سه‌رۆك بارزانی: ئێدی نابیت هیچ پێكهاته‌كێ ئیراقی د حوكمرانیێ دا بهێته پشت گوه هاڤێتن
ئه‌ڤرۆ:
سه‌رۆك بارزانی په‌یامه‌كا پیرۆزباهیێ ب هه‌لكه‌فتا سه‌رێ سالا نوو 2022 به‌لاڤكر و راگه‌هاند، هه‌لبژارتنێن ئۆكتۆبه‌را بۆری یێن جڤاتا نوونه‌رێن ئیراقێ هه‌لبژارتنێن باش بوون و ئه‌نجامێن وان ژی خواست و ئیرادا وه‌لاتیان بوو.
ده‌قێ په‌یاما سه‌رۆك بارزانی..
ب هه‌لكه‌فتا سه‌رێ سالا زایینی یا نوو پیرۆزباهیێ ل خه‌لكێ كوردستانێ ومالباتێن سه‌ربلندێن شه‌هیدان و پێشمه‌رگێن قه‌هره‌مان دكه‌م، هیڤیدارم سالا نوو ده‌ستپێكا قۆناغه‌كا نوو بیت بۆ باشتربوونا ره‌وشا خه‌لكی و بده‌ستڤه‌ئینانا سه‌قامگیریێ و پێشكه‌فتنا زێده‌تر بۆ گه‌لێ مه.
ب پێدڤی دزانم سوپاسیێن خوه ئاراسته‌ی هێزا پێشمه‌رگه‌ی و ده‌زگه‌هێن ئه‌منی و هه‌موو خه‌لكێ كوردستانێ بكه‌م كو هه‌رده‌م ب قوربانیدان و خۆراگریا خوه، ل به‌رانبه‌ر گه‌ف و تیرۆرێ و ئابلۆقدانێ راوه‌ستیاینه و كوردستان پاراستیه، ئه‌ركێ سه‌ر ملێ هه‌موو داموده‌زگا وئالیێن سیاسی یه د ئاستێ قوربانیدانا گه‌لێ مه دابن و پێكڤه و ب هیمه‌تا هه‌موو ئالیه‌كی ده‌ستكه‌فت و مافێن خه‌لكێ كوردستانێ بپارێزن.
هه‌لبژارتنێن ئۆكتۆبه‌را بۆری یێن جڤاتا نوونه‌رێن ئیراقێ، هه‌لبژارتنێن باش بوون و ئه‌نجامێن وان ژی خواست و ئیرادا وه‌لاتیان بوو.
پشتی په‌سه‌ندكرنا ئه‌نجامان ژئالیێ دادگه‌ها فیدرالی یا بلند ڤه پێدڤیه گاڤ و نه‌ریتێن دستووری بۆ پێكئینانا كابینا نوو یا حوكمه‌تێ و ده‌زگه‌هێن دی بله‌زتر بهێنه بجهئینان و ڤه‌ژاندن و خزمه‌تگوزاری و ماف و خواستێن وه‌لاتیان و سه‌رجه‌م پێكهاتێن ئیراقێ ببیته كارێن سه‌ره‌كی یێن به‌رنامێن حوكمه‌تا داهاتی ئه‌وژی د چارچۆڤێ بجهئینانا هه‌رسێ پره‌نسیبێن هه‌ڤپشكی و سازان و هه‌ڤسه‌نگی د حوكمرانیێ دا.هه‌ڤده‌م نابیت ئێدی بزاڤا پشت گوه هاڤێتنا هیچ پێكهاته‌كێ ئیراقی د حوكمرانیێ دا بهێته كرن.
ب هه‌لكه‌فتا سه‌رێ سالا زایینی 2022 جاره‌كادی دووپاتیێ ل په‌یاما ئاشتیانه و فه‌رهه‌نگا پێكڤه‌ژیانا گه‌لێ كوردستانێ دكه‌ین و پێدڤیه هه‌موو ئالیه‌ك ب باشی د وێ چه‌ندێ بگه‌هیت كو ئیراق و ده‌ڤه‌را مه ئێدی نه‌شێت خوه ل به‌ر كێشه و توندوتیژیێ و تیرۆرێ و توندره‌ویێ و نه‌سه‌قامگیریێ بگریت. ئه‌ركێ جڤاتا نێڤده‌وله‌تی ژی یه بۆ پاراستنا ئاشتیێ و دادپه‌روه‌ریێ و ته‌ناهیێ هۆكاره‌كێ هاریكار بیت بۆ وێ چه‌ندێ ئێدی زێده‌تر گه‌لێن ده‌ڤه‌رێ و خه‌لكێ بێتاوان تووشی نه‌هامه‌تیێ و وێرانكاریێ نه‌بن.
ل سالا نوو ب ئومێدا وێ چه‌ندێ نه كو ئاشتی و پێكڤه ژیان ل ده‌ڤه‌را مه په‌یدابیت و ئومێدا خێر و خوه‌شیێ بۆ گه‌لێ كوردستانێ دخوازم، ژ خودێ مه‌زن دخوازم گه‌لێ مه ژ هه‌موو جۆره په‌تا و نه‌خوه‌شی و نه‌هامه‌تی و كاره‌ساته‌كێ یێ دوور بیت.
