دلدار محەمەد
1
هەمی سالان ل سێیی تەباخێ، رۆژ ناهەلێت، سپێدەیێن من دناڤ رەشی دا نقۆم دبن.
2
فریشتەیان، ژ وی زارۆکێ دو رۆژی پرسی:
– کێ تۆ کوشتی؟
– بۆچی تو کوشتی؟
بەرسڤا زارۆیی قێری بوون و بۆ جارا ئێكێ چاڤێن فریشتەیی هەڤنیاسین دگەل رۆندکان کر .
3
سێیی تەباخێ، هەڤالەکێ من گۆت :
ـ ناڤێ بێ هەلویستەکی ببێژە ؟
ـ جیهان !
4
ئەو تەباخا هند دفنا خۆ ب گەرما خۆ بلند دکر، ئێدی هەمی سالا ب تلخەیێن سەر دلێن مە ڤه شەپرزە دبیت.
5
دەهـ سال
ئەو سالانە سالێن دووراتیا هەڤژینا خۆ د هژمێریت، ئەڤە تبلێن دەستێن وی خلاس هێشتا ژ ئاگرێ دووراتییێ خلاس نەبوویی.
سەگڤان ئەحمەد
چ بخوازت ئەز دێ دمێ
ئاور وەك تیر و ڕمێ
ژ دل و جان من دڤێتن
نکارم ئەز بێژمێ
بەژن بلند بەدەوێ
ژبەر وێ نابینم خەوێ
عەشقا وێ پر دژوارە
سۆتم حەلاندم ئەوێ
د گەل وێ ئەز ڕوینشتم
ئاورێن وێ برشتم
چ دەردە کەتم تێدا
دەنگ نازکێ ئەز کوشتم
گڕنژینێن وێ گولن
چاڤ دو ستێرێن گەش هلن
ل بەر وان تیرێن دژوار
جەرگ و دل خوە ناگرن
پێلێن عەشقا وێ برم
نەشێم خوە لبەر ب گرم
ل سەر ڕێکا وێ دمەشم
ژ ڤێ ڕێ نازڤرم
هەردو تیمێن یانەیا دهۆك ل سەر ئاستێ لاوان و پشكۆژان ڕێزێن ئێكێ و دویێ ل سەر ئاستێ گشتی یێ قارەمانییا ئیراقێ یا یارییا پایسكلان ب دەستڤە ئینان پشتی ب دووماهی هاتنا قووناغا چارێ و دووماهیێ ژ قارەمانیێ ب پشكدارییان 28 یانەیێن ئیراقێ و هەرێما كوردستانێ ل سەر ئاستێ لاوان، تازەپێگەهشتیان و پشكۆژان ل سەر ڕێیا كورا مانگێشكێ ل سنۆرێ پارێَزگەها دهۆكێ هاتییە كرن.
ئەنجامێن وان بڤی شێوەیی بوون، هەرچەندە تیما لاوێن یانەیا دهۆك د قووناغا چارێ دا یا دویێ هاتبوو بۆ بەریكانەیا كت بۆ گشت یاریزانان یا 100كم ب هەشت دەمژمێر،24 خولەك و 50 چركە، لێ ل سەر ئاستێ هەرچار قووناغان لاوێن دهۆكێ شیان ریمۆنتادایی بینن و مفایی ژ خەلەتیێن هەڤڕكا خوە یانەیا حەشد بینت دیسان حەفت خولەكێن دەمژمێران زێدەتر بن ژ هەڤڕكێ خوە یێ دی سیناعە و پێشڤە بهێتە ڕێزا ئێكێ ل سەر ئاستێ گشتی و ببیتە قارەمانا وەرزێ ئەڤ سالە یا ئیراقێ.
ل سەر ئاستێ پشكۆژان بۆ گشت یانەیان ل سەر ئاستێ هەرچار قووناغان تیما دهۆكێ ل ڕێزا دویێ هات ئەوا تیما حدبا رێزا ئێكێ هاتی، لێ یاریزانێ پشكۆژ عەبدولرەحمان شڤان ئەكرەم لسەر ئاستێ تاك بوو قارەمان.
ل دۆر ڤێ دەستكەڤتێ د. عەلی تەتەر پارێزگارێ دهۆكێ پەیاما پیرۆزباهیێ بەلاڤكر و بڤی شێوەیی: ب هەلكەڤتا سەركەڤتنا لاوێن یانەیا دهۆك یا پایسكلان د قووناغا دووماهیێ ژ خولا ئیراقێ بۆ وەرزێ 2025ێ و ب دەستڤە ئینانا ناسناڤێ قارەمانیێ پیرۆزباهیێ ل هەموو وەرزشڤان، ڕاهێنەر و سەرپەرشتێن ڤێ یانەیێ و سەرجەم یاریزانان دكەین، جهێ دلخوەشیێ یە كو ئەڤ قووناغا دووماهیێ یا ئەڤێ قارەمانیێ ژی د كەشوهوایەكێ ئارام دا دناڤ سرۆشتێ كوردستانێ ل پارێزگەها دهۆكێ هاتە ئەنجامدان، هەروەسان پیرۆزباهییا لاوێ خودان شیان عەبدولرەحمان شیڤان دكەین كو شیایی ل سەر ئاستێ پشكۆژات ببیتە قارەمانێ ئیراقێ.
ل دۆر ڤێ یەكێ هوشیار فەریق ئەندامێ كارگێرییا یانەیێ و سەرپەرشتێ تیمێن پایسلڤانێن یانەیێ بۆ رۆژنامەیا ئەڤرۆ گۆت: پیرۆزباهیێ ل یانەیا خوە و هەموو یاریزانان و ڕاهێنەرێن تیمێ دكەین كو شیان ب گەهینە ئارمانجا خوە ئەوا مە دڤیایی، ئەوژی دەستڤە ئینانا ناسناڤێ ئیراقێ زێدەباری ناسناڤێ كەسۆكی یا تیما پشكۆژان، قارەمانییا ئیراقێ ل سەر چار قووناغا ل چار پارێزگەهێن جودا بۆ ماوەیێ شەش مەهان د ژڤانێن جودا دهاتنە كرن، پارێزگەها دهۆكێ قووناغا دووماهیێ و سەركەڤتی بڕێڤەبر.
هەروەسان ناڤهاتی گۆت: تیما لاوێن یانەیا دهۆك د قۆناغا ئێكێ دا ڕێزا دویێ هاتبووین ب دەمەكێ كێم ئەوا یانەیا سیناعە ڕێزا ئێكێ هاتی، د قۆناغا دویێ دا ڕێزا ئێكێ ب دەستڤە ئینا بوو ئەوا ل پارێزگەها كەربەلا هاتییە كرن، ل قووناغا سێیێ دا ڕێزا دویێ هاتبوون بتنێَ 34 چركە كێمتر بوون ژخودانا ڕێزا ئێكێ سیناعە، د قووناغا چارێ دا سەرباری ڕێزا دویێ هاتبوو لێ ڕیمونتادا ئینا و شیا پێشكەڤیت ل سەر یانەیا سیناعە ب كۆمڤەكرنا دەمی یا گشت قووناغا كو دبیتە ڤەڕێژا قارەمانیێ و دیاركرنا ڕێزبەندیێ، هەروەسان سێ یاریزانێن مە یێن لاوان، ئاڤەند هشیار فەریق، یوسڤ جیهاد و عیسان عەلی بۆ ناڤ ڕێزێن هەلبژارتیێ ئیراقێ هاتنە داخوازكرن.
عەلی حاجی :
د داخویانیەکێ دا ئەندامەکێ دەستەیا کارگێرییا یانەیا زاخۆ بۆ رۆژنامەیا ئەڤرۆ دیار کر هاتنا لژنەیەکا تایبەت بۆ یاریگەها وان بۆ هندێ بوو یاریگەهـ بهێتە بەرهەڤکرن بۆ کوپا کەنداڤی.
زێدەتر دلژار عەدنان گۆت: لژنەیەکا تایبەت کو ژ پێنچ کەسان پێکهاتبوون سەرەدانا یاریگەها مە یا نێڤدەولەتی کرن، ژ نێزیک ڤە هەمی جهێن یاریگەهێ دیتن و پاشی دێ ب ڕێیا نڤێسارەکا فەرمی کێماسیێن د ناڤ یاریگەهێ دا هێنە دیار کرن و دێ چارەسەر کەین، ب شێوەیەکێ گشتی یاریگەها مە یا بەرهەڤە و بتنێ هندەک کێماسیێن بچووک هەنە و ئەو ژی دێ هێنە نوو کرن و وێ لژنەیێ سەرەدانا هوتێلێن ل زاخۆ کر و پاشی سەرەدانا یاریگەها مە یا ڕێهێنانان ژی کر، ب شێوەیەکێ گشتی ئەم بەرهەڤی بۆ وێ قارەمانیێ دا کو ب شێوەیەکێ باش پێشوازیێ ل هەر تیمەکێ بکەین یا بهێتە ئیدارەیا سەربەخویا زاخۆ.
ناڤبری گۆت ژی: ئەردێ یاریگەها مە یێ دهێتە نووژەنکرن و ژبەریا دەستپێکرنا خولێ دێ یاریگەهـ ب دوماهی هێت و هەر دیسان دێ ل هندەک جهێن دیتر ژی یاریگەهـ هێتە نووژەنکرن ژبەر کو هندەک جهـ دناڤ یاریگەهێ دا پێدڤی ب نووژەنکرنێ هەنە.
بۆ زانین پشتی تیما یانەیا زاخۆ ل رێزا سێیێ ل سەر ئاستێ خولا ستێرێن ئیراقێ یا فوتبۆلێ هاتی ب فەرمی وەکو نوونەرا ئیراقێ دێ پشکداریێ د کۆپا کەنداڤی دا دکەت، ئەوا د بیتە جارا ئێکێ د دیرۆکا خوە دا یانەیا زاخۆ پشکداری قارەمانییەکا دەرڤە بیت.
قەیس وەیس:
یانەیێن پشكدار د خولا ستێرێن ئیراقێ یا فوتبۆلێ لڤینێن خوە زێدەكرینە و ئاستێ لێگەریانا ڕاهێنەر و یاریزانان بلندتر كرییە ب دانا ئۆفەرێن گرانبوها بۆ یاریزانێن ئیراقێ و پیشەكار، دبیت دڤێ حەفتیێ دا یانەیێن دهۆك و زاخۆ پۆستێ ڕاهێنەرێن تیمێن خوە ب ڕابگەهینن دگەل هەبوونا گرێبەستێن بەردەوام.
دهۆك نێزیكی گرێبەستێ یە دگەل مسرییەكی
یانەیا دهۆك بەردەوامە ل سەر دانۆستاندنێن خوە دگەل چەند ڕاهێنەرەك و یاریزانان، د ماوەیێ بۆری دا گرێبەستا پیشەكارێ بەرازیلی وێلینگتۆن نسیمێنتۆ یێ 30 سالی ڕاگەهاند ئەوێ ل هێلا بەرەڤانیێ یاری د خولا توركیا، قوبرس، پۆرتۆگال و بەرازیلێ دا دكر، ژلایەكێ دووڤە هاتییە بەلاڤكرن ل تۆرێن كۆمەلایەتی دا حوسام ئەلبەدری ڕاهێنەرێ مسری و یانەیا ئەهلی تەرابلس یا لیبیایێ بەربژارێ سەرەكییە بۆ پۆستێ ڕاهێنەراتییا یانەیا دهۆك پشتی خوەڤەكێشانا ڕاهێنەرێ پێشتر سلێمان ڕەمەزانی ئەوێ ژبەر كاودانێن تەندرستی، دبەرانبەردا هێرشبەرێ دهۆكێ و كوڕێ پارێزگەهێ ئیبراهیم غازی گرێبەستا یانەیا نەفت یا بەغدایی ئیمزاكر، ژلایێ خوەڤە دبیت پیشەكارێ دهۆكێ لۆكاس هێنریك دگەل یانەیێ بەردەوام نەمینیت پشتی هاتنا سەعەد ناتق بۆ تیمێ.
قەتەرییەك دێ بیتە ڕاهێنەرێ زاخۆ
ژلایێ خوەڤە یانەیا زاخۆ هاتنا ستێرێ یانەیا هەولێرێ ئوسامە رەشید بۆ ناڤ ڕێزێن تیما خوە بفەرمی ڕاگەهاند، هەروەسان زاخۆییان چاڤ ل ڕاهێنەرەكێ قەتەرییە ئەو ژی ویسام ڕزق كو دبیت دەمژمێرێن بهێت دا ڕابگەهینن، ئەڤچەندە هات پشتی بزاڤێن وان دگەل ڕاهێنەر ئەیوب ئۆدیشۆ سەرنەگرتی، هەر دبزاڤێن یانەیا زاخۆ خوە نێزیكی یاریزانێ هەلبژارتیێ ئیراقێ عەلی جاسمی كرینە و دوورنینە بهێتە دناڤ ڕێزێن وێ دا سەرباری بریكارێ وی خویاكرییە دبیت بۆ ئێك ژ یانەیێن هولەندی یا بەلجیكی بكەت
دانۆستاندن و گرێبەستێن یانەیێن دی دگەرمن
ژلایێ خوەڤە یانەیا هەولێر ب فەرمی كادرێ خوە یێ ڕاهێنانێ دەستنیشانكرن ب سەرپەرشتی باسم قاسم، پشتی دانۆستاندێن درێژ و ڕازیبوونا یانەیا هەولێرێ ل سەر هەموو خالێن وی، ب شێوەیەكێ ئەحمەد سەبری كوڕێ باژێرێ سێمێلێ و یاریزانێ پێشتر یێ یانەیا نەفت گرێبەستا یانەیا جەوییە یا بەغدایی ئیمزاكر، یاریزانێ ناڤهاتی شیابوو ببیتە گۆلكەرێ یانەیا نەفتێ ب11 گۆلان و حەفت ئەسێست هەبووینە، دیسان گرێبەستا پیشەكارێ نێجیری دانیێل جیبۆلا ئیمزاكر ئەوی ژێ یانەیا قادسییە یا كوێتی هاتی، ژلایەكێ دووڤە یانەیا ئەلگەرمە نێزیكی ئیمزاكرنا گرێبەستا عەدنان حەمەد بوویە ژبۆ وەرگرتنا ئەركێ ڕاهێنەراتییا یانەیێ و هەروەسان گرێبەستا پیشەكارێ خوە یێ بەرازیلی حێڤێرسۆن نووكر و نێزیكی گرێبەستێ نە دكەل یێ تونسی حەمدی ئەلنەفاز بووینە، د بەرانبەر دا یانەیا شورتە ژی نێزیكی گرێبەستا هێرشبەرێ سوری عومەر سومە بوویە، یانەیا ئەلگەرمە ڕاگەهاند ئەوان گرێبەستا ڕاهێنەرێ خوە ئەحمەد خەلەف بۆ وەرزەكێ دی نووكر.
بۆ زانین پرۆسێسا دانۆستاندنان دگەل یاریزان و ڕاهێنەران گوهۆڕین سەر دا دهێت، دیسان ئیمزاكرنا گرێبەستان ژی نە یا جێگرە و زێدەبوون پەیدا دبیت، لەوما ژی ئەڤ ڕاپۆرتە هەتا دگەل نڤێسینا وێ پێزانین هاتینە كومڤەكرن.
پشتی هەڤڕكییەكا درێژ دناڤبەر هەردو یانەیێن نیۆكاسل یۆنایتد و مانچستەر یۆنایتد یێن ئنگلتەرایێ ژبۆ ب دەستڤە ئینانا ستێرێ سلۆڤینی بێنجامین سیسكۆ هێرشبەری یانەیا لایپزیك یا ئەلمانی، ب فەرمی دانۆستاندنێن یانەیا مان یۆنایتد ب سەركەڤت پشتی ئۆفەرا خوە زێدەتر لێكری.
رۆژناماڤانێ بەرنیاس ل جیهانێ بۆ كارۆبارێن مێركاتۆیان ڤابریزیۆ رۆمانۆ دیار كر ب فەرمی یانەیا مانچستەر یۆنایتد گەهشتە ڕێكەڤتنێ دگەل ستێرێ ئەلمانی و یانەیا لایپزیك بێنجامین سیسكۆ ب گرێبەستەكێ هەتا دگەهیتە 2030ێ.
هەروەسان خویاركر ئەو بوو ماوەیێ زێدەتری سێ حەفتییان هەڤڕكی دناڤبەرا مان یۆنایتد و نیۆكاسل هەبوو، ل دەستپێكێ ئۆفەرا نیۆكاسل 80 ملیۆن یۆرۆ دانابوون، لێ پشتی بۆرینا حەفتییەكێ مان یۆنایتدێ ئۆفەرەك پێشكێشكر و گەهاندە 82 ملیۆن، دووڤدا نیۆكاسل ئۆفەرا خوە كرە 43 ملیۆن، لێ مانچستەر یۆناتید ڕژدبوو و ئۆفەر كرە 85 ملیۆن یۆرۆ زێدەباری پاداشتێن سەركەڤتنان، ئەڤچەندە نیۆكاسل خوەڤەكیشا و مانچستەر یۆنایتد ب سەركەڤیت.
گۆڤارا فرانس فوتبۆل یا فرەنسی ڕاگەهاند ئەڤرۆ دێ ناڤێن سێ بەربژارێن سەرەكی بۆ دەستڤە ئینانا خەلاتێ بالندۆر باشترین یاریزانێ جیهانێ یا سالا 2025ێ ئەوا بڕیارە د ئاهنگەكا فەرمی دا ل 22ێ ئەیلۆنا بهێت ل وەلاتێ فرەنسا بهێتە كرن.
ل دووڤ تۆرا Planet Football یا ئنگلتەرایێ ئەو دەهـ یاریزانێن دێ ئەڤرۆ هێنە ڤاڤارتن و بتنێ سێ دێ مینت بۆ رۆژا ئاهنگێ ئەوژی، عوسمان دیمبلی- پاریس سانجێرمان-، ڕاڤینا دیاز- بەرشەلۆنا-، ئەشرەف حەكیمی-پاریس سانجێرمان-، لامین یامال- بەرشەلۆنا-، ڤیتینیا-پاریس سانجێرمان-، محەمەد سەلاح- لیڤەرپۆل-، پێدرێ- بەرشەلۆنا-، كێلیان مپابی- ریال مەدرید، نۆنۆ میندێچ- پاریس سانجێرمان-، چیانلۆیجی دۆنارۆما- پاریس سانجێرمان-.
زێدەباری باشترین یاریزان دێ باشترین یاریزانێ گەنج باشترین گۆلپارێز، باشترین یاریزانا كچ، جوانترین گۆل، باشترین یانە، باشترین ڕاهێنەرێ كوڕ و باشترین ڕاهێنەرا كچ.
سەرۆك بارزانی ب هەلكەفتا سالڤەگەڕا 20 یا دامەزراندنا دەزگەهێ خێرخوازیێ بارزانی پەیامەك بەلاڤكر و تێدا گوت» ب هەلكەفتا سالڤەگەڕا 20 یا دامەزراندنا (دەزگەهێ خێرخوازیێ بارزانی) گەرمترین پیرۆزباهیێن خوە ل سەرۆك و رێڤەبەر و كارمەندێن دەزگەهێ خێرخوازیێ بارزانی دكەم. من رێز بۆ رۆلێ مرۆڤدۆستانە و خێرخوازانەیێ وی دەزگەهێ هەیە د هاوارچوونا ئاوارە و لێقەومییان و هاریكارییا نەخوەش و بێ سەرپەرشتان و خەلكێ هەژار و كێمدەرامەت. ئەركێ خوە ب شێوەیەكێ هەژی ئەنجامدایە و جهێ شانازیێ نە، دەستخوەشیێ و سوپاسییا وان دكەم وهیڤییا سەركەفتن و بەردەوامیێ بۆ دخوازم».
ژ ئالیێ خوەڤە نێچیرڤان بارزانی، سەرۆكێ هەرێما كوردستانێ پەیامەكا پیرۆزباهیێ ب ڤێ هەلكەفتێ بەلاڤكر و تێدا گوت» سالڤەگەڕا 20 یا دامەزراندنا دەزگەهێ خێرخوازیێ بارزانی ب گەرمی و ژ دل ل بەرپرس و رێڤەبەر و كارمەندێن وی پیرۆز دكەم، دەستخوەشیێ لێ دكەم بۆ وان هەموو ئەرك و خزمەتێن مرۆڤایەتی و خێرخوازی یێن جوامێرانە ئەوێن پێشكێش كرین، هیڤییا بەردەوامیێ و سەركەفتنێ بۆ دخوازم».
گوت ژی» كار و خزمەتا مرۆڤایەتی و خێرخوازی و ب هاوارچوونا دەزگەهێ خێرخوازیێ بارزانی د دەمێ 20 سالێن ژیێ خوەدا بۆ لێقەومییان، بەرجەستەكرنا گیانەكێ بلند یێ مرۆڤایەتی، نموونەیەكا بلند یا مرۆڤپەروەری و هاریكاریێ بوویە كو شوون تبلێن وی د دیار و بەرچاڤن و جهێ رێز و سوپاسییەكا مەزنە».
هەر ب هەمان هەلكەفت، مەسرور بارزانی، سەرۆكێ حوكمەتا هەرێما كوردستانێ پەیامەك بەلاڤكر و تێدا راگەهاند» دەزگەهێ خێرخوازیێ بارزانی خودانێ پێگەهەكێ دیارە د كارێ بەخشین و خێرخوازیێدا».
د پەیاما سەرۆكێ حوكمەتا هەرێمێ دا هاتیە ژی» ل سالڤەگەڕا 20 یا دامەزراندنا دەزگەهێ خێرخوازیێ بارزانی، گەرمترین پیرۆزباهییان ئاراستەی سەرۆك و ئەندامێن دەستەیا كارگێری و هەموو كارمەندێن دەزگەهێ خێرخوازیێ بارزانی دكەم، هیڤییا بەردەوامبوونێ و سەركەفتنێ بۆ دخوازم، هەروەسا دەستخوەشیێ لێ دكەم بۆ وەستییان و كاركرنا وان یا بەردەوام ژ پێخەمەت هاریكارییا خەلكێ هەژار و لێقەومای».
مەسرور بارزانی دیاركر ژی» دەزگەهێ خێرخوازیێ بارزانی، خودان پێگەهەكێ دیارە د كارێ بەخشین و خێرخوازیێدا و بێی هیچ جوداهی، خزمەتەكا هەژی و بەرچاڤ پێشكێشی خەلكێ هەژار و كێمدەرامەت و لێقەومای دكەت نەك تنێ ل كوردستانێ، بەلكو ل دەڤەرێن دی یێن ئیراقێ و وەلاتێن دەوروبەر و جیهانێ ژی. من رێزەكا مەزن بۆ هەموو خێرخواز و بەخشەر و هەموو ئەو ئالی و ئاژانس و رێكخراو و دەزگەهێن خێرخوازی هەیە، كو هاریكاریێ و هەماهەنگیێ ل گەل دەزگەهێ خێرخوازیێ بارزانی دكەن و كار و چالاكی و پرۆژەیێن هەڤپشك ئەنجام د دەن».
ل دووماهیێ گوت» سالڤەگەڕا دامەزراندنا دەزگەهێ خێرخوازیێ بارزانی پیرۆز بیت و هیڤیدارم هەردەم نموونەیەكا گەش یا كارێ مرۆڤایەتی و خێرخوازی بیت».
نێچیرڤان بارزانی، سەرۆكێ هەرێما كوردستانێ ب مەبەستا مالئاڤاهیێ بۆ ب دووماهی هاتنا ئەركێ وێ، پێشوازی ل كریستیانە هۆمان، بالیۆزا ئەلمانیا ل ئیراقێ كر.
د دیدارەكێدا سەرۆكێ هەرێما كوردستانێ، ئاستێ هەڤبەندیێن ئەلمانیا ل گەل ئیراقێ و هەرێما كوردستانێ بلند هەلسەنگاند وخواستا هەرێما كوردستانێ بۆ پێشڤەبرنا هەڤبەندییان و بەرفرەهكرنا هاریكارییا هەڤپشك د هەموو واراندا ل گەل ئەلمانیا، دوپاتكر.
نێچیرڤان بارزانی هەروەسا رێز و سوپاسی پێشكێشی بالیۆزا ئەلمانیا كر ژ بۆ ئەرك و بزاڤێن وی ژ پێخەمەت زێدەتر ب هێزكرنا هەڤبەندیێن وەلاتێ وێ ل گەل ئیراقێ و هەرێما كوردستانێ و هیڤییا سەركەفتنێ د ئەركێ وێ یێ نوو دا بۆ خواست.
ژ ئالیێ خوەڤە هۆمان سەرەرای نیشادانا خوەشحالیێ بۆ وی دەمێ ئەركێ وێ ل ئیراقێ، سوپاسییا خوە بۆ پشتەڤانییا ئالیێن پەیوەندیدارێن هەرێما كوردستانێ د سەرئێخستنا ئەركێ وێ دا دیاركر، هەروەسا دوپاتكر كو وەلاتێ وێ ب گرنگیڤە دنێریتە هەڤبەندیێن خوە ل گەل ئیراقێ و هەرێما كوردستانێ وخوازیارە د هەموو كەرت و واراندا، زێدەتر بهێنە پێشڤەبرن.
هەڤبەندیێن هەولێر – بەغدا، رەوشا ئیراقێ و هەرێما كوردستانێ و پێشهاتێن سووریێ و دەڤەرێ ب گشتی، تەوەرەكێ دی یێ دیدارێ بوو كو قۆنسلێ گشتیێ ئەلمانیا ل هەرێما كوردستانێ بەرهەڤ ببوو.
نيشاندان