جڤاتا وه‌زيران رۆهنكرنه‌كێ ل دۆر برياره‌كێ به‌لاڤ دكه‌ت
ئه‌ڤرۆنيۆز:
پشتى ب برياره‌كا جڤاتا وه‌زيرێن هه‌رێما كوردستانێ، هنارتنا فه‌رمانبه‌ران بۆ ده‌رڤه‌ى وه‌لاتى هاتيه راگرتن، ل دۆر وێ بريارێ جڤاتا وه‌زيران رۆهنكرنه‌ك به‌لاڤكر.
ب بريارا جڤاتا وه‌زيرێن هه‌رێما كوردستانێ ل 11/10/2017، ژ ئه‌گه‌رێ راگرتنا گه‌شتێن ئه‌سمانى يێن نێڤده‌وله‌تى ل هه‌رێما كوردستانێ، شاند وئيفاد وگه‌شتكرنا فه‌رمانبه‌رێن حوكمه‌تێ بۆ ده‌رڤه‌ى وه‌لاتى هاتبوو راگرتن.
ب نڤيساره‌كا جڤاتا وه‌زيرێن هه‌رێمێ ل دۆر وێ بريارێ رۆهنكرنه‌ك به‌لاڤكريه ئه‌وژى نڤيسارا هژمار 4598 ل 24/10/2017 ئاماه ب وێ چه‌ندێ هاتيه كرن كو راگرتنا ئيفادكرنێ وگه‌شتان هه‌موو فه‌رمانبه‌رێن حوكمه‌تێ ناگريت.
دوێ نڤيسارێ دا هاتيه، راگرتنا شاند وگه‌شتكرنێ بۆ ده‌رڤه‌ى وه‌لاتى ب تنێ وان شاندا بخوه‌ڤه دگريت كو مه‌زاختيێن وان ل سه‌ر حوكمه‌تا هه‌رێما كوردستانێ بيت.
جڤاتا وه‌زيران ل هه‌رێما كوردستانێ دياركريه ژى كو ئه‌و ئيفادكرنا فه‌رمانبه‌ران كو مه‌زاختيێن وێ ل سه‌ر رێكخراو وده‌زگه‌هێن نێڤده‌وله‌تى بيت، يان به‌رنامه‌كێ تايبه‌ت رێك دئێخن بۆ فه‌رمانبه‌ران، ئه‌و برياره ژوان ناگريت ورێا ئيفادێ دێ بۆ هێته دان.
