ڕەمزی سیسۆ

ژبەركو پارتی د هەر سەردەمەكی دا خۆ دگونجینت و خزمەتێ پێشكێشی خەلكێ دكەت، دزانن پارتی هاتیە دامەزڕاندن بۆ گەڕاندنا مافێ ڕەوایێ كوردان و چو جار ب زۆرداریێ رازی نابت و هەردەم هێزا خوە ژ باوەریا خەلكێ وەردگریت ل كەڤن دا و دەستپێكا هەبوونا پارتی ب شۆرش و داستانان دەستپێكر و شەڕ بۆ زمانی و ئاخێ و ئالایی كر و ئەڤرۆ ب هەمان بیر و باوەر بەردەوامن ل سەر درێژەدانا وێ خەباتا پێشتر هاتیەكرن و دامەزراندنا هەرێمەكا سەربەخۆ و ئاڤەدانیا ڤێ هەرێمێ دەستپێكریە و سەرەرایی هەمی ئاستەنگێن دەرەكی و ناڤخۆیی، پارتی هەر بەردەوامی دا ب خەباتا خوە ژ هەمی لایان ڤە و ئەم دبینن هەرێمەكا نموونە ل ناڤ چار دەولەتێن زلهیز هاتیە ئاڤاكرن و هەر چار دەولەت ل دژی ڤێ هەرێمێ راوەستیان و نۆكە ژی ئەڤ هەڕێمە بۆ وان وەكی ئاگرەكێ گەشە د دلێ ئەوان دا، بەلێ ب سیاسەتا پارتی شییا بالانسێ بڕاگریت و باوەریێ‌ ب ڤێ هەرێمێ بینن و پارتی دێ ئەوا فێركەت هەرێمێن كوردی ل ناڤ ئەوان ژی دا هەبن و مافێ تاكێ كورد ل هەر جهەكێ دونیایێ بهێتەدان وەكی هەر تاكەكێ دیتر خۆدان ماف بیت و ب خۆشی بژیت.
هێزا پارتی ئەوە هندی وێڤەتر بچیت گەنجتر دبیت و خزمەتا گەنجێ كورد دكەت هێرشا ئیرانێ و ئیراقێ ل دەمێ دژی ریفراندۆمێ و پاشێ هاتنا داعش و هاتنا كورۆنایێ و ژبلی ئەو لایەنێن د ناڤخۆ دا كاردكەن، باوەریا خەلكی ب هەبوونا هەرێما كوردستانێ نەئێت و هەردەم ل سەر هندێ كاردكەن، ئیرادەیا مللەتی ب كوردستانێ و پارتی بشكێنن، بەلێ ژبەر راستگۆیی و دلسۆزیا پارتی مەحالە بشێن پارتی ژ دل و دەروونێ خەلكێ بیننەدەر و پارتی ئەڤ كارەساتێن هەنێ‌ ب سەركەفتیانە دەربازكرن و ئەڤرۆ جیهان هەمی ڤێ هەرێمێ ناس دكەت و پالپشتیا ڤێ هەرێمی دكەن و ئەگەر ژ دویر تەماشیە بكەن هەرێم پێشكەفتیترە ژ ئیراقێ و هەردەم سیاسیێن ئیراقێ دبێژن گەندەلێن مە ئیراق هێلات كاڤلكری و نەشیان وەكی ؟هەرێماكۆردستانێ ئاڤەدان بكەن!.
پارتی هەردەم دبێژیت شوینا ئەم دەمێ خوە ب دژایەتیكرنێ ڤە ببۆرینن، فەرمۆن وەرن دا پەرلەمانی كاڕا بكەن و ژین و ژیارا خەلكێ باشتر لێبكەن و ئەگەر سوبەهی، دیسا كارەساتەك بهێت رێیا ڤی خەلكی دا، هەر پارتییە دێ بت بەربەست و ل پێشیا ئەوان كارەستا و ناهێلت زەرەر و زیان بگەهن خەلكێ و دیسا زەرەر و زیان دێ ب سەرێ پارتی ئێت سەرا مللەتی وەك چاوا پێشتر ب سەدان هزار جاران ل سەرا رزگاركرنا كوردستانێ زەرەر و زیان ب سەرێ پارتی هاتی و قوربانی بۆ كورد و كوردستانێ دایی و دلخۆش بوویە ب ڤێ قوربانیدانێ.
ڕێزدار سەرۆك بارزانی د گۆتنەكا خۆ دا فەرمۆ گۆتیە:» ئەگەر مرۆڤی ئیرادە هەبیت، دێ پارە و سامان هەبیت، بەلێ ئەگەر مرۆڤی ئیرادە نەبیت چەند پارە و سامان هەبیت بەختەوەری نابیت»

ڕەمزی سیسۆ

دەمێ جیهان ب چاڤێن گومانێ ل مە دنێریت هەردەم ژ زاخۆ دەنگەك و دەستەك یان مشتەك بلند دبیت و دبێژیت نەخێر كورد نە بتنێ بۆ قوربانیدان هاتینە ئافڕاندن بەلكو كورد ئافراندكارە ژی د ماوەیەكی كورت دا سێ د ناڤ كوردستانێ دا و ژ باژێرێ مە بوونە مینا سێ چرا ل سەر سێ چیایێن جودا.. وەرزش و زانست و شەڕێ رینگێ.
1 دەنگێ پشتەڤانێن زاخۆ گەهشتە فیفایێ
ل دەوحە د رێورەسمێن The Best FIFA Football Awards 2025 دا ناڤێ زاخۆ نە وەكۆ یانەیەكا بچووك بەلكو وەك نموونەیا وەفاداریێ هاتە بلندكرن و پشتەڤانێن زاخۆ خەلاتێ باشترین هاندەرێن جیهانێ ب دەستڤە ئینا ئەو وێنەیێ سەرۆكێ یانێ ل تەنیشت جیانی ئینفانتینۆ نە بتنێ وێنەیەكە بەلكۆ بەلگەیە كۆ دلێ كوردستانێ دشێت ل دلێ فیفا ژی لێدەت د وەلاتەكێ دا كو یاریگەهـ ب زحمەت د ئاڤاكرین و هاندەرێن مە بوونە ستاندار دا جیهانێ و كوردان پشتەڤانیەكا دلسۆزانە ئەنجام دا.
2- د. ئازاد نەجار زاخۆیێ كو دلی چێدكەت.
ژ كۆلانێن زاخۆ بۆ لابۆراتوارێن سوێدێ دكتۆر ئازاد نەجار 25 سالان خەبات كر دا خەونەكا مرۆڤایەتیێ بكەتە راستی، ئەوی دلەكێ دەستكرد یێ تەمام پەرەپێ دا، یێ‌ ئێكێ‌ ژ جۆرێ خوە یێ هەموو كارێن دلێ مرۆڤی وەك خوە دكەتە بەر ئەڤە نە تەنێ سەركەفتنەكا پزیشكیە ئەڤە بەرسڤا زاخۆیە بۆ وان یێن دبێژن كورد نەشێن ئەو دلێ پلاستیكی نوكە دێ ژیانێ ڤەگەڕینیتە بۆ هزاران نەخۆشێن ل سەرانسەری جیهانێ و ل سەر وی دێ نڤیسیت: Made in Zakho.
3- نامۆ فازل نەڤیێ سەلاحەدینی
ل دوبەی د قەفەسا 971 FC دا نامۆ فازل وێ كچەلاوێ كورد ب مشتێن خوە ئالایێ كوردستانێ بلند كر ئەوی یاقووب سلیمانۆڤ یێ چیچانی ب ناكاوەتەكێ مەزن بر و پشتی سەركەفتنێ گۆت: ئەڤە بۆ كوردانە نامۆ یێ ب ناسنامێ‌ كورێ سەلاحەدین دهێتە نیاسین نە تەنێ شەڕكەرەكێ MMA یە ئەو پەیامەكە كورد دشێت د هونەرا شەڕی دا ژی ببیتە پاشا ب رەوشت و رێزڤە و مەدیت چاوا ڕكابەرێ خوە یێ ئەمریكی دماوێ شەش خولەكاندا دوراند و ئالا كوردستانێ و سڕوودا كوردستانێ ل جیهانێ هەمیێ بەرنیاسكر و ناڤێ كوردان ل مێژووێ دا نڤێسی و سەرۆك بارزانی و هەرچار پارچێن كوردستانێ پیڕۆزباهی لێكر و بئێك پارچە دزانن بژیت كوردستان.
ئەم وەك زاخۆیی شانازیێ پێ دبەین نە ژبەر كو ئەم ژ باژێرەكێ بچووكین بەلكو ژبەر كو ئەم دزانین مەزناتی ژ دلێ مرۆڤی دەستپێدكەت نە ژ نەخشەی، دەم هاتیە ب دەنگەكێ بلند بێژین زاخۆ نە بتنێ سنوورە، زاخۆ دەستپێكە و هەر سێ ناڤێن كو ئەڤرۆكە بووینە شانازیا هەمی كوردان نەكۆ بتنێ یا زاخۆیان و ب ڤان سەركەفتنا هەمی كورد دلخۆەشبوون و پشتەڤان بوون و ژمێژە بارزانی گۆتیە یان كوردستان یان نەمان.

ڕەمزی سیسۆ

د نوكە دا كۆمارا ئیسلامییا ئیرانێ د قووناغەكا هەری هەستیار دا دەرباز دبیت، قووناغەك كو نە ب تنێ چارەنڤیسێ سیستەمەكێ سیاسییە، بەلكو چارەنڤیسێ مللەتەكێ ب تەمامی دیار دكەت. پشتی پتر ژ چل و پێنج سالان ژ شۆڕەشا 1979 و تاران نە ل هەمبەر ئالۆزییەكا سادە بەلكو ل هەنبەر دیوارەكێ بلند یێ دیرۆكی ڕاوەستایە و نزانیت كەنگێ دێ ئەڤ دیوار هەڕفیت.
هەر وەسا جڤاكا ناڤدەولەتی ژی نێرینا خوە بۆ تارانێ گوهۆڕییە. ئەو فێلبازێن سیاسی یێن بەرێ نەمانە، نوكە گەلەك وەلات و ناڤەندێن بڕیاردەر وەك ئەمریكا و بریتانیا و هەڤپەیمانێن وان ل ڕۆژهەلاتا ناڤین تەڤگەرێن تارانێنە، وەك ستراتیژیەكا درێژخایەن بەلكو وەك بزاڤەكا بێهیڤی بۆ مانێ دبینن و دزانن ل ناڤخۆ ڕەوش هێشتا ئالۆزترە قەیرانا ئابووری بێكارییا گەنجان و داخوازا ئازادییێن جڤاكی و سیاسی هەموو بووینە ئاگرەكێ د بن خولیێ دا. نەڤێن نە شەڕ نە ئاشتی یێ كو ڕێبەری بلند باس دكەت بۆ خەلكێ ئاسایی بوویە ژیانەكا ڕۆژانە یا پر ژ دلڕاوكێ.
دڤێت ئاگەهدار بن ل دەرڤە ژی تاران هەڤالێن كەڤن ژدەستددەت، ڕۆسیا مژوولی شەڕێ ئۆكرانیایە و چین ژی ل دووڤ بەرژەوەندییا خوە دچیت. ئەو تەمەحورا ڕۆژهەلاتی یا كو ئیرانێ بانگەشە بۆ دكر نها زێدەتر وەك خەیالەكێ دیار دبیت
ل هەنبەر ڤێ ڕەوشێ دو ڕێك ل بەرانبەر تارانێ نە: ئێك: ڤەكرنا دەرگەهان بۆ گوهۆڕینەكا راستەقینە د ناڤخۆ و دەرڤەدا.
دو: بەردەوامییا سیاسەتا بەرێ كو دێ وەلاتی بەر ب تەنگاڤییەكا مەزنتر ڤەكێشیت. یا ڕاستی ئەوە كو دەم نەمایە گەنجێ ئیرانی ل سەر تۆڕێن جڤاكی دبینیت بەراورد دكەت و پرسیار دكەت ئەو چاڤەڕێ گوهۆڕینێ یە نە بەرسڤ یا گەلەك گرنگە بۆ مە وەك كورد ڕەوشا ئیرانێ هەردەم یا گرنگ بوویە هەر گوهۆڕینەك ل تارانێ دێ كارتێكرنەكا راستەوخۆ ل سەر ڕۆژهەلاتا كوردستانێ هەبیت.
دیتنا من ل دووماهییا گۆتارێ، تاران نوكە ل سەر خاچەڕێیەكێ ڕاوەستایە بڕیارێ ددەت كو دێ هێتەدان و دێ ئەو بڕیار دیار كەت ئەرێ ئەو دێ شاهیدێ دەستپێكەكا نوو بن یان ژی شاهیدێ دووماهییا قووناغەكا دیتر بن.

ڕەمـزی سیسۆ/ زاخـۆ

ئەم باش دزانین شەرێ ئەمریكا و ئیسرائیل دژی ئیرانێ گەهشتیە قووناغەكا هەڵكشانێ یا كو نە تنێ سنورێن سێ وەلاتان بەلكۆ چارەنڤیسێ هەمی رۆژهەلاتا ناڤین د دیار دكەت لەوا هەمی وەلاتێن دەڤەرێ ژ كەنداوێ هەتا دەریا سپی و ژ بەغدا هەتا ئەنقەرەو تەمەنایێ دكەن رێككەفتنەك بهێتە كرن و دویماهیك ب ڤی شەری بهێت و لێ ل سەر مێزا دانوستاندنان تشتەكێ دی روو ددەت و پشتی چەندین جاران بۆ ماوەیەكێ رێككەفتن هاتە راگەهاندن و شەر هاتە راوەستاندن و تا نها هەردوو لایەن نەگەهشتینە چ ئەنجامەكێ راستەقینە ئەگەرێ سەرەكی نە تەكنیكیە و نە یا قانوونی یە، بەلكو سیاسیەكا قوولە جێبەجێكرنا رێككەفتنێ گەلەك قورس بوویە ژ بەركو لایەنێ ئەمریكی و ئیسرائیلی ئارمانجێ وان ژێكجودایە و ئەڤ جوداهیە بوویە ئەگەرێ سەرەكی كو هەر دانوستاندنەك بێ ئەنجام بمینیت.
ئەمریكا وەك زلهێزەكا جیهانی ل دەڤەرێ دیارە و ئارمانجا وێ پاراستنا هەژموونا خۆیە و واشنتون دخوازیت رێككەفتنەكێ بكەت كو د وێ ڕێكەفتنێ دا ئیران لاواز بیت؛ لێ د هەمان دەم دا هەڤپەیمانێن وێ ل كەنداڤی بێ ترس بمینن و ئەمریكا نە دخوازت شەرەكێ مەزن دەست پێ بكەت، چونكو دزانیت بهایێ وێ یێ ئابووری و لەشكری دێ گران بیت و ژ بەر هندێ دخوازیت رێككەفتنەكێ بكەت كو وێنەیێ سەركەفتنێ بدەتە وێ بێ كو بەرژەوەندیێن ستراتیژی ل دەڤەرێ ژ دەستبدەت.
ئیسرائیل ب چاڤەكێ دی تمام سەحدكەتێ‌، بۆ تەلئەبیبێ ئاریشە نەهەژموونە، بەلكو مان و نەمانە ئارمانجا ئیسرائیلێ ژناڤبرنا بەرنامەیێ ئەتۆمی یێ ئیرانێ یە ب تەمامی نەكێمكرن و نەراوەستاندن و ئیسرائیل باوەر دكەت هەر رێككەفتنەكا كو دەرفەتێ بدەتە ئیرانێ یۆرانیۆمێ بپارێزیت دێ بیتە هەڕەشەكا راستەوخۆ ل سەر ئەمنیەتا وێ ژ بەر هندێ فشارێ دكەتە سەر واشنتونێ‌ كو مەرجێن گرانتر دانیتە سەر ئیڕانێ. ئیران ژی ل سەر بەرەیێ دی راوەستیایە بۆ تارانێ‌ بەرنامەیێ ئەتۆمی نەتنێ پرۆژەیەكێ زانستییە بەلكو رەمزێ سەروەریا نەتەوەییە و لایەنێ ئیرانێ دبینیت هەر رێككەفتنەكێ بكەت كو تێدا دەست ژ یۆرانیۆمێ بەردەت و بەرنامەیێ خۆ ژناڤببەت، ئەڤە خۆكوشتنا وێ یا سیاسی و ستراتیژییە، لەوڕا ئیران دبینیت ئەگەر ئەڤێ كارتێ ژ دەستبدەت دێ بێ پاراستن مینیت ل هەنبەر هەڕەشەیێن دەرەكی.
ل ڤێرێ خالا ناكۆكیێ دروست دبیت؛ ئەمریكا و ئیران ب خالێن هەڤدو رازی نابن و ئەمریكا دبینیت ئەگەر ب خالێن ئیرانێ رازی بیت و رێ بدەت یۆرانیۆم د ئاستەكێ دیار دا بمینیت؛ دێ تووشی ژ دەستدانا سەنگا خۆ ل دەڤەرێ بیت و هەڤپەیمانێن وێ دێ باوەریا خۆ ژ دەستدەن و دێ بێژن ئەمریكا پاشڤەچوو و ل بەرانبەر ئیران دبینیت ئەگەر پاشڤەچوونەكا مەزن بكەت دێ هێزا دانوستاندنێ یا خۆ ژدەستدەت و دێ لاوازتر لێ هێت.
لەوڕا ڤێ ناكۆكیێ دانوستاندن كرینە سێ لایەنی و ئەڤە ژی قورسیێ زێدە دكەت و دەمێ سێ ئارمانجێن جودا ل سەر مێزەكێ بن گەهشتن ب چارەسەریێ ب ساناهی نابیت و ئەمریكا دخوازیت هەژموونا خوە دیار بكەت و بسەپینت و ئیسرائیل دخوازیت ژناڤبرنا ئیڕانێ و ئیران دخوازیت ب یوڕانیۆما خۆڤە بهێز بمینیت و پاشڤە نەزڤریت، چاوا دێ ئەڤ سێ خالە د رێككەفتنەكێ دا كۆم ببن؟
دیرۆكا دانوستاندنان ژی ئەڤێ راستیێ دیاردكەت و ل سالێن بۆری دا چەندین جاران هەول هاتنەدان هەر جارەك بۆ ماوەیەكی ئاگربەست هاتە راگەهاندن؛ لێ پشتی چەند حەفتیان ئەو ئاگربەست هەلوەشیا ژ بەركو هەر لایەنەكی دڤیا تشتەكێ دی ژ رێككەفتنێ دەربخێت و ئەمریكا دڤیا وێنەیێ سەركەفتنێ بۆ خەلكێ بدەت دیاركرن و ئیسرائیلێ دڤیا گەرەنتیا ئەمنی بۆ خوە مسۆگەر بكەت و ئیرانێ‌ دڤیا گەرەنتیا مانا بەرنامەیێ خۆە بپارێزیت.
دبینن وەلاتێن دەڤەرێ ژی ماندی بووینە؛ ئیراق دترسیت ببیتە مەیدانا شەڕێ ب وەكالەت و سعوودیە و ئیمارات دخوازن ئابوورێ خۆ بپارێزن و ناخوازن مۆشەك بكەڤنە سەر بنگەهێن نەفتا وان و توركیا دخوازیت رۆلێ ناڤبەینكار ببینیت و هەمی دزانن شەڕەكێ بەرفرەه دێ بهایێ وێ ب ملیاران دۆلار بیت و دێ ب ملیۆنان كەس ب ڤی شەڕی ئاوارە بن.
لێ پێنگاڤا چارەسەریێ دیارە ئەگەر ئەمریكا و ئیران تنێ د ناڤ دانوستاندنان دا بانە؛ دا ساناهیتربیت و زویتر دا گەهنە رێككەفتنێ ژ بەركو بریار دا دو لایەنە بن و بۆ گەهشتن ب رێككەفتنێ ب ساناهیتربیت و دانوستاندنان دو لایەنی دێ ركێ دەت هەر لایەنەك ب ئاشكرایی بێژیت كا چ دڤێت و چ نەڤێت و دێ ترسا واشنتونێ‌ ژ ژدەستدانا روومەتێ كێم بیت، چونكو نە دێ ل ژێر فشارا راستەوخۆ یا تەل ئەبیبێ دا بیت.
ئەمریكا دڤێت فەهم بكەت پاراستنا هەژموونێ ب شەڕی نابیت، بەلكو ب رێككەفتنەكا هەڤسەنگیێ دبیت و ئیران ژی دڤێت فەهم بكەت مانا بەرنامەیێ ئەتۆمی ب دانوستاندنێ دبیت و نە ب هەلكشانێ و هەر دەمەك هەردو لایەن راستیا هێزا ئێكدو قەبوول بكەن دەرگەهـ دێ ڤەبن.
و ئیسرائیل دێ هەر وەك هەڤپەیمانەكێ نێزیك مینیت؛ لێ نابیت ببیتە ئاستەنگ ل سەر رێكا دانوستاندنێ و ئەزموونا سالێن بۆری دیاركر كو دەمێ سێ لایەن ل سەر مێزێ بن هەر لایەنەك دترسیت لایەنێ دی تشتەكی ژ پشتڤە بكەت ئەڤ ترسە بوویە ئەگەرێ بێ باوەریێ.
ئەڤجا ب دیتنا من رێككەفتن ناهێتەكرن نە ژ بەركو ئیرادە نینە، بەلكو ژ بەركو ئاراستە نە ئێكەكە هەتا ئەمریكا ژ ترسا ژدەستدانا سەنگا خۆ دەرباز نەبیت و هەتا ئیران دەستبەردانا یۆرانیۆمێ وەك خۆكوشتن نەبینیت و هەتا ئیسرائیل باوەرنەكەت ئەمنیەتا وێ ب رێككەفتنێ دێ باشتر پاراستن بیت ژ شەڕی ئەڤ بازنە دێ رۆژهەلاتا ناڤین بەردەوام بیت.
چارەسەری د دەستێ واشنتنێ‌ و تارانێ دایە، دانوستاندنەكا راستەوخۆ دویر ژ دەنگەدەنگا راگەهاندنێ و دویر ژ مەرجێن پێشوەخت یێن ئیسرائیلێ دشێن رێكێ ڤەكەت و دەڤەر نەشەرەكێ دی دڤێت، بەلكو رێككەفتنەكا وێرەك دڤێت كو هەمی لایەن تێدا ب سەركەفتی دەربكەڤن نە ب دۆراندنێ و ب شكەستن و لاوازبوونێ بهێن دیاركرن.

ڕەمزی سیسۆ/ زاخۆ

كوشتنا عەلی لاریجانی وەكی بۆمەلەڕزەكا مەزنتر بوو ژ كوشتنا عەلی خامنەئی، ئەو زەلامێ هەمی كارەك بۆ ئیڕانێ ئەنجامددا و بڕێڤەدبر ل ناڤخوەیا ئیرانێ وەكی تەڤنێ جالجالۆكێ بوو و ژ دەرڤەیا ئیڕانێ سیاسیەكێ خوەدان سام و ژێربوو، ژبەركو ئەمین سندۆقێ خامنەئی بوو ب ساناهی نینە كەسەكێ شیان هەبیت ب ڕۆلێ ناڤبری ڕابت و جهێ وی پڕ بكەت و كوشتنا عەلی لاریجانی روودانەكا مێژوویە بۆ ئیسرائیلێ و ژ گرنگترین روویدانانە و ژ گرنگترین پێنگاڤێن سەربازیە كو ئیسرائیلێ ل دژی ئیڕانێ هات هەژمارتن.
تەل ئەبیب دەما كوشتنا عەلی لاریجانی سكێرتێرێ ئەنجوومەنێ بالا یێ ئاسایشا ئیرانێ بەلاڤكر؛ ب دلەكێ خۆش ڤە و دەما بۆ جارا ئێكێ لاریجان هاتبوو دیتن د رووپیڤانا ڕۆژا قودسێ و لاریجانی كەسەكێ زۆڕ گرنگ بوو كو هەمی سیستەمێ ئیڕانێ ل بنڤە بڕێڤە دبر و ڕۆلەكێ سەرەكی د ڕێكخستنا كارێ حوكمەتێ و چارەسەركرنا كێشیەیێن ناڤخۆیی دل هەبوو، هەر دیسا هەمی سیستەمێ ئالۆزیێن ئیڕانێ ب كەسەك وەك لاریجانی دهاتنە كۆنترولكرن و ل وەلاتێ ئیرانێ دامەزڕەوانێن مەدەنی ژ لایێ سەرۆك كۆماری ڤە دهێنەڕێڤەبرن و بێگومان ل ژێر چاڤدێریا ڕابەری ڤە، هەروەسا بابەتێ ئاسایش و ئابووری و پاسداڕان برێڤە دبر و ب شێوەیەكی سەركەفتیانە و ئەڤ كارێن هەنێ‌ بۆ هندێ دكرن دژایەتی نەكەڤیت د ناڤخوەیا ئیڕانێ دا و زۆر هشیاربوو ل سەر ڤێ چەندێ و هەول ددا پێكڤە و ب ئێك دەست كار بكەن و ژبەر ڤان كار و چالاكیێن لاریجانی ب سندۆقا نهێنیا سەركەفتنا خامنەئی دهاتە ناسكرن.
ب كورتی لاریجانی زەلامێ سیستەمێ ناڤخوەیا ئیڕانێ بوو و هەمی بەرپرسێن ئیڕانێ دبێژن بۆ دیتنا خامنەئی پێدڤی ب چ مۆلەتان نەبوو، ئێكسەر دچوو دەف و ڕێكا وی ڤەكری بوو ژبەركو ڕێڤەبەرێ ڤەگوهاستنا زانیاریان و دامەزراندنا بەرنامەیێ ئەتۆمی بوو و هەر دیسا ڕێكخستنا دانوستاندنا دپلۆماسی دكر و زێدە باری ناكۆكی و ناڤخوەیا ئیدارێ دكر و د هەمی كاڕێن خوەدا سەركەفتی بوو، لەورا هەمی دەمان هەولدانا كوشتنا وی هاتە ئەنجامدان.
عەلی لاریجانی بەرپرس بوو ژ ئێكگرتنا سیستەمی سیاسی ئیداری یێ كۆماڕا ئیسلامیا ئیرانی و بتنێ ئەڤ كەسەبوو هەڤسەنگی د ناڤبەڕا توندرەو و میانرەوی دا رادگرت و هەروەسا دشیا فەرماندەیێ سوپایێ پاسداڕان ڕازی بكەت ل دەمێ دانۆستاندنێ دا سازیش بۆڕێكەفتنێ بكەن.
رۆژنامەیا تێلگڕاڤ: دبێژیت ب ساناهی نینە كەسەكێ‌ دێ جهێ لاریجانی بگریت كا چاوا ل پێشتر كەسێ نەشیا جهێ قاسم سولەیمانی بگریت هەروەسا د هەمان دەم دا كەس نەشێت جهێ لاریجانی بگریت.
نەمانا لاریجانی هۆسا تو دەرگەهێ‌ ئاشتیێ بگری و تو دەرگەهێ شەڕی ڤەكەیی و كوشتنا عەلی لاریجانی لێدانەكا مەزن بوو ل پرسا دانوستاندنان د ناڤبەڕا ئەمریكا و ئیڕانێ‌ دا ب بۆچوونا من كوشتنا عەلی لاریجانی سیستەمێ ئێكگرتی یێ ئیڕان دێ كەڤیتە د مەترسیێ دا و هندەك لایەن ڤێ چەندێ ب سەركەڤتن بۆ ئیسرائیلێ دبینن؟ بەلێ ئەز گەشبین نینم ب ئەگەرێ كوشتنا عەلی لاریجانی ژبەركو پرسا دانوستاندنێ و ئاشتیێ زەحمەتتر لێ هات و كوشتنا عەلی لاریجانی لێدانەكا سەربازی نەبوو، بەلكو هەرەشەیەكا ڕاستەوخۆ بوو، ئـەو بنەمایێ سیستەمێ دەستهەلاتا ئیرانێ، هەروەسا دشێت كاریگەریا درێژخایەن ل سەر ئاسایشا دەڤەڕێ و جیهانێ دروست بكەت، دوبارە ب بۆچوونا من كوشتنا عەلی لاریجانی خەلەتیەكا مەزن بوو كو شەڕ مەزنتر لێ بهێت و دەرگەهێ دانوستاندنان ب ئێكجاری بهێتە گرتن.
ژبەركو هەولەك هەبوو بۆ دانوستاندن و ئاشتیێ د ناڤبەرا ئەمریكا و ئیرانێ دا بەلێ لایەنێ ئیسرائیلێ ئەڤ چەند پێ خۆش نەبوو، لەورا ئیسرائیل هەولدەت بازنەیێ جەنگی بەڕفرەه بكەت و ئەڤ چەندە ئەمریكا ناخوازیت جەنگ زێدەتر مەزن ببت و هەردەم دترسیت ژبەر دەست دەربكەڤیت و ئیڕانێ ئاخفتنەك جوان هەیە هەردەم دبێژیت (هەوە دەست ب شەڕی كر و دوماهیئینانا شەڕی دێ ب بریاڕا مەبیت).

ڕەمزی سیسۆ / زاخۆ

ئیڕان دەولەتەكا ب هێزە و مەزنە ژ روویی رووبەری و ژمارەیا دانیشتوانان ڤە و دیسان جهێ جوگرافیا وێ گەلەك بهێزە و زنجیرە چیایێن ئاسێ هەنە و خودان چەك و سەربازە ژبەركو ئەڤە چەندین سالە هزرا شەڕەكێ مەزن دكەت دگەل ئەمریكا و ئسرائیلێ و پێشتر ژی شەڕ دكر ژ دویرڤە ل لبنان و فەلەستین و گەلەك جهێن دی ب رێكا حزب الله و گەلەك ئاستەنگ بۆ ئسرائیلێ دروست دكرن و سەدان چالاكی ئەنجامددان و هەتا گەهشتی ڤی شەڕێ نوكە و كۆشتنا سەرۆك و سەربازێن پلە بلند یێن ئیرانێ ژناڤبرن.
ئیڕان هەولددەت شەڕی بەرفرەه بكەت و ژبەردەست بدەربێخت كا چاوا بۆ وێ نەما وەسان دڤێت بۆ دەولەتێن عەرەبی نەمینت وانژی د ئاگرێ خۆە دا بسۆژیت و دیسا بارێ ئەمریكا و ئسرائیلێ قورستر بكەت و كونترۆلا خوە ژدەستبدەن و ب ڕاستی ژی ئەگەر ئەڤ شەڕە نەهێتە كۆنتڕولكرن، هندەك لایەن و هێزێن توندرەو و شانەیێن نڤستی ڤان كاودانان ب دەلیڤە بینن و مەرەمێن خوە جێبەجێ بكەن و دڤیت ئەم وەك هەڕێما كۆردستانێ ل گەل زلهێزان ل سەر خەت بن ود هشیاربن و ئەم نەهێن بكارئینان و نەهێن داگیركرن ژلایێ هەر هێزەكا دیار و نەدیارڤە
هەردوو مەرەمێن ئەمریكا:
– ئێك هیچ ئاستەنگەكێ لپێشیا دەولەتا ئسرائیلێ نەهێلیت ژبەركۆ ئیران مەزنترین دوژمنا ئسرائیلێ یە و بهێزترین دوژمنا وێ یە و هەردەم هزرەكا مەزن بۆ د هاتكرن و نەخاسمە ئەگەر ببیا خۆدانا چەكێ بهێز یێ نەوەوی و دێ هەول دەن دەست ب سەر هەمی یۆڕانیوما ئیرانێ دا بهێت گرتن و بۆ خوە ببەن و دەستهەلاتا ئیرانێ بگوهۆرن و ب سەدان ئاریشەیان بۆ دڕوست بكەن و بۆ سەد سالێن دی وەكی نوكە بهێز نەبیت.
– مەرەما دووێ یا ئەمریكا ئەوە دەست ب سەر گەرویێ هورمز بگرت و سزایی ل سەر ئیرانێ راكەت داكو نەفت ل وێرێژی گران ببیت و ئابووری یا چینێ براوەستینت ژبەركو وەلاتێ چینێ حەفتێ پێنچ ژ سەدێ ئابوورا وێ ژڤان هەردو خالایە كو ب ڤی بریارا دایی و سەپاندی ل سەر ئیرانێ رێكێ ل چینێ بگریت و بێژتێ بڕاوەستە.
بابەتەك دی گرنگتر ئەوە كوردێن مە یێن ڕۆژهەلات د ئامادەباشیان دابن و ڤێ دەلیڤا زێرین ژ دەستنەدەن و ب ڕاوێشكاریا سەرۆك بارزانی پێنگاڤان بهاڤێژن و ل گەل زلهێزان بجڤن و دیسا ب ڕێكا سەرۆك بارزانی پەیوەندییان ل گەل ئەمریكا و ئیسرائیلێ بكەن و بۆ ئەوان دیار بكەن مافێ ئەوان بهێت دان ل ئیرانا نویی دا، ئێدی بەس پشتا خوە بدەن كوردان و ژبەركو پێشتر ب هزاران كوردێن هەژار ژلایێ رژێما زۆڕدار یا ئیرانی ڤە ب دارڤەكرنە و زیندانكرنە و سەرهندكرنە.

ڕەمزی سیسۆ/ زاخۆ

د هەر وەلاتەكێ هەبیت دا؛ كۆمەكا ئایینان هەبوونا خوە هەیە و دڤێت هەر ئێك ب ئازادانە ل دویڤ وان بیروباوەڕان ب ئایینی خوە هەیی؛ ب ئازادی بەردەوامیێ وان بیروباوەران بدەت بێ كو كەسەك یان ئایینەكێ‌ دیتر خوە ل سەر وان بسەپینت كو ئایینێن وان د خەلەتن یان دڤێت بهێن لسەر ئایینێ وی بێگومان خۆدایێ پڕ دلۆڤان هەمی مرۆڤ ئازاد كرینە و د ئازادن ل سەر چ هزر و بیر و ئایین بژین و مافێ وانە ل سەر وێ ئاخێ بژین یێ كو جهێ زمانێ ئەوان و هەردیسا دڤێت هەمی كەسێن ل سەر ئاخێ دژین؛ ب هەمی ئایین و هزڕو بیران ڤە بەرەڤانیێ ژ وێ ئاخێ بكەن یێن ل سەر دژین و ب ئازادانە ب ئایینێ دەروونێ خوە ئارام دكەن ژ بەركو ئەگەر ئاخ نەبیت چ ئایین نەشێن ب ئازادانە و ب زمانێ خوە، خۆدایێ خوە بپاڕێزن و ژیان ب لێك تێگەهشتن و ئێكدو قەبوولكرنێ جوانە؛ ئەم نێڕینەكێ ل ئیراقێ بكەن، ژبەر هندەك ئایین و مەزهەب و نەتەوەیان شیانێن ئێكدو قەبویلكرنێ نینە و هەر كەسێ دەستهەلاتێ بگرت دەست؛ هەول ددەت ئایین و نەتەوەیێن دی ژناڤببەت و لاواز بكەت و مال و سامانی بتنێ بۆ لایەنگرێن خوە ببەت و بەروڤاژی بهێن تەماشەیی وەلاتێ رۆسیا فیدڕال بكەن؛ ب دەهان ئایین هەنە؛ (٨٩) هەشتێ و نەه نەتەوە د ناڤدا هەنە و هەر ئێك ژ ئەوان هزروبیرێن خوە یێن تایبەت هەنە و پێكڤە دژین و ئێكدو قەبوول دكەن و هیچ جارەكێ هێرشێ ل سەر ئێكدو ناكەن؛ ل ڤێرێ بۆ مە دیار دبیت گەلەك گرنگە پێكڤە هەولبدەین هزرا مرۆڤان بگوهۆرین و ل قوتابخانە و زانكۆیان؛ بەحسا ئێكدو قەبوولكرنێ بكەین نەكو بەروڤاژی؛ ژبەرێ چەند هەیامەكا مە دیت ل كەركووكا دلێ كوردستانێ قوتابیەك هات دەركرن بتنێ ژبەركو وێنەیێ ئالایێ كوردستانێ ل سەر لاپەڕێ خوە دروست كربوو. جهێ داخێ یە مامۆستا ل قوتابخانەكا حكومی كو د وێ حوكمەتێ دا و ب یاسا هاتبیت نڤێسین. كورد نەتەوەیەكێ دروستن و مافێ وانە ئالا و زمان و سنوورێ جوگرافیا خوە هەبن، یان گەلەك جاڕان مە گوه لێ بوویە؛ دبێژن كوردێن موسلمان ئەجنینە یان هندەك كەس و ئایین ب دلەكێ تژی كەرب و كین ڤە دهاڤێژن دینێ بەڕانبەری خوە؛ كو هەردو ئێك نەتەوە و ئێك زمان دئاخڤن، لەوڕا ب بۆچوونا من ب هەڕ حالێ هەیی دڤێت ل گەل زلهێزێن جیهانێ روینن خار و ب هەر مەرجێ ئەوان هەیی ڕازی بن ئەم ژ ئەڤان هزڕ گەنیان جودا ببن و دەولەتەكا سەربەخوە ل ڕۆژهەلاتا ناڤین دابمەزرینین و باش دبینن ئالۆزی و شەڕ و كەرب و كین د ناڤ ئەوان دا هەیە و هەر ژ كەڤن دا ب هزاران ئێكدو كوشتینە و هەتا ئەڤرۆ ئێكدو قەبوول ناكەن، ئەڤجا چاوا دێ مە قەبوول كەن و مافێ مە دەن مە، گۆتنەك جوان هەیە دبێژیت: ((عەرەب ب دەستەكی شیری بلند دكەن و ب دەستێ دی قورئانێ، هەرگاڤا بهێز بین شیری لسەر سەرێ خەلكێ بلند دكەن و هەرگاڤا لاواز بین ب دەستێ دی قورئانا پیرۆز بلند دكەن ژ بۆ مەرەمێن خوە یێن قڕێژگرتی)).

رەمزی سیسۆ

گەنجێن هەر وەلاتەكێ هێزەكا زۆر هەیە، ئەو وەڵاتێن ڕێژەیا گەنجان د ناڤدا زۆر بیت، ئەو وەلات زەنگینە ژ لایێ هێزێ ڤە و هەرچ كارێن هەبن، ژبەركو گەنجن دشێن كار بكەن بێی كو بوەستن و مللەتێ خوە پێشڤەببەن، لەورا زۆرا گرنگە ئەم هەولبدەن پێداویستیێن گەنجان پڕ بكەن داكو ژ وەلاتی خوە دەرنەكەڤن و ئەو هێزا ل دەف گەنجان هەیە بۆ وەڵاتێ خوە بمەزێخن و خێزانا خوە وەلاتێ خوە پێكڤە بەر ب پێشڤە ببەن.
ئەگەر ئەم لێنیرینەكێ ل گەنجێن خوە بكەن ئەرێ ئەم بەرێ گەنجێن خوە دەنە چ كار و هەڤڕكیێ لسەر چ بكەن؟ هەڤركیێ لسەر زانستی بكەن، بێگومان نەخێر، هەڤڕكیێ لسەر داهێنانێ بكەن بێگومان نەخێر؟ ل سەر حەز ژ نشتیمانی و ئاخێ و شەهیدان بكەن، بێگومان نەخێر هەتا ڕادەیەكێ ئەڤ خالە ل دەف گەنجێن مە هەیە، بەلێ ئەم نابن ڕێك خوەشكرەك و پالدانەك زێدەتر ئەڤ گەنجە دەمێن خوە بدەن ڤان كارێن من دیاركرین.
د نوكەدا مە بەرێ گەنجێ خوە دایە وەرزشێ و هەڤڕكیەك دژوار ئێخستیە د ناڤبەرا ڤی باژێری و باژێرێ دی هەتا وێ ڕادێ كەرب و دژاتیەكا سۆر ب سۆر بۆ ئێكدو هەیە و ب شێوەیەك روی ب روی ئاخفتنێن سەقەت و نەیێن هەژی گۆتنێ ئاڕاستەیی هەڤدو دكەن، ئەڤەژی دێ بیت مالخرابكرنەك بۆ هەردولا ل داهاتی دا و كەس مفایی ژ ڤێ هەڤڕیێ نابینت، بێگومان وەرزشێ نابینم كارەك خراب ژ بەركو لسەرانسەری جیهانێ ئێك ژ كارێن زۆر گرنگە هەم ژلایێ ناسكرنا وەلاتی و باژێری ب دەوروبەران و دیسا وەكو بازرگانیەك و هەردیسا د وەرزشێ دا ئەم دشێن زێدەتر هەستا نەتەوایەتیێ و حەژێكرن و پشتەڤانیەكا باشتر بێخن د ناڤ جەماوەری داـ ئەوژی بەردەوام ب نڤێسینا بابەتان و روینشتنێن ڕەوشەنبیری ل ڕادیۆ و كەناڵان و بەرنامەیێن ل سەر وەرزشی كو پشتەڤان چ بكەت و چ لسەر پێدڤیە بكەن و ئەگەر خەلەتیێ بكەن سزایێ وان چیە؟ چونكی نابیت ژ بۆ خاترا چەند كەسەكێن كێم دو باژێر بكەڤن شەڕ و ئاژاوەگێریێ دا و چ ئاخفتنێن سەقەت و نەهەژی گۆتنێ ئاڕاستەیی هەڤدو بكەن لسەر كەنالێن ئاسمانی وەكی ژبەری نوكە مەدیتن و تا نوكە ژی سۆشیال میدیا پڕە ژڤیدیۆیێن تژی كەربوكین و ئاخفتنێن سەقەت!.
دیسا ب مخابنیڤە ڕاگەهاندكارێن مە یێن كوردی ئەرێ ئەو كەسن یێن دزانن ڕاگەهاندنێ بڕێڤەببن و ئەو كەسن دبن رێكخۆشكەر و پاڵدانەك گەنجێن مە حەژ هەڤدو بكەن یان بەروڤاژی زێدەتر دژاتیێ ل ناڤبەینا حەژێكەرێن ڤێ یانێ و یانا دی دروست دكەن ژبۆ هندێ لایك و كۆمێنتان ب ئەكتیفەكا بەرز ب دەستخوەڤە بینن و هندەك سزایێن توند بهێنەدان، هەر كەناڵ و ڕاگەهاندكارەك ببیت ئەگەرێ ئاژاوەگێریێ دڤێت ب توندی بهێتە سزادان، ژبەركو ئازادیا نوكە ئەم تێدا بەرهەمێ خوینا هەزاران جانگوریێن قارەمانە و ماندیبوونا هەزاران ئاوارەو بێ سەر و شوینایە.
یا فەرە ئەم ژ ئەڤرۆ وێڤە زێدەتر تەركیزا خوە بدانن سەر وێ چەندێ كو گەنجێن مە چ ئارمانج هەبن و بۆچی بژیت و حەژێكرنا وەڵاتی ل دەف پلە ئێك بیت و بزانیت سباهی ئەو دێ بن خودانێ وەڵاتی و ڤی وەڵاتی بڕێڤەبەن و نابیت خەمساربن بەڕامبەر خوینا شەهیدان و دلسۆزیا وان دایكێن هێشتا ساخ ب مری دهێنە دیتن ژ بەر ژ دەستدانا جەگەرێن خوە.
ئەڤ كارێ هەنێ زێدەتر ل سەر ملێن مامۆستا و دایك و باب و ڕەوشەنبیرێن وەلاتی یە و ئەگەر وەلاتە بكەڤیت دەستێن كەسێن خودان ژێر دا ئەو وەڵات رۆژ بۆ رۆژ بەرەب پێشكەفتنێ ڤە چیت و هیڤیخوازن پێكڤە كاربكەن كو گەنجێن خوە پال بدەن و هەڤڕكیێ بێخنە د ناڤبەڕا وان دا حەژ زانستی بكەن و ئاخێ بكەن و ئالایی و پێشمەرگەیی بكەن و حەژ پشتەڤانیا وەرزشەكا ساخلەم بكەن بێ كەرب و دژاتیكرن و برینداركرنا هەست و سۆزیێن ئێكدو.

رەمزی سیسۆ

بابەتێ سنووران بابەتەكێ هەستیارە هەر چەند هەرێما كوردستانێ هەمی شیانێن خوە بۆ بەرەڤانیكرن ژ سنوورێن خوە دمەزێخت, بەلێ بەروڤاژی ئەم نابینن ئیراق خۆ ل ڤی بابەتی بكەت خودان، دڤێت هەر دەولەتەكا هەبیت سنووریێن خۆ بپارێزیت ژ هەر هێرش و دەستدرێژییەكا بهێتە سەر.
ژ بەركو هەر وەلاتەك ب بهای سنووران دهێتە دیاركرن، مینا سنوورین مە خودان ئاڤەكا زەلال و چیایێن ئاسێ و سەخت لێ هەنە، ژ ئەگەرێ خەمساریا ئیراقێ ژ دەستدانا ب سەدان گوند و جهێن ستراتیژی و گەشت و گوزاری هەروەسا ئەڤ جهێن هەنێ زەنگینن ب ماددەیێن كانزایی و سەرەرایی بچویككرنا قەواریێ وەلاتی و زیدەبوونا ترس و نەئارامیێ ل دەڤ خەلكێ دروست بوویە.
ب ۆچوونا من هەرێما كوردستانێ دڤیا بیت بلەز ئێكگرتنەكا ناڤخوەیی پەیدا بكەت و حوكمەتا خوە پێكبینن و دڤێت بلەز خوە ژ ڤان كاودانان قورتال بكەن، ژ بەركو نابیت ئەم خۆ پشتگەرمێ ئیراقێ بكەن، ئاشكرایە ئیراقێ دڤێت هەرێما كوردستانێ هەردەم لاواز بیت و دەستێ وێ بەر ئیراقێ بیت، دیسا ل بیرا مەیە ل سالا2014 دەما چەكدارێن داعشێ هێرشی ئیراقێ كرین ب چەند چەكدارێن هەژمارەكا كێم شكەستن ب سوپای ئیراقێ ئینا و بەروڤاژی پێشمەرگێن كوردستانێ روی ب روی بەرامبەر تیرۆرستێن داعش راوەستیان و شیان سنوورێن خوە ژ ڤان درندەیان بپارێزین و ب خوینا هزاران جانگورییان، ئەم باش دزانن هەمی بریارێن ئیراقێ ژ لایێ ئیرانێ ڤە دهێنەدان.
سەرەرایی سوپایێ ئیراقێ بۆ چەندین گرۆپان دابەش بووینە، بەلێ جهێ دلخۆشیێ یە پشتی شەرێ داعشێ پێشمەرگەهیێن قارەمان ب سەركرداتیا دلسۆزانەیا جەنابێ بارزانی ناڤودەنگیا پێشمەرگەیی ل جیهانێ بەلاڤكر ئەڤ چەندە ژی هەمی پاڵدەرین بۆ راكێشانا سۆز و ڤیان و رایا نیڤدەولەتی یە و هەر دیسا هناردەكرنا نەفتا هەرێمێ زێدەتر پێگەهێ كوردستانێ ل سەر نەخشەیێ جیهانێ دیاركر.
و زێدەباری هەولێن بەردەوام یێن سەرۆكێ حوكمەتا هەرێما كوردستانێ بەرێز مسرۆر بارزانی بۆ دەرئینانا غازا هەرێما كوردستانێ ئەڤ چەندە ژی رۆڵ و پێگەهێ هەرێمێ ل ناڤخۆ و دەرڤە دێ بهێز كەت. ئەڤ هەمی پاڵدەرێن پشتەڤانیا هەڤپەیمانان كو پشتەڤانیێ ل هەرێما كوردستانێ دكەن، ژ بەر ڤان خێروبێرێن ل وەلاتێ مە دا هەین هەردەم دوژمنێ مە چاڤێ وان ل وەڵاتێ مەیە و سنوورێن مە دبەزینن، ئیراق ژ ڤی بابەتی ڤە بێ دەنگە و بێ هەلوەستە.
نڤیسەرێ مەزن جەگەرخوین گۆتیە:
(ئەگەر هوین نەبن یەك.. هوینێ بچن یەك ب یەك)