سیاسەتمەدارا کورد دیلان یێشیل گوێز پشتی دەست ژ کارکێشانا سەرۆک وەزیرێن بەرێ یێ هۆلەندا نها بەربژارەکا هەری بهێزە بۆ وەرگرتنا پۆستێ سەرۆک وەزیران ل هۆلەندا، دیلان خەلکا باکورێ کوردستانێ یە و لێ وەلاتیا هۆلەندایە و ب سالانە ئەنداما پارتیا ئازادی و دیموکراسیێ یا هۆلەندایە، د کابینا بەری نها یا حوکمەتا وی وەلاتی دا وەزیرا دادێ بوو و نها ژی ئێکە ژ بەربژارێن هەری بهێز بۆ وەرگرتنا پۆستێ سەرۆک وەزیران.
دیلان یێشیل گوێز پشتی کو مارک روتە دەست ژ کارکێشانا خوە راگەهاندی وەکو سەرۆکا نوو یا پارتیا ئازادی و دیموکراسیێ هاتە هەلبژارتن و ل گۆر باوەریا چاڤدێرێن سیاسی نها ژنا کورد بەربژارەکا هەری بهێزە دا ببیتە سەرۆک وەزیرا نوو یا وەلاتێ هۆلەندا، ل گۆر دەزگەهێن راگەهاندنا هۆلەندا ژی دیلانێ شانسەکا مەزن یا هەی کو وەکو ئێکەم کورد وی پۆستێ گرنگ ل وەلاتێ هۆلەندا وەربگریت.
نووترين نووچه
- رێباز حەملان: پارتی نهو پتر ژ هەر دەمەكێ بەرهەڤە بۆ دوبارەكرنا هەلبژارتنان
- پەیڤدارێ فراكسیۆنا پارتی: بنەمایێن هەڤپشكی و وەكهەڤیێ ل ئیراقێ نەماینە
- د. زیرەك زێباری: پترییا فراكسیۆن و حزبان دخوازن پارتی بایكۆتا پەرلەمانی بشكێنیت
- د سالڤەگەڕا بۆردۆمانكرنا قەلادزێ دا، سەرۆك بارزانی: ئەو كارەساتە زنجیرەكا دی یا تاوانێن رژێمێ بوو
- نێچیرڤان بارزانی: بوردۆمانكرنا زانكۆیا سلێمانیێ و قەلادزێ ئیرادەیا گەلێ كوردستانێ نەشكاند
- نێچیرڤان بارزانی و ئیراقچی رەوشا دەڤەرێ گەنگەشە دكەن
- ب رێز و سەربلندی ڤە بیرئینانا شەهیدێن قەلادزێ دكەین
- حوكمەتا هەرێمێ: چو بارەگەهـ و ناڤەندێن مەشق و راهێنانا دەزگەهێن هەوالگیرییا وەلاتان ل كوردستانێ نینن
- دبیت هەلبژارتنێن پێشوەخت ببنە چارەسەری
- 809 هێرش ل سەر هەرێما كوردستانێ هاتینە كرن 20 شەهید و 123 بریندار هەنە
naci bedel
هەكە خەرزێ ژنان كێم ببت ئەم دشێین هاریكاریا وێ بكەین
بەرپەرێ ساخلەمیێ:
د.زوزان عبدالرحمن فارس، تایبەتمەندا نەخۆشیێن ژنان و زارۆكبوونێ، تایبەتمەندیا هویر ب نەزووكیێ و زارۆكێن بلووری دیاركر ئێك ژ ئەگەرێن نەئینانا زارۆكان یا نەزوكیێ هێك و هێلكەدانن ب رێژا %44 ژ خەلكێ مە ئەڤ ئاریشە یا هەی و گۆت: سێ ئەگەرێن سەرەكی یێن هەین كو دبنە ئاریشە درێكا هێكێ دا كو هێك مەزن نەبیت یان ناهێتە خارێ و دووگیانی چێنابیتن، ژوان ئەگەران ژی، نەبوونا هورمونێن هاندانێ ژ مەژی یان راوەستاندنا وی كو گەلەك جاران هندەك ئاریشێن زكماكی یێن هەین و گەلەك جارێن دی شوولناكەتن، ئەڤە باراپتر وەختێ ژنەك گەلەك زوی قەلەو بیت یان گەلەگ زوی زەعیف بیت یان ئالوزیەك بو چێدبیت، ئێكسەر ئەڤ هورموناتە دراوەستیت و یاباش ئەوە ڤێ چەندێ چارەسەریا خویا هەی.
ئەگەرێ دوێ، زێدەبوونا هێكا ل هێلكەدانێ یان عەمبارێ هێكا، كو مە ئاریشە یا هەی دگەل گەلەك ژنان و ئەم دشێین ڤێ ئاریشێ ژی چارەسەر بكەین ب رێكا شێوازێ ژیانا خوە و خارنا خوە ب گۆهوریت و گۆتژی: گەلەك جاران ئەم چارەسەریا ددەینێ رێكێن خوە یێن هەین كو ئەم هاریكاربین دگەل ژنێ وێ ئاریشێ بو حەل كەین كو گەلەك هێك هەبن، چونكی ئەڤ چەندە ژی هەر هورمونێن وێ تێك دبەتن و دبیتە ئەگەر كو هێك نەهێتە خارێ.
ل دۆر ئەگەرێ سیێ ژی، د.زوزانێ دیاركر، نەبوونا هێكا ژبەر چەند ئەگەران و ئەگەرێ سەرەكی ژ نەبوونا هێكا ئەوە وەختێ عەمر مەزن دبیت، پشتی ژیێ 35 سالیێ هێك گەلەك كێم دبیت ئەو هێكا دمینیت شیانێن وێ گەلەك د باش نینن ب تایبەت پشتی 40 سالیێ وگۆت: گەلەگ جاران گەلەك نشتەرگەری سەر جهێ هێكان دهێنەكرن و هێك كێم دبن و دبیتە ئەگەر ژن دوگیان نەبیت و ئاریشە هەبن.
و گۆتژی: نەبوونا هێكێ یانژی كێمبوونا هێكێ چارەسەریا وێ یا ب زەحمەتە، هەكە هێك نەمان یان كێمبوون مە رێك یێن هەین ئەم هاریكاریا ژنێ بكەین هەتا رادەكی.
د.زوزان دیاركر پشتی ژیێ 45 سالیێ 90% خو ئەگەر زاروك چێ ببیت ژی كروموسوماتێن وان نە د دروستن، هەروەسا پشتی ژیێ 42 سالیێ گەلەك زارۆك ژبەر ژنێ دچن و مەترسی ل سەر ژیانا ژنێ ب خوە هەنە دەمێ دوگیانیێ ئەڤ ئاریشە هەمی پەیدادبن ژ نەبوون یان كێمبوونا هێكێ، دەمێ هێك نەمینن ئەڤە یا مشەیە پەیدادبیت دگەل فاكتەرێ عەمری هندی ژن مەزن بیتن دێ عەمبارێ هێكێ پتر هێتە خارێ حەتا هندەك هێك هەبن ژی دێ دوگیانی یاب زەحمەت بیتن، گۆتژی: ئەم حەز دكەین نەساخی ئاگەهداركەین هەر وەسان نۆشداران ژی ئەگەر گەلەك ئەڤ ئاریشێن پەیوەندی ب هێكا ڤەو هێلكەدانا نە د مەترسی بن، یا چێتر ئەوە بهێلن نشتەرگەریێ ل سەر نەكەن، چونكو دێ پاشەروژێ زووتر مەخزونێ ژنێ هێتە خارێ و زووتر دێ هێكێن وێ پیچ بن و دێ بیتە ئێك ژ ئەگەرێن نەزوكیێ بو نەساخی.
ساڤار ژ برنجێ ساخلەمترە
دەربارەی جوداهیا دناڤبەرا برنج و ساڤارێ ژ روویێ ساخلەمیێ و هەبوونا بەهایێن خوارنێ.
تایبەتمەندەكێ زانستێ خوارنێ بەراوردیێ دناڤبەرا واندا دكەت و دبێژیت: ساڤار باشتر و ساخلەمترە.
د. كامەران رەسول ژاژلەیی، دەربارەی جیاوازیێ دناڤبەرا ساڤار و برنجێ ژلایێ ساخلەمیێ ڤە، راگەهاند: ساڤار ل برنجێ باشترە، ژبەر چەند ئەگەرەكا، ئەوژی؛ د 100 گرامێن برنجێدا، 4 گرام پڕۆتین و 0.6 گرام رووشال و 2 مایكرۆگرام فلۆید ئەسید و 0.21 گرام ژ چەوریێن ب مفا تێدانە، بەلێ 100 گرامێن ساڤارێ دا، 6 گرام پڕۆتین، 8 گرام رووشال، 14 مایكرۆگرام فلۆید ئەسید و 0.60 گرام ژ چەوریێن ب مفا تێدانە.
راگەهاند ژی: رێژەیا شەكرێ د برنجی دا بلندترە، لەورا بۆ كۆنتڕۆلكرنا شەكرێ و رێگرتن لێ، هەروەسا ل دەمێ رێجیم و چارەسەریا قەلەویێ و خۆپاراستن ژ زێدەبوونا كێشێ، ساڤار ب مفاترە.
تارق سەعید: نە ب تنێ ناسناڤ بەلكو دەركەفتنا نڤشەكێ نوو ژی بوو دەستكەفت
تیما پایسكلڤانێن یانەیا دهۆك شیا بۆ قۆناغا سێیێ ل دووڤ ئێك پێشەنگییا خوە د رێزبەندییا قارەمانییا ئیراقێ ل سەر ئاستێ تازەپێگەهشتییان دا ب پارێزیت، پشتی سێ یاریزانێن وان رێزێن ئێكێ هەتا سێیێ ل دووڤ ئێك كونترۆل كرین، د هەڤڕكیێن واندا ئەوا دوهی ژ چارچووڤەیێ قۆناغا سێیێ و بەری دووماهیێ ل سەر ڕێیا سەرەكی زاویتە، كورا بۆ مانگشێشكێ هاتیە كرن و هەتا سوبەهی ژی دێ ل سەر ئاستێن دی یێن لاوان، كچان و پێشكەفتیان ب سەرپەرشتییا فیدراسیونا پایسكلڤانێن ئیراقێ ب پشكدارییا 220 یاریزانان ژ 28 یانەیان بەردەوامبن.
دوهی ل دانێ سپێدێ هەڤڕكێ ل سەر ئاستێ تازەپێگەهشتییان یێ شێوازێ كت بۆ گشت یاریزانان هاتە كرن، هەرسێ یاریزانێن یانەیا دهۆك پێشەنگ بوون د بەریكانەیا 60كم و رێزێن ئێكێ پاراستن، ئاریۆس سلێمان رێزا ئێكێ، یوسف عەرفان رێزا دویێ و ئیبراهیم سەمیر رێزا سێیێ ل دووڤ ئێك هاتن و سەرێ لیستێ پارێزن و ل سەرجەمێ گشتی یێ هەرسێ قۆناغان ناسناڤێ قارەمانیێ مسۆگەر بكەن بەری ب دووماهی هاتنا قارەمانیێ ب ئێك قۆناغ.
هەر دوهی ل سەر ئاستێ لاوان بۆ بەریكانەیا 38كم یانەیا حەشد یا بەغدایی رێزا ئێكێ هات، حەدبا یا مووسلی رێزا دویێ و سیناعە یا بەغدایی رێزا سێیێ هات.
بریارە ئەڤرۆ ل سەر ئاستێ كچان یا بەریكانەیا كت بۆ یاریزانێن پێشكەفتی و لاوان ب درێژاهییا 50كم و بەریكانەیا دویێ ل سەر ئاستێ لاوان كت دژی دەمژمێرێ بۆ درێژاهییا 20كم بهێنە كرن، سوبەهی چارشەمبی ل سەر ئاستێ كت بۆ گشت یاریزانێن تیمێن پێشكەفتیان بۆ درێژاهییا 140كم كو دێ هێتە ئەنجامدان.
ل دۆر ڤێ ئەنجامێ سەركەفتی تارق سەعید راهێنەرێ تیما یانەیا دهۆك بۆ رۆژنامەیا ئەڤرۆ گۆت: پێخوەشحالم ئەو پلانا مە بۆ یاریزانێن خوە د راهێنانان دا دانایی ژ وانا ئێكلاكرنا رێزێن ئێكێ یا هەڤڕكییان ژبۆ مسۆگەركرنا ناسناڤێ قارەمانیێ هاتە بجهـ ئینان، ئەڤچەندە ژی پشتی زەحمەتەكا مەزن و ئاستەنگێن بەردەوام، لێ رژدییا یاریزانان و پشتەڤانیا سەرپەرستێ تیمێ و ئەندامێ كارگێریا یانەیێ و ئەو پلانێن هاتینە دانان ب خوەشحالیڤە گەهشتینە ئارمانجا خوە، زێدەتری كۆمەكا باش یا یاریزانێن تیما یانەیا دهۆك بۆ پاشەرۆژا یانەیێ هاتنە دیتن ژبەركو بۆ وەرگرتنا مفایی مە ژبلی ئەو یاریزانێن سەرەكی و فەرمی پشكداربووین ب تێست هەشت یاریزانێن مە ژی د ناڤ چالاكیێ دابوون كو بوو جهێ سەرنجراكێشا پشكداران، لەوما نە بتنێ ناسناڤ بەلكو دەركەفتنا نڤشەكێ نوو ژی بۆ دەستكەفتێ پاشەرۆژا وەرزشا پایسكلان ل پارێزگەها دهۆكێ، لێ ئەڤچەندە ژی پێدڤی ب پشتەڤانییا دارایی یە ژ یانەیێ و بەرپرسێن پەیوەندیدار.
رێنمایی بۆ دامهزراندنا یانهیان هاتینه دانان و زێدهبوونا وان دێ خزمهتا وهرزشێ كهت
هەولێر، سولین سلێمان:
د داخویانیهكێ دا سهردار ئیسماعیل رێڤهبهرێ گشتی یێ وهرزشی ل ههرێما كوردستانێ بۆ رۆژنامهیا ئهڤرۆ دیار كر بۆ پێشكێشکرنا داخوازیا وەرگرتنا مولەتا دامهزراندنا یانهیهكێ مە چەند رێنماییەکێن نوو هەنە ژ وانا پێدڤییە ژێرخانهیا وەرزشی هەبیت نموونە یاریگەها خوه و خودان بارەگایهكێ سهربهخوه بیت و د چالاكیێن وهرزشی دا بهردهوامبیت، یا گرنگ دڤێت سۆزنامهیهكێ ل دەڤ دادنڤیسی پربکەت کۆ هیچ هاریکاریەکێ ژ حکومەتێ وەرناگریت، وی دەمی دێ مولەتێ پێ هێتهدان و زێدهبوونا یانەیان نیشانا خزمەتکرنا وەرزشێ یە تایبهت یا لاوان.
ل دۆر بابهتێ پێشینهیا ههیڤانه بۆ یانهیان چهوا دهێته بهلاڤكرن و چ پیڤهر ههنه گۆت: یانە ب ل سەر چوار پلەیان هاتینه دانانا ب پشتبهستن ل سهر ئەو داتایێن ژ رێڤەبەریێن مه یێن وەرزشا ل پارێزگههان بۆ مه دهێنه فرێكرن، دیسان پشتبهستن ل سهر وان چالاکیێن ئێكهتیێن وەرزشێ ژلایێ لژنهیێن ئۆلمپیا کوردستان و ئێراقێ ب شێوازەکێ دادپەروەری هاتینە دابەشکرن، چ هەولێر، دهۆک یان سلێمانی هەر ئێک ژ وان ل دۆر پلەیێن خوە پارە بۆ هاتینە تەرخان کرن، ڤی شێوازی ئەم ژی نڤێسارێن پشبهستن بهرههڤ دكهین دا کو ل وەزارەتا دارایی پێشینهیا دیاركری وهربگرن.
دەربارێ گۆتگۆتێن هاتینه بهلاڤكرن كو هندهك كارگێریێن یانهیان مووچهیی ب ناڤێ لیستهیێن كهلوپهل و پاداشت وهردگرن ناڤهاتی گۆت: بێگومان هەر كۆژمهكێ پارەیی بهێتە وەرگرتن ب هەر جورەکی بیت چ فرۆتنا پلێتان یا سپۆنسەران ئەو پێشینهیا یانهیا کۆ پێدڤیە دبیت بچیتە سەر هەژمارا بانکیا وێ یانێ، ئەگەر تشتەک وەسا هەبیت ئەم دێ دۆڤچوونێ کەین.
ل دۆر رێنمایێن نوو ژبۆ ئەکادیمیێن وەرزشێ ل کوردستانێ رێڤهبهرێ گشتی یێ وهرزشی گۆت: د نۆکە دا ئەم مژویلی دانانا رێنمایانه د ڤێ حهفتیێ دا ب هاریکاریا فیدراسیونا تەپا پێی و لهقێن باژێران و ناڤەندێن کوردستانێ رێنمایێن نوو بۆ ئەکادیمیێن تەپا پێی بەلاڤ کەین.
لدووماهیێ لسهر پهیوهندیێن وان دگهل لژنهیا ئۆلمپی یا كوردستانێ سهردار ئیسماعیل گۆت: کارێ لژنەیا ئۆلمپی دگەل مە تمام کەرێن ئێکن چنکو ئەم وەک لایەنێ فەرمی ژ لایێ وەزارەتا رەوشەنبیری سەر ب حکومەتا هەرێما کوردستانێ نە کارێ مە زێدەتر رێکخستنا وەرزشێ یە ب گشتی وەک رێڤەبەراتییا وەرزشا کوردستانێ و دانا مۆلهتێ بۆ یانهیێن كوردستانێ.
بهرههڤی گیرۆبووینه و بهرپرس نابین ژ ئهنجامێن خراب
عەلی حاجی:
د داخویانیەکێ دا هاریکارێ راهێنەرێ تیما باسکێت بۆلا یانهیا زاخۆ ئەوا پشکدار د خولا نایابا ئیراقێ دا بۆ رۆژناما ئەڤرۆ دیار کر هەتا نوکە تیما وان نەهاتیە ئێکلا کرن و بورینا دەمی د بەرژەوەندیا واندا نینە و هەکە ئاست و ئەنجام د باش نەبن ئەو نه بهرپرسن.
زێدەتر جوتیار عەلی گۆت: کارگێریا یانهیا زاخۆ نێزیكی سێ جاران دگەل یاریزانێن تیما باسکێت بۆلێ كۆمبووینه، لێ هەتا نوکە بەرسڤا دووماهیێ بۆ یاریزانێن مه نههاتیه دان، ب رونی بۆ دەستەیا کارگێریا یانێ هاتیه دیاركرن هەکە وان دڤێت وهكو وەرزێ بوری دەربازبنه چارگوشهیا زێرین پێدڤی یە پارەیەکێ زێدەتر ژ یێ بوری خەرج بکەن ژبەر کو وهرزێ ئهڤ ساله بهێزتره و هەشت تیم دێ هەڤرکیێ بۆ چار گوشا زێرین کەن، لێ هەکە ئارمانجا وان ب تنێ پشکداریکرن بیت دێ ب پلانەکا دیتر پشکدار بین و ئەم چاڤەرێ بەرسڤا کارگێریێ نە، یانه دگەل راهێنەرێ مە یێ بیانی یێ وەرزێ بوری گەهشتینە رێکەڤتنێ و دەمەک نێزیک دا دێ ڤەگەریتە باژێرێ زاخۆ، دەربارەیی یاریزانێن ب رەگەز عەرەب گەلەک کێمن ههرچهنده دو یاریزان هاتبوونه دهستنیشانكرن و دا هێزهكێ دهنه تیمێ لێ چو کەسەکێ خوە ل وێ داخازیا مە نە بوو خودان و ئهوان یاریزانان گرێبهستێن یانەیێن دیتر ئیمزا کرینه، نوکە چو یاریزانێن رەگەز ئیراقی یێن باش ل بەر دەست نەماینە .
ناڤهاتی ئەوچەندە ژی گۆت: ل وەرزێ بوری و د ڕۆژەکا وەکو ئەڤرۆ دا بۆ ماوهییچ زێدەتری ١٣ رۆژان دەست ب یەکەیێن راهێنانان كربوون، لێ هەتا نوکە تیما مە و گرێبهستا یاریزانان نەهاتیه ئێكلاكرن، لهوما ئەم بەرپرسیارەتیێ هەلناگرین ئەگەر ئەنجام و ئاست د ئەڤ سالە دا د باش نەبن ژبەرکو دەم گەلەک سەرڤە چوویە و بورینا دەمی ژی د بەرژەوەندیا مە دا نینە و ئەز خوە بەرپرس ژی نابینم بەرامبەر ئاست و ئەنجامێن خراب د وەرزێ نوو دا.
15 هەلبژارتیێن عەرەبی دێ هێنە كوردستانێ
قەیس وەیس:
ئەندامێ ئێكەتیا كیك بۆكسینگا ئیراقێ دیار كر ل مەها بهێت هەرێما كوردستانێ دێ مێڤاندارییا قارەمانیا عەرەبی ل سەر ئاستێ هەلبژارتییان بۆ دو سیستەمێن یاریێ ل باژێرێ سلێمانیێ كەت.
زێدەتر مەحفوز ئیبراهیم بۆ رۆژنامەیا ئەڤرۆ گۆت: بڕیارە ل شەشێ مەها بهێت باژێرێ سلێمانیێ مێڤاندارییا قارەمانییا كیك بۆكسینگێ ل سەر ئاستێ هەلبژارتیێن وەلاتێن عەرەبی بۆ سیستەمێ كەی وان وfull contact بكەت، ئەوا دێ ل سەر ئاستێ كچان و كوڕان بۆ ماوەیێ شەش رۆژان بەردەوام بیت، هەروەسان بەری دەستپێكرنا قارەمانیێ دێ خولەكا راهێنانێ یا نێڤدەولەتی هێتە رێكخستن و دهێتە پێشبینیكرن سەرۆكێ فیدارسیۆنا كیك بۆكسینگا جیهانێ بەرهەڤ بیت.
هەروەسان ناڤهاتی گۆت: پشتی ب دووماهی هاتنا قارەمانیێ بڕیارە هەڤڕكیێن قارەمانییا پیشەكاران ل سەر ئاستێ عەرەبی بهێتە كرن ئەوا دهێتە هژمارتن بۆ جارا ئێكێ یە فیدراسیونا عەرەبی رێك دئێخیت، ب هیڤییا وێ یەكێ ئەو یاریزانێن كورد و یێن پارێزگەها دهۆكێ د ناڤ هەلبژارتیێ ئیراقێ دا بشێن دەستكەفتێن مەزن ب دەستڤە بینن.
نەیماری ژی چاڤ ل رۆنالدۆی و بنزێمای كر
ب شێوەیەكێ فەرمی ستێرێ بەرازیلی و یانەیا پاریس سانجێرمان یا فرەنسی نەیمار دا سێلڤا گرێبەست دگەل یانەیا هیلال یا سعۆدیێ ئیمزاكرن و چاڤ ل چەند ستێرێن دی كر وەكو كریستیانۆ رۆنالدۆ و كەریم بنزێما و بڕیارە ئەڤرۆ هەتا سوبەهی ب گەهیتە پایتەختێ سعۆدیێ ریاز.
ل دووڤ راپۆرتا رۆژنامەیا lequipe یا فرەنسی گرێبەستا نەیماری دگەل هیلال بۆ دو وەرزان ب كۆژمەیێ 160 ملیۆن یۆرۆیان یێن هەردو وەرزان هاتییە ئیمزاكرن زێدەباری نێزیكی 100 ملیۆن یۆرۆیان یانەیا سعۆدیێ دێ پێشكێشی یانەیا پاریس سانجێرمان كەت بەرانبەر دەستبەردارییا وی و بڕیارە ئەڤرۆ هەتا سوبەهی ب گەهیتە وەلاتێ سعۆدیێ.
بۆ زانین خولا رۆشن یا سعۆدیێ كۆمەكا بەرچاڤ یا ستێرێن جیهانی د خولێن ئۆرۆپایێ دا ئیناینە د ناڤ رێزێن خوە دا ژ وانا، كریستیانۆ رۆنالدۆ، كەریم بنزێمە، نگۆلۆ كانتی، رۆبێرتۆ فیرمینۆ، ریاز محرز، سێرجی میلینكۆڤێچ، ساڤێچ، كالیدۆ كۆلیبالی، رۆبن نیڤێز.
هەتا هەیڤەكا دی دڤێت هەموو ئاوارە ڤەگەڕنە سەر مالێن خوە
ئەمیر ئەترووشی
وەزارەتا كۆچ و كۆچبەرێن عێراقێ راگەهاند، 10ی ئیلۆنا ئەڤ سالە” دووماهی ژڤانە بۆ ڤەگەریانا ئاوارێن ناڤخۆیی و پشتی وێ رێككەفتنێ دۆسەیا ئاواران ل هەموو پارێزگەهان دێ هێتە داخستن و ئەو خێزانێن ڤەنەگەرنە سەر جهـ و وارێن خۆ، ئێدی ب ئاوارە ناهێنە هژمارتن.
وەزارەتا كۆچ و كۆچبەرێن عێراقێ گۆت، 10ی ئیلۆنا ئەڤ سالە دووماهی ژڤانە بۆ ڤەگەریانا ئاوارێن ناڤخۆیی بۆ دەڤەرێن وان و پشتی وی دەمی ئێدی ب ئاوارە ناهێنە هژمارتن و گۆت: پێدڤی ب زووترین دەم هەموو ئاوارە ب ڤەگەرنە سەر مال و مولكێن خوە و ئێدی هیچ كەسەك وەكو ئاوارە دناڤا ئاخا عیراقێ دا نەهێتە هژمارتن.
رێڤەبەرێ كۆچ و كۆچبەران و بەرسڤدانا قەیرانا ل پارێزگەها دهۆكێ دیاركر: د ماوێ 7 رۆژاندا 600 خێزانێن ئاوارێن شنگال داخوازیێن خۆ بۆ ڤەگەریانا شنگال پێشكێش كرینە، هەر ئاوارەكێ بڤیت ڤەگەرتە شنگال هیچ ئاستەنگە نینە و یێ بڤێت بمینیت ژی هیچ ئاریشەك نینە».
پیر دەیان جەعفەر، رێڤەبەرێ كۆچ وكۆچبەران وبەرسڤدانا قەیرانا ل پارێزگەها دهۆكێ راگەهاند: كۆمبوونەك ل سەر ڤەگەریانا ئاوارێن شنگال هاتە ئەنجامدان، مەرەم ژ كۆمبوونێ ئەوە هەموو ئاسانكاری بهێنە كرن دگەل وان خێزانێن بڤین ژ كەمپان ڤەگەرنە شنگال و ئاوارە د ئازادن بۆ ڤەگەریانا شنگال و هیچ كیشە و ئاریشەك نینە یێ بڤێت ڤەگەرت ئاسانكاری دگەلدا هێنە كرن، یێ بڤێت بمینیت ژی هاریكاری دگەهنێ، ل سالا 2014ێ وەرە حوكمەتا هەرێما كوردستانێ بەردەوام پشتەڤانیێ و هەڤكاریا ئاواران دكەت و هەتا نوكە ژی بەردەوام هەموو شیانێن حكومەتا هەرێما كوردستانێ هارێكاریا پێشكیشی ئاواران دكەت».
تەكەزكر: حكومەتا عێراقی ب ئاستی پێدڤی پشتەڤانیێ و هەڤكاریا ئاواران ناكەت، ژ ئەگەرێ خرابیا رەوشا شنگال ئاوارە ماینە دناڤ كەمپان دا و نەشێن ڤەگەرن، نوكە ژی گرۆپێن چەكدار هەموو هەولا دەن ئاوارە دناڤ كەمپان دا نەمینن و بچنە شنگال «.
شەریف سلێمان، سەرۆكێ لیژنا كۆچ وك کۆچبەران ل پەرلەمانێ عێراقی راگەهاند: وەزارەتا كوچ و كۆچبەرێن عیراقێ د كەیسا ئاواراندا دا كێمتر خەمیێ دكەت و ئاوارە هاتینە پشتگوههاڤیتن ژلایێ عیراقێ ڤە، هەكە كێشەیا شنگال چارەسەر نەبیت، دێ گەلەك ئاریشە ل شنگال روودەن «.
ئاشكەرا كر: پێدڤیە بۆدجەكا تایبەت بۆ زڤرینا ئاواران بهێتە تەرخانكرن و هەتا نوكە 450 هزار خێزان یێن زڤرینە باشیك و بەحزانی و دەڤەرێن سەر ب نەینەوا ڤە و هێشتا حوكمەتا عیراقێ خەلكێ زەرمەند قەرەبوو نەكریە.
هێشتا رێژەیەكا زۆر یا زەڤیێن مین-رێژكری ل ئامێدیێ نەهاتینە پاقژكرن
مەحمود نهێلی
ژ ئەگەرێ شەرێن بەردەوامێن ل سەر دەڤەرێ و هەبوونا شوونەوارێن بنگەه و بارەگایێن كەڤنێن رژێما بەرێ یا عیراقێ هێشتا مەترسیا مینان ل سەر وەلاتیێن دەڤەرا ئامێدیێ ب گشتی مایە و ئەڤ یەكە ژی بوویە دلگرانیا وەلاتیێن دەڤەرێ.
ستار عەبدولله ئاكنجیێ ناوچەداریا دێرەلۆكێ بۆ رۆژناما ئەڤرۆ دیاركر، ژ بەر كو گەلەك جهێن ل دێرەلۆكێ هەی و هەر دكەڤندا بنگەهێن لەشكەرێ بووینە و ئەڤ جهە هێشتا ژ مینان نەهاتینە پاقژكرن و گۆت: (ل سەر دەمێ رژێما بەعس بنگەه و بارەگایێن سەربازی یێن عیراقێ ل ڤێ دەڤەرێ هەبوون و ئەڤێ دەڤەرێ هەردەم شەر تێدا بوویە ژ بەر وێ یەكێ ژی پرانیا وان جهان یێن هاتینە مین رێژ كرن و ئەڤ یەكە ژی بوویە جهێ مەترسیێ ل سەر وەلاتیان و خەلكێ دەڤەرێ).
د رێ و رەسمێن رادەستكرنا سێ زەڤیێن ژ مینان هاتینە پاقژكرن سەرۆكی دەزگەهێ گشتی یێ كاروبارێن مینان دیاركر، ل سەرانسەرێ هەرێما كوردستانێ 13 هزار و 600 كەس بوونە قوربانی مینان و بەردەوام خەلك دبنە قوربانی و بتنێ د هەشت هەیڤێن ئەڤ سالە دا 18 كەس بووینە قوربانی.
و گۆت: ئەگەرێن سەرەكی یێن بووینە سەدەما پیسبوونا ژینگەها دەڤەرا بەهدینان و بەلاڤبوونا مینان ل ڤێ دەڤەرێ بۆ سالێن شێستان ڤەدگەرن و دەسپێكا شۆرەشا ئیلونێ كو رژێمێن عیراقێ یێن ئێك ل دووڤ ئێك دژی پێشمەرگە و شورەشێ دانای و 90 ژ سەدێ ژ ڤان مینان یێن شەخسی بوونە، چونكە پێشمەرگەی ئالیاتێن مەزن نەبووینە تا كو رژێم مینێن دژی وان دانیت ژ بەر وێ یەكێ مینێن شەخسی ل بەر پێشمەرگەی دهاتنە دانان، ئەڤە زێدەباری شەرێ عیراقێ و ئیرانێ .
رێگر بێسفكی بەرپرسێ راگەهاندنا رێڤەبەریا كاروبارێن مینان ل پارێزگەها دهوكێ بۆ رۆژنانا ئەڤرۆ دیاركر، ل سنورێ دەڤەرداریا ئامێدیێ مەزنترین رووبەرێ زەڤیێن مین رێژكری ب خوەڤە دگریت و گۆت: دورێن 303 زەڤێن مین رێژكری هاتیە دەست نیشانكرن ل دەڤ مە د توماركرینە و پتر ژی هەنە لێ نەهاتینە دەست نیشانكرن و ب مخابنی ڤە بەردەوام د زێدەبوونێ دانە و سالانە چەندین كەس بووینە قوربانی.
و دیاركر، هەتا نوكە ئەو شیانە 80 ژ ڤان زەڤیان ژ مین و تەقەمەنیان پاقژ بكەن و رادەستی خودانێن وان هاتینە كرن، كارێ راكرنا مینان ل ڤێ دەڤەرێ یێ بەردەوامە.
نيشاندان
WP Facebook Auto Publish Powered By : XYZScripts.com