محسن مه‌نده‌لاوی:جڤاتا نوونه‌ران كار بۆ په‌سه‌ندكرنا پرۆژێ قانوونا په‌ترۆل و غازێ دكه‌ت
ئه‌ڤرۆ:
جێگرێ ئێكێ یێ سه‌رۆكێ جڤاتا نوونه‌رێن ئیراقێ ڕاگه‌هاند، جڤاتا نوونه‌رێن ئیراقێ ب هه‌موو شیانێن خوه‌ڤه كار بۆ په‌سه‌ندكرنا پرۆژێ قانوونا په‌ترۆل و غازێ ل ئیراقێ دكه‌ت و داخواز ژی ژ ئالیێن سیاسی یێن ئیراقی دكه‌ت چاره‌سه‌ریه‌كێ بۆ پرسا په‌ترۆل و غازێ ببینن.
دوهی دوشه‌مبی 19 كانوونا ئێكێ 2022، موحسن مه‌نده‌لاوی، جێگرێ ئێكێ یێ سه‌رۆكێ جڤاتا نوونه‌رێن ئیراقێ د چارچۆڤێ پشكداریكرنێ د كۆنفرانسێ به‌غدا یێ نێڤده‌وله‌تی یێ هه‌شتێ بۆ په‌ترۆل و غازی و وزێ د په‌یڤه‌كێ دا دووپاتی ل گرنگیا سامانێ غازێ كر و ئاماژه ب وێ چه‌ندێ كر كو سه‌ره‌رای گرنگیا جیهانی یا غازی، هه‌تا نوكه ب شێوه‌یه‌كێ به‌رده‌وام سامانێ غازێ ل ئیراقێ ژ ده‌ستدچیت.
موحسن مه‌نده‌لاوی د په‌یڤا خوه‌دا، ب گرنگی باسێ كاركرنا ڕژد بۆ چاره‌سه‌ركرنا گرفتا ژ ده‌ستدچوونا غازێ كر و ڕاگه‌هاند” پێدڤیه ب شێوه‌یه‌كێ ڕاسته‌قینه غاز بهێته به‌رهه‌مئینان، بۆ وێ چه‌ندێ وه‌كو سامانێ په‌ترۆلێ لێ بهێت”.
د پشكه‌كا دی یا په‌یڤا خوه دا، جێگرێ ئێكێ یێ سه‌رۆكێ جڤاتا نوونه‌رێن ئیراقێ گوت” جڤاتا نوونه‌رێن ئیراقێ ب هه‌موو هێز و شیانێن خوه‌ڤه كار دكه‌ت بۆ په‌سه‌ندكرنا پرۆژێ قانوونا په‌ترۆل و غازێ ل ئیراقێ، ب شێوه‌یه‌كی ژینگه‌هه‌كا قانوونی یا ب هێز بۆ كاركرنێ و وه‌به‌رئێنانكرنێ د كه‌رتێ په‌ترۆل و غازێ دا مسۆگه‌ر بكه‌ت دوور ژ گرژیێن سیاسی”.
ناڤبری د په‌یڤا خوه‌دا داخواز ژ ئالیێن سیاسی یێن ئیراقی كر چاره‌سه‌ریا پێدڤی بۆ پرسا په‌ترۆل و غازێ ببینن، بۆ وێ چه‌ندێ جڤاتا نوونه‌رێن ئیراقێ بشێت كار ل سه‌ر په‌سه‌ندكرنا پرۆژه‌یێ قانوونا په‌ترۆل و غازێ بكه‌ت.
ل ڕۆژا چارشه‌مبی 27 چریا ئێكێ 2022، محه‌مه‌د شیاع سودانی، سه‌رۆك وه‌زیرێن ئیراقێ كارنامه‌یا حوكمه‌تا خوه به‌لاڤكربوو.
د پشكه‌كا كارنامه‌یا حوكمه‌تا محه‌مه‌د شیاع سودانی دا هاتیه” حوكمه‌تا هه‌رێما كوردستانێ و حوكمه‌تا فیدرال پرۆژه‌یێ قانوونه‌كێ ل دۆر په‌ترۆل و غازێ و بودجه‌ی ب گۆره‌ی دستوورێ ئیراقێ د ده‌مێ شه‌ش هه‌یڤان دا دێ به‌رهه‌ڤ كه‌ن”.
هه‌ر د وێ كارنامه‌یێ دا هاتیه” ب پشته‌ڤانیا وان هێز و ئالیێن سیاسی یێن ل سه‌ر ڤێ كارنامه‌یێ ڕێككه‌فتین، حوكمه‌تا هه‌رێما كوردستانێ و حوكمه‌تا ئیراقێ دێ هێنه سه‌رپشككرن بۆ دانوستاندنێ ل سه‌ر دۆسێیا په‌ترۆل و غازێ و بودجه‌ی هه‌تاكو ده‌ركرنا پرۆژه‌یێ قانوونا په‌ترۆل و غازێ ب گۆره‌ی دستووری د ده‌مێ شه‌ش هه‌یڤاندا”.
بۆ دارێشتنا پرۆژه‌یێ قانوونا په‌ترۆل و غازێ د كارنامه‌یا حوكمه‌تا محه‌مه‌د شیاع سودانی دا هاتیه” لژنه‌یه‌كا تایبه‌تمه‌ند ب كاروبارێن قانوونی، دارایی و سوته‌مه‌نیێ ژ ئالیێ حوكمه‌تا هه‌رێما كوردستانێ و حوكمه‌تا ئیراقێ دێ هێته پێكئینان”.
