ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی پێشوازی ل شانده‌كێ بلند یێ ژۆرا بازرگانی یا كلدانی ئه‌مریكی و ده‌زگه‌هێ جڤاكێ كلدانی ب سه‌رۆكایه‌تیا مارتن مه‌ننا كر.

سه‌رۆكێ ژۆرا بازرگانی كلدانی ئه‌مریكی و جڤاكێ كلدانی كورتیه‌ك ل دۆر كار و چالاكی و پرۆژه‌یێن خوه‌ ل ئه‌مریكا و هه‌رێما كوردستانێ و ده‌شتا نه‌ینه‌وا به‌رچاڤكر و به‌رهه‌ڤیا خوه‌ یا تمام بۆ پشكداریكرنا كارا د پرۆسه‌یا ئاڤه‌دانكرن و گه‌شه‌پێدانا كوردستانێ دا نیشان دا.

مه‌سرور بارزانی ئاماژه‌كر كو كوردستان نیشتمانێ مه‌ هه‌موویانه‌ ب هه‌موو پێكهاته‌یێن نه‌ته‌وی و ئایینی یێن جوداڤه‌ و پێدڤیه‌ ئه‌م هه‌موو د هاریكار بین ژ پێخه‌مه‌ت زێده‌تر پێشخستنا هه‌رێما كوردستانێ و پێشڤه‌برنا كه‌لتوورێ پێكڤه‌ژیانا ئاشتیانه‌ د ناڤبه‌را پێكهاته‌یان دا.

سه‌رۆكێ حوكمه‌تا هه‌رێمێ پشته‌ڤانیا هه‌رێما كوردستانێ بۆ داخوازیێن ڕه‌وا یێن كریستیانان و پێكهاته‌یێن جودا یێن ده‌شتا نه‌ینه‌وا و ده‌ڤه‌رێن كوردستانی یێن ده‌رڤه‌ی ئیدارا هه‌رێمێ دیاركر و دووپاتی ل گرنگیا چاره‌سه‌ركرنا كێشه‌یێن وان ده‌ڤه‌ران د چارچۆڤه‌یێ ماده‌یێ 140 یێ دستووری دا كر.

ئه‌ڤرۆ:

ئه‌ندامه‌كێ كۆمیته‌یا ناڤین یا پارتی دیموكراتی كوردستان ڕاگه‌هاند، پشتی تمامكرنا كارێن ئۆرگانێن پارتی، شانده‌ك بۆ دانوستاندنێ ل گه‌ل ئالیێن سیاسی دێ هێته‌ پێكئینان.

ئومێد خوشناو، ئه‌ندامێ كۆمیته‌یا ناڤین یا پارتی دیموكراتی كوردستان گوت” هه‌ر وه‌كو د ده‌مێ ئه‌نجامدانا كۆنگره‌یێ 14 یێ پارتی دووپاتی لێ هاتیه‌ كرن، پارتی پشتی كۆنگره‌ی دێ به‌رپه‌ره‌كێ نوو ل گه‌ل ئالیێن سیاسی ڤه‌كه‌ت و دێ سه‌ره‌دانا هه‌موو وان ئالیان كه‌ت كو دناڤ ده‌ستهه‌لاتێ دانه‌ و هه‌تا ئه‌وێن ژ ده‌رڤه‌ی ده‌ستهه‌لاتێ ژی”.

ئومێد خوشناو دیاركر” ل ده‌مه‌كێ نێزیك شاندێ پارتی دێ سه‌ره‌دانا ئالیێن سیاسی یێن هه‌رێما كوردستانێ و ئیراقێ ژی كه‌ت و دێ سیاسه‌تا به‌رپه‌ره‌كێ نوو ل گه‌ل ئالیان ڤه‌كه‌ت”.

سه‌باره‌ت ده‌مێ سه‌ره‌دانا شاندێ پارتی بۆ ئالیێن سیاسی یێن هه‌رێما كوردستانێ و ئیراقێ، گوت” شاند دێ پشتی تمامكرنا كارێن ئۆرگانێن پارتی هێته‌ پێكئینان بۆ وێ چه‌ندێ سه‌ره‌دانا ئالیێن سیاسی بكه‌ت”.

هه‌ولێر، قائید میرۆ

پسپۆره‌كا په‌یوه‌ندیێن نێڤده‌وله‌تی ڕاگه‌هاند، وه‌لاتێن ده‌وروبه‌ر مه‌ترسی ل سه‌ر هه‌رێما كوردستانێ په‌یداكریه‌ و حوكمه‌تا ئیراقێ ژی یا خه‌مساره‌ لهه‌مبه‌ر گه‌ف و هێرشێن ل سه‌ر هه‌رێمێ هه‌ین هه‌روه‌سا دبێژیت، پشتی سه‌ره‌دانا نێچیرڤان بارزانی بۆ به‌غدا دێ ڕه‌وش باشتربیت و ئالۆزی دێ كێمتربن، به‌لێ ئه‌ركێ نوونه‌رێن كوردایه‌ ل جڤاتا نوونه‌ران زێده‌تر گڤاشتنان بكه‌نه‌ سه‌ر ئیراقێ بۆ بجهئینانا دستووری.

ئاشنا بابان، پسپۆرا په‌یوه‌ندیێن نێڤده‌وله‌تی بۆ ڕۆژنامه‌یا (ئه‌ڤرۆ) گوت” ئاریشه‌یێن هه‌رێمێ دگه‌ل به‌غدا هه‌ین هه‌موو د دستوورینه‌، له‌وما هه‌رێما كوردستانێ به‌رده‌وام پێداگیری ل سه‌ر بجهئینانا دستووری كریه‌، حوكمه‌تا نوكه‌ یا ئیراقێ ب سه‌رۆكایه‌تیا محه‌مه‌د شیاع سودانی ته‌كه‌ست ل سه‌ر چاره‌سه‌ركرنا ناكۆكیێن د ناڤبه‌را به‌غدا و هه‌رێما كوردستانێ دا كریه‌، سه‌ره‌دانا ڤێ دووماهیێ یا نێچیرڤان بارزانی، سه‌رۆكێ هه‌رێما كوردستانێ بۆ به‌غدا دێ كاریگه‌ری هه‌بن ل سه‌ر ده‌ستپێكرنا گاڤێن چاره‌سه‌ریێ، به‌لێ گه‌ره‌نتی نینه‌ جاره‌كادی به‌غدا قانوون و دستووری پێشێل بكه‌ت، مخابن ژبه‌ركو ئه‌و ده‌وله‌ت نینه‌ ئه‌ركێ ئیراقێ یه‌ ئاریشه‌یان چاره‌سه‌ر بكه‌ت، ئه‌ز باوه‌رم ئیراق وه‌كو پێدڤی ئه‌ركێ خوه‌ بۆ پاراستنا هه‌رێما كوردستانێ بجهنائینیت كو ڕۆژانه‌ توركیا و ئیران ب به‌هانه‌یێن جودا هه‌رێما كوردستانێ دكه‌نه‌ ئارمانج، ئه‌ڤه‌ ئه‌ركێ حوكمه‌تا فیدڕاله‌ ب رێیێن دیبلۆماسی بزاڤان بكه‌ت مه‌ترسی ل سه‌ر هه‌رێما كوردستانێ بهێنه‌ كێمكرن، هه‌لویستێ په‌رله‌مانتارێن كورد ژی وه‌كو پێدڤی نینه‌ ل به‌غدا، چونكه‌ په‌رله‌مانتارێن كورد نوونه‌رێن هه‌رێما كوردستانێ نه‌ ل به‌غدا ئه‌ركێ وانه‌ ل به‌غدا نوونه‌رایه‌تیا هه‌رێما كوردستانێ بكه‌ن و گڤاشتنان بكه‌نه‌ سه‌ر حوكمه‌تا ئیراقێ بۆ وێ چه‌ندێ پێگیریێ ب دستووری بكه‌ت”.

ئاشنا بابان گوت ژی” هه‌رچه‌نده‌ حوكمه‌تا ئیراقێ یێ لاوازه‌ هه‌مبه‌ر هێرشێن ل سه‌ر هه‌رێما كوردستانێ، ڕاسته‌ سه‌رۆك وه‌زیرێن ئیراقێ داخوازا ڕاگرتنا هێرشان كریه‌ و بڕیاره‌ نوونه‌رێن وه‌لاتێن ده‌وروبه‌ر بهێنه‌ گازیكرن بۆ وه‌زاره‌تا ده‌رڤه‌یا ئیراقێ، به‌لێ شه‌رمه‌زاركرنا ڤان هێرشان چو مفایێ خوه‌ نابیت ل سه‌ر هه‌لویست و هێرشێن بیانی بۆ سه‌ر ئاخ و خه‌لكێ هه‌رێما كوردستانێ، به‌رۆڤاژی ڕێكارێن دستووری یێن هه‌ین و وه‌لاتێن  ده‌وروبه‌رێن ئیراقێ قانوونێن نێڤده‌وله‌تی بنپێكرینه‌، هه‌رچه‌نده‌ ئه‌ز یا گه‌شبینم چوونا سه‌رۆكێ هه‌رێما كوردستانێ بۆ به‌غدا دێ گه‌له‌ك ئاریشه‌یان چاره‌سه‌ر كه‌ت و  ئالۆزیێن نوكه‌ هه‌ین نامینن، ژ به‌ر كو نێچیرڤان بارزانی د سه‌ره‌دانا خوه‌ دا بۆ به‌غدا ئه‌و بابه‌ت دگه‌ل به‌رپرسێن ئیراقێ به‌حسكرینه‌”.

ئه‌ڤرۆ، سالار محه‌مه‌د دۆسكی:

چاڤدێره‌كێ سیاسی دبێژیت، پارتی و ئێكه‌تی پێدڤی ب ڕێككه‌فتنه‌كا نوونه‌ بۆ حوكمڕانیا هه‌رێما كوردستانێ چونكه‌ سه‌ركردایه‌تیا هه‌ردو پارتان هاتیه‌ گوهۆڕین و تایبه‌ت ئێكه‌تی وگرنگه‌ ل به‌غدا و كوردستانێ هه‌ر دو پارتان هه‌فكاری هه‌بیت بۆ پاراستنا سه‌نگا كوردان.

عه‌لی ئیبراهیم باخ، چاڤدێرێ سیاسی بۆ ڕۆژنامه‌یا (ئه‌ڤرۆ) گوت” ڕێككه‌فتنه‌ك یا هه‌ی كو د ده‌مه‌كێ كورت دا پارتی دیموكراتی كوردستان باره‌گه‌هێن خوه‌ ڤه‌گه‌رینیته‌ ده‌ڤه‌رێن كوردستانی یێن ژ ده‌رڤه‌ی ئیدارا هه‌رێما كوردستانێ و تایبه‌ت ل پارێزگه‌ها كه‌ركوكێ و دیسا تێكگه‌هشتنه‌ك یا هه‌ی  بۆ بودجه‌یا پێشمه‌رگه‌ی هه‌روه‌سا ده‌مێ شه‌ش هه‌یڤان هاتیه‌ دیاركرن بۆ وێ چه‌ندێ قانوونا په‌ترۆل و غازێ ل جڤاتا نوونه‌رێن ئیراقێ  بهێته‌ به‌رهه‌فكرن و په‌سه‌ندكرن و به‌غدا و هه‌ولێر ل سه‌ر ڤی پرۆژه‌ قانوونێ رازیببن، باوه‌رناكه‌م ل سالا داهاتی دا كێشه‌ بهێنه‌ چاره‌سه‌ركرن لێ یا گرنگ ئه‌وه‌ حه‌زه‌ك هه‌بیت بۆ چاره‌سه‌كرنا ڤان كێشه‌یان و چارچۆڤه‌یێ هه‌ماهه‌نگیێ دێ هه‌موو بزاڤان كه‌ت 40% داخوازێن كوردان بجهبینیت دا پارتی دیموكراتی كوردستان ڕازیبت وه‌كو پارته‌كا كوردی یا هه‌ژماره‌ ئێك ل هه‌رێما كوردستانێ د هه‌لبژارتنێن داهاتی دا نه‌ چیته‌ ئالیێ موقته‌دا سه‌در و ئه‌ڤه‌ بۆ گه‌له‌ك یا گرنگه‌ كو نه‌ تنێ كورد به‌لكو هه‌تا سوننه‌ ژی نه‌چنه‌ ئالیێ موقته‌دا سه‌در له‌وما بۆ به‌رژوه‌ندێن خوه‌ نه‌ بۆ چاره‌سه‌كرنا كێشه‌یێن ل گه‌ل كوردان خوه‌ نێزیك چاره‌سه‌كرنێ دكه‌ن”.

دیاركر ژی” دڤێت پارتی و ئێكه‌تی به‌رپرسایه‌تیێ وه‌ربگرن ل به‌غدا و هه‌تا نوكه‌ دو وه‌زاره‌تێن كوردان ڤالا ماینه‌ و دڤێت پارتی و ئێكه‌تی ڤێ چه‌ندێ چاره‌سه‌ر بكه‌ن چونكه‌ ئێدی كوردان سه‌نگ ل جڤاتا وه‌زیران نامینیت و تنێ دو وه‌زیرێن كوردان ل جڤاتا وه‌زیرێن ئیراقێ د به‌رهه‌ڤن و پێدڤیه‌ كورد ب زووترین ده‌م ڤان هه‌ردو وه‌زاره‌تان پر بكه‌ن و هه‌كه‌ بابه‌ت هه‌ژمار بن هه‌ردو وه‌زاره‌ت بۆ پارتی دكه‌ڤن لێ هنده‌ك جاران سیاسه‌ت ب هه‌ژماران ناهێته‌ شرۆڤه‌كرن و دڤێت ل دووماهیێ پارتی و ئێكه‌تی بگه‌هنه‌ وێ باوه‌ریێ كو شێوازه‌كێ ئێكگرتی ل به‌غدا و كوردستانێ په‌یڕه‌و بكه‌ن و هه‌ر دو ئالی پێدڤی ب ڕێككه‌فتنه‌كا نوو نه‌ بۆ پێنچ هه‌تا 10  سالێن بهێت كا چه‌وا كوردستانێ بڕێڤه‌ببه‌ن”.

خویاكر” پێشتر سه‌ره‌ده‌ری ل گه‌ل ئێكه‌تیێ دهاته‌كرن كو حزبه‌كه‌ یا به‌ر ب نه‌مانێ دچیت به‌لێ پشتی هاتنا بافل ته‌له‌بانی شیكاره‌كا دی یا دهێته‌ دیتن نه‌ ڕامان ئه‌وه‌ یا بهێز كه‌فتی به‌لكو دبیت هنده‌ك ئه‌جندایێن  ده‌ره‌كی ژی هه‌بن و گه‌له‌ك كورد كه‌فتینه‌ به‌ر هێرشێن هه‌ر دو وه‌لاتێن توركیا و ئیرانێ”.

ئاماژه‌كر”پشتی 16 ئۆكتۆبه‌رێ كوردان چ سیسته‌مه‌كێ حوكمڕانیێ یێ باش پێشكێشی خه‌لكێ كوردستانێ و ئیراقێ نه‌كریه‌ كو بیته‌ ئه‌زموونه‌كا باش بۆ كوردان ل ئیراقێ و ده‌رڤه‌، نێچیرڤان بارزانی سه‌رۆكێ هه‌رێما كوردستانێ یێ هه‌موو بزاڤان دكه‌ت كو ئالیێن سیاسی ل سه‌ر مێزا دانوستاندنێ كوم بن و ئه‌و ناڤوده‌نگیا هه‌رێما كوردستانێ بۆ خوه‌ چێكری ب پارێزیت و ئه‌ڤه‌ به‌رپرسایه‌تیه‌كا مه‌زنه‌ ل سه‌ر ملێن پارتی و پاشی ئێكه‌تی و دڤێت بكه‌ن و دیسا دڤێت ژڤانێ هه‌لبژارتنێن كوردستانێ بهێـته‌ دیاكرن و ئه‌و هه‌لبژارتن بهێنه‌ ئه‌نجامدان و دڤێت بۆ خه‌لكی بهێته‌ دیاركرن كو هێشتا كورد بهێزن “.

هه‌روه‌سا گوت” هه‌كه‌ چارچۆڤه‌یێ هه‌ماهه‌نگیێ ل گه‌ل سه‌رۆك وه‌زیرێن ئیراقێ نه‌بیت، كه‌سایه‌تیا سه‌رۆك وه‌زیران چ ڕۆل ل سه‌ر كونترۆلكرنا ئیراقێ نابیت و پێشبینی دكه‌م چارچۆڤه‌یێ هه‌ماهه‌نگیێ دێ هه‌موو بزاڤان كه‌ت ڤێ قوناغێ خزمه‌تێ پێشكێشی خه‌لكی بكه‌ت”.

هێشتا گوت” باشتره‌ پارتی و ئێكه‌تی ل گه‌ل هه‌ڤدو ڕوونن و پلانه‌كا دارێتی بدانن بۆ چاره‌سه‌كرنا كێشه‌یان، چونكه‌ سه‌ركردایه‌تیا هه‌ر دو ئالیان و تایبه‌ت ئێكه‌تی هاتیه‌ گوهۆڕین و نه‌ ئه‌و سه‌ركردایه‌تیا جارانه‌ كو ڕێككه‌فتن ل گه‌ل پارتی دیموكراتی كوردستان كری و پێشتر كابینه‌یێن بۆری یێن حوكمه‌تا هه‌رێمێ  هنده‌ك پاره‌ زێده‌تر دانه‌ سلێمانیێ لێ به‌ری دو سالان و ل سه‌ر خواستا سلێمانیێ كو داهاتێ هه‌ر پارێزگه‌هه‌كێ بۆ وێ بیت و پشتی چه‌ند كێشه‌یێن دارایی بۆ دروستبووین نوكه‌ دزڤرن و بێژن كوردستان هه‌موو ئێكه‌ و هه‌ولێر پایته‌خته‌”.