ئامێدیێ‌، مەحمود نهێلی:

د چارچوڤێ وان گوهۆڕینێن ل دووڤ كۆنگرێ ١٤ ێ یێ پارتی دا دهێن، لقێ 18 یێ پارتی بەپرسێن هەر هەشت لژنێن سنوورێ لقێ گوهۆڕین و بۆ ئێكەم جار ژی ئافرەتەك دبیتە بەرپرسا لژنەیەكێ ل سنوورێ دەڤەرداریا ئامێدیێ.
بەرەڤان حەمدی، بەرپرسێ لقێ ١٨ یێ پارتی ل ئامێدیێ‌ دەربارەی ڤان گورانكاریێن ل سەر ئاستێ لقێ هاتینە كرن گۆت: «د چارچوڤێ بەرنامێ پارتی دیمۆكراتی كوردستان دا، پشتی كۆنگرێ ١٤ێ هاتیە ئەنجامدان، گورانكاری ژ بۆ پێشڤەچوونا پارتی و بجهكرنا پەیرەو و پرۆگرامێ پارتی، چێكرنا خوونەكا نوو د ناڤا پارتی دا، بڕیارا گورانكاریێن بەرپرسێن ناوچەیان ل سەر ئاستێ لقێ ١٨ پشتی رازیبوونا مەكتەبا رێكخستنا پارتی ل دهۆكێ هاتنە راگەهاندن و كەفتە د بیاڤێ بجهكرنێ دا، ل دەستپپێكا ڤێ حەفتیێ دێ دەور و تەسلیم هێنە كرن».
گۆتژی: «ئەڤ پرۆسەیە بۆ پێشڤەچوونا رێكخستنا لقێ ١٨ یە و دێ پرۆسەیەكا بەردەوام بیت، كو ل سەر ئاستێ كارگێرێن لژنەیا بخوە ژی ئەو گوهۆڕین دێ د بەردەوام بن».
ناڤهاتی ئاشكرا ژی كر، پێداچوون د بەرپرسێن رێكخراو و بنكان ژی دا دێ هێتە كرن و پشتەڤانیەكا تەمام بۆ بەرپرسێن بنكان دێ هەبیت.
سەبارەت گورانكاریان ل سەر ئاستێ كارگێرێن لقێ بەرپرسێ لقێ 18 گۆت: «ئەڤ پرۆسەیە ل سەر ئاستێ مەكتەبا رێكخستنا پارتی ل پارێزگەها دهۆكێ بۆ كارگێرێن لقێ‌ و بۆ پێشڤەچوونا رێكخستنا سنوورێ هەمی لقێن بەهدینان ژی د ڤەكۆلینێ‌ دایە».
ل داویێ ناڤهاتی هیڤیا سەركەفتنێ بۆ هەموو هەڤالان خواست د ئەركێ وان یێ نوو دا، ژ بۆ پێشڤەچوونا رۆلێ پارتی و رێبازا بارزانی و بجهئینانا پەیرەو و پروگرامێ پارتی ژ بۆ خزمەتا خەلكێ كوردستانێ و خەلكێ دەڤەرا ئامێدیێ ب تایبەتی.
دهێتە زانین دووماهیا حەفتیا چوویی بڕیارا گورانكاریان ل سەر ئاستێ هەر هەشت لژنەیێن سەر ب لقێ ١٨ ڤە هاتە راگەهاندن و كەفتنە د بیاڤێ بجهكرنێ دا و ب ڤی رەنگێ ل خوارێ دیاركری:-
– محەمەد سەعید مێزی بوو بەرپرسێ‌ لژنا ناوچا ئامێدیێ.
– مەهدیا سەعدوللا بوو بەرپرسا لژنا ناوچا دێرەلۆكێ‌.
– ئوسمان عەبدوللا ئامێدی بوو بەرپرسێ‌ لژنا ناوچا شێلادزێ.
– كەیهان ئیدریس نێروەیی بوو بەرپرسێ‌ لژنا ناوچا سیریێ.
– عەگید شەفیق بوو بەرپرسێ‌ لژنا ناوچا سەرسنكێ.
– دوسكی نایف ئەرتیسیبوو بەرپرسێ‌ لژنا ناوچا بامەرنێ.
– هاشم تروانشی بوو بەرپرسێ‌ لژنا ناوچا چەمانكێ.
– جەمال عەبدللا ئەرەدنی بوو بەرپرسێ‌ لژنا ناوچا كانی ماسێ.
هەروەسا بڕیار هاتیەدان رەمەزان ئەحمەد هورەیی، بەرپرسێ بەرێ یێ لژنا سەرسنكێ و مەحەمەد سەلیم فەیسەل نێروەیی بەرپرسێ بەرێ یێ لژنا دێرەلۆكێ بۆ بارەگایێ لقێ بهێنە ڤەگوهاستن و ئەركەكێ نوو پێ بهێتە راسپاردن.

بەرهەڤی بۆ پەسەندكرنا نەخشە و دەستپێكرنا هەردو پڕۆژەیێن پاركا گشتی یا دهۆكێ و پڕۆژەیێ گەشتیاری یێ سكرێ دهۆكێ دهێنە كرن.
ئەڤرۆ رۆژا چارشەمبی ب سەرپەرشتیا بەرێز “د. عەلی تەتەر، پارێزگارێ دهۆكێ، ب بەرهەڤبوونا لایەنێن پەیوەندیدار و هەژمارەكا وەبەرهێنەرێن پارێزگەها دهۆكێ باس ل قووناغێن دەستپێكرن و پەسەندكرن و رازیبوونا نەخشەیێن پێشنیاركری بۆ هەردو پڕۆژەیێن پاركا گشتی یا دهۆكێ و پڕۆژەیێ گەشتیاری یێ سكرێ دهۆكێ هاتە كرن.
پارێزگارێ دهۆكێ پلانا كارگێریا پارێزگەها دهۆكێ بۆ وەبەرهێنەران رۆهنكر و گۆت: «مە وەكو كارگێریا پارێزگەهێ‌ بەرهەڤی كرینە ل دەمەكێ نێزیك ئەڤ پڕۆژەیە بهێنە بجهئینان و بكەڤنە د خزمەتا وەلاتی و گەشتیاران دا.

رێڤەبەری ئاڤا دەوروبەرێن پارێزگەها دهۆكی دیار كر، ل پارێزگەها دهۆكێ‌ 34 پڕۆژەیێن ئاڤێ‌ ب گوژمێ‌ دو ملیار دیناران دهێنە بجهئینان و ئەڤ پڕۆژە ل سەر هەموو دەڤەران بەلاڤكرینە.
خەلات فەتاح، رێڤەبەرێ‌ ئاڤا دەوروبەرێن پارێزگەها دهۆكی بۆ ئەڤرۆ ئاشكرا كر، ل سەر بودجەیا وەبەرهێنانێ‌ ب گوژمێ‌ دو ملیار دیناران پڕۆژەیێن ئاڤێ‌ ل سنوورێ‌ پارێزگەها دهۆكێ‌ دهێنە بجهئینان و گۆت: «34 پرۆژەیێن ئاڤێ‌ نە و ل سنوورێ‌ هەموو دەڤەرداری و ناوچەداریێن سەر ب پارێزگەها دهۆكێ‌ ڤە دێ‌ هێنە بجهئینان».
گۆتژی: «ل سەر بودجەیا پارێزگەها دهۆكێ‌ ژی چەند پڕۆژەیێن ئاڤێ‌ دهێنە دروستكرن، هەروەسا ل ناوچەداریا فەیدیێ‌ ژی ل سەر بودجەیا پارێزگەها نەینەوا پڕۆژەكێ‌ چێكرنا عمبارەكا ئاڤێ‌ ب گوژمێ‌ 700 ملیۆن دیناران دهێتە دروستكرن».
خەلات زێدەتر گۆت: «ل سەر داهاتێ‌ ریڤەبەریێ‌ ژی ب گوژمێ‌ 250 ملیۆن دیناران پڕۆژەیێن ئاڤێ‌ هاتیە بجهئینان، دیسا ل دەڤەرداریا بەردەڕەش ژی چەندین پڕۆژەیێن ئاڤێ‌ بۆ گوندان دهێنە چێكرن».

ئامێدیێ، مەحمود نهێلی:

پشتی دو گەنجێن سنوورێ دەڤەرداریا ئامێدیێ ب رێیا ئەورۆپان ڤە ل دارستانێن بولگاریا گیانێ خوە ژ دەست دای ب بزاڤێن سەرۆكێ حكومەتا هەرێما كوردستانێ و ئالیێن پەیوەندیدار، شەڤا ١١ ل سەر ١٢ تەباخا 2023ێ جەنازێن وان گەهشتنە د ناڤ كەسوكارێن وان دا و ب ئامادەبوونا هەژمارەكا زۆرا خەلكێ دەڤەرێ و كەسوكارێن وان و بەرپرسێن حزبی و حكومی ل گورستانێن دێرەلۆكێ و شێلادزێ هاتنە ڤەشارتن.
كەسوكارێن وان گەنجان د پەیڤەكێ‌ دا سوپاسیا ئالیێن پەیوەندیدار و خەلكێ دەڤەرێ كر، كو هەر ل رۆژا گیان ژ دەست دانا وان هەتا تەرمێن وان گەهشتین، هەڤپشكێن خەما وانا بوون ل سەر هێلێ بوون بو ڤەگەڕاندنا جەنازێن وان، دیسا داخواز ژ حكومەتێ ژی كر، پێنگاڤێن باش بگرنە بەر بۆ رێگریكرنێ ژ چوونا گەنجان بۆ دەرڤەی وەلاتی و بزاڤێ بكەن دەلیڤێن كاری بۆ گەنجان بهێنە دابینكرن، دیسا داخواز ژ گەنجان ژی كر، ڤێ رێكا مرنێ نەگرنە بەر بۆ وێ یەكێ ژیانا وان یا پاراستی بیت.
دهێتە زانین بەری دو حەفتیان گەنجەكێ ناوچەداریا شێلادزێ بناڤێ (دیندار داوود كوكەری، رێكانی) ل دارستانێن وەلاتێ بولگاریا گیانێ خوە ژ دەست دا بوو، پشتی دو رۆژان خەبەرێ گیان ژ دەست دانا گەنجەكی دێ یێ ناوچەداریا دێرەلۆكێ‌ ژی بناڤێ (رێكەفت باقی سپێری نێروەی) هەر ل دارستانێن بولگاریا گەشتە كەسوكارێن وی، ب رێیا پەیوەندیێن حكومەتا هەرێمێ، تەرمێن وان بۆ هەرێما كوردستانێ هاتنە ڤەگەڕاندن و ل گورستانێ هاتنە ڤەشارتن.