هەولێر، قائید میرۆ

شارەزایەكێ وزێ راگەهاند، پڕۆژێ رۆناكی ئەگەر وەكی خۆ بهێتە ئەنجامدان، دێ كاریگەریێن زۆر هەبن و ئاریشا كارەبێ ب ئێكجارێ دێ چارەسەر بیت و دبێژیت: پێدڤیە پشكدارێن مەزن ژی ڤەگریت و هەموو بهێتە كۆنتڕۆلكرن.

حەمە ئەمین هەورامانی، شارەزایێ وزێ بۆ رۆژناما ئەڤرۆ دیار كر «پرۆژێ رۆناكی ئەگەر وەكی خۆ بهێتە ئەنجامدان و ب شێوەیەكێ رێكوپێك كار تێدا بهێتەكرن، دێ ئاریشا كارەبێ ب ئێكجاری چارەسەركەت، ب تایبەتی هەموو پشكدارێن كارەبێ ڤەگریت، چونكە پشكدارێن كارەبێ ب تنێ وەلاتی و مال نینن، پشكدارێن مەزن ژی هەنە، وەكی كارگە و فەرمانگەهێن میری، بۆ نموونە فەرمانگەهێن حوكمەتێ ب شێوەیەكێ رەها كارەبێ بكار دئینن و كریا كارەبێ ژی ب رێیا چەكا ددەنـ ئەڤێ چەندێ ژی كاریگەری كریە سەر تۆرێن كارەبێ.
زێدەتر گۆت: ئەم یێ ل دەستپێكا وەرزێ هاڤینێ و پێدڤیە پشكدارێن مەزن یێن كارەبێ بهێنە كۆنتڕۆلكرن و پیڤەرێ زیرەك بۆ بهێتە دانان و وەكی مالێن وەلاتیان پێگیریێ بكەن، ئەڤە ژی دێ بیتە ئەگەرێ دابینكرنا كارەبەكا باش بۆ وەلاتیان د وەرزێ هاڤینێ دا، ژلایەكێ دیڤە پڕۆژێ رۆناكی دێ وەلاتیان فێركەت زێدەگاڤیێ نەكەت ل ب هەدەردانا كارەبێ، ژ بەر كو بكارئینانا كارەبەكا زۆر ژبلی بەرهەمی ژلایێ دارایی ڤە بارگرانی بۆ حوكمەتێ پەیداكریە و بەردەوام بگۆڕ دهێنە سۆتن.
ئەڤی شارەزایێ وزێ گۆت ژی» پێدڤیە پشكدارێن كارەبێ بهێنە كۆنتڕۆلكرن، نوكە ئیراق ژی مژوولی پلانەكێ یە بۆ كۆنتڕۆلكرنا كارەبێ، هەر چەندە بەری نوكە ژی بزاڤێن زۆر ل هەرێما كوردستانێ هەبوون بۆ كۆنتڕۆلكرنا پشكدارێن كارەبێ، بەلێ بەردەوام نەبوون، ئەز پێشبینی دكەم رەوشا كارەبێ بەرەف باشتر بچیت ب مەرجەكی حوكمەت پلانا خۆ ئەنجامبدەت وەكی هاتیە راگەهاندن.
حەمە ئەمین هەورامانی ئاماژە كر «پڕۆژێ رۆناكی چەندین مفا هەنە بۆ خەلكی ژ وان ژی، پشتی پڕۆژە دهێتە ئەنجامدان و دكەڤیتە كاری وەلاتی پێدڤی ب كارەبا موەلیدێ نابیت و ژلایێ ئابوری ڤە دێ مفاداربن، ئەم وەكی ئەندازیار و شارەزایێن كەرتێ كارەبێ ل سەرانسەری هەرێما كوردستانێ دگەل ئەنجامدانا پڕۆژێ رۆناكی نە، ئەڤێن دژی پڕۆژێ رۆناكی ژی زێدەتر مەرەمێن سیاسی هەنە و مە دیت دەمێ دانانا كامیرێن لەزاتیێ دخواست ئاستەنگان چێكەن، بەلێ ل دووماهیێ دەركەت دانانا كامیرەیێن لەزاتیا تڕۆمبێلا مفایەكێ زۆر هەبوو و كاریگەری هەبوو لسەر كێم كرنا روودانێن هاتن و چوونی.

دلۆڤان ئاكرەیی

سەرۆكێ باژێرڤانیا زاویتە دیار كر: ٩٠٪ تەڤایا جادەیێن ناڤا زاویتە هاتینە قێركرن و ب چێكرنا چەند ئوڤەرپاسان ل سەر جادەیا دهۆك بۆ زاویتە دێ قەلەبالغییا زاویتە بۆ دهۆك هێتە كێمكرن، كۆمەلگەهەكا گەشتیاری و بازارەكێ هەڤچەرخ دێ ل زاویتە هێنە چێكرن.

نەوزاد عەبدوللا سەرۆكێ باژێرڤانیا زاویتە بۆ رۆژنامەیا ئەڤرۆ گۆت: باژێرڤانیا زاویتە ئێك ژ باژێرڤانییێن دهۆكێیە، ل پلەیا چوارێ دایە و نێزیكی ١٠ هزار وەلاتی ل زاویتە دژین، باژێرڤانییا وێ ب باژێرڤانییا گۆزاری یا بەرنیاسە، زاویتە پێك دهێت ژ زاویتەیا سەری و ژوری كۆ ب زاویتەیا گۆند بەرنیاسە و تاخێ نوو كۆ ب گەرەكا شەهیدان هاتیە ناڤكرن و سنۆرێ وێ ل دوریانا بابلو بۆ گەلیێ زاویتەیە و بریارە ژی هەر دو گۆندێن بابلو و بادێ ژی بكەڤنە دناڤ سنۆرێ باژێرڤانیا زاویتە دا و ب ڤێ‌ بڕیارێ‌ دێ سنۆرێ وێ هێش بەرفرەهتر بیت و زاویتە ب دووریا ١٦ كیلومەتران ل سەنتەرێ باژێرێ دهۆكێ دوورە.
ل دۆر پرۆژەیێن خزمەتگۆزاری ل سنۆرێ باژێرڤانییا زاویتە ئاشكرا كر: ل سالێن بوری ب كۆژمێ ٧٠٠ ملیون دیناران چەندێن پرۆژە هاتینە جێبەجێكرن كۆ ژمارەیەكا زۆر ل وان د سێكتەرێ رێ و جادەیان بووینە، ب ئاوایەكی دناڤا سەنتەرێ زاویتە دا ب رێژا ٩٠٪ تەڤایا رێ و جادە هاتینە قێركرن و كونكریتكرن، هندەك پرۆژەیێن دی ب رێكا فروتنا پارچە زەڤییێن روكن و نایاب جێبجێدكەن، زاویتە ژبەر سروشتێ خۆ یێ توپوگرافی سولین تێدا دكێمن، لەوما وان د پلانا خۆ داخوازا سولینەكا مەزن بۆ رووبارێ گۆندێ زاویتە و چێكرنا پارك و باخچەیان دناڤا سەنتەرێ باژێری دا كریە، ئەو پشتبەستنێ ب ئاڤا بیران دبەستن و ژ بەر كێمییا ئاڤێ ژی كێمتر ئاڤێ د مەزێخێن و كاری ژی بۆ رێكخستنا ناڤا بازاری دكەن.
زێدەتر گۆت: د پلانا واندا هەیە رێیا گورستانا زاویتە بهێتە قێركرن و و دەست ب چێكرنا جادەیا ناڤا سەنتەرێ باژێری كۆ بۆ گەرەكا شەهیدان دچیت ب خەملاندنا ٢٤٠ ملیون دیناران جادە بهێتە چێكرن كۆ د خزمەتا زێدەتر ل ٤٠٠ مالاندا بیت.
زێدەتر گۆت : ژبەر تێك نەچوونا سەر و سیمایێ گەشتیاری رەزەمەندی ب كۆژاندنا زەڤییان نەهاتیە دان بۆ مەبەستا دابەشكرنا پارچە زەڤییان ب سەر فەرمانبەران، بریارە ژی بازارەكێ هەڤچەرخ یێ گۆزاری و كۆمەلگەهەكا گەشتیاری ل زاویتە بهێتە دروستكرن و ل سەر جادەیا بێسرێ هەتا زاویتە ژی چەندین ئوڤەر پاس ل بێسرێ و ئیمینكێ و بەرێ بوهار و ل زاویتە بهێنە دروستكرن و هەر دو لایێن جادەیا سەرەكی ژی ل سێ لاینان بۆ چوار لایەنان بهێنە بەرفرەهكرن و زێدەباری هندێ‌ دێ ل گەلیێ زاویتە بۆ تونێلا گەلیی زاویتە ب رێكا رێڤەبەرییا رێك و پران پرۆژەیەك ب كۆژمێ ٤٣ ملیار دیناران هێتە چێكرن كۆ ب تەمام بوونا وان دێ چارەسەرییا قەلەبالغییا هاتنووچوونێ ل زاویتە بۆ دهۆك هێتە كرن.