دوهی ئێكشەمبی 16/2/2025، شاندێ دەم پارتی بۆ ئیمرالی ب سەرۆكایەتییا پەروین بولدان و سری سورەییا، گەهشتە بارەگەهێ بارزانی و ل دۆر پڕۆسەیا نوو یا ئاشتیێ ل توركیا و باكوورێ كوردستانێ، ل گەل سەرۆك بارزانی كۆمبوو.
ب گۆڕەی بەیاننامەیەكا بارەگەهێ بارزانی» د دیدارەكێدا، شاندێ ئیمرالی بیر و بۆچوونێن خوە ل دۆر رەوشا سیاسی و پڕۆسەیا ئاشتیێ ل توركیا و ئەنجامێن دیدارێن خوە ل گەل عەبدوللا ئۆجەلانی بۆ سەرۆك بارزانی بەرچاڤكر».
د بەیاننامەیا بارەگەهێ بارزانی دا ئاماژە ب وێ چەندێ ژی هاتیە كرن» شاندێ ئیمرالی د وێ دیدارێدا ناڤەرۆكا پەیاما عەبدوللا ئۆجەلانی ژی گەهاندە سەرۆك بارزانی».
بارەگەهێ بارزانی ئەوژی بەرچاڤكر» هەر د وێ دیدارێدا، سەرۆك بارزانی سەرەرای ب خێرهاتنا شاندێ مێهڤان، دوپاتی ل گرنگییا پڕۆسەیا ئاشتیێ وەكو تاكە رێكا دروست بۆ گەهشتنێ ب چارەسەریێ كر و ب پێدڤی ژی زانی كو هەموو ئالی بزاڤێن خوە زێدەتر بكەن تاكو پڕۆسەیا ئاشتیێ بگەهیتە ئەنجام».
د بەیاننامەیا بارەگەهێ بارزانی هاتیە ژی» سەرۆك بارزانی بەرهەڤییا خوە یا تمام بۆ هاریكاری و پشتەڤانییا پڕۆسەیا ئاشتیێ ل توركیا راگەهاند».
ژ ئالییەكێ دیڤە دەم پارتی ل دۆر كۆمبوونا شاندێ خوە ل گەل سەرۆك بارزانی، د بەیاننامەیەكێدا بەلاڤكر» كۆمبوونا پیرمام، د چارچۆڤەیێ دیدارێن شاندێ دەم پارتی دا بوو ل گەل عەبدوللا ئۆجەلانێ، رێبەرێ زیندانكریێ پارتییا كاركەرێن كوردستانێ (PKK)».
دەم پارتی ئەوژی بەرچاڤكر» شاندێ دەم پارتی، سەرۆك مەسعود بارزانی ل دۆر پڕۆسەیا نوو یا ئاشتیێ ل توركیا و باكوورێ كوردستانێ ئاگەهداركر و مە بۆچوون و پێشنیازێن سەرۆك بارزانی ل دۆر پڕۆسەیێ ب گرنگ وەرگرتن» .
چاڤەڕێ دهێتە كرن پشتی زڤرینا وی بۆ باكوورێ كوردستانێ، شاندێ دەم پارتی كو دو جاران ل گەل عەبدوللا ئۆجەلان، رێبەرێ زێندانكریێ پارتییا كاركەرێن كوردستانێ (PKK) كۆمبوویە، بۆ جارا سیێ ژی ل دۆر پڕۆسەیا نوو یا ئاشتیێ ل توركیا و باكوورێ كوردستانێ، ل گەل ئۆجەلانی كۆمببیت.

سەرۆكێ هەرێما كوردستانێ هیڤی خواست ل نێزیك عەبدوللا ئۆجەلان دەستپێشخەرییا ئاشتیێ بكەت و PKK ژی ل دووڤ وێ دەستپێشخەریێ بچیت.
دوهی ئێكشەمبی 16/2/2025، نێچیرڤان بارزانی، سەرۆكێ هەرێما كوردستانێ د كۆنفرانسەكێ رۆژنامەڤانیدا، باسێ پشكداریێ د كۆنفرانسێ ئاسایشێ ل میۆنشن، پێكئینانا كابینەیا دەهێ یا حوكمەتا هەرێما كوردستانێ، سەرەدانا شاندێ ئیمرالی بۆ هەولێرێ و چەندین پرسێن دی كر.
سەرۆكێ هەرێما كوردستانێ ل دۆر پشكداریێ د كۆنفرانسێ ئاسایشێ دا ل میۆنشن، راگەهاند» كۆنفرانس دەلیڤەیەك بوو كو ژ نێزیك دوماهی پێشهاتێن ئەمنی یێن جیهانێ و دەڤەرێ ل گەل سەركردە و بەرپرسێن وەلاتان گەنگەشە بكەین».
نێچیرڤان بارزانی ئەوژی بەرچاڤكر» ب خوەشحالیڤە ل دو رۆژێن بۆری، مە چەندین دیدارێن گەلەك گرنگ و بەرهەمدار ل گەل سەركردە و بەرپرسێن بلند یێن وەلاتان هەبوون و مە هەلوەست و بۆچوونێن هەرێما كوردستانێ ل دۆر پێشهاتێن ئەمنی بەرچاڤكرن و مە بۆچوونێن یێن وەلاتان ژی ل دۆر وێ چەندێ وەرگرتن» .
نێچیرڤان بارزانی، كو هەڤدەم جێگرێ سەرۆكێ پارتی دیموكراتی كوردستان ژی یە، باس ل وێ چەندێ كر» هەردو شاندێن پارتی و ئێكەتی یێن د دانوستاندنێن جدی دا بۆ پێكئینانا كابینەیا دەهێ یا حوكمەتا هەرێما كوردستانێ و هەتا نوكە چەندین دیدار د ناڤبەرا هەردو ئالییاندا یێن هاتینە كرن».
پتر گۆت» دیدارێن پێشتر یێن هەردو شاندێن پارتی و ئێكەتیێ، ل دۆر وێ چەندێ بوون، چاوان پێكڤە كار بكەین؟ هەكە ئەم هەردو د هەڤپشكین د حوكمەتێدا رامانا وێ هەڤپشكیێ چیە؟ ئەڤە، ئەو بابەت بوون كو جهێ گرنگیێ بوون ل دەف هەردو ئالییان و پێشڤەچوونا باش ب خوەڤە دیتییە».
نێچیرڤان بارزانی ئاماژە ب وێ چەندێ ژی كر» هیڤیدارین د دەمەكێ نێزیكدا وان دانوستاندنان تمام بكەین، تاكو ل قۆناغا داهاتی، باس ل چاوانییا بەلاڤكرنا پۆستێن حكومی د ناڤبەرا پارتی و ئێكەتیێ ، پێكهاتە و ئالیێن دی دا بهێتە كرن».
دوهی ئێكشەمبی 16/2/2025، شاندەكێ دەم پارتی بۆ ئیمرالی، ب سەرۆكایەتییا پەروین بولدان و سری سورەییا ئۆندەر، گەهشتبوونە بارەگەهێ بارزانی و ل دۆر پڕۆسەیا نوو یا ئاشتیێ ل توركیا و باكوورێ كوردستانێ، ل گەل سەرۆك بارزانی كۆمبوو.
سەرۆكێ هەرێما كوردستانێ ل دۆر سەرەدانا وی شاندێ بۆ هەرێمێ راگەهاند كو ل رۆژا دوشەمبی 17/2/2025 دێ ل گەل شاندێ دەم پارتی كۆمبیت و دێ گەنگەشێ سەبارەت دیدارێن وی شاندی ل گەل ئۆجەلانی و پڕۆسەیا نوو یا ئاشتیێ ل توركیا و باكوورێ كوردستانێ كەن.
ل دۆر دەستپێشخەرییا چاڤەڕێكرییا ئۆجەلانی، نێچیرڤان بارزانی هیڤی خواست» گوه ل دەستپێخەرییەكا ئاشتیێ ژ ئالیێ عەبدوللا ئۆجەلانی ببین، هیڤیدارین PKK ژی هەلوەست هەبیت و پێشوازیێ ل پەیاما ئۆجەلانی بكەت».
ل رۆژا شەمبیێ 15/2/2025، ل درێژییا بەرنامەیێ خوە ل كرنفرانسێ ئاساشێ ل میۆنشن، نێچیرڤان بارزانی، سەرۆكێ هەرێما كوردستانێ، ل گەل ماركۆ رۆبیۆ، وەزیرێ دەرڤەیێ ئەمریكا كۆمببوو.
سەرۆكێ هەرێما كوردستانێ ل دۆر دیدارا خوە ل گەل وەزیرێ دەرڤەیێ ئەمریكا، گۆت» ماركۆ رۆبیۆ، وەزیرێ دەرڤەیێ ئەمریكا گەلەك ژ مێژ نینە دەست بكاربووی. د كۆمبوونێدا مە باس ل پرسێن هەڤپشكێن د ناڤبەرا ئیراقێ و ئەمریكا دا كر و مە دوپاتی ل وێ چەندێ كر، ئیراقێ و هەرێما كوردستانێ دخوازن ببنە فاكتەرێ سەقامگیریێ ل دەڤەرێ و رۆلی بگێرن تاكو گرژی و ئالۆزی زێدە نەبن».
نێچیرڤان بارزانی باس ل وێ چەندێ كر» من وەزیرێ دەرڤەیێ ئەمریكا بۆ رێوڕەسمێ ڤەكرنا ئاڤاهیێ نوو یێ قۆنسولخانەیا گشتییا ئەمریكا ل هەولێرێ ڤەخواند، وی ژی خوەشحالییا خوە ب پشكداریكرنێ د رێوڕەسمیدا نیشاندا».

سكرتێرێ گشتیێ ناتۆی بۆ نێچیرڤان بارزانی: هەڤپشكی ل گەل هەرێما كوردستانێ بۆ بەرهنگاربوونا گەفێن تیرۆرستان ل دەڤەرێ، یا گرنگە
ل چارچۆڤەیێ پشكداریێ دكۆنفرانسێ ئاسایشا میۆنشن ل ئەلمانیا، نێچیرڤان بارزانی، سەرۆكێ هەرێما كوردستانێ، ل گەل مارك رۆتە، سكرتێرێ گشتیێ پەیمانا باكوورێ ئاتلەنتیك (ناتۆ) كۆمبوو.
د دیدارەكێدا پێشهاتێن ئەمنی ل ئیراقێ و دەڤەرێ و گرنگییا ب هێزكرنا پەیوەندی و هاریكارییا ناتۆی ل گەل ئیراقێ و هەرێما كوردستانێ، ب تایبەتی د وارێ بەرهنگاربوونا تیرۆرێ و راهێنانا هێزێن ئەمنی، هاتنە گەنگەشەكرن.
سەرۆكێ هەرێما كوردستانێ سوپاسییا هەرێما كوردستانێ بۆ پشتەڤانییا ناتۆی د وارێ ب هێزكرنا شیانێن بەرگرییا هێزێن پێشمەرگەی دیاركر و دوپاتی ل سەر گرنگییا بەردەوامییا ڤێ پشتەڤانیێ ژ پێخەمەت پاراستنا سەقامگیریێ و ئاسایشێ ل دەڤەرێ، كر.
ژ ئالیێ خوەڤە مارك رۆتە، پێگیرییا ناتۆی ب بەردەوامییا پشتەڤانییا ئیراقێ و هەرێما كوردستانێ دوپاتكر، هەروەسا ئاماژە ب گرنگییا هەڤپشكیێ ل گەل هەرێما كوردستانێدا كر بۆ دەستەبەركرنا ئاسایشێ و سەقامگیرییا ئیراقێ و بەرهنگاربوونا گەفێن تیرۆرستان ل دەڤەرێ.
رەوشا سووریێ و پێشهاتێن رۆژهەلاتا ناڤین، ئالییەكێ دی یێ دانوستاندنێن كۆمبوونێ بوو.
نێچیرڤان بارزانی و هاكان فیدان پێشهاتێن ئەمنی یێن دەڤەرێ گەنگەشەكرن
نێچیرڤان بارزانی، سەرۆكێ هەرێما كوردستانێ ل میۆنشن، ل گەل هاكان فیدان، وەزیرێ دەرڤەیێ توركیا كۆمبوو.
د دیارەكێدا پەیوەندیێن ئیراقێ و هەرێما كوردستانێ ل گەل توركیا هاتنە گەنگەشەكرن، هەروەسا هەردو ئالییان باس ل چاوانییا ب هێزكرنا هاریكاریێ د وارێن سیاسی، ئابووری و ئەمنیدا كر و رۆناهی ئێخستە سەر پێشهاتێن ئەمنی و سیاسی یێن ئیراقێ و سووریێ و دەڤەرێ.
نێچیرڤان بارزانی، دوپاتی ل سەر پێشڤەبرنا پەیوەندیێن دۆستانەیێن هەرێما كوردستانێ ل گەل توركیا ل سەر بنەمایێ بەرژەوەندیێن هەڤپشك كر و ئاماژە ب گرنگییا هاریكارییا هەڤپشك ل گەل توركیا د هەموو واراندا، ب تایبەتی د وارێ ئاسایش و سەقامگیرییا دەڤەرێدا، كر.
ژ ئالیێ خوەڤە، هاكان فیدان خواستا توركیا بۆ زێدەتر ب هێزكرنا پەیوەندیێن خوە ل گەل ئیراقێ و هەرێما كوردستانێ نیشاندا، هەروەسا دوپاتی ل سەر گرنگییا هەماهەنگییا هەڤپشك بۆ بەرهنگاربوونا ئاستەنگێن ئەمنی و كاركرن بۆ ب دەستڤەئینانا سەقامگیریێ و گەشەكرنێ ل دەڤەرێ كر.
سەرۆكێ هەرێمێ ل گەل شاندەكێ پەرلەمانێ ئەلمانیا ووەزارەتا هاریكارییا ئابووری یا ئەلمانی كۆمبوو
نێچیرڤان بارزانی، سەرۆكێ هەرێما كوردستانێ، ل بەردەوامییا دیدار و كۆمبوونێن خوە دا ل كۆنفرانسێ ئاسایشا میۆنشن، ل گەل شاندەكێ پەرلەمانێ ئەلمانی (بوندستاك)ب سەرۆكایەتییا یۆهان ڤادیپول، جێگرێ سەرۆكێ فراكسیۆنا پەرلەمانی یا حزبێن ئێكەتییا دیموكراتییا مەسیحی (CDU) و ئێكەتییا جڤاكییا مەسیحی (CSU) كۆمبوو.
د كۆمبوونەكێدا سەرۆكێ هەرێما كوردستانێ سوپاسییا هاریكاری و پشتەڤانییا بەردەوام یا سیاسی، ئەمنی، لەشكری و مرۆڤایەتییا ئەلمانیا بۆ هەرێما كوردستانێ كر و رۆناهی ئێخستە سەر رۆلێ دیار یێ ئەلمانیا د دابینكرنا پێدڤیێن گرنگ یێن لەشكری و لۆجستی بۆ پێشمەرگەی د شەڕێ دژی داعشێدا، هەروەسا سوپاسییا پەرلەمانێ ئەلمانیا كر بۆ درێژكرنا ئەركێ هێزێن ئەلمانی ل هەرێما كوردستانێ.
ژ ئالیێ خوەڤە، ئەندامێن شاندێ پەرلەمانێ ئەلمانی، پێگیرییا ئەلمانیایێ ب بەردەوامییا پشتەڤانییا ئیراقێ و هەرێما كوردستانێ دوپاتكر، هەروەسا ئاماژە ب گرنگییا بەردەوامییا هەڤپشكیێ بۆ بەرهنگاربوونا مەترسیێن ئەمنی و ب هێزكرنا هاریكاریێ د كەرتێن گرنگدا.
هەر د چارچۆڤەیێ كارنامەیا خوە دا ل كۆنفرانسێ ئاسایشا میۆنشنێ، نێچیرڤان بارزانی، سەرۆكێ هەرێما كوردستانێ، د دیدارەكێدا ل گەل ئەلێكشاندەر دۆبرینت، سەرۆكێ گرۆپێ پەرلەمانیێ پارتییا جڤاكییا مەسیحی (CSU) ل پەرلەمانێ ئەلمانیا (بوندستاگ)، باس ل پەیوەندیێن ئەلمانیا ل گەل ئیراقێ و هەرێما كوردستانێ و پێشهاتێن سیاسی و ئەمنی یێن ئیراقێ و دەڤەرێ، كر.
سەرۆكێ هەرێمێ دوپاتی ل گرنگییا بەردەوامییا پشتەڤانییا ئەلمانیا بۆ ئیراقێ و هەرێما كوردستانێ كر، ب تایبەتی د وارێ راهێنانا هێزێن پێشمەرگەی و ب هێزكرنا ژێرخانەیا ئەمنیدا، هەروەسا ئاماژە ب خواستا هەرێما كوردستانێ بۆ بەرفرەهكرنا ئاسۆیێ هاریكاریێ ل گەل ئەلمانیا د هەموو كەرتاندا كر.
ژ ئالیێ خوەڤە ئەلێكساندەر دۆبرینت پێگیرییا ئەلمانیا بۆ پشتەڤانییا سەقامگیرییا ئیراقێ و هەرێما كوردستانێ دوپاتكر، هەروەسا رۆلێ هەرێما كوردستانێ د پاراستنا پێكهاتەیان و ئاسایش و سەقامگیرییا دەڤەرێدا كر.
هەر ل میۆنشنێ، سەرۆكێ هەرێما كوردستانێ ل گەل شاندەكێ پەرلەمانێ ئەلمانیا و وەزارەتا هاریكارییا ئابووری و گەشەپێدانا ئەلمانی كومبوو كو پێكهاتبوو ژ د. نیلس شمید، پەیڤدارێ كاروبارێن دەرڤە و هەماهنكگارێ گرۆپی د لژنەیا كاروبارێن دەرڤە دا ل پارتییا دیموكراتییا جڤاكی (SPD)، ئەندریاس شوارز، ئەندامێ لژنەیا بەرگریێ، مێتن هاكڤێردی، ئەندامێ لژنەیا بۆدجەی و نیلس ئانین، وەزیرێ دەولەتێ ل وەزارەتا هاریكارییا ئابووری و گەشپێدانێ یا ئەلمانی.
د كۆمبوونەكێدا دوپاتی ل گرنگییا پێشڤەبرنێ ب پەیوەندیێن ئەلمانیا ل گەل ئیراقێ و هەرێما كوردستانێ هاتە كرن، هەروەسا سەبارەت رەوشا ئیراقێ و هەرێما كوردستانێ و پێشهاتێن دەڤەرێ، بیر و بۆچوون لێكگۆهارتن.
نێچیرڤان بارزانی دوپاتی ل سەر گرنگییا ب هێزكرنا هاریكاریێ ل گەل ئەلمانیا كر، ب تایبەتی د وارێ پێشڤەبرنا شیانێن بەرگریێ ل دەف هێزێن پێشمەرگەی و پاراستنا ئارامیێ و سەقامگیریێ.
ژ ئالیێ خوەڤە، ئەندامێن شاندێ داكۆكی ل دۆستایەتییا هەرێما كوردستانێ و ئەلمانیا كر، هەروەسا پێگیرییا ئەلمانیا بۆ بەردەوامییا پشتەڤانییا ئیراقێ و هەرێما كوردستانێ دیاركر و ئاماژە ب گرنگییا بەرفرەهكرنا هەڤپشكیێ د وارێن گەشپێدانێ، ئاسایشێ و پێدڤییا بەردەوامییا هەماهەنگییا هەڤپشك كر بۆ بەرهنگاربوونا ئاستەنگێن ئەمنی.
هەلبژارتنێن پەرلەمانێ كوردستانێ و بزاڤێن پێكئینانا كابینەیا نوو یا حوكمەتا هەرێما كوردستانێ، رەوشا ئاوارە و پەنابەران و پێكهاتەیان ل هەرێما كوردستانێ و گوهۆڕینێن سووریێ، تەوەرەكێ دی یێ كۆمبوونێ بوو.