سندس سالح سلێڤانەیی:

فەرهاد ئەترووشی، سەرۆكێ لیستا (275) ل پارێزگەها دهۆكێ دیار كر، ل دووڤ وێ هژمارا دەنگان ئەوا بەری سالەكێ پارتی بۆ پەرلەمانێ كوردستانێ ل دەڤەرا بەهدینان ئیناین كو نێزیكی (408) هزار دەنگان بوون، لەورا هەكە ب ڤی رەنگی بیت و ل دووڤ وێ هژمارێ و ل دووڤ حیساباتان، هەروەسا ل دووڤ پێشبینیێن بسپۆر و شارەزا و كۆمسیۆنێ پارتی یا بێ هەڤڕكە و دێ بێ منەت و گەلەك ب ساناهی ژی دێ (9) كۆرریسكان ل دەڤەرا بەهدینان ب دەستڤە ئینیت.

فەرهاد ئەمین ئەتروشی، بەربژارێ ژمارە (1) یێ لیستا (275) یا پارتی دیموكراتی كوردستان و سەرۆكێ لیستا پارتی ل پارێزگەها دهۆكێ د دیدارەكێ دا بۆ رۆژنامەیا ئەڤرۆ گۆت: ئەز دبێژمە هەموو دەنگدەرێن كوردستانێ دەنگی بدەنە پارتی دا كوردستان بهیز بمینیت، دەنگی بدەنە پارتی، دا پارتی بشێت ڤێ ئێمناهیا ل كوردستانێ هەی باشتر رابگریت، دەنگی بدەنە پارتی دا پارتی بشێت زێدەتر پرۆژەیان چێكەت، دەنگی بدەنە پارتی دا پارتی بشێت سەركێشیا پرۆژەیێ نەتەوەی یێ كوردستانێ بكەت.
زێدەتر گۆت: ل سالا 2010 هەتا 2014 ئەز ئەندامێ پەرلەمانێ عیراقێ بووم، ئەم نێزیكی (33) پەرلەمەنتارێن پارتی بووین، هەموو لایەنێن مەزن هزرا مەزن سەنگا مەزن قەبارێ مەزن بۆ پارتی د دانا، هەموو دەمان چاڤێ وان و گوهێ وان ل هندێ بوو كا دێ لیستا پارتی چ بێژیت، هەروەسا كا دێ سەرۆك بارزانی چ بێژیت؟ لەورا هەكە خەلكی بڤێت كوردستان بهێز بمینیت، كوردستان پتر یا ئارام و ئاڤەدانبیت، دەنگێ خوە بدەنە لیستا (275) یا پارتی دیموكراتی كوردستان، كو ئەو ژی لیستا سەرۆك مەسعود بارزانی یە، لیستا شەهیدانە، لیستا ئارامی و ئاڤەدانیا كوردستانێ یە.
د لایەكێ دی دا گۆت: ئەم دێ بزاڤێ كەین ئەم هەموو لیستێن كوردی پێكڤە د ئێكگرتی بین و هندەك تشتێ سەرەكی پێكڤە دارێژین، چونكو چارەنڤیسێ مە هەموویان وەكو ئێكە، كوردستان یا مە هەموویانە و هەكە تشتەكێ باش هەبیت دێ بۆ مە هەموویان یا باش بیت و هەكە تشتەكێ خراب بهێت دێ ب سەرێ مە هەموویان هێت، ژبەر هندێ یا فەرە ئەم هەموو پێكڤە كاربكەین و ڤێ ستراتیژیەتێ بێخینە كاری، چونكو مە خالێن هەڤپشك یێن هەین وەكو لایەنێن كوردستانی و رەنگە هندەك خال ژی هەبوون ناكۆكی بوون و ئەڤا ل هەموو دونیایێ یا هەی و ئەڤ ئۆفیسا من ل دهۆكێ ڤەكری ئۆفیسا لیستا (275) و هەر (21) بەربژارێن وێ یە و دەرگەهێ ئۆفیسێ بۆ وان هەموویان یێ ڤەكری یە بهێن بانگەشەیا خوە بكەن یان دحازربن جهێ وان هەموویانە و هەكە ئەم بەربژارێن پارتی نەبین ئەم دەرناكەڤین، چونكو خەلك دەنگێ خوە ددەتە مە، چنكو ئەم هێزا پارتی نە و هێزا مە ژی هێزا سەرۆك بارزانی یە.
ل دووماهیێ (د. فەرهاد ئەمین ئەتروشی) سەرۆكێ لیستا (275) یا پارتی دیموكراتی كوردستان بۆ هەلبژارتنێن پەرلەمانێ كوردستانێ گۆت: د شەش سالێن ئەز پارێزگەرێ دهۆكێ، كو ژ 2014 هەتا 2020 بوو، ل سەردەمێ من گەلەك قەیران و روودان پەیدا بوون، ژ وانا ئەنجامدانا پرۆسەیا سەرەبەخۆیا كوردستانێ یان بێژین (ریفراندۆمێ) كو ئەو دەستكەفتەكێ مەزن بوو، ددووڤدا هاتنا حەشدا شەعبی و بڕینا مۆچە و بۆدجەیێ كوردستانێ و پەژیكا كۆرۆنایێ ئەڤە هەموو كو ژ سەربۆرا من مەزنتر بوون، بەس ئەم شیاین ئیدارە بكەین.

لەزگین جوقی

بەربژارێ ژمارە 5 ل سەر لیستا 275 یا پارتی دیموكراتی كوردستان ل بازنێ نەینەوا راگەهاند، پارتی دێ پتریا دەنگێن شنگالێ بدەستخۆڤەئینیت و پارتی كار دكەت بۆ دەستڤەئێنانا ئێك ملیۆن دەنگان.

مەحما خەلیل، بەربژێرێ ژمارە 5 ل سەر لیستا 275 یا پارتی دیموكراتی كوردستان گۆت ژی: هەردەم بێ جوداهی مە بەرەڤانیێ ژ خەلكێ خۆ كریە، ئەم رێ نادەین زۆلم ل خەلكێ مە بهێتە كرن، ئەم دێ بەرەڤانیێ ژ خەلكێ خۆ كەین و دێ كار كەین بۆ ڤەگەراندن و ئاڤەدانكرنا شنگالێ د چارچووڤێ كارناما پارتی دیموكراتی كوردستانێ دا، هەردەم بەرنامێ پارتی ئاڤەدانی و ئارامییە بۆ هەمی دەڤەران، ئەم دێ كار و خزمەتێ بۆ هەمی پێكهاتێن كوردستانێ و ئیراقێ كەین، دێ ب رژدی بۆ شنگالێ كار كەین، هەتا نوكە ئێش و ئازارێن خەلكێ شنگالێ دەرمان نەبووینە و پێدڤیە پتر خزمەتا خەلكێ خۆ شنگالێ بكەین.
زێدەتر گۆت: ئەم ژ سندۆقا هەلبژارتنان ناترسین، مە باوەری ب خەلكێ خۆ ل شنگال هەیە و دێ‌ بەرەڤانیێ و خەباتا و قەهرەمانیا خەلكێ خۆ ل شنگالێ كەین، خەلكێ مە ل شنگالێ خەلكەكێ خۆراگرە و دێ ل رۆژا 11/11/2025ێ خەلكێ مە شنگالێ دەنگ ب لیستا 275 یا پارتی دیموكراتی كوردستان دەن و بەربژێرێ شنگالێ دناڤ لیستا پارتی دا كۆ بەری نوكە مە بۆ بەرژەوندیا خەلكێ خۆ شنگالێ كار كریە دێ بەردەوام بین ل سەر خزمەتكرنا هەمی خەلكێ خۆ.
تەكەز كر، هەردەم مە كاركریە بۆ ڤەگەراندنا ئاوارەیان ب سەرفەرازی و رزگاركرنا خەلكێ خۆ و ڤەكرنا گۆڕێن ب كۆم ل شنگالێ و ئاڤەدانیا شنگالێ بۆ خۆلا شەشێ یا پەرلەمانێ ئیراقێ و خەلكێ شنگالێ دێ دەنگ ب لیستا 275 یا پارتی دیموكراتی كوردستان و بەربژێرێن پارتی دیموكراتی كوردستان ل شنگالێ دەن، چونكو دەنگێ وان بۆ ئاڤەدانیا شنگالێ و ڤەگەراندنا ئاوارە و دادپەروەریە.

سالار محەمەد دۆسكی:

3-3

لێ‌ هەتا بۆ مە بڕیار نەهاتی مە ئەو جهە نەهێلا و دەما ئەم هاتینە خۆارێ‌ و من بابێ‌ خۆ دیتی، ئەز چووم من دەستێ‌ بابێ‌ خۆ ماچی كر، لێ‌ وی ئەز ناس نەكرم و گۆت تو كیژ ژ وانی؟!.
ل دۆر كارێ‌ رێكخستنێ‌ ژی ناڤبری گۆت: بەلێ‌ و ژبۆ چەندین كارێن نهێنی هاتیمە راسپاردن و من ب ئامانەت ئەنجام داینە و هەتا ژ بۆ كارەكێ‌ فەر هاتمە راسپاردن و نامەیەكا نهێنی من برە تەهران ل وەلاتێ‌ ئیرانێ‌ و دوبارە ڤەگەریام. و پشتی ئاوارەی ئیرانێ‌ بووین، مە هەر ل گەل بەرێزان (ئیجرا سەعید و حەمید عەلی سپینداری) ژی ل مەكتەب سیاسی ل راژان كار كری یە و هەتا ڤەگەریاینە كوردستانێ‌‌.
هەمان پێشمەرگەی گۆت: ل هەوا ئەنفالێن سالا ١٩٧٤ێ‌، ئەم هەرسێ‌ برا و باب ل (خنێرەی) هنداڤی سیدەكان بووین، و وی دەمی نەچار بووین برایێ‌ مە یێ‌ مەزن ژبەر مالێن مە ڤەگەریتە نێروە و ئەم یێن دی هەر ماین و نەڤەگەریاین و مە هنگی كەس و كارێن خۆ دیتن، هەتا ئاوارەیی وەلاتێ‌ ئیرانێ‌ بووین.
گۆتژی: ل دەستپێكا ئاوارەیێ، مە نەزانی خێزانێن مە كیڤە چووینە، لێ ئەم برینە (شنۆ) و پاشان ڤەگۆهاستینە ئۆردوگایێ‌ (كرمانشان) و پاشی مە زانی كو خێزانێن مە ل توركیا بەرەڤ وەلاتێ‌ ئیرانێ‌ هاتینە و ئاكنجی گوندی (رەبەت)ێ بووینە. مە ب فەرمی داخۆاز كر كو ئەمژی بگەهینە خێزانێن خۆ و باشبوو رێك دا و ئەمژی گەهشتینە خێزانان. بۆ چەندەكێ‌ ئەم ماین و پاشان خەلك دابەش كر و ئەم برینە (مەشهەد) و ل وێرێ‌ ژی بەرەڤ سنۆرێن (ئەڤغانستانێ‌) و ل (بەلوچستان) و باژێرێ‌ (بیرجەند) ئاكنجی كرین، و ل وێرێژی ئەم دابەشكرن و هەر دو ژمە هاڤێتنە گوندەكێ‌، ل ڤێرە مە ب دزیڤە هەولدا دوبارە بگەهینەڤ ئێك و ل باژێرێ‌ (بیرجەند) ئاكنجی بووین. و ل وێرێ‌ ماین و هەتا سالا ١٩٧٩ێ‌ كو بابێ‌ نەتەوا كورد چوویە بەر دلۆڤانیا خۆدێ‌، ل گەل بهیستنا وی دەنگ و باسی، بابێ‌ من گۆت، ئەم ل ڤێرە نامینین هەكە مە هەموویان بكۆژن و ئەو بوو پشتی حكومەتا شاهی ژناڤچووی ئەم شیاین ڤەگەریینە (زێوە).
پێشمەرگەیێ‌ هەر دو شۆرەشان گۆتژی: ژیان ل غەریبیا مرۆڤ خۆدانێ‌ چ تشتی نینە، یێ‌ ئارام نینە، بەردەوام هزر و بیر و دل و چاڤێن مرۆڤی یێ‌ ل ڤەگەریانێ‌، مرۆڤی حەز دكر كو بەردەوام ل ناڤ شەراندا بیت و نەكو كەسەك غەریب بیت و خۆ خۆدانێ‌ زمانێ‌ خۆژی نەبیت.
ل دۆر دیتنا سەرۆكی ژی، ناڤبری گۆت: ژ بلی شۆرشا ئەیلۆلێ‌ كو مە بەردەوام ددیت، ل گوندێ‌ راژان ژی كو من ل مەكتەب سیاسیا پارتی كار دكر و كارێ‌ من ئینانا نڤیساران بوو، بەردەوام من ئەو ددیت.
ل دۆر بیرهاتنێن ئاوارەیێ ژی، هەمان پێشمەرگە گۆت: ئاوارەیی ئانكۆ مرن و مە ل وان سالێن ئاوارەیی رۆژانە مرن ددیت، چ وار نابنە وارێن مرۆڤی و بلا مرۆڤ یێ‌ برسی بیت و خۆلامێ‌ وەلاتێ‌ خۆ بیت و نەكۆ تێر و ئاغایێ‌ خەلكی بیت.
ل دۆ سەرهلدانێ‌ ژی ناڤبری گۆت: سەرهەلدان دووبارە چریسكا ئازادیێ‌ بوو، و وەها بوو كو مرۆڤ ژنوو ژ دایك دبیت، ئەم ژ زیندانێ‌ بەرە ب ئازادیێ‌ بری، .نەخۆشترین رۆژێن ژیانا من پێشمەرگاتیا پشتی سەرهەلدانێ‌ بوو، چونكۆ وەلێ‌ هات كو مرۆڤ نەزانیت كی ب دروستی پێشمەرگەیە و كێ‌ شۆڕش كر، كی ماندی بوو و رێز ل كێ‌ هاتە گرتن.
ل دۆر خۆشترین رۆژێن ژیانێ‌ ژی گۆت: خۆشترین رۆژێن من دەما سەركەفتنا هەر كوردەكێ‌ دبینم و یا ژ هەموو خۆشتر كو بگەهم دەنگی بۆ سەربەخۆیا كوردستانێ‌ بدەم و من دەنگ بۆ ریفراندومێ‌ دای.
ل دووماهیێ‌ ناڤبری، پەیڤەك پێشكێشی گەنجان كر، و گۆت: وەلاتێ‌ خۆ خۆش بڤێن، یەك دەنگ بن و جوداهیێ‌ نەكەن، رێزێ‌ ل كەسێن ماندی بوویی بگرن، خیانەتێ‌ ل گەل و ئاخا خۆ نەكەن، كار بۆ ئاڤەدانی و پێشڤەبرنا وەلاتێ‌ خۆ بكەن.