سترانا رۆژا گەل د دەمەکێ کورتدا بۆ ریفراندۆمێ هاتە بەرهەڤکرن
ئەڤرۆ نیوز:
ئەمین بۆتانی چیرۆکا بەرهەڤکرنا سروودا رۆژا گەل بۆ ئەڤرۆ نیوز ڤەدگێریت و دبێژیت: هونەرمەندێ پێشمەرگە حەسەن شەریف وی دەمی ل دهۆکێ بوو، سەرێ ئێڤارەکێ تەلەفۆن کر، ئەم ل سەر گرنگیا بەرهەڤکرنا ستران و سروودەکێ ئاخفتین کو تایبەت بیت ب رۆژا ریفراندۆما سەرخوەبوونا کوردستانێ، دیار بوو کو جەماوەر و هەڤالا ژی ئەو چەند پێخۆش بوو بەرهەمەکێ هونەری ب ڤی ئاوایی بهێتە ئامادەکرن.

ناڤهاتی گۆت ژی: چەند رۆژەکێن کێم ل بەر دەستێ مەبوون، من سۆزدا حەسەنی هەر وێ شەڤێ نەنڤم و هەلبەستێ حازر بکەم، ئەو ژی بەر ب سوید و ئەلمانیا بڕێبکەڤیت، رێناس میران چاڤەرێی وی بوو، حەسەن ل گەل ئاخفت بوو مە بەرهەمەکێ لەزوبەز لبەردەستە، حەسەنی گۆت حەز دکەم هەر کۆپلەکا هەلبەستێ تەمام دکەی بۆ من ڤرێکەی دا ئاوازا وێ بەرهەڤکەم، دەمژمێر شەشی سپێدێ من تەمامیا هەلبەستێ بۆ ئیمێل کر و لێ نڤستم.

ئەمین هێشتا دبێژیت: جۆش و کەیفخوەشیا سەرخوەبوونێ نە کێمە، ئەو جۆشا وان رۆژا مە دیتی، تاما وێ چ جار ژ دلێ مە دەرناکەڤیت، چ تشت ژ ئازادیێ شرینتر نینە، ئازادیا کوردستانێ، وارێ شەهید و پێشمەرگەیان، وارێ جەنەرال بارزانی، وارێ جەسارەتا سەرۆک مەسعود بارزانی و پێشمەرگەهێن لەهەنگ و مێرخاس.

گەلەک ب چەلەنگی حەسەن شەریف و محەمەد عەلی کار ل سەر ئاوازێ کرن، ئالیکاریا هونەرمەند رێناس میران ژی پر گرنگ و هێژابوو رۆژا گەل بهێتە ئامادەکرن، بەردەوام ریکۆردێن بەراهیێ و قۆناغێن ئاواز و ئارانجۆیا وێ ژ لایێ حەسەنی ڤە دهاتە هنارتن و زوو زوو پشتی گۆتوبێژەکە بلەز دهاتە ئەپروڤکرن، ئەرێ سترانا گەل چێ بوو، د وەختەکی باش حازر بوو، چەند رۆژەکێن کێم مانە بۆ بیست و پێنجا مەزن، تەنێ دیمەن مانە ژلایێ دەرهێنەرێ چەلەنگ و ماندینەناس شینوار کەمال بهێنە هەلبژارتن و دانین، مە وەخت نینە چ وێنا بگرین و کامیرێ هەلگرین، شەڤەکا بزەحمت بوو بۆ شینواری، ئەو ژی دو شەڤ و رۆژەکا نەنڤست هەتا کلیپا سروودا رۆژا گەل ئامادەکری ب تایتل ڤە، سەحەتا وی و هەمیا خۆش، دەست و تلێن وان ساغ بن، ئەڤەبوو سروود و سترانا شادئامێزا رۆژا گەل ب جۆش و کەلەجان هاتە بەلاڤکرن و پێشوازیکرن و گوهداریکرن.

ناڤهاتی هێشتا دبێژیت: بۆ گرتنا پەیوەندیا و بەلاڤکرن و بسەرێکڤەئینانێ ژی، عیسا بۆتانی و سوبحی مەناف ل هەولێرێ و زیندان موسا ئورەیی و هەڤال کارکەر و ئەڤراز ژی ل دهۆکێ، کەد و وەستیانا وان جهێ سوپاسیەکا لایق و هێژایە، ئەو هەر هەبن، دیسان هەتا نەیێ ژبیرکرن، گەرەکە پشتەڤانیا برایێ هەلبەستڤان (رزگار کێستەیی) بگرنگی وەرە لبەرچاڤگرتن، جەنابێ وی کەسەکێ وەلاتپارێز و پشتەڤانەکێ هێژایە.
بدرێژاهیا رۆژانێن کەرنەڤالا ریفراندۆما سەرخوەبوونێ، سروود سترانا رۆژا گەل ل هەر دەرێ دهاتە بهیستن، لهەر دەر و جڤات و ئاهەنگەکێ دهاتە گۆتن، حەسەن شەریف ژی ڤەگەریا و ب گۆتنا زندی یا رۆژا گەل، کەرنەڤالێن ریفراندۆما سەرخوەبوونێ هێژ ب رەوش کەفت، هزاران پێشمەرگە و خۆرت و پیر و جوان و مەزن و زارۆیێن مە لبەر ریتما ڤێ سترانێ بەژنا خوە لەیزاندن و سەمایا سەرفرازی و ئازادی و تاما سەرخوەبوونێ شاراندن، زندی و گەش بمینە ئەو رۆژا دیرۆکی، ئەم باوەرن وێ رۆژەک بێ کوردستان سەرخوەبوونا خوە رابگەهینە، جانێ پاکڕەوان و جانگۆریێن مە دگۆرێ دا شاد و ئارام بن و قیز و خۆرتێن مە ژی ب ئازادی پاشەرۆژا وەلاتێ خوە ئاڤا بکەن، بژی کورد و کوردستان، نەمریی بۆ شەهیدان، حورمەت و رێز بۆ دایک و باب و کەسوکارێن سەربلندێن شەهیدان، تەمەنێ درێژ و ساخلەمیەک باش بۆ سەرۆک مەسعود بارزانی، سەروەری و رێزمەندی بۆ پێشمەرگێن قەهرەمانێن کوردستانێ.