جێگرێ سەرۆكێ پارتی دیموكراتی كوردستان، مەسرور بارزانی سەرەدانا مەكتەبا ڕێكخستنا پارتی دیموكراتی كوردستان ل پارێزگەها دهۆكێ كر.
ئارمانج ژ سەرەدانا جێگرێ سەرۆكێ پارتی دیموكراتی كوردستان بۆ مەكتەبا ڕێكخستنا پارتی ل دهۆكێ، كۆمبوون و دانوستاندن بوو سەبارەت بەرنامە و كار و پلان و پڕۆژەیێن پارتی.
پشتی كۆنگرەیێ 14، پارتی دیموكراتی كوردستان ل پارێزگەها دهۆكێ ژی مەكتەبا ڕێكخستنێ ڤەكر، ب مەبەستا زێدەتر گرنگیدان ب وێ دەڤەرێ و ئاگەهداربوون ژ ڕەوشا خەلكی.
پشتی كۆنگرەیێ 14 یێ پارتی، پشتیوان سادق ئەندامێ مەكتەبا سیاسی وەكو بەرپرسێ مەكتەبا ڕێكخستنێ یا پارتی دیموكراتی كوردستان ل پارێزگەها دهۆكێ هاتیە دەستنیشانكرن.

پەیڤدارێ حوكمەتا هەرێما كوردستانێ ڕاگەهاند: ل ڕۆژا سێشەمبی 15/8/2023 شاندەكێ حوكمەتا هەرێما كوردستانێ دێ سەرەدانا بەغدا كەت و ئاماژەكر ژی ل دەمێ گەهشتنا بودجەی ژ بەغدا دێ مووچە ژ كارێن بەراهیێ بیت .
پێشەوا هەورامانی، پەیڤدارێ حوكمەتا هەرێما كوردستانێ گوت» بابەتێ قانوونا بودجەیا گشتی یا ئیراقێ دێ بابەتێ دانوستاندنێن شاندێ حوكمەتا هەرێما كوردستانێ و حوكمەتا ئیراقێ بیت و هەرێما كوردستانێ هەموو ئەركێن سەر ملێن خوە بجهئیناینە و چاڤەڕێ هنارتنا پشكا بودجەیا هەرێما كوردستانێ دكەین».
پێشەوا هەورامانی گوت ژی» مووچەیێن وەلاتیێن مە دێ ژ كارێن بەراهیێ بیت ل دەمێ گەهشتنا بودجەی ژ بەغدا».
سەبارەت سەرەدانا شاندێ حوكمەتا هەرێما كوردستانێ بۆ بەغدا، پەیڤدارێ حوكمەتا هەرێمێ دبێژیت» بەرێز سەرۆكێ حوكمەتا هەرێما كوردستانێ ئالیێن پەیوەندارێن حوكمەتا هەرێمێ ڕاسپاردینە بۆ وێ چەندێ هەموو هاریكاریەكێ ل گەل تیمێن تەكنیكی یێن ئیراقێ بكەن و هیچ پرسیارەك بێ بەرسڤ نەمینیت».
هەروەسا دیاركر» ڕۆژا ئێكشەمبیا داهاتی ژی شاندەكێ حوكمەتا هەرێما كوردستانێ بۆ دانوستاندنێ ل سەر قانوونا پەترۆل و غازێ دێ سەرەدانا بەغدا كەت و هەرێما كوردستانێ دخوازیت دستوور بنەما بیت د بابەتێ پەترۆل و غازێ دا، كو دێ سێ ئالیێن سەرەكی د قانوونا پەترۆل و غازێ دا دانوستاندنان كەن ئەوژی حوكمەتا هەرێما كوردستانێ، پارێزگەهێن بەرهەمئینەرێن پەترۆلێ و حوكمەتا ئیراقێ».
هەڤدەم باس ل وێ چەندێ ژی كر» هەرێما كوردستانێ دخوازیت قانوونەك بۆ پەترۆل و غازێ بهێتە دەركرن كو هیچ ئالیەك تێدا هەست ب غەدرێ نەكەت و پێدڤیە ئالیێن كوردستانی د ڤی بابەتی دا ئێكدەنگ بن و خواستا حوكمەتا هەرێما كوردستانێ ئەوە ئەزموونا قانوونا بودجەی د پرسا قانوونا پەترۆل و غازێ دا ل ناڤ هۆلا جڤاتا نوونەران دا دوبارە نەكەینەڤە» .

دهۆك، لەزگین جوقی

بەرپرسێ‌ ڕێكخستنا لقێ‌ 17 یێ پارتی دیموكراتی كوردستان ل شنگالێ ڕاگەهاند كو گرۆپێن نەشەرعی و میلیشیێن د ناڤ باژێرێ شنگالێ دا هەموو بزاڤان دكەن ئاوارە بزڤرن بۆ شنگالێ تاكو بۆ هەلبژارتنێن جڤاتێن پارێزگەهێن ئیراقێ دەنگێن وان بێخنە د بەرژوەندیا خوە دا ،هەروەسا دیاركر ژی كو ل شنگالێ هەژمارەكا پارت وگرۆپان هاتینە پێكئێنان ب ناڤێ‌ ئێزدیان كو ئەو هەموو بۆ خاپاندنا خەلكێ‌ شنگالێ كار دكەن.
قاسم ڕەشۆ، بەرپرسێ‌ ڕێكخستنا لقێ‌ 17 یێ پارتی دیموكراتی كوردستان ل شنگالێ دیاركر» هەلبژارتنێن جڤاتێن پارێزگەهێن ئیراقێ بۆ قەزا شنگالێ د چارەنڤیسازن وهەردەمێ‌ بەربژارێن پارتی دیموكراتی كوردستان بچنە جڤاتا پارێزگەها نەینەوا بیگومان دێ‌ ڕەوشا شنگالێ چارەسەركەن ودێ‌ دەستێ‌ ئاڤەدانیێ گەهیتە شنگالێ وخەلكێ‌ وێ یێ زیاندار ژی دێ هێتە قەرەبووكرن وئاوارە دێ‌ ڤەگەرنە شنگالێ و د نوكە دا پارتی دیموكراتی كوردستان ل شنگالێ دەست ب بەرهەڤیان بۆ هەلبژارتنێن جڤاتا پارێزگەها نەینەوا كریە ونوكە ناڤێن ئاوارەیان یێن دهێنە تۆماركرن ودێ‌ ئاوارە ل كەمپان دەنگێ‌ خوە دەن هەروەسا ئەو ئاوارەیێن چووینە شنگالێ ژی دێ‌ هەر ل شنگالێ دەنگێن خوە دەن».
ناڤبری خویاكر ژی نوكە ب ڕیێا 18 گرۆپان دناڤ ئاوارەیان دا كار دهێتە كرن كو ئاوارە بچن ناڤێن خوە تۆمار بكەن بۆ پشكداریكرنێ د هەلبژارتنێن جڤاتێن پارێزگەهان دا و دگەل كۆمسیۆنا بلند یا سەربخوە یا هەلبژارتنان ل ئیراقێ و ڕێڤەبەریا كۆچ و كۆچبەران گرۆپ هاتینە پێكئێنان بۆ هاندانا ئاوارەیان كو بچن ناڤێن خوە تۆمار بكەن تاكو ل ڕۆژا ئەنجامدانا هەلبژارتنان ل 18/12/2023 ب ساناهی بشێن دەنگێن خوە بدەن «.
بەرپرسێ‌ ڕێكخستنا لقێ‌ 17 یێ پارتی دیموكراتی كوردستان ل شنگالێ ئەو ژی گوت» گرۆپێن نەشەرعی و میلیشیێن د ناڤ شنگالێ دا هەموو بزاڤان دكەن ئاوارە بزڤرن شنگالێ دا كو بۆ هەلبژارتنان بكاربینن ونوكە گرۆپێن نەشەرعی و میلیشیا بەردەوام د ناڤ شنگال دا كۆمبوونان دكەن وهەموو بزاڤان ژی دكەن ئاوارە ژ كەمپان بەر ب شنگالێ ڤەگەرن داكو خەلكێ‌ بێخنە دبن فشارا خوە دا و ل ڕۆژا دەنگدانێ فشاران ل وەلاتیان بكەن ودەنگان بێخنە د بەرژوەندیا خوە دا «.
قاسم ڕەشۆئاماژەكر ژی»پارتا ئازادی دیموكراتی ئێزدی كو ب ناڤێ‌ ئێزدیان پشتی جینۆسایدا شنگالێ ل سالا 2014ێ‌ د ناڤ شنگالێ دا هاتیە دروستكرن كو هزر وبیرێن وی پارتی یێن گرۆپێن نەشەرعی نە و ئەڤ پارتا ب ناڤێ ئێزدیان ژئالیێ وان گرۆپان ڤە هاتیە دروستكرن و پارتا پشكەفتنا ئێزدیان و بزاڤا ئێزدیان ل سەر بدەستڤە ئینانا كورسیا كۆتا ئێزدیان كار دكەن و هەژمارەكا پارتێن سیاسی ب ناڤێ‌ ئێزدیان ل شنگالێ هاتینە دروستكرن كو كار بۆ خاپاندنا خەلكێ‌ شنگالێ دكەن وچەندێن ئالایێن هەمەجۆر د ناڤ شنگالێ دا بلندكرینە وهەموو بزاڤان دكەن خەلكی ب خاپینن لێ‌ خەلكێ‌ شنگالێ یێ هشیارە و چو جاران ناهێتە خاپاندن وئەو پارتێن دروستكری چو جاران نەشێن شەرعیەتێ‌ ل شنگالێ ب دەستڤەبینن».

دوهی دوشەمبی
2023-8-14مەسرور بارزانی سەرۆكێ حوكمەتا هەرێما كوردستانێ د ڕێورەسمەكێ تایبەت دا ل باژێرێ زاخۆ، پڕۆژەیێ گەشتیاری یێ كۆرنیشا دەلال ڤەكر.
سەرۆكێ حوكمەتێ د وی ڕێورەسمی دا پەیڤەك پێشكێشكر و ئەڤە دەقێ وێ یە:

گەلەك پێخوەشحالم ئەڤرۆ ل گەل هەوە ل ڤێرێ پشكدارم بۆ ڤەكرنا ڤێ پڕۆژەیێ گرنگ و جوان كو د دەمەكێ گەلەك كێم دا هاتیە بجهئینان، پیرۆزباهیێ ل هەوە و خەلكێ زاخۆ و هەموو خەلكێ كوردستانێ دكەم، هیڤیدارم مفای ژێ ببینن و ببیتە جهێ ڕازیبوونا هەوە هەموویان، سوپاسیا كۆمپانیا جێبەجێكار و ئیدارەیا سەربخوە یا زاخۆ و سوپاسیا خەلكێ زاخۆ دكەم بۆ بێهنفرەهی و هاریكاریا وان، هیڤیدارم ڕۆژانە پڕۆژەیێن زێدەتر ل زاخۆ و ڤێ دەڤەرێ و هەموو دەڤەرێن كوردستانێ بهێنە بجهئینان.
بۆ من جهێ دلخوەشیێ یە دەمێ دبینم ئەم پێشوەخت هندەك سۆزا ددەین، پشتی دەمەكی دهێین و دبینین ئەو سۆزێن مە داین بۆ بجهئینانا پڕۆژەیان، ئەنجام هەنە و پشكداریێ د ڤەكرنا ڤان پڕۆژەیان دا دكەین.
وەكو دزانن ئەڤە تاكە پڕۆژە نینە، بەلكو ل زاخۆ چەندین پڕۆژەیێن دی هاتینە دروستكرن وەكو ڤەكرنا ڕێك و جادەیان و هندەك پڕۆژەیێن دی یێن گرنگ ل ڤێ دەڤەرێ وەكو نووژەنكرنا بازارێ كەڤنێ زاخۆ كو هیڤیدارم بۆ وی ژی مە دەم هەبیت و سەرەدانا وی بكەین و ویژی ببینین.
ب گشتی وەكو دزانم زێدەتر ژ 170 پڕۆژە ل سنوورێ ئیدارەیا سەربخوەیا زاخۆ د ڤێ دەمی دا هاتینە بجهئینان. د بەرنامەیێ مە دایە ل قۆناغا داهاتی گەلەك پڕۆژەیێن دی ژی ئەنجام بدەین ئێك ژوان دروستكرنا جادەیا 60 متری یە، هەروەسا مزگینیێ ددەینە هەوە كو دێ بەردەوام بین ل سەر دروستكرنا كۆرنیشێ زاخۆ هەتا ڕووبارێ خابیری ل زاخۆ تمام دبیت، دێ هەموو قۆناغێن دی ژی هێنە بجهئینان.
هەروەسا سكرێ زاخۆ ل خابیری دێ هێتە دروستكرن، ئەوژی پڕۆژەیەكێ مەزن و ستراتیژیە و هەر دەمێ دیزاین و بەرنامەیێ وی ژی تمام بوو، ئەوژی دێ كەڤیتە بوارێ بجهئینانێ، بێگومان دێ وی ژی مفایەكێ مەزن بۆ خەلكێ زاخۆ و خەلكێ هەموو كوردستانێ ژی هەبیت.
زاخۆ باژێرەكێ گرنگە بۆ مە، نەكو تنێ ژبەر وێ چەندێ كو باژێرەكە ل سەر سنوورێ هەرێما كوردستانێ و دەرگەهەكە بۆ پەیوەندیێ ل گەل توركیا و ئورۆپا و جیهانێ، بەلكو باژێرەكە هەموو دەمان پشتەڤان بوو بۆ پاراستنا هەرێما كوردستانێ و قەهرەمانێن گەلەك مەزن ل زاخۆ هەنە و ڤێ دەڤەرێ گەلەك شەهید یێن داین، مخابن گەلەك ژوان ئەڤرۆ ل ڤێرێ نینن، هەرچەندە ئەم ژ نێزیك دنیاسین، مخابن ل ڤێرێ نینن، بەلێ ئەم سەرێ ڕێزێ بۆ وان و بنەمالێن سەربلندێن شەهیدان و پێشمەرگێن قەهرەمان دچەمینین كو ئەڤ كارە ژ ئەگەرێ خەباتا وان هاتیە ئەنجامدان .
حەز دكەم وێ چەندێ ژی بێژم كو ب ڕاستی من گەلەك پێخوەش بوو كو ئەم دلێ سەرۆكی ژی ژ خوە ڕازی بكەین، ئەڤجا هیڤیدارم هوون ژی ژ مە ڕازی ببن تاكو دلێ سەرۆكێ ژ مە ڕازی ببیت.
مە گەلەك زەحمەت دیت، چ وەكو مللەت و چ وەكو ڤێ كابینەیێ ژی، گەلەك ئاستەنگ ل سالا بۆری بۆ مە هاتنە دروستكرن، ل بوارێ ئابۆری، سیاسی، هندەك جاران هندەك كێشەیێن ئەمنی ژی بۆمە دروستكرن بۆ وێ چەندێ ئەم نەشێن بەردەوام بین د گەهاندنا خزمەتگوزاریان بۆ خەلكێ خوە ل هەموو دەڤەرێن كوردستانێ، بەلێ سوپاس بۆ خودێ و خۆراگریا خەلكێ قەهرەمانێ كوردستانێ، ئەم بەردەوام بووین و مە سەرێ خوە بۆ هیچ نەحەز و فشار و ئاستەنگەكێ نە چەماند و مە شیا وان قۆناغان دەرباز بكەین و هندەك ژ وان پڕۆژەیان ژی بجهبینین.
بۆ مە جهێ شانازیێ یە و مەزنترین شانازی بۆ من ئەوبوو كو خەلكێ كوردستانێ پشتەڤانێن مە بوون، پشتەڤانیا هەوە هێز دا مە، پشتەڤانی و خۆڕاگریا هەوە هێز دا مە تاكو بشێین بەرامبەر وان هەموو فشارێن كو هاتینە سەر حوكمەتا هەرێما كوردستانێ، ڕاوەستین، لەوما هیڤیدارم ئەو پشتەڤانیە بەردەوام بیت تاكو ئەوا دشیانێن مە ژی دا بیت بۆ خزمەتكرنا هەوە، بەردەوام بین.
دخوازم مفای ژ ڤێ دەلیڤەیێ وەربگرم بۆ وێ چەندێ هندەك باسێ ڕەوشا كوردستانێ ژی بكەم، د دەمێ بۆری دا مە چەندین شاند هنارتنە بەغدا تاكو دانوستاندن بهێتە كرن چ ل سەر بابەتێ هنارتنا پەترۆلا هەرێما كوردستانێ بۆ دەرڤە و چ ل سەر بابەتێ بودجەی كو مخابن مە چەندین ڕێككەفتن ل گەل سەرۆك وەزیرێن ئیراقێ و حوكمەتا فیدرالی ئەنجامدان، بەلێ پاشی ئەو ڕێككەفتنە هاتنە پشت هاڤێتن یان دەستكاری تێدا هاتە كرن و هندەك بیر و بۆچوونێن دی ل سەر خەلكێ كوردستانێ سەپاندن، سەرەرای وێ چەندێ ژی مە دیسان بزاڤكر و دێ بزاڤێ ژی كەین كو هەتا دوماهی قۆناغ ل گەل بەغدا بگەهینە ئەنجامەكی كو بەرهەمێ وی د خزمەتا هەموو خەلكێ ئیراقێ و ب تایبەتی د خزمەتا هەرێما كوردستانێ دا بیت، بێی ئەمم هیچ داگیرانەكێ ل سەر دەستكەفت و شایستە و مافێن خوە یێن دستووری بكەین. ئەم دێ بەردەوام بین بۆ وێ چەندێ مافێن خوە یێن دستووری بپارێزین، دێ بەردەوام بین ژی بۆ وێ چەندێ ل گەل حوكمەتا ئیراقێ بگەهینە ئەنجامەكێ ئاشتیانە و ئەو كێشەیێن هەین چارەسەر بكەین. ل ڕۆژێن داهاتی ژی جارەكا دی شاندێ مە دێ چیتە بەغدا بۆ گەهشتنێ ب ڕێككەفتنێ ل سەر بابەتێ هنارتنا بودجەی. هەروەكو هوون دزانن پێشتر گازندەیا وێ چەندێ دهاتە كرن كو حوكمەتا هەرێما كوردستانێ مووچەی نادەت یان ل دەمێ خوە مووچە نەدایە، دخوازم وێ چەندێ بێژم كو هەتا ڕێگری ل هنارتنا پەترۆلا كوردستانێ هاتیە كرن، حوكمەتا هەرێمێ ب شانازی ڤە هەموو مەهەكێ مووچەیێ خەلكێ كوردستانێ دابین كریە. ب خوەشی بیت و ب زەحمەت و هەر جۆرەكی بیت، بەلێ مە ئەو بەرپرسیارەتیێ ل ستوویێ خوە گرت و د خزمەتا خەلكێ خوە دا بووین. نوكە ژی ئەو فشارا ل سەر مە دبیت بۆ وێ چەندێ بیت كو ئەم دەست ژ هندەك مافێن خوە یێن دستووری بەردەین، بەلێ دخوازم هەوە پشتڕاست بكەم كو ئەم دەست ژ مافێن خوە یێن دستووری بەرنادەین. ب پشتەڤانیا هەوە و خودێ مەزن، دێ بەردەوام بین ل داكۆكیكرنێ ژ هەموو مافێن خوە و یێ گەشبینم ب وێ چەندێ دێ گەهینە ئەنجامەكێ باش ل گەل ڤێ حوكمەتێ، تاكو ئەوژی بودجەی د دەمێ خوە دا بۆ خەلكێ هەرێما كوردستانێ بهنێرن و بابەتێ بودجەی ژی نەكەنە بابەتەكێ سیاسی و تێكهەلی كێشەیا سیاسی نەكەن كو هندەك جاران مخابن بهانەیێن بێ ڕامان بۆ دئینن.

پارتەکا نوو ل رۆژئاڤایێ کوردستانێ هاتە دامەزراندن و سەرکردەکێ وێ پارتیێ ژی دیار دکەت، ئارمانجا وان بدەستڤەئینانا مافێن نەتەوی یێن گەلێ کوردستانێ یە و دڤێت د چارچۆڤێ بدەستڤەئینانا مافێن نەتەوی یێن گەلێ کوردستانێ دا ل سووریێ کار بهێتە کرن، لێ مخابن نها ئاستەنگیێن مەزن ل هەمبەر کار و خەباتا نەتەوی ل رۆژئاڤایێ کوردستانێ هەیە.

پارتەکا نوو یا سیاسی ب ناڤێ پارتا گەلێ کوردستان/ سووریا ل باژێرێ قامشلۆ ل رۆژئاڤایێ کوردستانێ ب فەرمی دامەزراندنا خوە راگەهاند، ئێک ژ سەرکردێن وێ پارتیێ ژی دیار دکەت، نها پتر ژ هەر دەمەکێ پێدڤیا گەلێ کورد ل رۆژئاڤایێ کوردستانێ و سووریێ ب خەباتەکا نەتەوی هەیە، چونکی سووریێ بەر ب گوهۆڕینێن مەزن ڤە دچیت و هەر گوهۆڕینەک ژی روو بدەت دێ کاریگەریا خوە ل سەر کوردان هەبیت، ژ بەر هندێ ژی دڤێت نها هەموو پارت و ئالیێن سیاسی یێن کوردی ل رۆژئاڤایێ کوردستانێ و سووریێ پێکڤە دەست ب قۆناغەکا نوو بکەن، چونکی هەکە کورد نها د چارچۆڤێ بەرەیەکێ نەتەوی دا پێکڤە کار نەکەن دێ زیانێن مەزن گەهنە پاشەرۆژا کوردان ل سووریێ.
ل گۆر راگەهاندنا دووماهیێ یا کۆنگرێ پارتا گەلێ کوردستان/ سووریا وان دڤێت مافێن کوردان د چارچۆڤێ دستوورەکێ نوو ل سووریێ دا بهێتە گەرەنتیکرن و شەرێ نها ل سووریێ بهێتە راگرتن، چونکی ب شەری نە قەیرانا نها ل سووریێ ب دووماهی دهێت و نە ژی کورد دگەهنە مافێن خوە، هەروەسا دڤێت د زووترین دەم دا بەرەیەکێ نەتەوی ل رۆژئاڤایێ کوردستانێ بهێتە ئاڤاکرن و هەموو هێز و ئالیێن سیاسی د چارچۆڤێ مافێن نەتەوی یێن گەلێ کورد دا پێکڤە کار بکەن، دڤێت د ڤێ چارچۆڤێ دا ئەنجوومەنێ نشتیمانی یێ کوردی ل سووریێ پتر ب رۆلێ خوە رابیت و ل گەل هەموو هێزێن دی یێن نەتەوی ل رۆژئاڤایێ کوردستانێ سەرکێشیا بزاڤا نەتەوی بکەت، هەروەسا دڤێت هەموو پێکهاتێن دی یێن نەتەوی و ئایینی ل سووریێ بگەهنە مافێن خوە، ژ بەر هندێ ژی پێدڤیا سووریێ ب دستوورەکێ نوو هەیە.
چاڤدێرێن سیاسی ل رۆژئاڤایێ کوردستانێ ژی دیار دکەن، نها گەلەک پارتێن سیاسی ل رۆژئاڤایێ کوردستانێ هەنە، پێدڤیا رۆژئاڤایێ کوردستانێ ب بەرەیەکێ نشتیمانی هەیە، دڤێت هەموو هێزێن سیاسی یێن کوردی د چارچۆڤێ بەرەیەکێ نەتەوی دا پێکڤە کار بکەن، چونکی نها ناکۆکیێن گەلەک مەزن د ناڤبەرا هێزێن سیاسی یێن کوردی دا هەنە، ب تایبەتی ژی دڤێت بەری هەر تشتەکێ هەر دو جڤاتێن کوردی یێن رۆژئاڤایێ کوردستانێ ئانکۆ ئەنجوومەنێ نشتیمانی یێ کوردی ل سووریێ و تەڤدەم بشێن هەموو پرسێن هەی د ناڤبەرا خوە دا چارەسەر بکەن، ژ بەر کو هەکە نها کورد د ناڤ خوە دا ئێکگرتی نەبن دێ زیانێن مەزن گەهنە کوردان ل سووریێ.