ئەڤرۆ نیوز:
وهزارهتا ساخلەمیا حكومهتا ههرێما كوردستانێ دیار کر: د ماوێ 24 دەمژمێرێن بوری دا (327) پشکنین هاتینە وەرگرتن، کو (203) ل هەولێرل و (96) ل سلێمانیێ و (28) ل دهۆكێ، د ئەنجامدا (9) تووشبوویێن نوو هاتینە تۆمار کرن.
هەوروەسا گۆتیە، ل سنوورێ پارێزگەها سلێمانیێ (8) حالەت پۆزەتیڤ بوون، کو (5) زەلام و (3) ژن بووینە، دناڤا وان دا رەلامەک ز ئەگەرێ نەخۆشیەکا کوژەک یا درێژخایەن، پشتی گیان ژ دەستدانێ پشکنینا وی پۆزەتیڤ دەرچوویە، ل دهۆکێ ژی ژنەک تۆشی کۆرۆنا یێ بوویە.
ئەڤرۆ نیوز، زنار تۆڤی:
ئەڤرۆ ل سنۆرێ باژێرڤانیا فهیدیێ دەست ب ئاڤاکرنا نەخۆشخننەکا تایبەت ب کۆرۆنا یێ هاتە کرن، کو 63 هزار مهترێن چار گۆشه یێن ئهردی بۆ ساخلهمیا دهۆكێ هاتینە دابینكرن، ژ ڤی رووبهری ژی نێزیكی 15 هزار مهترێن چار گۆشه بۆ نهخۆشخانا كۆرۆنایێ یا 100 تهختی هاتینه دابینكرن، كو ئەڤ نەخۆشخانە دێ ژ ئالیێ وهبهرهێنهرێن دهۆكێ ڤه هێته ئاڤاكرن، رووبهرێ مایی ژی دێ ل ژێر كۆنترۆلا ساخلهمیا دهۆكێ دا بیت.
ئهندازیار دیار بهحری، رێڤهبهرێ گشتی یێ باژێرڤانیان ل پارێزگهها دهۆكێ بۆ ئەڤرۆ نیوز دیار كر، ئهڤرۆ دوشهمبی 23/3/2020 ل سهر رووبهرێ 63 هزار مهترێن چار گۆشه كو ژ ڤی رووبهری نێزیكی 15 هزار مهترێن چار گۆشه بۆ نهخۆشخانەکا تایبەت ب كۆرۆنا یێ ڤە یا 100 تهختی هاتینه دابینكرن و نوکە دهست ب ئاڤاکرنا ڤێ نهخۆشخانێ هاتیه كرن و وهبهرهێنهرهكێ دهۆكێ دێ وێ نهخۆشخانا تایبهت بۆ نهخۆشێن كۆرۆنا یێ ئاڤا كهت.
ناڤهاتی ئاشكرا كر ژی: كو ئهو ئهرده د ماستهر پلانا باژێرڤانیا فهیدیێ دا، ئهردێ نهخۆشخانێ یه و دكهڤیته سهر رێیا سهرهكی یا دهۆك دۆمیز.
ئەڤرۆ نیوز:
د پرێس کۆنفرانسەکێ دا وەزارەتا ساخلەمیا ئیرانێ راگەهاند، د دەمێ ٢٤ دەمژمێرێن بوری دا، هزار و ٤١١ کەسێن دیتر توشی ڤایرۆسێ کۆرۆنا یێ بووینە و ١٢٧ کەسان ژی ژیانا خوە ژ دەستدایە.
وەزارەتا ساخلەمیا ئیرانێ گۆتیە ژی، هژمارا گشتی یا توشبوویان گەهشتیە ٢٣ هزار و ٤٩ کەسان، هژمارا گیان ژ دەستدانێ گەهشتیە هزار و ٨١٢ کەسان، هەروەسا هەتا نوکە هەشت هزار و ٣٧٦ کەسێن توشبوویی ژ کۆرۆنایێ چێبووینە.
هەتا نوکە ل جیهانێ پتری ٣٤٠ هزار کەسان توشی ۆرۆنا یێ بووینە و پتری ١٤ هزار کەسان گیانێ خوە ژ دەستدایە، هەروەسا ٩٩ هزار کەس ژی چێبووینە.
ئەڤرۆ نیوز:
دوهی ۲۲ ئادارا ۲۰۲۰ ل حەفت وەلاتێن ئورۆپا تاقیکرنا چار دەرمانان هاتیە پێشنیارکرن بۆ توشبوویێن ڤایرۆسێ کۆرۆنا یێ ل ژێر سەرپەرشتیا رێکخراوا ساخلەمیا جیهانی و ب پشکداریا ۳۲۰۰ نەخوشان دەستپێکریە.
دەزگەهێ ئینسیرم یێ فرەنسی بۆ ڤەکۆلینێن نۆشداری راگەهاندیە: کو دەرمانێن هاتینە پێشنیارکرن پێک دهێن ژ (هایدرۆکسی کلۆرۆکوین) کو بەری نوکە بۆ مەلاریێ هاتیە بکار ئینان، هەروەسا(ریمدیسیڤر) کو بەری نوکە بۆ ئیبۆلایێ هاتیە بکارئینان، (لوبنافیر) ب تێکەلکرنێ ل گەل(ریتوفانیر)، کو دشێن ل گەل دەرمانێ (ئینترفیون بیتا) ب نەخوشان یان بێ ئەو بهێتە دان.
ئەو جۆرێن دەرمانان ئەڤە گەلەک سالن ل بازار و نەخوشخانان دا هەنە، ژبەر وێ چەندێ هند مەترسیا زێدە ل سەر ساخلەمیا مرۆڤان نینە، هەکە ل ژێر رێنمایێن نۆشداری دا بهێنە بکارئینان، ژبەر وێ چەندێ دێ ل سەر وێ هژمارا زێدە یا نەخۆشان هێتە تاقیکرن،
ئەو ۳۲۰۰ نەخۆش ژی یێن وەلاتێن بەلچیکا، ئەلمانیا، بریتانیا ،فرەنسا، لوکسۆمبۆرگ، ئیسپانیا و هۆلەندا نە.
دۆهی ژی هەر ئێک ژ ولاتێن سوید و نەرویج دەستپێکرنا تاقیکرنا دەرمانێ (هایدرۆکسی کلۆرۆکوین) راگەهاند، ژبەر کو تاقیکرن ل،سەر توشبوویان هەیە، دبیت ئەنجامێ دووماهیێ یێ ڤەکۆلینێ دەمێ ئێک بۆ دو حەفتیان دەربچیت، ل سەر باندۆرا دەرمانان، هەموو تاقیکرنێن بەری نوکە سەر ڤان دەرمانان ئەنجامێن باش و دلخۆشکەر هەبووینە.
ئەڤ دەرمانە ڤاکسین نینن، بۆ کەسێن ساخلەم نینن، کەسێ ژ توشبوونێ ناپارێزیت، لێ ب تنێ چارەسەریا توشبوویان دکەت، دیسان بکارئینانا وان بێی رێنمایێن نۆشداران دێ مەترسیێ سەر ساخلەمیێ دروست کەت.
ئەڤرۆ نیوز:
مەسرور بارزانی سەرۆکێ حوکمەتا هەرێما کوردستانێ د پەیامەکێ دا داخواز ژ هەموو وەلاتیان ل هەرێما کوردستانێ دکەت کو مەترسیا ڤایرۆسێ کۆرۆنا ب جدی وەربگرن و ل مالێن خوە بن و دەرنەکەڤن.
سەرۆکێ حوکمەتا هەرێما کوردستانێ دیار ژی دکەت کو یا پێدڤی ل خالێن سنوری و جهێ دی هاتیە کرن و داخواز ژ وەلاتیێن هەرێما کوردستانێ دکەت کو پێگیریێ ب رێنمایێن هەر دو وەزارەتێن ساخلەمیێ و ناڤخوە بکەن و ل مالێن خوە بن و نەچنە دەرڤە و هاریکاریا ئالیێن پەیوەندیدار بکەن.
سەرۆکێ حوکمەتێ دیار ژی دکەت کو هەکە وەلاتی هاریکاریا هەر دو وەزارەتان بکەن ئەو دێ شێن رێگریێ ل بەلاڤبوونا کۆرۆنایێ ل کوردستانێ بگرن.
ئەڤرۆ نیوز، بارزان مزووری:
موقەدمێ مافپەروەر فیراس یاسین بەرپرسێ پەیوەندی و راگەهاندنا بەرگیریا شارستانی ل ئاکرێ بۆ ئەڤرۆ نیوز گوت: (ئەڤرۆ ئێڤاری رێککەفتی 23/3/2020 تیمێن مە یێن غەواسا هاتنە ئاگەهدارکرن کو شڤانەک ب بناڤێ”مشعا نزال دهن”ژیێ وی 24 سالن دناڤ رووبارێ گومل دا خەندقیە، پشتی تیمێن مە گەهشتینە جهێ رویدانێ تەرمێ وی دناڤ رووباری دا ئینادەر و بۆ نوژداریا داد ل پارێزگەها دهوک هاتە ڤەگوهاستن.
ئەڤرۆ نیوز:
وەزارەتا گەهاندنێ یا حوکمەتا هەرێما کوردستانێ راگەهاند کو وان بەری نها داخواز ژ کۆمپانیێن دابینکرنا ئینترنێتێ کربوون کو بهایێ کارتێن خوە کێم بکەن و هەروەسا لەزاتیێ ژی زێدەتر لێ بکەن، کو هەر دو کۆمپانیێن (NOOR TEL) و (Fast Link) داخوازیا وەزارەتێ قەبوول کرینە و دێ ٢٥% داشکاندنێ کەن بێی کو چو کارتێکرنێ ل لەزاتیا هێلا ئینتێرنێتێ بکەت.
ئەڤرۆ نیوز،عەلی حاجی :
د داخویانیەکێ دا هاریکارەکێ سەرۆکێ زانکویا زاخۆ بۆ ئەڤرۆ نیوز دیار کر زانکویا وان د بەرهەڤیێن تەمام دا بۆ ئونلاینکرنا وانەیێن زانکویێ و هەر دیسان وان داخاز ژی کری یە رەزامەندی ل سەر ئونلاین کرنێ بهێتە دان .
زێدەتر دکتور کاروان فەهمی گوت: (ژبەریا سێ سالان ب رێیا سیستەمەکێ وان ئیمێل بۆ هەمی قوتابیان دروست کر بوون بۆ روژەکێ وەکی ئەڤرۆ کو پێدڤیا وان پێ هەبیت،بەلێ بۆ ماوەیێ سالەکێ ب رێیا سیستەمەکێ باشتر وان هەمی قوتابی و ماموستایێن خوە ئێخستینە دناڤ وی سیستەمی دا لەورا وەکو جڤاتا زانکویێ ژی ئێکەم کومبون ب شێوازێ ئونلاین ژی کری یە و ئەم بەرهەڤین ب وی سیستەمێ وانەیێن ئونلاین کارا بکەین کو ب شێوازەکێ بیت هەر قوتابیەکێ پرێسگرێن ئەنترنێتێ و کارەبێ و لاپتوپان هەبیت بۆ وان ئاریشە دروست نەبن داکو ئەڤ سیستەمە ب شێوەیەکێ باش ب رێڤە بچیت و ئەم بەرهەڤیا خوە ژی دیار کری یە بۆ وەزارەتا خواندنا بلند و ڤەکولینێن زانستی بۆ جێبەجێ کرنا وی سیستەمی).
و گوت ژی: ئارمقنجا سەرەکی ژی ژ ڤێ چەندێ ئەوە ئەم نەهێلين خواندنا ئەڤ سالە یا قوتابیان ب هەروەی بچیت،هەر چەندە ئەم دزانین ژی بۆ وانەیێن پراکتیکی دێ پرێسگرێک هەبن بەلێ مە هزر د وێ چەندێ ژی دا کری یە کو هەر دەما دەوام دەست پێ بکەن کو د وی دەمی دا ئەو وانەیێن پراکتیکی بهێنە ئەنجام دان و د رێیا ئونلاین هەتا ٧٠٪ دێ پروسەیە خواندنێ سەرکەڤتی بیت.
نيشاندان