ئه‌ڤرۆ نيوز:

ژ ئەگەرێ بەلاڤبوونا ئەنفلەوەنزا مریشکان حوکمەتا ھەرێما کوردستانێ ئینانا بەرھەمێ مریشکان ژ ھژمارەکا وەلاتێن جیھانێ بۆ ھەرێما کوردستانێ قەدەغەکر و بەرپرسەکێ وەزارەتا چاندنێ ژی دبێژیت، ھێشتا چو حالەتێن ئەنفلەوەنزا مریشکان ل ھەرێمێ نەھاتینە تۆمارکرن و دێ چاڤدێریا زەڤیێن ب خۆدانکرنێ کەین.
دکتۆر میقداد ئیبراھیم، رێڤەبەرێ ساخلەمیا تەرش و کەوالی ل وەزارەتا چاندنێ بۆ رۆژناما ئەڤرۆ ئاشکرا کر کو وەزارەتا چاندنێ یا حوکمەتا ھەرێما کوردستانێ، ئینانا مریشکان ژ ھژمارەکا وەلاتێن جیھانێ قەدەغەکریە ژ ئەگەرێ بەلاڤبوونا ئەنفلەوەنزا مریشکان و گۆت: “نوکە ئینانا مریشکان ژ وەلاتێن ئەلمانیا و سوید و ئیران و ھۆلەندا و ھندێ ھاتیە قەدەغەکرن”.
ناڤھاتی خویا کر کو ل حەفتیا بۆری بڕیارا قەدەغەکرنا ئینانا مریشکان ژ لایێ وەزارەتێ ڤە ھاتیە دەرکرن و ھەر وەلاتەکێ ئەنفلەوەنزا مریشکان تێدا بەلاڤبوو دێ ئینانا بەرھەمێن وی وەلاتی ھێتە قەدەغەکرن، بەلێ ھێشتا ل ھەرێما کوردستانێ چو حالەتێن بەلاڤبوونا ئەنفلەوەنزا مریشکان نەھاتینە تۆمارکرن و گۆت: “بتنێ ل سالا بۆری چەند حالەتەک ھاتبوونە تۆمارکرن ل ھەرێما کوردستانێ، مە ب نڤیسارەکا فەرمی ھەموو رێڤەبەریێن خوە ئاگەھدارکرینە، کو ئەنفلەوەنزا مریشکان ل وەلاتێن جیھانێ بەلاڤبوویە و دووڤچوونێ بۆ بەرھەمێن ناڤخۆ بکەن، بەلێ ھێشتا مە دەست ب وەرگرتنا پشکنینێ ل چو زەڤیێن ھەرێما کوردستانێ نەکریە و دێ د بەردەوامبین ل سەر چاڤدێریکرنا بازاری و زەڤیێن ب خۆدانکرنا مریشکان داکو ھەر دەمێ گومان ھەبیت پشکنین بۆ بھێتەکرن”.

ئه‌ڤرۆ نيوز:

ئه‌ڤرۆ د كۆنگره‌يه‌كێ رۆژنامه‌ڤانى دا، پشتى ب دووماهى هاتنا هه‌لمه‌تا به‌رهنگاربوونا توندوتيژيان دژى ژنان، نێچيرڤان بارزانى سه‌رۆك وه‌زيرێن هه‌رێما كوردستانێ به‌رسڤا وێ پرسيارێ دا، ئه‌رێ راسته‌ حوكمه‌تا هه‌رێمێ پاره‌ هه‌نه‌ و ناده‌ته‌ وه‌لاتيان.

نێچيرڤان بارزانى سه‌رۆك وه‌زيرێن هه‌رێما كوردستانێ ئاماژه‌ ب وێ يه‌كێ كر: خه‌لك يێ ب ته‌حه‌موله‌ ل گه‌ل مه‌، سوپاسيا وان دكه‌ين، وان پشت راست دكه‌ين كو چ راستى بۆ وان  ئاخافتنان نينن كو دبێژن حوكمه‌تا هه‌رێمێ پاره‌ يێ هه‌ى و ناده‌نه‌ وه‌لاتيان، ئه‌م نوكه‌ يێ دقه‌يرانه‌كا دارايى يا دژوارداينه‌.

ئەڤرۆ نيوز:
حوکمەتا ھەرێما کوردستانێ گۆتگۆتکا ڕاگرتنا مووچێ فەرمانبەرێن ھەرێمێ بۆ سالا بھێت ڕەت دکەت، ل دووڤ پێزانینان ژی دانا مووچێ فەرمانبەران دێ بەردەوام بیت و لایەنێن پەیوەندیدار ژی د بزاڤا باشترکرنا سیستەمێ پاشکەفتکرنا مووچەی دانە.
وەکو دیار دەمەکە ھژمارەکا دەزگەھێن راگەھاندنێ گۆتگۆتکەک بەلاڤکریە کو سالا بھێت 2017 حوکمەتا ھەرێما کوردستانێ شیان نابن، مووچێ فەرمانبەران بدەت، ئەگەر ژی بۆ دانا قەرێن کۆمپانیێن پەترۆلێ ڤەدگەریێت، راگەھاندیە ژی، ژ ئەگەرێ بەردەوامبوونا دانا قەران، حوکمەتا ھەرێمێ شیان نابن چارێکا مووچەی ژی بەلاڤ بکەت.
ل دووڤ وان پێزانینێن SNN ژ جڤاتا وەزیرێن ھەرێمێ بەلاڤکرین، د نوکە دا حوکمەتا ھەرێمێ د بزاڤا باشترکرنا سیستەمێ پاشکەفتکرنا مووچەی دایە و وان گۆتگۆتکان ژی ڕەت دکەت، یێن ھاتینە گۆتن کو حوکمەتا ھەرێمێ نەشێت بۆ سالا بھێت، د بەلاڤکرنا مووچێ فەرمانبەران دا یا بەردەوام بیت.
ھەروەسا ل دووڤ پێزانینان، لژنا روو ب رووبوونا قەیرانان چ راپۆرت ل سەر ڤێ چەندێ ل بەر دەست دا نینن کو سالا بھێت بەلاڤکرنا مووچەی دێ یا چاوا بیت، بەلکو ب تنێ د بزاڤا باشترکرنا مووچەی دایە.
دەربارەی سیستەمێ ئەلکترۆنیکرنا مووچەی ژی، پێزانین دیار دکەن کو ژ ئەگەرێ ب جھئینانا وی سیستەمی گرێبەستێن ھژمارەکا زۆر یا فەرمانبەران دێ ھێنە ھەلوەشاندن، چونکو فەرمانبەرێن راستەقینە نینن و ب رێیا حزبان بووینە فەرمانبەر ل دام و دەزگەھێن حوکمەتا ھەرێما کوردستانێ.