حاكم زاملی: ئه‌و خانیێ هێرشا مووشه‌كی ل سه‌ر هاتیه كرن یێ خێزانه‌كا ئیراقی بوو
شانده‌كێ جڤاتا نوونه‌رێن ئیراقێ كو پێكهاتبوو ژ هه‌ردو جێگرێن سه‌رۆكێ جڤاتێ حاكم زاملی و شاخه‌وان عه‌بدوللا و هه‌ژماره‌كا په‌رله‌مانتاران سه‌ره‌دانا هه‌ولێرێ كر بۆ ژ نێزیك ئاگه‌هداربوون ل سه‌ر روودانا هێرشا مووشه‌كی یا ئیرانێ ل سه‌ر هه‌ولێرێ ئه‌نجامدای.
حاكم زاملی، جێگرێ ئێكێ یێ سه‌رۆكێ جڤاتا نوونه‌ران راگه‌هاند” مه سه‌ره‌دانا هه‌ولێرێ كر بۆ دیتن و زانینا راستیان و هۆكارێن وێ هێرشا مووشه‌كی ل سه‌ر هه‌ولێرێ هاتیه ئه‌نجامدان و ب شێوه‌كێ مه‌یدانی مه ڤه‌كۆلین د وی بابه‌تی دا كر و ئه‌م باش دزانین هێرشكرن ل سه‌ر هه‌ر جهه‌كی ل ئیراقێ ئانكو ب هێرشه ل سه‌ر هه‌موو ئیراقێ”.
زاملی زێده‌تر گۆت” پشتی مه سه‌ره‌دانا جهێ هێرشێ كری دیاربوو كو ئه‌و جهه خانیێ خێزانه‌كا ئیراقی یه و یێ شێخ بازی یه و ئه‌ز ب خوه چومه د هه‌موو ژۆرێن وی خانی ڤه و هه‌ر تشتێ من دیتی دیاردكه‌ت كو ئه‌و خانیێ خێزانه‌كا ئیراقی یه و پشتی كارێ لژنا دووڤچوونا راستیان ل دۆر وێ هێرشێ ب دووماهی دهێت دێ داخوازا روونشتنه‌كحا جڤاتا نوونه‌ران كه‌ین بۆ دانوستاندنێ ل سه‌ر ئه‌نجامێ ئه‌و لژنه گه‌هشتیێ”.
ژ ئالیێ خوه‌ڤه شاخه‌وان عه‌بدوللا، جێگرێ دوویێ یێ سه‌رۆكێ جڤاتا نوونه‌رێن ئیراقێ گۆت” شانده‌كێ جڤاتا نوونه‌ران سه‌ره‌دانا هه‌رێمێ كریه و چوویه جهێ روودانێ و ڤه‌كۆلین دێ ل سه‌ر وی بابه‌تی هێته كرن و پشتی زڤرینا وی شاندی بۆ به‌غدا دێ راپۆرتا خوه هه‌بیت و ل روونشتنا تایبه‌ت یا جڤاتا نوونه‌ران دێ هێته به‌رچاڤكرن”.
