رێڤەبەرێ تۆمارا گشتی یا زانکۆیا دھۆک د.سەعید خودێدا بۆ رۆژناما ئەڤرۆ دیارکر کو بۆ ئەڤ سالە زانکۆیا دھۆک دێ ٤٠٠٠ قوتابیان ل ٥٤ پشکێن زانستی وەرگریت، ل دۆر زانکۆلاینێ دیارکر کو بۆ ماوێ ١٠ رۆژان دێ یا بەردەوام بیت و ھەر قوتابیەکی شاشیەک د فۆرما وی دا ھەبیت ئەو وەکو بنگەھێ شیرەتکاری دشێن بۆ چارە بکەن.

دیدار، رەمەزان رێکانی:

د. سەعید خودێدا ل دۆر ھژمارا وان قوتابیان ل پارێزگەھا دھۆکێ ماف ھەی پێشکێشی زانکۆلاین بکەن دیارکر کو١٨٥٧٣  قوتابیان ل پاریزگەھا دھۆکێ مافێ ھەی پێشکێشی زانکۆلاینێ بکەن، ئەو ژی ئاشکرا کر کو ل ریکەفتی ٨/١١/٢٠١٤ زانکۆلاین کەفتیە کاری و دێ بۆ ماوێ ١٠ رۆژان ڤەگێشیت و ئەگەر یا فەر بیت ئەو ماوە بھێتە زێدەکرن ل وی وەختی وەزارەتا خواندنا بلند دێ وان ل سەر ئاگەھدار کەت.

رێڤەبەرێ تۆمارا گشتی یا زانکۆیا دھۆک ل دۆر بنگەھێن پێشکێش کرنا زانکۆلاین ل پارێزگەھا دھۆکێ دیارکر کو پار سال ب تنێ سێ بنگەھێن سەرەکی یێن راوێژکاری ل سەرانسەری ھەرێما کوردستانێ ھەبوون، ئەو ژی ل زانکۆیێن دھۆک و سەلاحەددین و سلێمانی، لێ ئەڤ سالە و ب بریارەکا وەزارەتا خواندنا بلند ١٣ بنگەھێن راوێژکاری ھاتنە ڤەکرن، ل ھەر ١٣ زانکۆیێن حکوومی یێن ھەرێما کوردستانێ، ل باژێرێ دھۆکێ سێ بنگەھێن راوێژکاری ھەنە ئەو ژی ل زانکۆیا دھۆک و زانکۆیا زاخۆ و زانکۆیا پۆلیتەکنیک یا دھۆک و گۆت: مە وەکو زانکۆیا دھۆک چار بنگەە ڤەکرینە کو ھاریکاریا قوتابیان بکەین دەمێ پێشکێشی زانکۆیێن ھەرێمێ دکەن و ئەو بنکەە ژی ل تۆمارکرنا گشتی یا زانکۆیا دھۆک و فاکۆلتیا چاندنێ و فاکۆلتیا زانست و بنگەھێ کۆمپیوتەری ل سەرۆکاتیا زانکۆیا دھۆک، ھەروەسا بنگەھێن زانکۆلاینێ ژ لایێ زانکۆیێن زاخۆ و پۆلیتەکنیک یا دھۆک ژی یێن ھەین.

ل دۆر وان بەلگەنامێن پێدڤی دەمێ قوتابی دچیت فۆرما زانکۆلاین پر دکەت، رێڤەبەرێ تۆمارا گشتی یا زانکۆیا دھۆک گۆت: ھەر قوتابیەکی دڤێت ناسناما بارێ شارستانی و رەگەزنامە و کۆبوونا خۆراکی و کارتا زانیاری و و ێنەیەک ل سەر سی دی ل گەل بیت دەمێ پێشکێش کرنێ.

رێڤەبەرێ تۆمارا گشتی یا زانکۆیا دھۆک دیار ژی کر کو ئەو قوتابیێن ل سالێن بۆری ل چ جھا نەھاتیە وەرگرتن دێ شێن پێشکێشی زانکۆلاین کەن، وان ئەڤ سالە ژی ل دووڤ رێنمایان ماف ھەیە پێشکێش بکەن ھەر ب رێیا کودێ خوە یێ کەڤن ئەوێ پارسال وەرگرتی.

د. سەعید خودێدا ھەروەسا گۆت ھەکە قوتابیەکی کودێ خۆ بەرزە کر بیت کودێن ھەموو قوتابیان ل تۆمارا گشتی یا زانکۆیا دھۆک ھەنە و ئەم دشێین کودێ وی ب دەینێ، یان ھەکە قوتابیەکی خەلەت فۆرما خوە داگرت، یان پەشیمان بوو ژ وێ داگرتنا وی داگرتی، ئەو قوتابی دشێت سەرەدانا تۆمارکرنا گشتی ل زانکۆیا دھۆک بکەت یان ژی ل زانکۆیا پۆلیتەکنیک چونکو ئەدمێن ھەنە و دشێت فۆرما وی جارەکا دی بزڤرینیت و قوتابی گوھۆرینا د فۆرما خوە دا بکەت.

ل دۆر پلانا زانکۆیا دھۆک بۆ سالا نوو کا دێ چەند قوتابیان وەرگرن، د. سەعید خودێدا گۆت: ژ بەر کو ھژمارا قوتابیێن ١٢ ئامادەیی سال بۆ سالێ زێدە دبیت ل ھەرێما کوردستانێ، زانکۆیا دھۆک ژی ھەردەم دەستپێشخەرە کو پتر خزمەتا قوتابیان بکەت و ھژمارەکا زۆر وەربگریت و بۆ ئەڤ سالە زانکۆیا دھۆک دێ ٤٠٠٠ قوتابیان ل ٥٤ پشکێن خوە یێن زانستی وەربگریت، کو بۆ سالا خواندنێ ٢٠١٤-٢٠١٥ دێ سێ پشکێن زانستی یێن نوو ل زانکۆیا دھۆک ھاتینە ڤەکرن و دێ قوتابیان وەرگرن ئەو ژی پشکا پەروەردا تایبەت فاکۆلتیا زانستێن پەروەردەیی ل سکۆلا پەروەردە و دەروونناسی و پشکا گەشت و گۆزار و رێڤەبرنا ئوتێلان ل فاکۆلتیا کارگێری و ئابووری و پشکا گەشتیاری و تۆریزما ژینگەھی ل فاکۆلتیا چاندنێ.

رێڤەبەرێ تۆمارا گشتی یا زانکۆیا دھۆک ل دۆر وێ پرسیارێ کو ھەکە وەزارەتێ پتر ژ پلانا زانکۆیێ قوتابی فرێکرن دێ چارە چ بیت، گۆت: پشتی تێکچوونا رەوشا ئەمنی ل باژیرێ مووسل و ھندەک باژێرێن دی یێن عیراقێ ھژمارەکا زۆر یا قوتابیێن وان زانکۆیان قەستا زانکۆیا دھۆک کریە ل سالا بۆری یا خواندنێ و ھەروەسا بۆ سالا خواندنێ ٢٠١٤-٢٠١٥ کو ل دووڤ شیانێن زانکۆیا دھۆک دێ ھندەک قوتابیین دی ژی ھێنە مێڤاندار کرن،   مە ب نڤیسارەکا فەرمی ل دەمێ پلانا وەرگرتنا قوتابیان بلند کری بۆ وەزارەتێ تێدا مە داخوازکریە کو ئەڤ چەندە ل بەر چاڤ بھێتە وەرگرتن و زێدەتر ژ پلانا مە داخواز کری قوتابی نەھێنە ھنارتن.