكه‌ن و ئيدى ل سه‌ر وان پێدڤيه‌ يان پارێ گێگابايتا بده‌ن يان ژى ئێك ژ هه‌ردو خزمه‌تێن سناپ پلاس يان سناپ پێرميه‌م ئه‌كتيڤ بكه‌ن.
يا دياره‌ كو بكارئينانا سناپ چاتى نها سنور به‌زاندينه‌ و زێده‌تر ژ 900 مليۆن كه‌سان هه‌يڤانه‌ سناپ چاتى بكاردئينن و هژماره‌كا زۆر يا بيره‌وه‌ريان تێدا هاتينه‌ عه‌مبار كرن ژ به‌ر ڤێ چه‌ندێ ژى كۆژمه‌كێ مه‌زن يێ پاره‌يى دڤێت ل به‌ر ده‌ست بيت دا كو خوه‌ ژ ڤێ ئاريشێ رزگار كه‌ت بۆ ماوه‌كێ گه‌له‌ك كێم، چونكو دووباره‌ ئه‌و عه‌مباره‌ پڕ دبنه‌ڤه‌، ژ به‌ر وێ چه‌ندێ كۆمپانيا خودانا سناپ چاتى بڕيار دا، بێى دانا پاره‌كێ هه‌يڤانه‌، بكارئينه‌رى ب تنێ مافێ پێنج گێگابايتان يێ هه‌يى و ژ وێ و پێڤه‌تر، هندى بيرهاتنێن هه‌ين هه‌موو دێ ب ره‌نگه‌كێ هه‌يڤانه‌ هێنه‌ ديلێتكرن و ناهێنه‌ هه‌لگرتن.
يا دياره‌ ئه‌و كه‌سێن سناپ چاتى بكاردئينن، پتريا وان ئه‌ون يێن حه‌ز ژ سناپ چاتى دكه‌ن، ژ به‌ر بيره‌وه‌ريان كو ب ره‌نگه‌كێ به‌رده‌وام بيرا مرۆڤان ل بيره‌وه‌ريێن وان ب ره‌نگه‌كێ رۆژانه‌ و ب ره‌نگه‌كێ هه‌ره‌مه‌كى ژى دئينيت. ژ نها پێڤه‌ يێ خزمه‌ته‌كا سناپ چاتى ئه‌كتيڤ نه‌كه‌ت، نه‌شێت مفايى ژ هه‌موو بيره‌وه‌ريێن خوه‌ وه‌ربگريت.
بكارئينه‌ر چاوان دێ شێن مفايى ژ سناپ چاتى وه‌رگرن؟
دشيان دايه‌ ب ره‌نگه‌كێ بێ به‌رامبه‌ر مفايى ژ پێنگ گێگابايتان وه‌ربگرى وه‌كو بيرهاتن د ناڤ سناپ چاتى ته‌ دا بمينن، ب ڤێ رێ ژى دێ پێدڤى ب پلانا هه‌لگرتنا بيره‌وه‌ريان بى.
دێ چاوان شێى ڤێ چه‌ندێ كه‌يى؟
• يان دێ خزمه‌تا 100 گێگابايتان بۆ بيرهاتنان كرى.
• يان ژى دێ سناپ چات پلاس كرى (250 گێگابايت يێ ل گه‌ل)
• يان ژى دێ سناپ چات پلاتينيوم كرى (5 تێرابايت يێ ل گه‌ل)
ئێدى چاوان دێ بيرهاتنێن خوه‌ هه‌لگرم؟
-1 دێ بيرهاتنان ڤه‌كه‌يى و ل وێرێ دێ سه‌يڤ هێته‌ سه‌ر يان ژى ده‌مێ وێنه‌ يان ڤيديۆيێ دگرى دێ سه‌يڤ كه‌يى.
-2 دێ ده‌ستێ خوه‌ ل سه‌يڤ يان هه‌لگرتن ده‌يى بۆ پلانا ته‌ و هه‌لبژارتنێن كرينێ.
-3 دێ پلانێ كرى و ل دووڤ رێنومايان چى.
چاوان دێ ئيدارا پلانا بيره‌وه‌ريان كه‌م؟
دشيان دايه‌ ئيدارا 100 گێگا بايتان بۆ بيرهاتنان بكه‌يى يان ب هه‌لوه‌شينى ب تنێ د رێكخستنا بيرهاتنان دا.
هه‌كه‌ ته‌ ژناڤبر، بيره‌وه‌ريێن ته‌ ژى ژ پێنج گێگابايتا بورى بن، دێ ته‌ ده‌م هه‌بيت د ماوێ 48 ده‌مژمێران دا، دووباره‌ نوو بكه‌يى به‌رى بيرهاتنێن زێده‌ ديلێت ببن.
بۆ زانين ل ده‌مێ ته‌ نه‌ڤێت پاره‌يى به‌رامبه‌ر بيره‌وه‌رى و بيرهاتنێن سناپ چاتى بده‌يى، گه‌ڤنترين بيرهاتنێن ته‌ يێن هه‌تا دگه‌هنه‌ پێنج گێگابايتان دێ مينن و يێن دى هه‌موو دێ ديلێت بن، ل ڤى حاله‌تى يان دڤێت ئێك ژ هه‌رسێ هه‌لبژارده‌يێن ب پاره‌ كارا بكه‌ين يان ژى به‌راده‌وام ئه‌و تشتێ ئه‌م ل سناپ چاتى دگرين، ل ده‌ف خوه‌ ژى سه‌يڤ كه‌ين دا كو ل ده‌ف مه‌ بمينيت يان ژى رێيا دويێ ب هه‌لبژێريت كو گه‌له‌ك يا ب زه‌حمه‌ت؛ ئه‌و ژى بزاڤێ بكه‌ت بيرهاتنێن خوه‌ يێن ژ هه‌موو گرنگتر ب هێليت و يێن دى هه‌موويان ب ده‌ستێ خوه‌ ديلێت بكه‌ت هه‌تا قه‌باره‌ د گه‌هيته‌ د بن پێنج گێگا بايتان دا و به‌رده‌وام ژى ڤێ كريارێ بكه‌ت. ئه‌ڤه‌ ژى بۆ ڤى سه‌رده‌مى گه‌له‌ك يا ب زه‌حمه‌ته‌ ژ به‌ر كو قه‌بارێ وێنه‌ و ڤيديۆيان د نها دا گه‌له‌ك يێ مه‌زنه‌ ژ به‌ر كوالێتيا وێنه‌يى و پێشكه‌فتنا كاميره‌يێن مۆبايلا.

سندس سالح:

د بزاڤه‌كێ دا، بۆ رێکخستنا کەرتێ ترۆمبێلێن کارەبایی، وەزارەتا بازرگانیيا چینێ راگه‌هاند کو ئەو دێ ياسايێن هنارتنا ترۆمبێلێن کارەبایی بهێز كه‌ت.
ئەڤ بڕیارە دێ هەموو کۆمپانیێن ترۆمبێلان به‌رهه‌م دئينن، ناچار كه‌ت، دەستووريێن هنارتنێ وەربگرن، ئەڤە ژی ژ ١ی کانوونا دويێ ٢٠٢٦ێ دەستپێدکەت. ئەڤ پێنگاڤە هاتیە هاڤێتن د دەمەکی دا کو تێدا ترسەکا مەزن یا هەيی سەبارەت زێدەبوونا بەرهەمهێنانێ و شەڕێن بهایان د ناڤبەرا کۆمپانیێن ناڤخۆیی یێن چینی دا.
چینێ دڤێت پشکداریا خوه‌ د بازارێ جیهانی یێ ترۆمبێلێن کارەبایی دا بهێز کەت، لێ د هەمان دەم دا دڤێت رێکخستنەکا باشتر هەبیت بۆ ڤی کەرتی. ب ڤان یاسایێن نوو، وەزارەتا بازرگانییا چینێ دێ شیان هەبیت چاڤدێریەکا باشتر بکەت ل سەر بەرهەمێن دهێنە هنارتن بۆ دەرڤەی وەلاتی. ئەڤ بڕیارە هات، پشتی گەلەک کۆمپانیێن چینی ترۆمبێلێن کارەبایی ب بهایێن کێمتر فرۆتن. ئەڤە ژی بوویە ئەگەرێ شەڕەکێ مەزن یێ بهایان د ناڤبەرا وان کۆمپانیان دا.
حوکمەتا چینێ ب ڤێ چەندێ دڤێت بازارێ خوه‌ یێ ترۆمبێلێن کارەبایی ساخلەم بهێلیت، نەهێلیت شەڕێن بهایان ببنە ئەگەرێ زیانێن مەزن بۆ کۆمپانیێن ناڤخۆیی. ئەڤ دەستوورێن نوو یێن هنارتنێ دێ وان هه‌موو كۆمپانيان ب خوه‌ ڤه‌ گريت، يێن ترۆمبێلان ره‌وانه‌يى ژ ده‌رڤه‌يى وه‌لاتى دكه‌ن. د سالێن بوری دا، چین بوویە ئێک ژ مەزنترین بەرهەمهێنەرێن ترۆمبێلێن کارەبایی د جیهانێ دا، بەرهەمێن وێ دگەهنە گەلەک وەلاتێن جیهانێ.
ترۆمبێلێن کارەبایی یێن چینی د به‌رنياسن ب بهایێن خوه‌ یێن گونجای و تەکنۆلۆژیا خوه‌ یا پێشکەفتی. ئەڤە ژی بوویە ئەگەرێ هندێ کو چین بشێت پشکەکا مەزن ژ بازارێ جیهانی یێ ترۆمبێلێن کارەبایی كۆنترۆل بكه‌ت. لێ د هەمان دەم دا، ئەڤ پێشکەفتنا ب لەز بوویە ئەگەرێ هندێ گەلەک کۆمپانی دەست ب بەرهەمهێنانا ترۆمبێلێن کارەبایی ل چینێ بكه‌ن، ب ڤێ چه‌ندێ ژى بەرهەمهێنان زێدەتر بوویە ژ پێدڤیێن بازاری.
وەزارەتا بازرگانییا چینێ دڤێت ب ڤان یاسایێن نوو چاڤدێریەکا باشتر ل سەر هنارتنا ترۆمبێلێن کارەبایی بکەت و نەهێلیت بەرهەمێن بێ کوالێتى بهێنە هنارتن. هەروەسا، ئەڤ یاسایە دێ هاریکاریا چینێ کەن کو كۆنترۆلا بازارێ جیهانی یێ ترۆمبێلێن کارەبایی بکەت. ديسا دەستهەلاتا خوه‌ د ڤی بواری دا بهێزتر بکەت.
هەیڤێن بهێت دێ گەلەک د گرنگ بن بۆ کۆمپانیێن به‌رهه‌مئينه‌رێن ترۆمبێلێن کارەبایی ل چینێ، دا کو ئامادەکاریێن خوه‌ بکەن بۆ ڤان یاسایێن نوو یێن دێ دەستپێکەن ژ ١ی کانوونا دويێ ٢٠٢٦ێ.