ب دیتنا چاڤدێرەكێ سیاسی و ئابۆری هنارتنا پەترۆلا هەرێما كوردستانێ دێ بیتە ئەگەرێ زێدەبوونا داهاتێ ئیراقێ و ژ داهاتێ وێ پەترۆلا هەرێمێ ئەوا دێ هێتە فرۆتن، مەهانە بۆ مووچەیێ فەرمانبەرێن هەرێما كوردستانێ دێ هێتە بكارئینان و ئەو كێشەیە دێ ب دووماهی هێت، لێ بەغدا دڤێت كێشە بەردەوام بیت و هنارتنا پەترۆلا هەرێما كوردستانێ ب بڕیارا تاكلایەنە و ئەو بڕیارە بیت كو ئەو ب خوە بدەت، ب ڤێ چەندێ ژی بەردەوامیێ ب كێشەیێ ددەت.
هنارتنا پەترۆلا هەرێما كوردستانێ، كو بەهانەیەكا بەغدایە بۆ نە هنارتنا مووچەی، ب بڕیارا چارلایەنی ڤە گرێدایە كو پەیوەندیدارن ب پەترۆلا هەرێما كوردستانێ، ئەو ژی حوكمەتا هەرێما كوردستانێیە و كۆمپانیێن بەرهەمهێنەرێن پەترۆلێ و توركیا و ئیراقن، لەوما ب چارەسەركرنا وێ كێشەیێ دێ دووماهی ب بەهانەیا بەغدایێ هێت، كو دەمێ زێدەتر ژ دو سالانە ل هەرێمێ دگریت و ژ ئەگەرێ وێ چەندێ مووچەیێ فەرمانبەرێن هەرێما كوردستانێ هەموو مەهان گیرۆ دبیت و نێزیكی سێ مەهانە مووچە نەهاتیە دان.
نەجوا كاكەیی، ئەنداما جڤاتا نوونەرێن ئیراقێ ژ فراكسیۆنا پارتی دیموكراتی كوردستان گۆت» هنارتنا پەترۆلا هەرێما كوردستانێ د بەرژەوەندییا هەرێمێ و پاشی یا ئیراقێ دایە و ئێدی ئەو كێشەیا هەموو مەهەكێ روو ددەت نامینیت و بارگرانی ل سەر بەغدایێ ژی نامینیت».

ئەندامەكێ دەستەیا كارگێرییا مەكتەبا سیاسییا پارتی دیموكراتی كوردستان راگەهاند: تێكچوونا سیستەمێ كارەبێ ل سەرانسەری پارێزگەهێن ئیراقێ ژ بلی هەرێما كوردستانێ، ئاماژەیا سەركەفتنا پڕۆژەیێ رۆناهییە، هەروەسا دبێژیت: حوكمەتا فیدرال شایستەیێن دارایی یێن هەرێما كوردستانێ بڕینە، بەلێ حوكمەتا هەرێما كوردستانێ بەرهەڤییا خوە بۆ هاریكارییا وێ دیاركریە.
هشیار زێباری، ئەندامێ دەستەیا كارگێرییا مەكتەبا سیاسییا پارتی دیموكراتی كوردستان ل پێگەهێ خوە ل تۆرا جڤاكییا ئێكس نڤیسی» تێكچوونا سیستەمێ كارەبێ ل سەرانسەری پارێزگەهێن ئیراقێ ژبلی هەرێما كوردستانێ كو هەڤدەمە ل گەل بلندبوونا پلەیێن گەرمی ئەوێن ئاستەكی پیڤانەیی تۆماركری، بەلگەیە ل سەر سەركەفتنا حوكمەتا هەرێما كوردستانێ بۆ دابینكرنا كارەبی بۆ هەڤوەلاتیێن خوە ب رێكا پڕۆژەیێ رۆناهی».
هشیار زێباری ئاماژە ب وێ چەندێ ژی كر» حوكمەتا هەرێما كوردستانێ سەرەرای بڕینا شایستەیێن وێ یێن دارایی ژ ئالیێ حوكمەتا فیدرالیڤە، بەلێ شیایە د دابینكرنا خزمەتگوزارییا كارەبێدا بۆ هەڤوەلاتیێن هەرێمێ یا سەركەفتی بیت».
زێباری گوت ژی» هەر چەندە حوكمەتا فیدرال شایستەیێن دارایی یێن هەرێمێ یێن بڕین، بەلێ حوكمەتا هەرێما كوردستانێ بەرهەڤییا خوە بۆ هاریكاریكرنێ د چارەسەرییا كێشەیا كارەبێدا، دیاركریە».
ل رۆژا دوشەمبییا بۆری، عەزیز ئەحمەد، جێگرێ بەرپرسێ نڤیسینگەها سەرۆكێ حوكمەتا هەرێما كوردستانێ، ل تۆرا جڤاكییا ئێكس نڤیسی بوو» كارەبا ئیراقێ ب تمامی هاتیە ڤەمراندن، ژبلی كارەبا هەرێما كوردستانێ، ئەو كێشەیە ژی دێ بەردەوام بیت هەتا كێشەیا بڕێڤەبرنێ و بكارئینانا كارەبێ ژ بنەڕەتدا نەهێتە چارەسەركرن».
ناڤبری گوتبوو ژی» هەرێما كوردستانێ ب رێكا پڕۆژەیێ رۆناهی دەستپێشخەرییەك بۆ چارەسەركرنا وێ كێشەیێ ب رێكا بكارئینانا بەرپرسیارانە، رێكخستنا داخوازییان، بۆ وێ چەندێ ژی ئیراق كێشەیا كارەبێ چارەسەر بكەت دڤێت هەمان سیستەمی پەیڕەو بكەت».
جێگرێ بەرپرسێ نڤیسینگەها سەرۆكێ حوكمەتا هەرێما كوردستانێ راگەهاندبوو ژی» هەرێما كوردستانێ یا بەرهەڤە د چارەسەركرنا كێشەیا كارەبا ئیراقێدا یا هاریكار بیت، هەر وەكو نوكە ل هەرێما كوردستانێ ئەو كێشەیە چارەسەركری، بۆ ڤێ چەندێ ژی وەزیرێ كارەبێ ل هەرێما كوردستانێ ل گەل بەرپرسێن حوكمەتا ئیراقێ د دانوستاندنان دایە، بۆ وێ چەندێ هەر هاریكارییەكا تەكنیكی بۆ چارەسەركرنا كارەبا ئیراقێ ب زووترین دەم پێشكێش بكەت».

ئەمیندارێ گشتیێ وەزارەتا كاروبارێن پێشمەرگەی ل حوكمەتا هەرێما كوردستانێ راگەهاند: هاریكاریێن هەڤپەیمانان ب گۆڕەی تێكگەهشتنا واشنتۆنێ و هەولێرێ دێ بەردەوام بن. سەبارەت ئێكگرتنا هێزا پێشمەرگەی ژی دبێژیت: كار ب خاڤی بڕێڤە دچن.
ژبلی هاریكاریێن دی، هەڤپەیمانییا نێڤدەولەتی ب سەرۆكایەتییا ئەمریكا مەهانە 20 بۆ 25 ملیۆن دۆلاران هاریكارییا هێزێن پێشمەرگەی دكەت و دهاتە گوتن كو ل دووماهییا ئەڤسالە ئەو هاریكارییە نامینیت.
لیوا بەختیار محەمەد، ئەمیندارێ گشتیێ وەزارەتا كاروبارێن پێشمەرگەی گوت» ب گۆڕەی تێكگەهشتنا دو ئالییانە د ناڤبەرا واشنتۆنێ و هەولێرێدا، هاریكاری هەتا مەها 10 یا سالا 2026 دێ بەردەوام بن» .
ئەمیندارێ گشتیێ وەزارەتا كاروبارێن پێشمەرگەی رۆهنكر ژی» مەهانە و سێ مەهان جارەكێ گەنگەشە ل سەر پێشكەفتنێن خالێن تێكگەهشتنێ دهێتە كرن. هەكە ئالیێ مە پێگیرییەكێ بجه نەئینیت، ئالیێ بەرامبەر ب گۆڕەی وێ چەندێ دێ راپۆرتەكێ ئاراستەی سەرخوەدا كەت و دبیت بڕگەیەك ژ هاریكاریێ بهێتە بڕین و بڕگەیەكا دی بهێتە زێدەكرن كو ئەو چەندە یا ئاسایییە. دوپات دكەین ژی كو هاریكاری ناهێنە بڕین».
لیوا بەختیار محەمەد ئاماژە ب وێ چەندێ ژی كر» هاریكاری تنێ مادی نینن، بەلكو دابینكرنا پێدڤییان، شیرەتكاری، مەشق و چەند وارەكێن دی نە ژی» .
ل دۆر ئێكگرتنا هێزێن پێشمەرگەی، ئەمیندارێ گشتیێ وەزارەتا كاروبارێن پێشمەرگەی گوت» كارێن دهێنە ئەنجامدان بۆ ئێكگرتنا ب تمامی یا هێزێن پێشمەرگەی د بەردەوامن و نە راوەستیاینە، بەلێ ب خاڤی بڕێڤە دچن».
سەبارەت ئەگەرێ خاڤیێ ژی، ئەمیندارێ گشتیێ وەزارەتا كاروبارێن پێشمەرگەی دیاركر» ئەگەر گەلەكن. پێشمەرگە خودان بودجەیا تایبەت یا خوە نینە، كێشەیێن د ناڤبەرا هەولێرێ و بەغدایێ دا كاریگەرییا خوە یا هەی، هەڤدەم پێكنەئینانا كابینەیا نوو یا حوكمەتا هەرێما كوردستانێ ژی ئەگەرەكێ خاڤبوونا پرۆسەیا ئێكگرتنا هێزێن پێشمەرگەیە».
د چارچۆڤەیێ هاریكاریێن هەڤپەیمانان بۆ پێشمەرگەی مەهانە گۆژمەیەكێ پارەی بۆ پێشمەرگەیێن لیوایێن هەڤپشك دهێتە دان.
وەزارەتا كاروبارێن پێشمەرگەی ل حوكمەتا هەرێما كوردستانێ بری چەند رۆژان بەلاڤكربوو، ل 7/8/2025 نێزیكی 74 هزار ئەفسەر، پلەدار و پێشمەرگە هاریكاریێن هەڤپەیمانان وەردگرن.
هەتا ئەڤرۆ پشكەكا هێزێن پێشمەرگەی ل دەرڤەێ وەزارەتا كاروبارێن پێشمەرگەی دانە و ب سەر یەكەیێن 70 و 80 نە، كو یەكەیا 70 ب سەر ئێكەتی نیشتمانی كوردستانە و یەكەیا 80 ب سەر پارتی دیموكراتی كوردستانە.

زنار تۆڤی:

بریاردەرێ فراكسیۆنا پارتی دیموكراتی كوردستان ل جڤاتا نوونەرێن ئیراقێ، ب دوور دبینیت كو پرۆژە قانوونا حەشدا شەعبی د ڤێ خولا جڤاتا نوونەران دا بهێتە پەسەندكرن و دیار كر: پەسەندكرنا وێ پرۆژە قانوونێ، د بەرژەوەندییا ئیراقێ دا نینە و هەكە هاتە پەسەندكرن، هەڤبەندیێن ئیراقێ ل گەل ئەمریكا دێ تێكدەت و هەروەسا كورد و سوننە ژی ل گەل وێ پرۆژە قانوونێ نینن.
شوان كەلاری، بریاردەرێ فراكسیۆنا پارتی دیموكراتی كوردستان ل جڤاتا نوونەرێن ئیراقێ، زێدەتر بۆ رۆژنامەیا (ئەڤرۆ) گوت» دەربازكرنا پڕۆژە قانوونا حەشدا شەعبی د ڤێ خولا نوكە یا جڤاتا نوونەرێن ئیراقێ دا كارەكێ ب زەحمەتە و ئەگەر هەیە بكەڤیتە خولا بهێت یا جڤاتا نوونەران، هەروەسا هەكە ئەو پرۆژە قانوونە د ناڤا جڤاتا نوونەراندا دەرباز ببیت، دێ زیانەكا مەزن گەهیتە ئیراقێ و هەڤبەندیێن وێ ل گەل ئەمریكا دێ تێكچن و ئەڤێ چەندێ ژ روویێ ئابۆری و ئارامیێ ڤە دێ كاریگەرییا نەرێنی ل سەر ئیراقێ هەبیت، چونكی ئەمریكا دێ هەلوەستەكێ دژوار هەمبەری ئیراقێ هەبیت، لەوما ئەز باوەرناكەم ئەو پرۆژە قانوونە ل جڤاتا نوونەران دەرباز ببیت».
بریاردەرێ فراكسیۆنا پارتی ل جڤاتا نوونەرێن ئیراقێ ئەو چەند ژی ئاشكرا كر» بایكۆتكرنا كۆمبوونێن جڤاتا نوونەرێن ئیراقێ هندەكان پەیوەندی ب دەربازنەكرنا وی پڕۆژەیێ قانوونا حەشدا شەعبیڤە هەیە، بەلێ ئەوا ل دەف مە گرنگ وەكو پەرلەمانتارێن كورد، ب دووماهی ئینانا وێ رەوشێیە یاكو ئیراقێ بۆ فەرمانبەرێن هەرێما كوردستانێ دروستكری».

ئەندامەكێ مەكتەبا سیاسییا رێكخراوا بەدر و سەركردە ل هەڤپەیمانییا چارچۆڤەیێ هەماهەنگیێ یا شیعەیان، راگەهاند: محەمەد شیاع سوودانی، سەرۆك وەزیرێن ئیراقێ، دخوازیت بۆ هەلبژارتنێن داهاتی یێن جڤاتا نوونەرێن ئیراقێ جهێ موقتەدا سەدر ل (هەڤپەیمانییا سێقۆلی) دا بگریت و بۆ وێ مەبەستێ ژی فشارێ ل سەر پارتی دیموكراتی كوردستان دكەت، تاكو د گەلدا هەڤپەیمانیێ بكەت، هەروەسا دبێژیت: پرسا مووچەی سیاسییە.
ئەبو میساق ئەلمەساری، ئەندامێ مەكتەبا سیاسییا رێكخراوا بەدر و سەركردە ل هەڤپەیمانییا چارچۆڤەیێ هەماهەنگیێ یا شیعەیان د داخۆیانییەكا رۆژنامەڤانیدا گوت» محەمەد شیاع سوودانی كو هەڤپەیمانییا (ئاڤەدانكرن و گەشەپێدان) بۆ هەلبژارتنێن داهاتی یێن جڤاتا نوونەرێن ئیراقێ پێكئینایە، گەلەك گرنگە ل دەف وی پارتی دیموكراتی كوردستان و كوردان ب گشتی بۆ ئالیێ خوە رابكێشیت».
ل دووڤ گوتنا وی سەركردەیێ چارچۆڤەیێ هەماهەنگیێ، سوودانی بۆ راكێشانا پارتی جۆرە فشارەك دروستكریە و گوت» هزرەك هەیە هەڤپەیمانییا سێقۆلی بهێتە زیندیكرن و ل شوونا سەدرییان، سوودانی بیت و حوكمەتا زۆرینە بهێتە پێكئینان. ئەو پرسە د دانوستاندناندا دێ باس ل سەر هێتە كرن».
وی ئەندامێ مەكتەبا سیاسییا رێكخراوا بەدر دیاركر ژی» سوودانی دخوازیت هەڤشێوەیێ موقتەدا سەدر، بشێت زێدەتر ژ 70 كورسیێن جڤاتا نوونەرێن ئیراقێ ب دەستڤەبینیت».
د دەمەكیدا مووچەیێ خانەنشینان ل ئیراقێ بۆ مەها هەشت هاتیە بەلاڤكرن، هەتا نوكە فەرمانبەرێن هەرێما كوردستانێ مووچەیێ مەهێن شەش و حەفت وەرنەگرتییە.
ئەبو میساق ئەلمەساری دوپاتكر» پرسا مووچەیێ فەرمانبەرێن هەرێما كوردستانێ بابەتەكێ سیاسییە زێدەتر كو تەكنیكی بیت، ئالیێ سیاسی، لهەڤهاتنا سیاسی و پرسا هەلبژارتنان ژی هاتییە د ناڤ بابەتیدا».
سەبارەت هەڤبەندیێن د ناڤبەرا هەولێرێ و بەغدایێدا، وی ئەندامێ مەكتەبا سیاسییا رێكخراوا بەدر ئاماژە ب وێ چەندێ كر» هەڤبەندی ل سەردەمێ كابینەیا سوودانی هەڤبەركرن ب كابینەیێن پێشتر د نموونەیێ بوون، بەلێ كێشەیا سەرەكی د ناڤبەرا واندا تێنەگەهشتنا ل چەمكێ ئەرك و ماف دا».
ئەلمەساری گوت ژی» هەكە قانوونا پەترۆل و غازێ د ڤێ خولا جڤاتا نوونەراندنا هاتبا پەسەندكرن، دا بیتە بنەمایەكێ ب هێز بۆ هەڤبەندیێن داهاتی».