زنار تۆڤی:

وەزیرا كار و كاروبارێن جڤاكی ل حوكمەتا هەرێما كوردستانێ راگەهاند، د دەمەكێ كورت دا وان سێ سەنتەرێن ئۆتیزمێ ڤەكرینە و ل هەرێما كوردستانێ نێزیكی چار هزار زارۆكێن ئۆتیزمێ هەنە، ب تنێ 310 زارۆیان مووچە هەیە و دبێژیت: مە سەنتەرەكێ ئۆتیزمێ ل قەلادزێ ڤەكر، كو پڕۆژەكێ هەڤپشك بوو د ناڤبەرا حكومەت و دەزگەهێ روانگە دا.
كوێستان محەمەد، وەزیرا كار و كاروبارێن جڤاكی گۆت: «د دروستكرنا ئەڤی سەنتەری دا حكومەتا هەرێما كوردستانێ 15 ملیۆن دینار بۆ دابینكرینە و 28 ملیۆن دینارێن دیتر ژی ژ لایێ دەزگەهێ روانگەڤە هاتینە دابینكرن، هەروەسا د دەمەكێ كورت دا، مە سێ سەنتەرێن ئۆتیزمێ ڤەكرینە، دو ژ وان ل سەر ئەركێ دەزگەهێ روانگە بووینە و ئێك ژی ب هەڤپشكی بوویە».
گۆت ژی: «نوكە ل هەرێما كوردستانێ 70 سەنتەرێن راهێنانا ئۆتیزمێ هەنە، 56 سەنتەر ژ وان یێن كەرتێ تایبەتن و 14 سەنتەر ژی حكومینە، هزار و 756 زارۆك راهێنانان تێدا وەردگرن، هەروەسا د چارچۆڤێ كارێ هەڤپشك دا، وەزارەتا كار ب هەڤكارییا دەزگەهێ روانگە و ناڤەندا هەڤپشك یا هەماهەنگییا قەیرانان، وەرشەكا نوو یا راهێنانێن پیشەیی ل قەلادزێ ڤەكریە».
ل دووڤ ئامارێن وەزارەتێ، ل هەرێما كوردستانێ سێ هزار و 927 زارۆك هەلگرێن نیشانێن ئۆتیزمێ نە، بەلێ ژ وێ هەژمارێ ب تنێ 310 زارۆیان مووچە هەیە.

دهۆك، لەزگین جۆقی:

سەرۆكێ دەستەیا بلندا بنگەهێ لالشێ‌ بۆ رۆژنامەیا ئەڤرۆ دیاركر كو سوبەهی ئەو دێ پێشوازیێ ل 33 سالیا دامەزراندنا بنگەهێ لالشێ‌ یێ رەوشەنبیری و جڤاكی كەن؛ ئەو دەزگەهێ بەرچاڤ و بلند و ژ بەرهەمێ خوینا ب هزاران شەهیدێن كوردستانێ هاتیە دامەزراندن.
سەعید جردۆ، سەرۆكێ دەستەیا بلندا بنگەهێ لالشێ‌ گۆت: «ئەم دێ پێشوازیێ‌ ل خەلكێ خۆ كەین و فەستیڤالەكا كەلەپووری دێ هێتە سازكرن، ئەم ب ئەركێ خۆ دزانین كو سوپاسی و پێزانینێن خۆ ئاراستەی سەركردایەتیا كوردستانێ بكەین، ب تایبەتی سەرۆك و لێڤەگەڕێ‌ كوردان مەسعود بارزانی، سەرۆكێ هەرێما كوردستانێ نێچیرڤان بارزانی ژ بۆ وێ پشتەڤانی و گرنگیدانا وان ب ڤی دەزگەهێ‌ دێرین، ب تایبەتی ژی د دەستپێكا دامەزراندنا وێ دا دای».
گۆت ژی: «ب هەموو شانازی و سەربلندی ڤە رادگەهینین، كو هەموو چالاكی و كارێن بنگەهێ لالشێ‌ ب پشتەڤانییەكا بێ سنۆر ژ ئالیێ مەسرور بارزانی، سەرۆكێ حكومەتا هەرێما كوردستانێ ڤە دهێنە ئەنجامدان».
زێدەتر گۆت: «ئێكەمین كۆنفرانسێ نێڤدەولەتی یێ زانستی، كو مە پار ب هەڤكاری ل گەل زانكۆیا دهۆكێ ل دۆر (ئێزدیاتی وەكو ئۆل، دیرۆك، جوگرافیا و كەلەپوور) سازكری، نوكە ئەم یێ‌ بەرهەڤییان بۆ گێڕانا كۆنفرانسێ دویێ‌ یێ‌ نێڤدەولەتی یێ زانستی ل دۆر (جینۆسایدا ئێزدییان؛ بیردانك و دادپەروەری) دكەین، كو بڕیارە ل دووماهیا مەها ئیلۆنا ئەڤ سالە بهێتە ئەنجامدان».

هەولێر، قائید میرۆ:

ئەندامەكا لیژنا ئاسایش و بەڕەڤانیێ ل پەڕلەمانێ ئیراقێ ئاشكرا كر، داخواز ژ سۆپا سالارێ ئیراقێ هاتیە كرن، هاریكاریێن لۆجستی و دارایی پێشكێشی هێزێن پێشمەرگەی بكەن و دبێژیت: مە داخوازكریە هەماهەنگی بۆ نەهێلانا ڤالاهیا ئەمنی ل دەڤەرێن كوردستانی هەبیت.
دكتۆر چیمەن بارزانی، ئەنداما لیژنا ئاسایش و بەڕەڤانیێ ل پەرلەمانێ ئیراقێ بۆ رۆژناما ئەڤرۆ گۆت: «ب مەرەما هەماهەنگیێ د ناڤبەرا هەرێم و بەغدایێ‌ دا د بیاڤێن سەربازی و ئەمنی دا، مە سەرەدانا سەرۆكایەتیا ئەركانێ سۆپایێ ئیراقێ كر، مە داخواز ژێ‌ كر هەماهەنگی د ناڤبەرا هێزێن پێشمەرگەی و سۆپایێ ئیراقێ دا هەبیت بۆ نەهێلانا ڤاهیا ئەمنی ل دەڤەرێن كوردستانی، داكو دوبارە گروپێن تیرۆرستی ل ئەڤان دەڤەران سەرهەلنەدەن، چارەسەریێن ریشەیی ل گورەی دستۆری بهێنە دیتن، بۆ ئێكلاكرنا وان دەڤەران».
دكتۆر چیمەن بارزانی گۆت ژی: «هەر د كۆمبوونا ل گەل سەرۆك ئەركانێ سۆپایێ ئیراقێ دا، مە تەكەزی ل سەر هاریكاریا د ناڤبەرا هەردولا دا كر، ب تایبەتی مە داخوازكر كو پێدڤیە كار بۆ باشتركرنا رەوشا دارایی و لۆجستی یا هێزێن پێشمەرگەی ژ ئالیێ حوكمەتا ئیراقێ ڤە بهێتە كرن، چونكی هێزێن پێشمەرگەی وەكو هێزەكا نیشتیمانی و دستۆری بەردەوام خەبات كریە».

رەمەزان زەكەریا:

حكومەتا هەرێما كوردستانێ د كابینەیا خۆ یا نەهێ دا سەركەفتنەكا بەرچاڤ د پاراستنا ئاساییشا ئاڤێ دا ب دەست ڤە ئینایە و شیایە ب ڕێكا چەندین بەنداڤێن نوو زێدەتر ژ 252 ملیۆن مەترێن سێجا یێن ئاڤێ عمبار بكەت.
ل دویڤ داتایێن فەرمی، سەرەڕای هەموو قەیران و ئاستەنگێن ل هەمبەر كابینەیا نەهێ هەین، بەلێ حكومەتێ شیایە د كەرتێ‌ ئاڤێ دا دەستكەفتێن ستراتیژی تۆمار بكەت، كار ل سەر ئاڤاكرنا 9 بەنداڤێن مەزن بكەت و تمام بكەت و ئەڤ سالە پتر ژ 252 ملیۆن مەترێن سێجا یێن ئاڤێ‌ عمباركرینە.
دیسا كابینەیا نەهێ گرنگیەكا مەزن ب ئاڤاكرنا پۆندان ژی دایە، 23 پۆند ب دووماهی هاتینە 58 پۆند د قووناغا بجهئینانێ دانە، هەروەسا حوكمەتێ ب دەهان پڕۆژەیێن مەزن یێن ئاڤێ بجهئیناینە ب مەرەما دابینكرنا ئاڤا ڤەخوارنێ بۆ باژێڕ و باژێڕكێن هەرێمێ و دابینكرنا ئاڤێ بۆ زەڤیێن چاندنێ، كو ئەڤە وەكو پشتەڤانیەكا مەزن بۆ كەرتێ ئابووری و چاندنێ ل كوردستانێ دهێتە هەژمارتن.