شاهۆ فەرید:

ل سەر پیڤەریێ پەروەردیێ سالانە بۆ پەیمانگەهێن حكومی و نەحكومی هەلسەنگاندنا ئاستی دهێتەكرن، ئەڤ سالە پەیمانگەها بەهدینان شیا پلەیا ئێكێ دەستڤەبینیت و رێژەیا 88% ژلایێ لیژنەیا پەرپێدانێ هاتیەدان، ئەڤ پەیمانگەهە ئێكە ژ 14 پەیمانگەهێن سەر سازیا شەهید كۆ مەزنترین سازیا پەروەردێ و خواندنا بلندە ل سەرانسەری هەرێما كوردستانێ.

نیهاد حەمید بەرپرسێ بەشێ كاروبارێن قوتابیان بۆ رۆژناما ئەڤرۆ گۆت: پشتی هاتنا لیژنەیا هەلسەنگاندنێ بۆ پەیمانگەها مە و دیتنا كوالێتیا خواندنێ پەیمانگەهێ‌ و باوەرنامەیێن ماموستایان و ئاڤاهی و رێژەیا كەسكاتی و ئەو ژینگەها قوتابی تێدا هاتیە خەملاندن، ژ هەموو لایان ڤە د ئاستێن باش دابووین و ل دووڤ ستانداردێن پەیمانگەهێ ب گشتی هاتینە هەسەنگاندن كرن، ئەو پێنگاڤ و زەحمەتا مە بڕی دەستكەفتەكێ باش مە دەستڤەئینا و بووینە ئێكەمێن پارێزگەها دهۆكێ.
زێدەتر گۆت: ئەڤە ژی بۆ ماموستا و قوتابیێن مە ڤەدگەرییت كۆ لێكتێگەهشتن دناڤبەرا وان دا هەرە باشە، قوتابیێ مە نە ب تنێ دناڤا هولێ دا وانەیان وەردگرن، بەلكۆ دناڤا تاقیگەهان و سەرەدانان بۆ جهێن گرێدایی پشكێن وانا كۆ پتر نێزیكی خواندنا خوەبن و پتر فێریی كاری بكەین، سالانە چەندین چالاكیێن جۆرا و جۆر بۆ قوتابیان رێكدئێخین ژ سمینار و پەنال و پێشبیركیا و گەشتەیان دا مێشكێ وی ب تنێ خواندنێ ڤە گرێدایی نەبیت، سال بۆ سال رێژەیا پەیمانگەها یا بەرەڤ زێدەبوونێ یە یا ب زەحمەت بوو هەتا گەهشتینە ئەڤی ئاستی ئەڤە ژی بۆ كارگێریا پەیمانگەهی و قوتابیان ڤەدگەریت.
ماموستا ئالینێ گۆت: پەیمانگەها مە ژ چوار بەشان پێكهاتیە ئەو ژی ژمێریاریی و كارگێریی و كۆمپیوتەر و نەفت و گاز، كورسێن خواندنێ دناڤا پەیمانگەها د سنورداركرینە، ئەم گەلەك كار ل سەر وێ خالێ دكەین، قوتابی پتر فێریی كاری بكەین، ئەگەر هات دەرچوو ژی دەرفەتا كاری بۆ بهێت یێ ئامادەبیت بۆ وی كاریی ئەوێ ب بەشێ ویڤە گرێدایی تێدا كاربكەت، دناڤا پەیمانگەهی دا ئەم هەولدەین دەروونێ قوتابیان ئارام بكەین، چارەسەرا دەروونی و هەروەسا هاریكارێ نوژداری مە دناڤا پەیمانگەهێ دا هەیە، بۆ سالا نوو یا خواندنی مە دەواما نیڤرۆیان ژی ڤەكریە بۆ وان كەسێن نەشێن سپێدێ و ئێڤاران بەردەوامیێ بدەنە خواندنا خوە.

هه‌رهین محه‌مه‌د:

جێگر و وه‌رگێڕێ‌ كومه‌لا کەڕ و لالێن كوردستانێ‌ ل دهۆكێ، د دیدارەکێ دا بۆ رۆژنامەیا ئەڤرۆ دیار کر، نوکە كه‌سانێن ئاسایی بشێوەیەکێ باشتر تێكه‌لیێ و سەرەدەریێ ل گه‌ل كه‌سانێن کەڕ و لال دکەن و گۆت؛ هه‌تا راده‌كی هەڤژینی ژی دناڤبه‌را واندا دهێته‌ كرن.

ئاری قادر حامد جێگر و وه‌رگێڕێ‌ كومه‌لا کەڕ و لالێن دهۆکێ، دیار کر کو به‌ری 10 سالان جڤاكی گه‌له‌ك بچاڤه‌كێ‌ كێم سەح دکرە کەڕ و لالان هەکە ئەو چووبا سه‌ر جاددێ‌ و ته‌كسیه‌ك گرتبا و ب حه‌ره‌كا ئاخفتبا ره‌نگه‌ شوفێری پێكربا كه‌نی و ئەڤە بۆ وان یا نه‌خوش بوو، به‌لێ‌ نوكه‌ ئەڤە نه‌مایه‌.
ئاری گۆت؛ کەڕ و لال هەست ب کێماسیێ دکەن دەمێ دبینن کەسەک دکەتە کەنی یان دوو کەس دگەل ئێکودو دئاخڤن و سەحدکەنێ، ژبەرکو هزر دکەن یێ بەحسێ وی دکەن، ئەڤجا پێدییە پتر ڕێز ل هەستێن کەڕ و لالان بهێتە گرتن.
جێگرێ‌ كومه‌لا کەڕ و لالان د بەردەوامیا ئاخفتنێن خۆدا گۆت؛ ئاریشا كه‌ڕ و لالا خواندنه‌ و دشێن هه‌تا پولا نه‌هێ‌ بخوینن و بدووماهی دهێت، لەورا ئه‌م داخواز دكه‌ین خواندنا وان هه‌تا پولا نه‌هێ‌ بتنێ نەبیت، بەلکو قوناغا ئاماده‌یی هه‌بیت، دیسا په‌یمانگه‌هێن پشه‌یی زێده‌ ببن.
ئاری دیار کر ژی کو په‌یمانگه‌ها هیوا ل دهۆكێ هه‌یه‌ و هنده‌ك كارێن پیشه‌یی نیشا دده‌ن، به‌لێ‌ تشتێن سه‌ره‌تایی نه‌ و چ شاره‌زایی لدەف پەیدا نابن و گۆت؛ مه‌ دڤێت په‌یمانگه‌هێن مه‌زن بهێنه‌ ڤه‌كرن و زێده‌تر كارێن پیشه‌یی بكه‌ن، مه‌ کەڕ و لال هه‌نه‌ هاریكارێن نوشدارانه‌ و ده‌ست و پیان چێدكه‌ن بۆ خودان پێدڤیێن تایبه‌ت.
سەبارەت ئاریشەیێن کەڕ و لالان، جێگرێ‌ كومه‌لێ دیار کر کو ده‌لیڤێن كاری بۆ کەڕ و لالان گه‌له‌ك د كێمن و یا ب زەحمەتە هەکە هه‌بن ژی بۆ ماوه‌یەكی نه‌، ژبەرکو خودانێ‌ كاری دبێژیت ئه‌م د ئێكودو ناگه‌هین و گۆت؛ هەروەسا نه‌بوونا وه‌رگێرا ل پارێزگه‌ها دهۆكێ‌، نها بتنێ‌ ئه‌ز وه‌رگێرم، ره‌نگه‌ هه‌بن به‌لێ‌ خوه‌ ناده‌نه‌ كاری و هه‌ر فه‌رمانگه‌هه‌كا حوكمه‌تێ‌ پێدڤی بیت ئه‌ز بتنێ‌ مه، لەورا پێدڤییه‌ فه‌رمانگه‌هێن میری وه‌رگێر بو کەڕ و لالان هه‌بن.
وه‌رگێرێ‌ کەڕ و لالێن دهۆكێ‌ گۆتژی؛ ل ئیراقێ‌ كه‌سانێن کەڕ و لال مولەتا شوفێریێ وەردگرن وه‌ردگرن و ل كوردستانێ‌ مولەت ب وان ناهێته‌دان، لەورا داخواز دكه‌ین ل کوردستانێ ژی مولەتا شوفێریێ بده‌نه‌ کەڕ و لالان.

بێوار حەمدی:

دەرونناسەکی بۆ ڕۆژنامەیا ئەڤرۆ دیار کر کو د ژیانێ دا هەموو تشت وەسا چێنابن وەکو مە دڤێت، ئەڤجا پێدڤیە ئەم د ڕازی بین و گۆت؛ دڤێت مە پەیوەندیێن ساخلەم و گەشبین هەبن داکو مە کەسایەتیەکا گەشبین ژی هەبیت.

دەروونناس ڕەشاد بەشار، دیار کر کو هەموو مرۆڤ ب شێوەیەکێ ئاسایی تووشی نەخۆشی و گرفتان دبن، لێ یا گرنگ ئەوە مە شیانێن خۆ گونجاندنێ دگەل کاودانان هەبن و گۆت؛ ئەو کەسێ حەز دکەت خۆدان دەروونەکێ ئارام و ساخلەم بیت دڤێت وی شیانێن خۆ گونجاندنێ و بزاڤێن گۆهوڕینێ هەبن.
ڕەشاد د بەردەوامیا ئاخفتنێن خودا دیار کر کو د نوکەدا نەبوونا پارزینکەکێ تژی پێزانین بوویە ئەگەر ئەم هەر د پاشڤەمایی بین و کارتێکرنێن مەزن ل دەروونێ مە ببن و گۆت؛ ب تایبەت ل ڤی سەردەمی ئاریشەیێن جڤاکی و بارێ ئابوری کارتێکرنێن نەرێنی ل دەروونێ مە کرینە، دیسان دیتنا دیمەنێن ناخهەژین و نەخۆش دناڤا سوشیال مەدیایێ دا پتر ڕێک بۆ نەخۆشی و تێکچۆنێن دەروونی خۆشکریە.
دەرونناسی ئەو چەندە ژی دیار کر، ئەڤجا داکو مە دەرونەکێ ئارام هەبیت دڤێت ژیانێ ب خۆشی و نەخۆشیێن وێڤە قەبیل بکەین، چونکی هەردەم هەموو تشت وەسا چێنابن وەکو مە دڤێت و گۆت؛ بەلکو دڤێت پارزینکێ خۆ یێ پێزانینان تژی بکەین و ژلایێ دەروونیڤە بزاڤێ بکەین مە پەیوەندیێن ساخلەم و گەشبین هەبن داکو مە کەسایەتیەکا گەشبین ژی هەبیت.