شاندەكێ پارتی دیموكراتی كوردستان ل بەغدایێ ل گەل سەركردایەتییا هەڤپەیمانییا (عەزم) كۆمبوو، تێدا دووماهی پێشهاتێن سیاسی یێن ئیراقێ و كۆمەكا دۆسییێن هەڤپشك گەنگەشە كرن.
ل رۆژا ئێكشەمبی، 5 تەممووزا 2026، شاندەكێ پارتی دیموكراتی كوردستان ب سەرۆكاتییا هشیار زێباری، ئەندامێ دەستەیا كارگێرییا مەكتەبا سیاسی ، سەرەدانا بارەگەهێ هەڤپەیمانیا عەزم ل بەغدا كر و ژ ئالیێ ئەندامێن دەستەیا سەركردایەتییا هەڤپەیمانییا ناڤبری ڤە پێشوازی لێ هاتە كرن.
فارس عیسا، سەرۆكێ نوونەرایەتییا حوكمەتا هەرێما كوردستانێ ل بەغدایێ، د بەیاننامەیەكێ دا ئاماژە ب وێ چەندێ كر كو د كۆمبوونێ دا، دووماهی پێشهاتێن گۆڕەپانا سیاسی یا وەلاتی ل گەل كۆمەكا دۆسییێن هەڤپشك هاتنە گەنگەشە كرن.
ل گۆرەی بەیاننامەیێ، هەردو ئالییان دوپاتی ل سەر گرنگییا بهێزكرنا پەیوەندیێن دووقۆلی و چەسپاندنا دیالۆگێ د ناڤبەرا هێزێن سیاسی یێن ئیراقێ دا كر، ب ئارمانجا پشتەڤانیكرنا ئارامییا سیاسی و دروستكرنا سەقایەكێ ئەرێنی د ناڤبەرا ئالیێن جودا دا، ب شێوازەكێ كو خزمەتا پرۆسەیا سیاسی یا وەلاتی بكەت.
بەرهەڤبوویێن كۆمبوونێ هەڤڕا بوون ل سەر گرنگییا پاراستنا هەڤسەنگیێن نیشتمانی و چەسپاندنا بنەمایێ هەڤپشكییا راستەقینە د رێڤەبرنا دەزگەهێن فیدرالی دا، ب جۆرەكێ كو بەرژەوەندییا گشتی و ئارامییا گشتگیر ل ئیراقێ گەرەنتی بكەت.

پەیڤدارێ سەرۆكاتییا هەرێما كوردستانێ راگەهاند، سەرۆكێ هەرێما كوردستانێ د كۆمبوونێن خۆ یێن ل تەهرانێ، دوپاتی ل سەر وێ چەندێ كریە كو هەرێما كوردستانێ د شەڕ و ململانیێن دەڤەرێ دا بێلایەنە و دێ یا بێلایەن مینیت.
دلشاد شەهاب، پەیڤدارێ سەرۆكاتییا هەرێما كوردستانێ، پشتی زڤڕینا شاندێ بلند یێ هەرێمێ ژ كۆمارا ئیسلامییا ئیرانێ، د كۆنگرەیەكێ رۆژنامەڤانی دا گۆت: «مە هەلوەستێ رۆهن و فەرمیێ هەرێما كوردستانێ یێ بێلایەنبوونێ ل دۆر شەڕ و ململانیێن ڤێ دووماهیێ یێن دەڤەرێ دوپات كر».
دلشاد شەهابی ئاشكرا كر كو شاندێ هەرێمێ ب سەرۆكاتییا نێچیرڤان بارزانی، سەرۆكێ هەرێما كوردستانێ، ب ڤەخواندنەكا فەرمی سەرەدانا تەهرانێ كربوو داكو پشكداریێ د رێورەسمێن بەهیدارییا عەلی خامنەیی، رێبەرێ مالئاڤاهیكر یێ وی وەلاتی بكەن، و د وێ سەرەدانێ دا چەندین كۆمبوونێن گرنگ ل گەل بەرپرسێن بلندێن ئیرانێ ئەنجام دان.
پەیڤدارێ سەرۆكاتییا هەرێمێ گۆت: «سەرۆكاتییا هەرێمێ هەموو بزاڤ كرینە دا بێلایەنییا نیشتمانییا هەرێمێ بپارێزیت، هەرچەندە مە زیان ژی د ڤی شەڕی دا بەركەفتینە، لێ ب ئەگەرێ سیاسەتێن مە یێن هەڤسەنگ، مە ب سەركەفتیانە قۆناغ دەرباز كر».
سەبارەت ب پەیوەندیێن د ناڤبەرا هەولێرێ و تەهرانێ دا، شەهابی ئاماژە ب وێ كر كو ئەڤ پەیوەندییە دێ مینن دۆستانە و ئیرانێ ژی گرنگییەكا مەزن دایە دیتنا شاندێ هەرێمێ د وی دەمێ دا كو وەلاتی د قۆناغەكا هەستیار دا بوو، ئەڤە ژی نیشانەیا پێگەهێ گرنگێ هەرێما كوردستانێ یە ل سەر ئاستێ دەڤەرێ.
ل دۆر رەوشا ناڤخۆیا هەرێما كوردستانێ ژی، دلشاد شەهاب ئەو دەنگۆباس رەتكرن كو باس ل لاوازبوونا پێگەهێ هەرێمێ دكەن و گۆت: «پێگەهێ سیاسی و دیپلۆماسیێ هەرێمێ یێ بهێزە. راستە كێشەیێن ناڤخۆ هەنە، لێ هەرێم د مەترسیێدا نینە».
سەبارەت ب كاراكرنا پەرلەمانێ كوردستانێ ژی، پەیڤدارێ سەرۆكاتییا هەرێمێ دوپات كر: «خەلكێ كوردستانێ و وەلاتێن هەڤپەیمان ژی چاڤەڕێی وێ چەندێ نە ئەم پەرلەمانی كارا بكەین، چونكە ئەو بابەتە گەلەك گیروبوویە و كاراكرنا پەرلەمانی مافەكێ سەرەتایی و فەرمیێ گەلێ كوردستانێ یە».

دیدار/ دلۆڤان ئاكرەیی

بەرپرسێ لقێ 23 یا پارتی دیموكراتی كوردستانێ دیاركر، رێككەڤتنا ڤێ دووماهییێ یا د ناڤبەرا ئێكەتیێ و نەوەی نوێ دا وەك نیشانا شكەستنا سیاسی یا هەردوو ئالیان بناڤ كر.
سەنگەر كانەبی، بەرپرسێ لقێ 23 یێ پارتی دیموكراتی كوردستان، دەربارەی رێككەفتنا ڤێ دووماهییێ یا د ناڤبەرا ئێكەتیێ و نەوەی نوێ دا بۆ رۆژنامەیا (ئەڤرۆ) گۆت: ئەڤ پێنگاڤە قۆناغەكا نوو یا سیاسی ل هەرێما كوردستانێ نیشا ددەت، ژ بەر كو نەوەی نوێ كو چەندین سالە خۆ وەك بەرەیێ نەرازی و ئۆپۆزسیۆنێ ب خەلكی نیشا دا و سیاری پێلا نەرازیبوونان ببوو، ل دووماهییێ روویێ خۆ یێ راستەقینە دیار كر و پێگەهێ خۆ پێشكێشی ئێكەتیێ كر و ئەز پیرۆزباهییێ ل خەلكێ باژێڕێ سلێمانیێ دكەم و دبێژمە وان پشتڕاست بن كو هەر وەك چەوا د دەمێ بۆری دا رێككەفتنێن ب ڤی رەنگی هەبوون كو مۆمەك ڤەمراند، نوكە ژی گلۆپەك ل ڤی سنۆری ڤەمرییا.
سەنگەر كانەبی ل دۆر گوتنێن شاسوار عەبدولواحدی كو خۆ ب كەسایەتییێن دیرۆكی یێن وەك نێلسۆن ماندێلا بەراورد دكەت گۆت: نێلسۆن ماندێلا ژ پێخەمەت دۆزا نەتەوەیەكێ و بەرەڤانیكرن ژ مافێن گەلێ خۆ د زیندانێ دا بوو و ئامادە نەبوو داگیرانێ ل سەر بنەمایێن خۆ بكەت، بەلێ شاسوار عەبدولواحد ل سەر پتر ژ 15 هەتا 20 دۆسییێن گرێدایی خوارنا مافێ خەلكی، فێلكرن و كێشەیێن دارایی یێن وەلاتییان هاتبوو دەستبەسەركرن، لەوڕا بەراوردكرنا ڤان ب ئێكدوو، بێڕێزییەكا مەزنە ب دیرۆكێ.
بەرپرسێ لقێ 23 یا پارتی، دەربارەی هەلوەستێ پارتی ل سەر ڤێ هەڤپەیمانییا نوو ئاماژە ب هندێ دا، پارتی ژ چو رێككەوتنێن سیاسی ناترسیت و ژ پشتی سالا 1992ێ وەرە هەتا نوكە، د هەر قۆناغەكێ دا كو دژایەتییا پارتی پتر هاتبیتە كرن، دەنگێن پارتی بەر ب زێدەبوونێ چوونە؛ ژ 500 هزار دەنگان بۆ 800 هزاران، پاشی بۆ ئێك ملیۆن دەنگان و د دووماهی هەلبژارتنان دا ژی بۆ پتر ژ ملیۆنەك و 200 هزار دەنگان بلند بوویە، نوكە ژی پارتی بەرهەڤییان دكەت بۆ ب دەستڤەئینانا ملیۆنەك و 500 هزار دەنگان.
سەنگەر كانەبی دوپاتی ل سەر وێ چەندێ ژی كر، ئێكەتی ل شوونا كو داخوازییا لێبۆرینێ ژ خەلكێ سنۆرێ سلێمانیێ و دەوروبەرێن وێ بكەت كو چەندین سالە ژ بەر نەبوونا خزمەتگوزارییان دنالن و رێگر بووینە كو حوكمەتا هەرێمێ ب رێیا وەزارەتێن فەرمی خزمەتا وان بكەت، پەنایێ دبەتە بەر هەڤپەیمانییێن ب ڤی رەنگی كو بتنێ بۆ مەرەمێن بەرتەنگێن حزبی و كۆمكرنا كورسییانە.
رۆهنكر ژی، كو دەرگەهێ گەنگەشە و دانوستاندنێن پارتی هەردەم ل سەرجەم ئالیێن سیاسی، هەتاكو ئالیێن ئۆپۆزسیۆن ژی یێ ڤەكرییە لەوما بۆ پێكئینانا كابینەیا نوو یا حوكمەتێ دڤێت هەموو بزڤڕنە سەر مێزا دیالۆكێ ژ پێخەمەت بەرژەوەندییا گشتییا گەلێ كوردستانێ، نەك پەیڕەوكرنا سیاسەتا ب مەرج و بەرتەنگ یا حزبی كو زیانێ دگەهینیتە ئێكڕێزییا نیشتمانی.

سیاسەتمەدارەکێ ناڤدار یێ کورد ل تورکیا دیار دکەت دڤێت کورد ئێکەتیا خوە ل تورکیا دروست بکەن و هەکە کورد ئێکگرتی بن و د هەلبژارتنان دا رێژەیا دەنگێن کوردان بگەهیتە ٢٠٪ وی دەمی ل تورکیا کەس نەشێت بێی کوردان بهێتە سەر دەستهەلاتێ.

ئەحمەد تورک ئەندامێ بەرێ یێ پەرلەمانێ تورکیا و سیاسەتمەدارێ ناڤدار یێ کورد ل تورکیا دیار کر، نها سەردەمەک نوو ل تورکیا دەستپێکریە، پێدڤیە هەموو هێزێن سیاسی یێن کورد ل تورکیا پێکڤە کار بکەن، هەکە هێزێن کوردی ئێکگرتی بن و بشێن پێکڤە کار بکەن وی دەمی دێ رێژەیا دەنگێن کوردان ل تورکیا گەهیتە ٢٠٪ و هەکە تشتەک وەسا روو بدەت دێ گوهۆڕینێن گەلەک مەزن روو دەن و گۆت: (هەکە ئەم بشێین رێژەیا دەنگێن کوردان د هەلبژارتنان دا بگەهیننە ٢٠٪ وی دەمی ئێدی چو هێزەک ل تورکیا نەشێت بێی کوردان حوکمەتێ ئاڤا بکەت و بهێتە سەر دەستهەلاتێ، ژ بەر ڤێ یەکێ ژی گەلەک یا گرنگە ئەم هەموو پێکڤە کار بۆ ئێکەتیا ناڤمالیا کوردان ل تورکیا بکەین).
ناڤهاتی د پشکەکا دی یا ئاخڤتنا خوە دا ئاماژە ب ڤێ یەکێ ژی کر کو، ل ژێر ناڤێ قووناغا ئاشتیێ رۆژانە گەلەک تشتان دبێژن لێ هەتا نها ب کریاری چو نەهاتیە کرن، ژ بۆ چارەسەرکرنا پرسا کوردی ل تورکیا هەتا نها چو نەهاتیە کرن، هەکە دەستهەلات ل سەر هەلوەستێ خوە یێ نها ل هەمبەر گەلێ کورد بەردەوام بیت دێ ئالۆزیێن هەی مەزنتر لێ هێن و گۆت: (هەتا کورد ل تورکیا نەگەهنە مافێن خوە یێن رەوا دێ ئالۆزی بەردەوام بن، بابەت تنێ راگرتنا شەڕی و توندوتیژیێ نینە، بابەت مافێن رەوا یین گەلێ کوردە و دڤێت ژ بۆ ڤێ یەکێ ژی دەولەت گەلەک پێنگاڤان بهاڤێژیت، لێ مخابن هەتا نها چو نەهاتیە کرن).
سیاسەتمەدارێ ناڤدار یێ کورد ل تورکیا د بەردەوامیا ئاخڤتنا خوە دا ئاماژە ب ڤێ یەکێ ژی کر، دڤێت چو ئاستەنگی ل هەمبەر خەباتا سیاسی بۆ کوردان نەهێتە دروست کرن، هەکە دبێژن کورد و تورک برانە وی دەمی کا تورکان ل ڤی وەلاتی چ ماف هەنە دڤێت کوردان ژی هەمان ماف هەبیت، هەتا نها ژ بەر هزرێن وان یێن سیاسی ب هزاران سیاسەتمەدارێن کورد د زیندانان دانە و نەهاتینە ئازاد کرن و گۆت: (هەتا نها چەندین جاران دادگەها مافێن مرۆڤی یا ئۆرۆپا بریارا ئازادکرنا دەمیرتاشی و هەڤالێن وی دایە، لێ هەتا نها ژی دەستهەلاتا تورکیا رازی نەبوویە ئەو بهێنە ئازاد کرن، ئەو یەک ژی نیشا ددەت کو هێشتا ژی نیەتا دەولەتا تورکیا ژ بۆ چارەسەرکرنا پرسا کوردی یا پاک نینە و ئەو یەک ژ ئالیێ کوردان ڤە ب چو رەنگەکێ ناهێتە قەبوول کرن).
ئەحمەد تورک د پشکەکا دی یا ئاخڤتنا خوە دا ئەو یەک ژی دیار کر، کورد هشیار بووینە و هەکە کورد ئێکگرتی بن دێ شێن کاریگەریەکا مەزن ل پاشەرۆژا تورکیا بکەن، هەکە ئەم رێژەیا دەنگێن خوە بگەهیننە ٢٠٪ وی دەمی چو هێزەکا سیاسی ل تورکیا نەشێت بێی کوردان بهێتە سەر دەستهەلاتێ، ئەو یەک ژی دێ بیتە ئەگەرێ گوهۆڕینەکا گەلەک مەزن و دیرۆکی، بێگومان کورد بهێزن، لێ مخابن پارچەبوونا هەی وەسا کریە ئیرادەیا سیاسی یا کوردان لاواز دەرکەڤیت، ئێدی دڤێت ئەم هەموو پێکڤە دەست ب قووناغەکا نوو بۆ پاشەرۆژا گەلێ خوە بکەین.
ناڤهاتی د دووماهیا ئاخڤتنا خوە دا داخواز ژ ئەردۆغانی و دەستهەلاتا تورکیا ژی کر کو، سۆزێن بەری نها داینە گەلێ کورد بجه بینن، دەست ژ سیاسەتا مژوولکرنا کوردان بەردەن، ب کریاری کار بۆ چارەسەرکرنا پرسا کوردی بکەن و ئاستەنگان ل هەمبەر ئاشتیێ دروست نەکەن، چونکی هەکە ڤێجارێ دەلیڤەیا هەی ژ دەست بچیت دێ جارەکا دی گەلەک یا ب زەحمت بیت کو کورد باوەریا خوە ب دەستهەلاتێ بینن و گۆت: (ئالیێ کوردی گەلەک تشت ئەنجام داینە، لێ هەتا نها ژ ئالیێ دەستهەلاتێ ڤە چو نەهاتیە کرن، کورد چاڤەرێنە ب کریاری دەولەت ژی هندەک تشتان بکەت، چونکی باوەریا کوردان ب قووناغا ئاشتیێ گەلەک کێم بوویە و بەرپرسیارێ ڤێ یەکێ ژی دەولەتا تورکیا یە، هەکە دەولەتێ بڤێت قووناغا نها ژناڤ نەچیت بلا یا پێدڤی بهێتە کرن).

بۆ وەغەرا دووماهیێ یا خەباتكەر و پێشمەرگەیێ هەردوو شۆڕشێن مەزنێن ئیلۆن و گولانێ، خودێ ژێ رازی (عەبدولڕەحمان پێداوی)، سەرۆك مەسعود بارزانی و نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ د پەیامێن جودادا بەهیداری و هەڤخەمییا خوە ئاراستەی مالبات و كەسوكارێن ناڤبری كرن.
سەرۆك بارزانی د پەیاما خۆدا ئاماژە ب وێ چەندێ كر كو رەحمەتی كەسایەتییەكا نیشتمانپەروەر بوو، پشتی دەرچوونا وی ژ كۆلیژا لەشكەری، پەیوەندی ب رێزێن شۆڕشا ئیلۆنێ كر و وەك فەرماندەیەكێ ژێهاتی د شۆڕشێ دا رۆل دیت، هەروەسا د سالا 1976ێ دا ئەندامێ سەركردایەتییا كاتی و پاشی كادرەكێ چالاك و دلسۆزێ شۆڕشا گولانێ بوو.
هەر د ڤێ دەربارێ دا، نێچیرڤان بارزانی، سەرۆكێ هەرێما كوردستانێ ژی ب هەمان شێوە پەیامەكا بەهیداریێ بەلاڤكر و تێدا ئاماژە ب وێ چەندێ كر كو رەحمەتی ژییەكێ درێژ ب پێشمەرگاتی و خەباتێ د رێكا ئازادییا وەلاتێ خۆدا دەرباز كر و بیرهاتنا وی دێ هەر زندی مینیت.
ژ ئالیێ خۆ ڤە، مەسرور بارزانی، سەرۆكێ حوكمەتا هەرێما كوردستانێ ژی د پەیاما خۆدا وێرەكی و دلسۆزییا رەحمەتی د خەباتا رزگاریخوازا گەلێ كوردستانێ دا ب بیرئینا و هیڤی خواست خودایێ مەزن گیانێ وی ب بەهەشتا بەرین شاد بكەت و سەبر و ئارامیێ بدەتە مالبات و هەڤال و هەڤسەنگەرێن وی.

نێچیرڤان بارزانی، سەرۆكێ هەرێما كوردستانێ، مل ب ملێ هەژمارەكا بەرچاڤا سەركردە و بەرپرسێن بلند یێن وەلاتێن دەڤەرێ و جیهانێ، ل تەهرانێ پشكداری د رێورەسمێن فەرمی یێن مالئاڤاییكرنێ ژ رێبەرێ بلندێ بەرێ یێ كۆمارا ئیسلامییا ئیرانێ كر.
سەرۆكێ هەرێما كوردستانێ د دەفتەرا بەهیداریێ دا پەیڤەك تومار كر. تێدا ل گەل دووپاتكرنا بەهیداریێ و هەڤسۆزییا خۆ و هەرێما كوردستانێ بۆ مالئاڤاهیكرنا رێبەرێ بلندێ بەرێ ئایەتوللا عوزما سەید عەلی خامنەیی، رۆناهی ئێخستە سەر كاریگەری و ئەو میراتێ ل دووڤ خۆ ل كۆمارا ئیسلامییا ئیرانێ و جیهانا ئیسلامی بجهـ هێلای.
هەر د چارچۆڤەیا سەردانا خۆ یا فەرمی دا بۆ تەهرانێ ب مەرەما پشكداریكرنێ د رێورەسمێن فەرمی یێن مالئاڤاییكرنێ ژ تەرمێ عەلی خامنەیی، رێبەرێ بەرێ یێ كۆمارا ئیسلامییا ئیرانێ، نێچیرڤان بارزانی، سەرۆكێ هەرێما كوردستانێ، زنجیرەیەكا كۆمبوونێن گرنگ ل گەل بەرپرسێن بلندێن ئیرانێ ئەنجامدان.
د ڤان كۆمبوونان دا، نێچیرڤان بارزانی ل گەل مەسعود پزیشكیان، سەرۆككۆمارێ ئیرانێ، محەمەد باقر قالیباف، سەرۆكێ جڤاتا شۆرایا ئیسلامی، و عەباس ئێراقچی، وەزیرێ دەرڤە، بابەتێن چارەنڤیسسازێن دەڤەرێ گەنگەشە كرن. سەرۆكێ هەرێما كوردستانێ د دەفتەرا بەهیداریێ دا پەیڤەك تومار كر و سەرەرای دەربڕینا هەڤسۆزیێ، رۆناهی ئێخستە سەر كاریگەرییا رێبەرێ بەرێ یێ ئیرانێ و میراتێ وی ل جیهانا ئیسلامی.
د كۆمبوونێن خۆ ل گەل سەركردەیێن ئیرانێ دا، سەرۆكێ هەرێما كوردستانێ دوپاتی ل سەر گرنگییا پێشڤەبرنا پەیوەندیێن ئیراقێ و هەرێما كوردستانێ ل گەل ئیرانێ كر. د وارێ ئابۆری دا، هەردو ئالییان دووپاتی ل سەر بەرفرەهكرنا ئاڵوگۆڕێن بازرگانی و كەرتێن ئابۆری كر ب رەنگەكێ خزمەتا بەرژەوەندیێن هەڤپشك بكەت.
ل دۆر رەوشا دەڤەرێ، نێچیرڤان بارزانی و بەرپرسێن ئیرانێ د هەڤڕای بوون ل سەر پێدڤییا پاراستنا ئارامیێ و پشتگرێدان ب دیالۆگێ بۆ چارەسەركرنا ئاریشەیان. د ڤێ چوارچۆڤێ دا، پێشهاتێن دانوستاندنێن د ناڤبەرا تارانێ و واشنتۆنێ دا بوون تەوەرەكێ گرنگ، كو تێدا هیڤییا سەركەفتنێ بۆ بزاڤێن دیپلۆماسی هاتە خواستن، ب ئارمانجا كو ئەڤ دانوستاندنە ببنە هێڤینەكا ئاشتییا بەردەوام بۆ دەڤەرێ و دووماهیێ ب ئالۆزی و گرژیێن سەربازی بینن.

نێچیرڤان بارزانی، سەرۆكێ هەرێما كوردستانێ، ب هەلكەفتا سالڤەگەرا 250 یا سەربخۆیا ئەمریكا، پەیامەكا پیرۆزباهیێ ئاراستەی دۆنالد ترەمپ، سەرۆكێ ئەمریكا و گەلێ وی وەلاتی كر.
رۆژا شەمبیێ، 4 تەممووزا 2026، نێچیرڤان بارزانی د پۆستەكێ تۆڕا جڤاكییا «ئێكس»دا راگەهاند: «د سالڤەگەرا 250 یا راگەهاندنا سەربخۆییێدا، گەرمترین پیرۆزباهیێن خۆ ئاراستەی سەرۆك دۆنالد ترەمپ و گەلێ ئەمریكا دكەم».
سەرۆكێ هەرێما كوردستانێ ئاماژە ب وانەیێن دیرۆكی یێن ئەمریكا كریە و دبێژیت: «وانەیا نەمر یا ئەمریكا ئەوە كو ئازادیێ، پێدڤی ب تشتەكێ پترە ژ هێزێ. ئازادی پێدڤی ب دەستوور، دەزگەه، هەڤسەنگییا فیدرالی، و رازیبوونا گەلێ ئازاد هەیە».
نێچیرڤان بارزانی ئەو پرەنسیپێن ئەمریكا ب پاشەڕۆژا ئیراقێ و هەرێما كوردستانێ ڤە گرێدان و نڤیسیە: «د دەمەكێدا هەرێما كوردستانێ و ئیراق ل هیڤییا هەڤپەیمانییەكا بهێزترن ل گەل ئەمریكا، ئەم باوەر دكەین هەمان پرەنسیپ بۆ پاشەڕۆژا ئیراقێ ژی وەك بنەڕەت دمینن، دڤێت ئارامی ل سەر بنەمایێ پێگیریێ ب دەستووری، فیدرالیزمێ، و پاراستنا تماما ماف و پێگەهێ هەرێما كوردستانێ دناڤ دەستوورێ ئیراقێدا بیت».
د دووماهیا پەیاما خۆدا، سەرۆكێ هەرێما كوردستانێ پێزانینێن خۆ بۆ رۆل و هاریكاریێن بەردەوام یێن واشنتۆنێ دیار كر و دبێژیت: «ئەم ب سوپاسی و پێزانین ڤە ل دۆستایەتی و سەركردایەتییا ئەمریكا دنێڕین، هەروەسا پشتەڤانیێن وێ یێن بەردەوام بۆ هەرێما كوردستانێ و ئیراقێ».

نێچیرڤان بارزانی، سەرۆكێ هەرێما كوردستانێ، ب توندی هێرشا تیرۆرستی ئەوا ل حەفتییا بۆری ل دیمەشقا پایتەختا سووریایێ خەلكێ مەدەنی كربوو ئارمانج، پرۆتەستۆكر. د هەمان دەم دا، پشتەڤانییا تمام یا هەرێما كوردستانێ بۆ حوكمەت و گەلێ سووریایێ پێخەمەت پاراستنا ئارامییا وی وەلاتی نیشا دا.
سەرۆكێ هەرێما كوردستانێ د پەیامەكێ دا راگەهاند: «ب توندی وی كاری تیرۆرستی پرۆتەستۆ دكەین دكەین یێ كو مەدەنیێن بێ تاوان ل دیمەشقێ كرینە ئارمانج».
نێچیرڤان بارزانی ل گەل دەربڕینا هەڤخەمییا خۆ گۆت: «سەرەخۆشی و هەڤخەمییا خۆ یا راستگۆ ئاراستەی كەسوكارێن قوربانییان دكەین و داخوازا ساخبوونەكا ب لەز بۆ برینداران دكەین».
د پشكەكا دی یا پەیاما خۆ دا، سەرۆكێ هەرێما كوردستانێ ل سەر رەوشا سیاسی و ئەمنی یا وەلاتی گۆت: «پشتەڤانییا تمام یا خۆ بۆ حوكمەت و گەلێ سووریایێ دوپات دكەین و پشتەڤانییا هەموو وان پێنگاڤان دكەین یێن كو ئاسایش و ئارامییا سووریایێ بهێز دئێخن و سەلامەتییا وەلاتییان دپارێزن».

رێبوار بابكەیی رادگەهینیت، وێ رێككەفتنا د ناڤبەرا شاسوار عەبدولواحیدی و بافل تالەبانی دا ل زیندانێ هاتیە ئەنجامدان، بتنێ بۆ پاراستنا پرۆژەیێن كەسی یێن شاسوار عەبدولواحیدی بوویە و ب وێ پێنگاڤێ ناڤبری بوویە «كادرەكێ ئێكەتیێ».
رێبوار بابكەیی، ئەندامێ بەرێ یێ جڤاتا نوونەرێن ئیراقێ ژ فراكسیۆنا پارتی، گۆت»ئەوا د ناڤبەرا شاسوار عەبدولواحیدی و بافل تالەبانی دا روودای، رێككەفتن نەبوو، چونكی رێككەفتن دڤێت ب رازیبوونا هەردوو ئالییان بیت، بەلكو ئەوا هاتییە كرن ل زیندانێ و ب «زۆری» بوویە».
رێبوار بابكەیی ئاماژە ب وێ چەندێ كر، ئارمانجا سەرەكی یا شاسوار عەبدولواحیدی ژ وێ رێككەفتنێ، پاراستنا پرۆژەیێ چاڤیلاند و پرۆژەیێن دی یێن كەسی بوویە و گۆت ژی: «دەستەسەركرنا شاسواری هەر ل سەر بابەتا دزییا مال و مولكێن وەلاتییان و پشكێن خودان پشكان بوو».
ل دۆر بەراوردكرنا خۆ ب نێلسۆن ماندێلای، بابكەیی گۆت: «جهێ پێكەنینێ یە شاسوار عەبدولواحید خۆ ب ماندێلای بەراورد بكەت، چونكی ماندێلا ل سەر دۆزا گەلێ خۆ د زیندانێ دا بوو، لێ شاسوار ل سەر دزییا پشكێن خەلكی و نەدانا قەرێن حوكمەتێ هاتە زیندانكرن، لەورا ئەڤە سڤكایەتی یە ب دیرۆكا ماندێلای».
بابكەیی دوپات كر كو ئەڤە هەڤپەیمانی نینە و دژبەرەكا مەزنە، چونكی نەهاتییە كرن هێزەك بانگەشەیا ئۆپۆزسیۆنبوونێ بكەت و بچیتە پال هێزەكا كو 33 سالانە ل دەستهەلاتێ یە. راگەهاند ژی: «ب ئیمزاكرنا ڤێ رێككەفتنێ، شاسوار عەبدولواحید ب فەرمی بوویە كادرەكێ ئێكەتیێ و 15 كورسیێن نەوەی نوێ كرنە قوربانی بتنێ بۆ وێ چەندێ دۆسیێن خۆ یێن یاسایی دابئێخیت و ئێكەتیێ ژی چەند پۆستێن كابینەیا دەهێ وەربگریت».
هەروەسا رێبوار بابكەیی پێشبینی كر كو ئەڤ رێككەفتنە دێ دووماهیێ ب نەوەی نوێ ئینیت و گۆت: «ئەڤە دەستپێكا ڤەمراندنا گلۆپا نەوەی نوێ یە، د هەلبژارتنێن داهاتی دا دێ وەك بزاڤا گۆڕان لێ هێن و دبیت ئێك كورسی یا پەرلەمانی ژی بۆ نەمینیت، چونكی شاسواری هەموو پرەنسیپێن ئەخلاقی و سیاسی یێن خۆ ل پێخەمەت بەرژەوەندییا مادی بنپێكرن».

ئەندامەكێ مەكتەبا سیاسی یا پارتی دیموكراتی كوردستان راگەهاند، دەنگێ خەلكی د هەلبژارتنەكا ئازاد و پاقژ دا، بتنێ ژێدەرێ شەرعی یێ ئالوگۆڕا دەستهەلاتێ یە؛ داخوازێ ژ ئێكەتی نیشتمانی كوردستان و نەوەی نوێ ژی دكەت بهێنە پێش، داكو پەرلەمانێ كارا بكەن و گەنگەشەیا كێشەیان د ناڤ هۆلا پەرلەمانی دا بكەن.
هێمن هەورامی، ئەندامێ مەكتەبا سیاسی یا پارتی دیموكراتی كوردستان، د پەیامەكێ دا ل سەر هەژمارا خۆ یا فەرمی ل تۆڕا جڤاكی یا «ئێكس» دیار كر، دەنگێ وەلاتییان ب رێیا هەلبژارتنەكا دیموكراسی، ئازاد و زەلال، بتنێ ژێدەرێ راستەقینە و شەرعی یە بۆ هەر گۆڕانكاریەكێ د هەڤسەنگییا هێزی و ئالوگۆڕا دەستهەلاتێ ل هەرێما كوردستانێ دا.
هەورامی ئاماژە ب ئەنجامێن هەلبژارتنێن مەها 10 یا سالا 2024 دا و نڤیسیە: « ئەم وەك پارتی دیموكراتی كوردستان، پتر ژ 400 هزار دەنگان ل پێش ئێكەتی نیشتمانی كوردستان و نەوەی نوێ بووینە، هەتا هەكە دەنگێن هەردوو وان ئالییان پێكڤە بهێنە كۆمكرن ژی».
ئەندامێ مەكتەبا سیاسی یا پارتی دبێژیت: «هەكە وان دڤێت بێژن هەڤسەنگییا هێزی هاتییە گوهۆڕین و رایا گشتی گۆڕانكاری ب سەر دا هاتییە، بۆچی ناهێنە پێش داكو د رۆژێن بهێن دا پەرلەمانێ كوردستانێ كارا بكەین؟»
هێمن هەورامی پرسیارێ دكەت، هەكە ئێكەتی و نەوەی نوێ دبینن كورسیێن وان وەك یان پتر ژ كورسیێن پارتی نە، بۆچی ب شێوەیەكێ كریاری پێنگاڤان ناهاڤێژن بۆ كاراكرنا پەرلەمانی، داكو ل وێرێ ل سەر هەموو پرسێن هەلاویستی دانوستاندنێ بكەن.