مەتین سەباح جمعە
ل بن سێبەرا دارەكێ دا كو ڕەهێن خۆ د ئاخێ دا ڤەشاردبوو، پێنوسەكێ وەستایی ل ئەردی روونشتبوو، بەلگەێن كەسك یێن دارێ لڤین و ب نەرمی گۆتن: چما تو هند وەستایی، پێنوسێ بچویك؟ پێنوسی هێدی بەرسڤ دا و گۆت: ئەز تەڤایا رۆژێ دنڤیسم، وێنەیان دكێشم و چیڕۆكا چێدكەم . هندەك جاران ئەز خۆ دناڤ رێزان دا بەرزە دكەم! مینا كو هەر تشێ ئەز دنڤیسم پشكەك ژ من ژی دگەل خۆ دبەت!
دار كەنی و شاخێ خۆ لسەر پێنوسێ چەماند، مینا كو دەستەكی هەمبێز دكەت و گۆت: لێ تو ژیانا لسەر كاغەزی ددانی، ئەز تنێ ڕادوەستم و تەماشە دكەم، بەلگێن خۆ د بای دا درەقسینم، تەماشە دكەم دنیا دگوهۆڕینێ دایە، لێ تشتێ تە دیتی تو دكاری هەر و هەر بپارێزی! و بیرهاتنا دروست بكەی. پێنوسی ب دەنگەكێ نزم گۆت: تەماشا كرن ئاسانە، لێ نڤیسین دژوارە ، هەر دێرەكا / رێزەكا ئەز دنڤیسم پێدڤی ب ووردبینی و هەست و سۆزان هەتا بهێتە چێكرن، جارنان ئەز دترسم تشتەكی خەلەت بنڤیسم! و وێ هەر و هەر خراب بكەم.
دار، دەمەك بێ دەنگ ما، پاشی ب دەنگەكێ نزم گۆت: هەر تشتەكی كو تو دبێژی و هەر رێزەك كو تو دنڤیسی پشكەك ژ تە و پشكەك ژ ژیانێ نەمر دكەت ! ڕەهێن من د ئاخێ دایە و یێن تە ژی ل سەر بەرپەرانە، هەر ئێكی ژ مە بارا خۆ هەیە، ئێك تەماشە دكەت و چاڤەڕێ دكەت، ئێك ژی دنڤیسیت و تۆمار دكەت. پێنوس كەنی و گۆت: دبیت تو راست ببێژی، دبیت هەر رێزەكا من بیر ئینانەك بیت ژ ژیانا كو تە فێری من كری! كو ئەز ببینم ژ دەمسالان ژ بایان ژ باران و رۆژێن تاڤــ.
داری بەلگێن خۆ لڤاندن وگۆت: بنڤیسە، پێنوسێ بچویك.. جیهان حەز ژ چیڕۆكێن تە دكەت، هەر رێزەكا تە هەتا ئەگەر كورت بیت، دكاریت دلێن كەسان بلڤینیت، هیڤییەكێ گەش بكەت، بەندەمانەكێ شرین بكەت، بنڤیسە. پێنوسی گۆت: تو چەوا دنیایێ دبینی، ئەی دار؟ چونكە تو چو جاران ژ جه نا لڤی، چەوا سەبر گر دمینی؟
دارێ بەسڤ دا و گۆت: سەبر دیاریەكە كو دەمی ب من دایە، من دیتیە بهار بهێت و بچیت، من دیتی یە بەلگ شین ببن و ژ نوی هەلوەرێن، ژیان هەر ئەڤ دوبارەبوونە یە، پێنوسی بچویك! تو ژی هەر نڤیسینا خۆ دوبارە دكەی، لێ هەر جارەكێ واتایەكا نوی پەیدا دكەت. پێنوسی گۆت: ئەرێ هەر رێزەك ژ نڤیسینا من مینا بەلگێن تەیە؟ داری شاخەكا خۆ هەژاند و گۆت: بەلێ هەر رێزەك ژ نڤیسینا تە پشكەك ژ ژیانێ یە، ئەز ب بەلگێن خۆ رەنگڤەدانا وەرزان دكەم، و تو ب نڤیسینێن خۆ .
پێنوسێ هەناسەیەك كێشا و گۆت: بەلێ ئەز چ دەما دنڤیسینم كورت دبم، ئەرێ ئەز ناترسم خلاس بم؟
داری بەسڤ دا و گۆت: كورتبوون ترس نیە! دەمێ هەر جار تو تشتەكێ دنڤیسی نڤیسینا خۆ ددەیە دنیایێ، ئەز ژی هەر سال بەلگێن خۆ دوەرینم و ژ نوی شین دبم! د ڕاستی دا دویماهیكا مە دەستپێكا مەیە .
بایەكا هێمن هات و پێنوسی چاڤێ خۆ ل دارێ كرن و گۆت: ڤێجا دێ نڤیسم، خۆ ئەگەر كورت ببم!
دارێ هێدی گۆت: ئەڤەیە واتایا دروست یا زیندیبوونێ.
نيشاندان