رەمەزان زەكەریا:

ل سەر ئاستێ مۆندیالا سالا ٢٠٢٦ كو ب شێوەیەكێ هەڤپشك ل سەر وەلاتێن ئەمریكا و كەنەدا و مەكسیك دهێتە برێڤەبرن و ٤٨ هەڵبژاردە تێدا پشكدارن دەستەكا كارگێڕیا یانەیێن وەرزشی ل كوردستانێ بۆچوون و پێشبینیێن خۆ ل سەر ڕەوشا یارییان دیار دكەن.
خەلیل حسێن، جێگرێ سەرۆكێ یانەیا دینارتە یا وەرزشی بۆ ڕۆژنامەیا ئەڤرۆ گۆت: سیستەمێ نوو یێ ٤٨ هەڵبژاردەیان د مۆندیالا ٢٠٢٦ دا بوویە ئەگەرێ هندێ كو ژمارەیەكا زۆر یا یارییان بهێتە ئەنجامدان. هەروەسا ئەڤسالە چەندین یاسایێن نوو هاتینە د ناڤ كێبڕكێیان دا بەڵێ ژبەر كو مۆندیال چار سالان جارەكێ دهێتە كرن هەر خۆشی و تاما خۆ یا تایبەت هەیە.
ناڤبری زێدەتر گۆت: ب گشتی یاریێن ئەڤسالە یێن مۆندیالێ تایبەتمەندییا خۆ هەبوو، بەلێ هندەك هەڵبژاردەیێن كو هەموو لایەكی پێشبینی دكر بگەهنە قۆناغا هەشتێ هەر زوو د دەمەكێ پێشوەخت دا دەركەفتن ئاشكرایە كو مۆندیال ب هەبوونا هەڵبژاردەیێن مەزن خۆشیەكا جودا ددەتە چاڤەرێبوونا وەرزشڤانان.
جێگرێ سەرۆكێ یانەیا دینارتە گۆت: ئەو تیمێن شیاین ژ قۆناغا كۆمەڵان دەرباز ببن ب گشتی ئاستەكێ زۆر باش نیشان ددەن، بەلێ ب دیتنا من هەلبژاردەیێ ئەرچەنتین باشترینە كو شیایە ب تاكتیكەكێ بلند یارییان ئەنجام بدەت و پێشبینی دكەم ناسناڤێ مۆندیالێ ب دەستڤە بینیت.
فەهمی فازل پەیڤدارێ یانەیا بجیل یا وەرزشی و چاڤدێرێ‌ وەرزشی بۆ ئەڤرۆ گۆت: ب دیتنا من سیستەمێ ٤٨ هەڵبژاردەیان یێ باش بوو چونكی دەلیڤە دا زۆرترین وەلاتان كو پشكداریێ د ڤێ بیرەوەرییا جیهانی دا بكەن بەلێ ئەگەر ل سەر كیشوەرێ ئاسیایێ باخیڤین ل گۆرەی كات و دەمێ یارییان بۆ جەماوەرێ ئاسیایێ هند یێ گونجای نەبوو بەلێ وەك كواڵێتییا یارییان زۆر یێ باش بوو و بێگۆمان ل قۆناغێن داهاتی دێ هێشتا گەرمتر و خۆشتر لێ هێت.
ناڤبری گۆتژی: هەڵبژاردەیێن فەرەنسا، ئەرژەنتین، ئیسپانیا، مەكسیك، پۆرتوگال و مەغریب، هەتا نوكە ئاستەكێ زۆر سەرنجڕاكێش پێشكەش كرییە.هەر چەندە ڕەنگە پۆرتوگال د یارییێن چۆیی دا د لۆتكەیا ئاستێ خۆ دا نەبووبیت بەلێ پێشبینییا من ئەوە كو هەڵبژاردەیێ پۆرتوگال دێ كێبڕكێیێ كەت و ناسناڤێ مۆندیالا ٢٠٢٦ بۆ خۆ بەت.
هەروەسان چاڤدێرێ‌ وەرزشی گۆت: ئەڤێ‌ مۆندیالێ‌ نێزكبوونەكا باش دناڤبەرا گەلان وشكاندن و نەهێلانا ڕەكەزپەرستیێ پەیداكر ب ڕێیا ڕەوشەبیری و دابونەراتیێن جودا یێن هەر وەلاتەكی، هەروەسان مۆندیال بوو ئەگەرێ‌ بەلاڤبوونا گیانێ‌ وەرزشی و كارێ‌ كۆم و پتر گەنجام پالدەتە وەرزشێ‌ و دووربكەڤن ژ كارێن خەلەت، دناڤا یاریێن مۆندیالێن یێن بۆری دا گەلەك كارێن سەرجراكێش هەبوون و جهێ‌ دەستخوەشیێ بوون

هەلبژارتیێ مەغرب بوویە ئێك ژ ئەوان تیمێن سەرنجراكێش دناڤا مۆندیالێ‌ دا و شیا ئاست و ئەنجامێ باش دەستڤە بینیت، دووماهی یارییا خوە دا ژ قووناغا 32ێ‌ سەركەڤتنەكا مەزن ب سێ‌ گۆلێن پاقژ لسەر هەلبژارتیێ نەمسا بینت و دەربازبیتە قووناغا 16ێ‌، لدووڤ ئامارێن فیدراسیۆنا فوتبۆلا جیهانی فیفا هەلبژارتیێ مەغرب خودانا 34 سەركەڤتنایە ل دووڤ ئێك، ژ سەرجەمێ‌ 26 یاریزانان 24 یاریزانێن وێ‌ ژ دەرڤەیی وەلاتێ‌ خوە پیشەكارن، شرۆڤەكار وێ‌ چەندێ دیاركریە كو یارییا بهێت یا رۆژا پێنچ شەمبیێ بەرانبەر هەلبژارتیێ فرەنسا دبیت سەركەڤتنێن وێ‌ بهێنە ڕاوەستاندن.

دوور ژ هەڤڕكیێن هەلبژارتییان بۆ سەركەڤتن د هەر یارییەكا مۆندیالێ‌ و گەهشتن بەر ب قووناغەكا باشتر هەتا بگەهنە فینالێ‌، دناڤا جیهانێ‌ دا چەندین تۆرێن قورمارێ‌ و بەریكانەیێن جودا هاتینە دانان، هەرچەندە ژلایێ یاسایی ڤە ڕێك ب كارەكێ‌ قورمارێ‌ ل سەر تۆرا ئینتەرنێتێ‌ هاتیە دان كو هەتا نوكە زێدەتری سێ‌ ملیار دۆلار دەربازكرینە ژبۆ دیاركرنا سەركەڤتنیێن هەر یارییەكێ‌، دگەل ئەوان پلاتفۆرمێن پێشبنییان گەهشتینە دو ملیار و370 ملیۆن دۆلاران، ژلایەكێ‌ دووڤە بتنێ‌ بۆ یارییا فینالێ‌ هەتا نوكە (1.8) ملیار دۆلار هاتینە دان و ئەڤ هژمارە بەر ب زێدەبوونێ‌ دایە.

د دیدارەكا رۆژنامەڤانی دا دیدێی دیشامب ڕاهێنەرێ‌ هەلبژارتیێ فرەنسا گازندە ژ شێوازێ‌ یارییا پاراگۆایی كر و ب شەڕەكێ‌ دژوار دا دیاركرن و گۆت: پشتی من شێوازێ‌ یارییا یاریزانێن پاراگۆایی دناڤا یاریگەهێ‌ دا دیتن، ئەز نەچاربووم من ژ یاریزانێن خوە یێن خودان جەستەیەكێ‌ هێز مباپی ب پارێزن و نەهێلین یاریزانێن پاراگۆایی دربێ هنگاڤتنێ‌ بدانێ‌، ب هەموو شێوەیان گڤاشتن ل سەر مباپی دهاتە كرن ب تنێ‌ دا ب ڕاوەستینن و دیاربوو ئەوان دڤیا ب هنگڤیت، یارییا پاراگۆایی گەلەك ب توند بوو مە سەرەدەری دگەل كر هەكە ل دووڤ ئەوێ‌ پلانا مە دانایی نەبا و بێهنفرەهییا یاریزانێن مە نەبا ژبلی ئەنجامێ سەركەڤتنا مە دا كارەسات ژی هەبیت، یاریزانێن وان شەڕ دكر نەك تەپاپێی

جەماوەرێ وەرزشی ئەڤرۆ ل دەمژمێر 10 شەڤ دێ‌ چاڤەڕێ‌ ئێك ژ دێربیێن ئاگرین یێن مۆندیالێ‌ بن ئەوا دێ‌ دناڤبەرا هەردو هەلبژارتیێ ئسپانیا و پۆرتۆگال ل یاریگەها دالاس ل ئەمریكا هێتە كرن، یاریێن هەردو هەلبژارتییان ب دێربیێ لارۆخا وسیلیساوا ئۆرۆپا و دێربیێ ئایبیری دهێتە ناڤكرن، پۆرتۆگال ب سەركێشا رۆنالدۆیێ دێ‌ بەرانبەر ئسپانییا ب سەركێشییا لامین یامال گەنجێ‌ دیار و دێ‌ شەڕی بۆ تۆلڤەكرنا فینالا كۆپا نەتەوەیێن ئۆرۆپا 2025ێ‌ كەن دەمێ‌ بەرانبەر پۆرتۆگالێ‌ تووشی خوسارەتیێ بووین و ناسناڤ ژ دەستدایی.
ئەمریكا- بەلجیكا
خودانێن ئەردی و مێڤانداریێ هەلبژارتیێ ئەمریكا دێ‌ هەلبژارتیێ بەلجیكا دناڤا یاریگەها لۆمێن فێلد مێڤانكەت ئەوا دێ‌ ل دەمژمێر سێیێ‌ سپێدەهییا سوبەهی هێتە كرن، سەركەڤتیێ ڤێ‌ یاریێ دێ‌ بەرانبەر سەركەڤتیێ ئسپانیا و پۆرتۆگال كەت، ئەڤ یارییە دبیتە یا سێیێ‌ دناڤبەرا وان دا، ل مۆندیالا 1930ێ‌ ئەمریكا ب سێ‌ گۆلێن پاقژ ب سەركەڤت بوو، ل مۆندیالا 2014ێ‌ بەلجیكا 2-1 ب سەركەڤت بوو.

چاڤەڕێ‌ دهێتە كرن ئەڤرۆ هەلبژارتیێ ئنگلتەرا یارییا خوە ژ قووناغا هەشتێ‌ دگەل هەلبژارتیێ مەكسیك بكەت و دناڤا بیردانكا وێ‌ دا روودانەكا نەخۆش یا ڤێ‌ یاریگەهێ‌ هەیە، ئەوژی ل سالا 1986ێ‌ بوو ئەوا هەلبژارتیێ ئەرجەنتین ب 2-1 سەركەڤتن ل سەر ئینایی، ستێرێ‌ وێ‌ دیێگۆ ئارماندۆ مارادۆنایی دو گۆل ل سەر تۆماركرین ئێك ژ ئەوا گۆلان ب شێوەیێ دەستی بوو و نێزكی سەری بوو كو هەتا نوكە یا دەنگڤەدانیی، تۆماس تۆخێل ڕاهێنەرێ‌ ئنگلتەرایێ گۆت: هەموو كەس دزانن ئەوا ل یاریگەها ئەزتیكا ل مەكسیك چێبوویی روودانەكا نەخۆش بوو، لێ‌ مە كرییە وانەیەك و دڤێت لڤێ یاریگەهێ‌ ب سەركەڤین.

ستێرێ‌ هەلبژارتیێ ئسپانیا پێدرۆ گۆزنالێز لۆپێز یێ ناڤدار ب پێدرێ هیڤیێن ب دەستڤەئینانا ناسناڤێ‌ مۆندیالا جیهانی یا 2026ێ‌ كر و ئەركێ‌ هەلبژارتیێ وەلاتێ‌ خوە بەرانبەر پۆرتۆگال ب سانەهی نابنیت و گۆت: هەموو یاریزان حەز و ڤیانا وان ئەوە تەپا زێری ب دەستڤە بینن هەروەسان مۆندیالا جیهانی، ل دەڤ من خەونا هەرە مەزن ب دەستڤە ئینانا مۆندیالێ‌ یە، سرۆشتییە ئەڤ خەونە و مافێ‌ هەر یاریزانەكی و هەلبژارتییەكی یە، لێ‌ كاركرنا ب ڕژد و پلانێن ڕێكخستی دێ‌ بنە ڕێكخۆشكەر بۆ ڤان خەونا، ئەو ل سەر ڕێیەكا دروست دچین یارییا بهێت بەرانبەر پۆرتۆگال ب سانەهی نابیت ژبەركو پێكهاتییەكێ‌ خودان شیان هەنە، دڤێت ئەڤرۆ سەركەڤتنێ‌ بینن دا بەردەوامیێ ب دەینە ئەوێ‌ هیڤیێ.

رۆژنامەیا نیۆیۆرك تایمز یا ئەمریكی د ڕاپۆرتەكێ‌ دا دیاركر یاسن بۆنۆ گۆلپارێزێ‌ هەلبژارتیێ مەغرب بەربژارە بۆ ب دەستڤەئینانا ناسناڤێ‌ باشترین گۆلپارێزێ‌ مۆندیالێ‌، ئەڤچەندە هات ل دووڤ ئەوان خالێن ب دەستخوەڤە ئینایین كو ئێك ژ ئەوا گۆلپارێزانە ژلایێ فیفایێ ڤە هاتیە دەستنیشانكرن بۆ هەڤڕكیێ ل سەر ناسناڤێ‌ باشترین گۆلپارێز و هەكە تیما وی سەركەڤتن ل سەر فرەنسا ئینا دێ‌ ڕێژەیا بەربژاركرنا وی بەر ب زێدەبوونێ‌ چیت، بۆنۆ شیابوو د یارییا بۆری دا بەرانبەر كەنەدا سێ‌ گۆلێن مسۆگەر تیما خوە قۆرتالبكەت، هەروەسان بەرانبەر بەرازیل چار گۆلان قۆرتالبكەت، دیسان گرتنا پەنەلتییان بەرانبەر هۆلەندا، دهێتە پێشبینیكرن دووماهی دەلیڤەیا بۆنۆیی بەرانبەر فرەنسا دیاربیت ئەرێ‌ دێ‌ بەربژارێ‌ بەردەوامبیت یان نە.