د دیدارەكێ دا ل گەل شاندەكێ بلند یێ ئەمریكی، سەرۆكێ حوكمەتا هەرێما كوردستانێ دوپاتی ل سەر پێدڤییا دەستپێكرنا هنارتنا پەترۆلێ و دابینكرنا بەهرا بودجەیا هەرێما كوردستانێ كر.
مەسرور بارزانی، سەرۆكێ حوكمەتا هەرێما كوردستانێ، پێشوازی ل جۆشوا هاریس، كاربڕێڤەبەرێ كاروبارێن بالیۆزخانەیا ئەمریكا ل ئیراقێ كر.
دكۆمبوونەكێدا كو وێندی گرین، قونسلێ گشتیێ ئەمریكا ل هەرێما كوردستانێ بەرهەڤبووی، دانوستاندنێن تێروتەسەل ل دۆر رەوشا گشتییا ئیراقێ پشتی هەلبژارتنێن جڤاتا نوونەرێن ئیراقێ و سیناریۆیێن پێكئینانا كابینەیا نوو یا حوكمەتا ئیراقێ هاتنە كرن.
سەبارەت شێوازێ حوكمڕانییا داهاتی ل بەغدایێ، هەردو ئالی هەڤڕابوون ل سەر گرنگییا پێكئینانا حوكمەتەكا خزمەتگوزار ب شێوەیەكی كو بێی جوداهی خزمەتا هەموو وەلاتی و پێكهاتەیان بكەت و پێگیر بیت ب رێزگرتنێ ل مافێن دەستووری یێن هەرێما كوردستانێ و پاراستنا سیستەمێ فیدرالی.
تەوەرەكێ سەرەكیێ دی یێ دیدارێ، تایبەت بوو ب كێشەیێن دارایی و ئابۆری، تێدا هەردو ئالی هەڤڕابوون ل سەر:
1-پێدڤییا دابینكرنا شایستەیێن دارایی و بەهرا بودجەیا هەرێما كوردستانێ ژ بودجەیا گشتییا ئیراقێ.
2-چارەسەركرنا ئاستەنگان و بەردەوامبوونا هنارتنا پەترۆلا هەرێما كوردستانێ ب رێكا بەندەرێ جەیهان یێ توركی.
ل دوماهییا دیدارێ، جۆشوا هاریس پێنگاڤێن مەسرور بارزانی د ئەنجامدانا چاكسازیێ ل كەرتێن جۆرا و جۆر بلند هەلسەنگاندن، ب تایبەتی چاكسازی د كەرتێ دارایی دا و پشتەڤانییا وەلاتێ خوە بۆ سەرئێخستنا وێ سرۆسەیێ دیاركر.

پەیامنێران، دلۆڤان و رەمەزان:

ب هە‌لكەفتا ڕۆژا جیهانی یا نەهێلانا توندۆتیژیا دژی ئافرەتان، دوهی 25/11/2025 ب چاڤدێریا د. عەلی تەتەر، پارێزگارێ دهۆكێ و ب ئامادەبوونا ماجد سەید سالح، نوونەرێ پارێزگارێ دهۆكێ و بریندار حەیدەر، دەڤەردارێ‌ دهۆكێ و دكتورە ڤیان سلێمان، هاریكارا بەرپرسێ مەكتەبا ڕێكخستنا پارتی ل پارێزگەها دهۆكێ و عەقید وەلات سەدیق، ڕێڤەبەرێ بەرهنگاریا توندۆتیژیێ و هژمارەكا بەرپرسێن دام و دەزگەهێن جۆدا، ل ژێر درووشمێ «هەڤبگرن ژ بۆ نەهێلانا توندۆتیژیا دیجیتالی دژی هەمی ئافرەت و كچان» ڕێڤەبەریا بەرهنگاربوونا توندۆتیژیا دژی ئافرەت و خێزانێ‌، ب هەڤكاری ل گەل زانكۆیا دهۆك و گروپێ كاری (GBV-Working Group) ڕۆژا جیهانی یا نەهێلانا توندۆتیژیا دژی ئافرەتان ساخكر و تێدا هەوا 16 رۆژی یا نەهێلانا توندۆتیژیێ هاتە ڕاگەهاندن.
نوونەرێ پارێزگارێ دهۆكێ د پەیڤەكێ دا بەحسێ گرنگیا ڤێ ڕۆژێ ل سەرانسەری جیهانێ كر، هەروەسان بەحسێ ڕۆلێ حكومەتا هەرێما كوردستانێ د ڕێكخستنا سازیێن پێدڤی دا بۆ نەهێلانا توندۆتیژیێ و گرنگیدان و پشكداركرنا ئافرەتێ د سازیێن جودا دا كر و گۆت: «پێدڤیە سەرجەم سازیێن پەیوەبدیدار و هەمی وەلاتی و خێزان پێكڤە د هاریكاربین، نە ب تنێ د 16 ڕۆژان دا، بەلكو بەردەوام ل دژی توندۆتیژیێ بین و خۆ ژێ دوور بكەین».
دیسا هەر ب هەمان هەلكەفت، دوهی 25/11/2025 ل كۆلیژا زانست ل زانكۆیا زاخۆ و ل ژێر چاڤدێریا د. دیار عەبدولكەریم، سەرۆكێ زانكۆیا زاخۆ، سەنتەرێ یەكسانیا جێندەری ل زانكۆیا زاخۆ، ب هەڤكاری ل گەل ڕێكخراوا ڕەوشەن بۆ بەڕەڤانیكرن ژ مافێ‌ ئافرەتان، هەوا 16 ڕۆژی یا بەرهنگاریا توندوتیژیا دژی ژنان و كچان ئەنجامدا.
دیسا هەر ب هەمان هەلكەفت، دوهی 25/11/2025 ل ئاكرێ هەوا نیشتمانیا 16 رۆژی یا نەهێلانا توندوتیژیا دژی خێزان و ئافرەتان ب چەند چالاكیان هاتە ساخكرن و عەقید محەمەد ئەمین عەلی، رێڤەبەرێ نەهێلانا توندوتیژیا دژی خێزان و ئافرەتان ل ئاكرێ بۆ ئەڤرۆ گۆت: ل ژێر چاڤدێریا دەڤەردارێ ئاكرێ، رێڤەبەریا نەهێلانا توندوتیژیا دژی خێزان و ئافرەتان ل ئاكرێ هژمارەكا چالاكیان ل ژێر درووشمێ (پێكڤە بۆ نەهێلانا توندوتیژیا ئەلیكترۆنی دژی ئافرەتان و كچان) ل هۆلا كۆنفرانسان یا زانكۆیا ئاكرێ هاتنە ئەنجامدان.

ئامێدیێ، مەحمود نهێلی:

ژ بۆ زێدەتر خزمەتكرنا وەلاتیان و گەهاندنا پڕۆژەیێن خزمەتگوزاری بۆ گوند و كۆمەلگەهـ و ناوچەدارییان، پڕۆژەیێ چێكرنا جادەیێن ناڤخوە ل سنۆرێ ناوچەدارییا شێلادزێ بەر ب قووناغێن داویێ یە و دەست ب قێركرنا وان هاتیە كرن.
رزگار عوبەید، رێڤەبەرێ ناوچەدارییا شێلادزێ بۆ رۆژناما ئەڤرۆ دیار كر، د بەرنامەیێ كابینەیا نەهێ‌ یا حكۆمەتا هەرێما كوردستانێ دا، گەهاندنا پڕۆژەیێن خزمەتگوزاری یە بۆ هەموو دەڤەران و گۆت: «پڕۆژەیێ چێكرن و قێركرنا هەژمارەكا زۆرا جادەیێن ناڤخوەیی ل سنۆرێ ناوچەدارییا شێلادزێ هاتە بجهئینان، ئەڤ پڕۆژە ژ قێركرنا جادەیێن ناڤخوەیی ل تاخێن (شیف چناركێ و كورەژاری و سیریێ و شێلادزا كەڤن و گولان و سەرهەلدان و ناڤ مالێن زێباریا و سنجا و شامكیا) پێك دهێت».
ناڤهاتی دیار ژی كر، ژ بۆ ئەنجامدانا ڤی پڕۆژەی گوژمێ زێدەتر ژ دو ملیون دیناران ل سەر بودجا تایبەتا پارێزگەها دهۆكێ هاتینە تەرخانكرن و گۆت: «نوكە كارێ چێكرنا ڤان جادەیان گەهشتیە قووناغێن داویێ و هاتنە قێركرن».

دهۆك، لەزگین جۆقی:

بەرپرسێ دەزگەهێ خێرخوازیێ بارزانی ل شنگالێ راگەهاند، پڕۆژەیێ ڤەگەڕاندنا ژیانێ بۆ خەلكێ شنگالێ ب هەڤكاری و پشتەڤانیا سویسرا هاتیە دەستپێكرن، ب تایبەت بۆ رزگاربوویێن دەستێ داعشێ و كەسێن بێ سەمیان، ب تایبەت ژی ژنێن بێ سەمیان، كو خودان زارۆك بن و ل دووڤ حەزا خۆ ڤەگەڕنە شنگالێ، دێ ژ ڤی پڕۆژەیێ دەزگەهێ خێرخوازیێ بارزانی مفادار بن.
شێرۆ پیر سمۆ جۆقی، بەرپرسێ دەزگەهێ خێرخوازیێ بارزانی ل شنگالێ بۆ رۆژناما ئەڤرۆ ئاشكرا كر، خانی بۆ وان كەسان دێ هێنە ئاڤاكرن یێن ژ دەستێ داعشێ‌ رزگاربووین و بێ سەمیانن، ب تایبەتی ژنێن بێ سەمیان، كو خودان زارۆك بن و گۆت: «ئەڤ سالە 10 خانی ل كۆمەلگەها بورك ل دەڤەرداریا شنگالێ دێ ب دوماهی هێن، د دووڤ دا ل حەردان دێ 10 خانیان ئاڤا كەین».