فراكسیۆنا پارتی هه‌لویستێ خوه ل دۆر ده‌ست ژكاركێشانا په‌رله‌مانتارێن سه‌در رادگه‌هینیت
ئه‌ڤرۆ:
ئه‌ندامه‌كێ جڤاتا نوونه‌رێن ئیراقێ ژ فراكسیۆنا پارتی دیموكراتی كوردستان راگه‌هاند، رێزێ ل بریارا په‌رله‌مانتارێن سه‌ر ب ره‌وتێ سه‌دری ڤه دگرین، ئه‌ڤه پرۆسه‌كا دیموكراسیه و بریارا وانه.
نوكه ئیراق د قه‌یرانه‌كا سیاسی دایه، چونكه ئالیێن سه‌رنه‌كه‌فتی د هه‌لبژارتنێن پێشوه‌خت یێن جڤاتا نوونه‌رێن ئیراقێ كو ل مه‌ها چریا ئێكێ 2021 هاتبوونه ئه‌نجامدان، د به‌رهه‌ڤ نینن دانپێدانێ ب سه‌رنه‌كه‌فتنا خوه د وان هه‌لبژارتنان دا بكه‌ن، پشتی كو موقته‌دا سه‌در رێبه‌رێ ره‌وتێ سه‌دری ل ڤێ دووماهیێ داخواز ژ په‌رله‌مانتارێن ره‌وتێ سه‌دری ل جڤاتا نوونه‌رێن ئیراقێ كری ده‌ست ژ كاركێشانا خوه پێشكێشی سه‌رۆكایه‌تیا جڤاتا نوونه‌رێن ئیراقێ بكه‌ن، ده‌ست ژ كاركێشانا وان ژی هاتیه په‌سه‌ندكرن، ئه‌ندامه‌كێ جڤاتا نوونه‌رێن ئیراقێ ژی رادگه‌هینیت، پێدڤیه رێز ل بریارا وان بگرین.
نه‌هله قادر، ئه‌نداما جڤاتا نوونه‌رێن ئیراقێ ژ فراكسیۆنا پارتی دیموكراتی كوردستان گۆت” ئه‌م رێزێ ژ پرسا ده‌ست ژكاركێشانا په‌رله‌مانتارێن سه‌ر ب ره‌وتێ سه‌دری ڤه دگرین”.
زێده‌تر دبێژیت” پێدڤیه مه باوه‌ری ب دیموكراسیه‌تێ هه‌بیت و د پرۆسه‌كا دیموكراسیدا وان ئه‌و بریاره دایه، ئه‌م ژی رێزێ ل بریارا وان دگرین”.
پشتی ده‌ست ژ كاركێشانا ئه‌ندامێن جڤاتا نوونه‌رێن ئیراقێ یێن سه‌ر ب ره‌وتێ سه‌دری ڤه و نیشادانا رازیبوونێ ل سه‌ر ده‌ست ژ كاركێشانا وان ژئالیێ محه‌مه‌د حه‌لبووسی سه‌رۆكێ جڤاتا نوونه‌رێن ئیراقێ، موقته‌دا سه‌در رێبه‌رێ ره‌وتێ سه‌دری پتریا داموده‌زگه‌هێن سه‌ر ره‌وتێ سه‌دری ژی ڤه داخستن، ژبلی وان، تنێ ده‌زگه‌هێ مه‌رقه‌دێ پیرۆز، نڤیسینگه‌ها ئه‌لشه‌هید، نڤیسینگه‌ها تایبه‌ت، ده‌سته‌یا شوونوار، پرۆژێ بونیان مه‌رسوی، مۆزه‌خانا شه‌هید، دشێن د كارێن خوه دا د به‌رده‌وام بن.
