دیدار: رەمەزان دەشتمری / زاخۆ
3-6
ل سحارێ ئەز ل تەرەكتورێ سیاربوم ژ گوندێ بەرزیركێ بۆ ناحیا باتیفا هاتم و پشتی نیڤرو ئەز گەهشتم بۆ زاخۆ و ئەز بۆ ئەوێ دوكانێ چووم ئەوا فەرماندە حەمید خواستی ناڤ و نیشان داین من. دەمێ من تەرەكتور ل بەر دەرێ دوكانێ ڕاوەستاندی و ئەز بۆ دوكانێ چووم و من سلاڤی خودانی كری و گوتێ: فەرماندە حەمید خواستی سلاڤ یێن بوتە هنارتین و یا گوتی كا ئەوی ئەمانەتی بدەمن دا ئەز دگەل خۆە ببم، ب لێبورین ڤە من ناڤێ خودانێ دوكانێ ژی هەتا نوكە نەزانی و ئەوی گوتە من: نوكە جەماعەتێن ئەمنێ یێن ل ئەڤان جها هاتن و چوونێ دكەن ئەز نەشێم ئەوی نەمانەتی نوكە تەسلیمی تە بكەم و هەرە ل دەور و بەرێن مەغرەب وەرە و ئەوی ئەمانەتی دگەل خوە ببە. پێشمەرگەیێ شۆڕشا گولانێ محەمەد تاهر بەرزیركی بەردەوامی دا ئاخفتنێن خوە و گوت: من تەرەكتورا خۆە ل جهەكێ ڕاوەستاند و ئەز بۆ ناڤ بازاڕی چووم و من خوە مژویل كر هەتا نێزیكی مەغرەب من تەرەكتور هاژوت و بۆ بەردەرێ ئەوێ دوكانێ چووم. دەمێ من تەرەكتور ڕاوەستاند و من بەرێ خۆە دایێ ترومبێلا مەفرەزا رەشەكێن ئەمنی ل دەڤ من ڕاوەستان و داخوازا ناسنامێ ژمن كرن. من دەستدا ناسناما خۆە دا ئەوێ ئەمنێ، ب زمانێ كوردی دگەل من ئاخفت و گوت: ل ئەڤێ مەغرەبێ تە چ شول ل ڤیرێ هەیە، من ژی گوتێ ئەز یێ هاتیم دێ چوپەكێ بۆ تاوێرێ عەرەبانا تەرەكتورێ كڕم، ئەو وەلامێ ئەمنێ ناسناما كرە ددەستێ مندا گوت: بلەز كارێ خۆە ب دوماهیك بینە و ژ ڤێرێ هەرە و نەمینە ل ئەڤان جهان. هەر زویكا مە هەشت چوپێن تایرا و گەل سێ بوكرێن كنفی ل عەرەبانا تەرەكتورێ باركرن، من خۆە گەهاند بۆ كومەلگەها تلكەبەرێ ول ئەوێ شەڤێ ئەز چووم مالەكا مروڤێن مە ل مالا وان نڤستم و ل سحارێ زویكا ئەز ل تەرەكتورێ سیاربیم و بۆ ناحیا باتبفا هاتم و پشتی نیڤرو ئەز ب سلامەتی گەهشتم بۆ گوندێ بەرزیركێ هاتم و من تەسلیمی فەرماندە حەمید خواستی كرن، هەر وەسا پایزا سالا 1980ی ل سپێدەهیەكێ مە بەرێ خۆە دایێ هەژمارا دوازدە كەسان و ب جل و بەگرێن كوردی و چەك و سیلەح قەستا ناڤ گوندێ مە بەرزیركێ كرن، ئەڤان كەسان وەسا خۆە بۆ خەلكێ گوندی دانە دیاركرن كو پێشمەرگەنە و یێن هاتین دا خوارنەكێ بخون و خەلكێ گوندی هاریكاریا ئەوان بكەن، بەلێ خوەشبەختانە ئەف مروڤێن هاتین بۆ ناڤ گوندی كو خەلكێ گوندێ بەرزیركێ ب سەردا ببن و كو بزانن كا چەوا خەلكێ گوندی هاریكاری و پشتەڤانیا پێشمەرگەیی دكەن، چ زیان نە گەهاندن گوندیان، ئەوبی هندەك ژ خەلكێ گوندێ ئەڤ مروڤێن بۆ ناڤ گوندی هاتین دەرگەفتن مەفرەزا ڕەشەكێن ئەمنێ ل ئەوی دەمی دگوتنێ مەفرەوزا یا عەلو وەهابا ژ باژێڕێ زاخۆ تایبەت بۆ گوندێ بەرزیركێ هاتبین و دا گوندێ بەرزیركێ ب سوژن و خەلكێ گوندی ژی دەستەسەر بكەن. بەلێ هندەك ژ خەلكێ گوندی ئەڤ مروڤە ناسكرن و هەر زوی ئاشكرابین و پاشی ب سەرشوڕی ژ ناڤ گوندێ بەرزیركێ بۆ ناحیا باتیفا چوون. بەلێ پشتی شەڕێ دناڤبەرا ئیراقێ و ئیرانێ دا هەلبویی و لەشکرێ حكومەتا ئراقێ ژ ئەوان سەر گرێن ل ئاقارێ گوندێ بەرزیركێ خۆە ڤەكێشان و دەڤەرا مە ژ هەبینا لەشکرێ حوكمەتا ئیراقێ ڤالەبێ و پێشمەرگەیی ڤێجا ب ئازادێ هاتن چوون ل دەڤەرێ دكرن. ئەوبی چەندین جاران هێرشا لەشکرێ حكومەتا ئیراقێ بۆ سەر دەڤەرێ دهات ب مەرەما دەرێخستنا هێزێن پێشمەرگەیی ژ دەڤەرێ دەربێخن. ئەوا دئیتە بیرا من ل پایزا سالا 1982ی هێرشا لەشکرێ حكومەتا ئیراقێ ژ بارەگایێ لیوا باتیفا بۆ سەر دەڤەرێ هات و بەراهیكا لەشکری هەتا پشتا گوندێ كەرپتێ هات. ئەوبی پێشمەرگەیی بەرسینگا ئەڤێ هێزا لەشکرێ حكومەتا ئیراقێ گرت و شەڕی و تەقێ دەستپێكر فڕوكەیێن ژ جورێ هەلیكوپتەر دئەڤی شەڕی دا پشكداری كرن. ئەڤی شەڕی هەتا دەمژمێر سیێ ئیڤاری ڤەكێشا و ئەسكەرێ حكومەتا ئیراقێ نەچاربی پاشدا ڤەكشیا و بۆ بارەگایێ لیوا بێگوڤا زڤڕین. بەلێ ب مخابنی ڤە پێشمەرگەیەك ب ناڤێ عەزەدین تەها شیلانی ئەوێ سەر ب ڕیكخراوا شەهید محەمەد سالح بوسەلی هات شەهید كرن و هەر وەسا دوو كەسێن دیتر ئەوێن بەرگیرێ مللی ب ناڤێ ئەمین محەمەد عەمەر كەرپتی و حسنی محەمەد عەزیز كەرپتی شەهید بوون. هەر دئەڤی شەڕی دا چوار هاولاتیێن دیتر ئەڤێن بەرگیرێ مللی ب ناڤێ سالح مەمەد بازید كەرپتی، ئەحمەد سلێمان بازید كەرپتی، كەمال سلێمان كەرپتی، نایف محەمەد عەمەر كەرپتی هاتن برینداركرن. بەلێ دەمێ لەشکرێ حكومەتا ئیراقێ هێزێن خۆە ڤەكێشان و دگەل كەرب و كینا ئەوان یا كیرهەگرتی ب سەر گوندێ بەرزیركێ دا گرتن و هەژمارا بیست كەسان ژ گوندێ مە بەرزیركێ دەستەسەركرن و دگەل خۆە بۆ بارەگایێ لیوا باتیفا برن. دناڤ ئەڤێن هاتین گرتن ئێك ژ ئەوان بابێ من حەجی تاهر بەرزیركی و دگەل مامێ من حەجی حسێن بین. ئەڤ هەر بیست كەسێن هەنێ بۆ بارەگایێ لیوا باتیفا ڤەگوهاستن. پشتی ڤەكولینەكا دژوار دگەل ئەوان هاتین كرن و ئەشكەنجەكا هەسا دانە بەر لاشێ ئەوان كو بۆ مرنێ دقوتان. پشتی بورینا یازدە ڕۆژان بابێ من دگەل ئەوان دەستەسەركریان هاتن ئازادكرن. هەر وەسا بیرهاتنەكا دیتر ل سەر دەمێ شۆڕشا گولانێ ، ئەو بوو ل سپێدەهیا ڕۆژا 13/10/1983ی هێزەكا مەزن یا لەشكرێ حكومەتا ئیراقێ ژ فرقا زاخۆ و دگەل زریپوش و فەروكەیێن هەلیكەپتەران ئەوێن جەنگی بۆ سەر دەڤەرا گوندێ زێوكێ مێرگەسورا دا هاتن و ل تەنشتا گوندێ زیوكێ پێشمەرگەیی بەرسینگا ئەڤێ هێزا حكومەتا ئیراقێ گرتن و شەڕی و تەقێ دەستپێكر.
نيشاندان