ئەڤرۆ نیوز، عەلی حاجی:
ل دویف وان پێزانینێن باوەرپێکری ب دەست ئەڤرۆ نیوز کەفتین گوهورین دێ د پوستێ سەروکاتیا باژێرڤانیا زاخۆ دا هێتە کرن و ئەندازیارەک ژ خەلکێ زاخۆ دێ وی پوستی وەرگریت.
هەر ل دویف پێزانینان ل دویف بەرنامەیێ گهورینان کو هاتیە دارێشتن، ئەندازیار وەلات سەعدی دێ ل جهێ سەروکێ باژێرڤانیا زاخۆ بژار مونیبی دەست ب کار بیت وەکو سەروکێ باژێرڤانیێ و بریارە د دەمەکێ نێزیک دا ئەو گوهورین بکەڤنە بوارێ جێبەجێ کرنێ دا و سەرۆکێ نوو ژی دەست ب کاری بیت.
ئەڤرۆ نیوز، بارزان مزووری:
كامیران بەرزنجی رێڤەبەرێ چاڤدێریا بازرگانیا قەزا بەردەرەش بۆ ئەڤرۆ نیوز گۆت: (ئەڤرۆ بەری نیڤرۆ رێكکەفتی 8/12/2020 ب بەشداریا قائیمقامێ قەزا بەردەرەش و رێڤەبەرێ ئاسایشا بەرەدەرەش چاڤدێریا بازرگانی ب هەماهەنگی دگەل لژنا ئابووری یا قەزا بەردەرەش زێدەتری سێ تەنێن كەل و پەلێن قەدەغەكری ژناڤبرن).
ناڤهاتی خویاكر ئەو كەل و پەلێن خارنێ پێك دهاتن ژ 186 كارتونێن هێكێن قەدەغەكری یێن ئیرانی دگەل 368 كارتون یێن مێلاكا مریشكا یا توركی كو ب شێوەیەكێ نەیاسای هاتبوونە قەزا بەردەرەش و ئەڤ كەل و پەلە ژلایێ ئاسایشا بەردەرەش ل ناحیا رۆڤیا هاتبوونە دەستەسەركرن ل رێكکەفتی 6/12/2020.
كامیران بەرزنجی ئەو یەک ژی دیار کر ئەو كەسێن ئەڤ كەل و پەلە ئیناینە چار كەس بوون بۆ دادگەهێ هاتینە رەوانەكرن دادگەه دێ بریارێ ل سەر سزایێ وان دەت.
ئەڤرۆ نیوز، عەلی حاجی:
بۆ ئێكەم جار ل زانكویا زاخۆ كورتە فلمێ شینوار كو ئەوێ ژلایێ قوتابیێن زانكویا زاخۆ ڤە هاتیە دروست كرن هاتە نیشادان و بریارە ئەو كورتە فلمە ل چەند جهێن دیتر ژی بهیچتە نیشان دان
دەرهێنەرێ كورتە فلمی سەفەر رەمەزان بۆ رۆژناما ئەڤرۆ گۆت: (بۆ ئێكەم جارە كورتە فلمێ شینوار ل زانكویا زاخۆ بهێتە نیشان دان ژبەر كو ئەو كورتە فلمە ژ بەرهەمێ زانكویا زاخۆ بوو و هەر زانكویێ ب خوە ژی پشتەڤانیا ماددی ل مە كربوو، پشتی نیشاندانا فلمی ب دوماهی دهێت د پلانا مەدایە ئەو كورتە فلمە ل زانكویا زاخۆ بۆ قوتابیان بهێتە نیشان دان و هەر دیسان ل چەند جهەكێن دیتر ژی،هەر چەندە ئەزمونەكا نوو بوو بۆ مە بەلێ هەتا رادەیەكێ باش ژی پێشوازی ل كارێ مە هاتە كرن و ئەو كەسێن پشكداری كورتە فلمێ مە بووین بۆ ئێكەم جارە كارێ ئەكتەریێ دكەن و ئارمانجا مە ژی ئەو بوو ئەم شیانێن قوتابیان دیار بكەین).
ل دوماهیێ گۆت ژی چێروكا فلمی ژ چێروكەكا راستەقینە هاتیە وەرگرتن و چێروك ژی ب شەهیدان ڤە گرێدایە و وەكو دەرهێنەر و ئەكتەرەكێ سەرەكی من رول تێدا گێرابوو و ئەڤە ژی دێ بیتە جهێ مفایی بۆ مە كو بشێن كارێن باشتر ل داهاتی دا بكەین و بشێن ب رێیا كورتە فلمێن خوە خزمەتەكێ بكەین.
ئەڤرۆ، بارزان مزووری:
كانیوار جبرائیل محەمەد رێڤەبەرێ پرۆژێ ئەندەر پاسێن دهوك بۆ ئەڤرۆ نیوز گۆت: سوبەهی رێكکەفتی 9/12/2020 هەماهەنگی دگەل رێڤەبەریا هاتن و چوونا پارێزگەها دهوك جادا سەرەكی یا بارزان ئەوا دكەڤیتە نێزیك پاركا ئازادی دهێتە گرتن و هاتن و چوون دێ هێتە ڤەگوهاستن بۆ هەر دو رێكێن دەوروبەری پرۆژەی بۆ دانانا گێردەرا بۆ پاراستنا گیانێ وەلاتیان ژ هەر رویدانەكا نەچاڤەرێ كری.
ناڤهاتی خویاكر ئەڤ رێكە بۆ ماوێ دو هەیڤان دهێتە داخستن ئەو گێردەرێن نها ل كارگەها كاڤین گرۆپ كارگەها دروستكرنا دنگ و گێردەرو قالبێن پریكاس ل قەزا شێخان هاتیە دانان بۆ ڤی پرۆژەی دهێنە ڤەگوهاستن.
ئەڤرۆ نیوز، عەلی حاجی:
رێڤەبەرێ ناحیا باتیفا د داخۆیانیەكێ دا بۆ ئەڤرۆ نیوز دیار كر ژ ئەگەرێ توپبارانا سوپایێ توركیا بۆ سەر گوندێ بانكێ بۆ جارا دویێ كارەبا وی گوندی ژ كار دكەڤیت و تیمێن مە بەردەوامن ل سەر سەخبێریكرنا وان جهێن زیان ڤێ كەڤتین .
زێدەتر دلشێر عەبدولستار گۆت: (ل شەڤا دەربازبوویی ژ ئەگەرێ توپبارانا سوپایێ توركیا بۆ سەر گوندێ بانكێ ل سنورێ ناحیا باتیفا چەند توپەك بەر ب كارەبا وی گوندی دكەڤیت و دبیتە ئەگەرێ ژ کارکەفتنا كارەبێ ل وی گوندی و تیمێن مە ل ناحیا باتیفا بەردەوامن ل سەر كاری دا كو جارەكا دی بشێن كارەبێ بۆ وی گوندی ڤەگەرینە ڤە، د ماوەیێ 10 رۆژان دا بۆ جارا دودێ یە زیان بەر ب كارەبا وی گوندی دكەڤیت ژ ئەگەرێ توپبارانا سوپایێ توركیا بەلێ هەر زوو تیمێن مە دشێن جارەكا دی كارەبا وی گوندی زڤریننەڤە).
ئەو چەندە ژی گۆت: (شەڤا بوری نێزیكی سێ توپان بەر ب گوندێ بانكێ كەڤتینە و بۆ دەما چەند رۆژەكایە ئەو گوندە بەردەوام دهێتە توپباران كرن ب هێجەتا هەبوونا چەكدارێن پەكەكێ و ترسەكا مەزن دەف خەلکێ گوندی دروست بوویە).
ئەڤرۆ نیوز، عەلی حاجی:
د سەرەدانەكێ دا بۆ باژێرێ زاخۆ دكتور عەلی تەتەر پارێزگەرێ دهوكێ بەرێ بنیاتی بۆ چار پرۆژەیان ب كوژمێ زێدەتری 15 ملیارر دیناران دانا و سەرەدانا پروژەیێ تەمامكرنا جاددەیا سەرەكی یا ئیبراهیم خەلیل بۆ دێرەبوونێ كر.
د كونگرەیەكێ روژنامەڤانی دا دكتور عەلی تەتەر گۆت: (پێشتر ب بریارا بەرێز مەسرور بارزانی سەروكێ حكومەتا هەرێما كوردستانێ بریارا دروستكرنا چەند پروژەیەكان ل زاخۆ دا بوو، ئەو پروژەیێن ئەڤرۆ بەرێ بنیاتی ژی بۆ هاتیە دانان د كەڤیتە د چارچووڤێ وان پروژەیان دا، جهێن پەیوەندیدار ژی دێ چاڤدێریا ڤان پروژەیان كەن دا كو د زووترین دەم دا ب دووماهی بهێن و وەكو ئیدارەیا پارێزگەها دهوكێ ژی مە ئەو ئەزموون هەیە كو بزانین كیش كومپانی دێ شێت ب دروستی كار كەت و هەر د ڤێ حەفتیێ دا ب كوژمێ زێدەتری 22 ملیار دیناران بەرێ بنیاتی بۆ چار پروژەیان ل زاخۆ هاتبوو دانان و ئەڤرۆ ژی ب كوژمێ 15 ملیار دیناران بەرێ بنیاتی بۆ هاتە دانان و ئەڤ پروژەیە ژی هەمی بۆ خزمەتا ڤی باژێری هاتینە دانان .
پارێزگەرێ دهوكێ دیار ژی کر گهورین ل پارێزگەها دهوكێ قوناغەكا باش دەرباز كرینە و بریارە د ڤێ حەفتیێ دا رێڤەبەرێن نوو بۆ رێڤەبەریێن گشتی هاتینە دانان دەست ب كار ببن و هەر دیسان د ماوەیێ دو هەتا سێ روژێن بهێت دا دێ گهورینەكا بنەرەتی ل سەر ئاستێ چەند رێڤەبەریەكێن گرنگ ل زاخۆ بهێنە ئەنجام دان و دگەل بورینا دەمی ئەو گهورین دێ دیار بن و هەر دیسان هژمارەكا ناڤێن دیترێن رێڤەبەران بەردەستن بۆ گهورینێ دا كو ئەو ناڤە بهێنە بلندكرن بۆ ئەنجوومەنێ پارێزگەها دهوكێ دا كو دەنگدان ل سەر بهێتە كرن .
ل دوماهیێ گۆت ژی ئەو پارەیێ هەشت پروژە ل زاخۆ هاتینە جێبەجێ كرن ئەڤە پشكەكا وی پارەیی یە یێ سەروكێ حكومەتا هەرێما كوردستانێ بۆ تەخارن كری و پشتی پشكەكا ڤان پروژەیان ب دوقماهی دهێت ب وی پارەیێ مایی دێ هژمارەكا دیتر یا پروژەیان بۆ زاخۆ هێنە دروست كرن.
ئەڤرۆ نیوز، عەلی حاجی :
د داخویانیەكێ دا سەرۆكێ یانا زاخۆ یا وەرزشی بۆ ئەڤرۆ نیوز دیار كر دەست ب دروستكرنا پروژەیێ سەن ستی یێ شوققەیێن گرێدایی ب یانا زاخۆ ڤە، ئاڤاكرنا وان شوققەیان ژی دێ بیتە پشتەڤانیەكا باش بۆ یانێ .
زێدەتر حەمید سەلمان گۆت: (پشتی حەفت سالێن راوەستیانێ ژ كاركرنێ ل سەر شوققەیێن پروژەیێ سەن ستی یێ گرێدایی ب یانا زاخۆ ڤە،بۆ دەما حەفتیەكێ یە ژلایێ كومپانیا ئەلئەمانی گروپ ڤە دەست ب دروست كرنا شوققەیان هاتیە كرن،ئەڤە ددەمەكێ دایە كار كرن ل سەر وان سوققەیان بۆ دەما حەفت سالان بوو كار ل سەر راوەستیا بوو و ئاڤا كرنا وان شوققەیان ژی پشتی گڤاشتن و هەولێن بەردەوامێن دەستەكا كارگێریا یانا زاخۆ بوو بۆ سەر كومپانیا جێبەجێ كار، بۆ دەما دوو حەفتیێن دیتر ژی دێ كار كرنا د وان شوققەیان دا بەرچاڤ بیت و دێ دووبارە ژی ئەو پروژەیە ب ئامادەوبما پارێزگەرێ دهوكێ هێتە ڤەكرن و ئەم ب هیچڤی نە ئەڤ پروژەیە هەتا دوماهی قوناغ كار تێدا نەهێتە راوەستاندن و ئەم ب چو رەنگان ژی رازی نابیت كار تێدا بهێتە راوەستاندن).
ناڤهاتی ئەو چەندە ژی خویار كر نێزیكی 1150 شوققە كو دبیتە 21 ئاڤاهی بریارە ژلایێ كومپانیێ ڤە بهێنە ئاڤا كرن و ئاڤاكرنا وان شوققەیان ژی هەتا رادەیەكێ باش دێ بیتە پشتەڤانیەكا ماددی بۆ یانا زاخۆ و ئەو شوققەیە ژی دێ ب قستێن درێژ خایەن ب وەلاتیان هێنە دان .
ل دووماهیێ گۆت ژی: (هەر چەندە د ڤان كاودانان دا ئاڤاكرنا پروژەیێن ب ڤی رەنگی یا زەحمەتە ژ بەر كو كوردستان د كاودانەكێ دارایی یێ دژوار دا دەرباز دبیت بەلێ مە ل سەر كومپانیێ دوپات كریە كار د پروژەیی دا بەردەوام بكەت دا كو د زووترین دەم دا مفا ژ وان شوققەیان بهێتە وەرگرتن و بكەڤیتە د خزمەتا باژێرێ زاخۆ و یانا زاخۆ دا).
ئەڤرۆ نیوز، عەلی حاجی :
ل رێککەڤتی ٢٣/١١/٢٠٢٠ێ ب ئامادەبوونا عەمید شەعلان ئەحمەد رێڤەبەرێ پولیسێن پارێزگەها دهوکێ و نوینەرێ قایمقامێ زاخۆ، گهورین د پوستێ رێڤەبەریێن پولیسێن قەزا زاخۆ دا هاتنە کرن .
د ئەنجامێ وان گهورینان دا و د رێ و رەسمەکێ دا مقەدەم نزار سلێمان حاجی وەکو رێڤەبەرێ نوو یێ پولیسێن قەزا زاخۆ ل جهێ مقەدەم سەعەد عومەری هاتە دانان، ژلایێ خوە ڤە ژی رێڤەبەرێ پولیسێن پارێزگەها دهوکێ داخازا سەرکەڤتنێ بۆ رێڤەبەرێ نوو یێ پولیسان خواست و سوپاسیا رێڤەبەرێ بەری نوکە یێ پولیسێن قەزا زاخۆ کر بەرامبەر وێ خزمەتا د سالێن بوری دا پێخەمەتی ئارامیا قەزا زاخۆ دا ئەنجام داین.
ئەڤرۆ نیوز، عەلی حاجی :
رێڤەبەرێ چاڤدێری و گەشەپێدانا جڤاکی ل زاخۆ د داخویانیەکێ دا بۆ ئەڤرۆ نیوز دیار کر دگەل سەر هەلدانا ڤایروسێ کورونایێ، ل سنورێ قەزا زاخۆ هەتا نوکە ١٤ هزار خێزان ژ هاریکاریێن ماددی و ئازوقەیی یێ حکومەتا هەرێما کوردستانێ مفادار بووینە.
زێدەتر بەیار باڤی گۆت: (دگەل هاتنا کورونایێ ب شێوەیەکێ نەچاڤەرێکری ل کوردستانێ، هاریکاری ل قەزا زاخۆ ب سێ قوناغان دەستپێکر ب رەنگەکێ قوناغا ئێکێ هاریکاریێن ئازوقەیی بوون کو ژلایێ خێرخوازان ڤە هاتبوونە بەرهەڤ کرن و قوناغا دووێ ژلایێ وەزارەتا کار و کاروبارێن کومەلایەتی بوو کو ئەو هاریکاری بۆ ١٢ هزار خێزانا بوو کو پێک دهاتن ژ هەژمارەکا جورێن خوارنێ بوو هەر ژ بێگوڤا هەتا سنورێ پێشابیرێ، قوناغا سیێ ژی نێزیکی شەش هزار خێزان مفادار بوون کو پێک دهات ژ هەژمارەکا هاریکاریێن ئازوقەی و کوژمەیەکێ پارەیی و هەر دیسان پشکا دوویێ ژی پێک دهات ژ ٥٠ کێلویێن برنجی و هەشت هزار خێزان مفادار بوون، ئەو کەسێن مفادار بووین ژ وان هاریکاریێن ل سنورێ قەزا زاخۆ هاتینە بەلاڤکرن کەسانێن دەستکورت و بێ سەمیان و خودان پێدڤیێن تایبەت و چەندین کەسێن دیتر ژی مفادار بوون).
ناڤهاتی دیار ژی کر کو ئەو هاریکاریێن نوکە دهێنە بەلاڤکرن بۆ هەر خێزانەکا ناڤێ وان هاتیە تومار کر ١٠٠ هزار دینارێن عێراقی نە و ب ریێا بانکا خابور و ل دووڤ رێزبەندیا پیتان ئەو هاریکاری یە دهێنە بەلاڤ کرن .
زێدەتر ناڤهاتی گۆت ژی پێدڤیە تومارکرنا ناڤێن کەسێن ژ هەژی هاریکاریان بن ب رێیا تیمان ناڤ بهێنە تومار کرن دا کو کەسانێن ژ هەژی بهێنە دەستنیشان کرن و ئەڤ کارە ژی پێدڤیە پێش وەخت بهێتە ئەنجام دا.
ئەڤرۆ نیوز، عەلی حاجی :
رێڤەبەرێ ناحیا رزگاری د داخویانیەکێ دا بۆ ئەڤرۆ نیوز دیار کر ئەندەر پاسا زاخۆ گەهشتیە د قوناغێن دەست نیشان کرنا نەخشەیەکێ و پێدڤیە رێیەک ژی بهێتە دیتن بۆ نەهێلا قەرەبالغیێ ل جاددەیا زانکویا زاخۆ.
زێدەتر ئەندازیار سەروەر سەعید گۆت: (نوکە دا سێ نەخشە بۆ ئەندەر پاسا زاخۆ هاتینە دەست نیشان کرن و هێشتا بریار ل سەر دەست نیشان کرنا نەخشەیەکێ نەهاتیە دان بەلێ پێدڤی یە ئەو نەخشەیێ دهێتە دەست نیشان کرن ببیتە ئەگەرێ کێم کرنا قەرەبالغیا ترومبێلان ل دەف زانکویا زاخۆ ژبەر کو قەرەبالغیەکا زێدە ل سەر وێ جاددەیێ دروست دبیت،بۆ ڤێ چەندێ ژئ مە دگەل رێڤەبەریا هاتن و چوونا زاخۆ پەیوەندی هەنە و وان ژی ژلایێ خوە ڤە پلانەکا باش هەیە ب رەنگەکێ کو ئەو ترافیک لایت نێزیک زانکویا زاخۆ نەمینیت و ئەم چاڤەرێ نە هەتا کو نەخشەیێ ئەندەر پاسێ بهێتە ئێکلا کرن دێ ل دویف دا پلانەک ژی هێتە دانان بۆ نەمانا قەرەبالغیێ ل سەر وێ جاددەیێ).
ناڤهاتی گۆت ژی دروستکرنا وێ ئەندەر پاسا نێزیک نیو زاخۆ بەر ب کومپانیەکا نافخۆ کەفتی یە و ب دوماهی ژی هاتیە و وێ کومپانیێ ژی پشکنینێن وێ جاددەیێ ژی کرینە پێخەمەتی وێ چەندێ هەر دەما رەزامەندی ل سەر نەخشەیەکێ هاتە دان ئێکسەر دەست ب کاری بن و پارەیەکێ تەخمین کری هاتیە دانان بەلێ پارەیێ دەست نیشان کریێ دروست بۆ ئەندەر پاسێ ئێکلا نەبوویە ئەو ژی دێ دگەل نەخشەیی هێتە ئێکلا کرن.
نيشاندان