ئهڤرۆ نيوز، عهزيز ههورامى:
وهلاتيێن پارێزگهها ههلهبچه ژ بوو پشتهڤانيكرن ل عهفرينێ رژيانه سهر جاددا و كريارێن لهشكرێ توركيا بۆ داگيركرنا ئاخا كوردستانێ شهرمزار كرن:
د ڤێ خرڤهبوونێ دا بهياننامهك ژى بۆ رايا گشتى هاته خواندن:
چهند ديمهنهكێن وێنهى ژ خوهنيشاندانا خهلكێ ههلهبچه دژى دهستدرێژيێن لهشكرێ توركيا:
ئهڤرۆ نيوز:
پشتى كو ئهڤرۆ نيوز بابهتهك ل بن ناڤێ “پارێ ژمارهكا مامۆستايێن وانهبێژ هاته دزين” بهلاڤكرى، ژ پەروەردا ئامێدیێ روونكرنهك ل سهر وى بابهتى بهلاڤكر كو ئهڤه ژى دهقێ وێ يه:
رونکرنەک ژ پەروەردا ئامێدیێ
ئەم وەکو رێڤەبەریا پەروەردا قەزا ئامێدیێ بو ھەموو ماموستا و جھێن پەیوەندیدار رون دکەین کو ئەو ژێدەرێن زانیاری بو ئەڤرو نیوز لسەر دابەشکرنا پارێ ماموستایێن وانەبێژ دایی، زانیاریێن شاش داینە، بو رایا گشتی رون دکەین کو پارە درۆست ھاتیە دابەشکرن و مافێ کەسێ نەھاتیە خوارن، و ژ ئەگەرا کێشەکا تەکنیکی پارە زێدە ھاتينە مەزاختن و لژنەیاک بو دوڤچون لسەر کێشێ ھاتیە پێکئینان و ھەموو ئەو پارێ زێدە ھاتیە مەزاختن دێ ھێتە کومکرن و زڤراندن بو گەنجینەیا حوکمەتێ.
پهروەردا قەزا ئامێدیێ
31.1.2018
ئهڤرۆ نيوز، ئەیاد بەرواری:
رۆژناما گاردیان یا بریتانی د ھژمارا خوە یا دوھی دا بەحسێ ھێرشا لەشکرێ تورکی ل سەر عەفرینێ دکەت و دبێژیت، دبیت ئەو شەرە سنورێن نوو ل تورکیا و ئیرانێ و عیراقێ و سووریێ پەیدا کەت.
رۆژناما ناڤبری ئاماژێ ددەت کو کورد تووشی پێرابوونێن دژ دبن ل ئیرانێ و ل عیراقێ و ئیران، عیراق و تورکیا دژی کوردێن عیراقێ راوەستیان ژ بەر کو داخوازا سەربخوەیێ کر، دیارکر ژی ئەڤ سیاسەتە نوکە ل باکورێ سووریێ ژی یا دھێتە پەیرەوکرن ب تایبەتی ل باژێرێ عەفرینێ کو ھێزێن پاراستنا گەل یێن کوردی و ھەڤپشکێ وان یێ سیاسی حزبا ئێکەتیا دیموکرات (پەیەدە) ل وی باژێرێ د بالادەستن و تورکیا وان ب سەر پەکەکێ ڤە دھەژمێریت، د دەمەکی دا ئەو گرۆپە خوە ب سووری و پێگیر ب سنورێن دەڤەرێن خوە دیار دکەن و دبێژین ئەو دسەربخوە نە دناڤ سووریا ئێکگرتی ل پاشەرۆژێ.
رۆژناما گاردیان دبێژیت” کورد ل سووریێ شارەزایی وەرگرت کو ئەو چەندە دێ ھەلویستێ وان ب ھێز ئێخیت وەکو ھێزەک کو نەھێتە پاش گوە ھاڤێتن، ژ بەر ھاریکاریا وان ل گەل ھێزێن لەشکری یێن ئەمریکی و رۆژئاڤای”. زێدەتر دبێژیت” ل دووڤ بۆچوونێن رۆژئاڤای، کا چاوان تورکیا ئەندامە د ھەڤپەیمانیا باکوورێ ئەتلەسی ( ناتۆ) ی دا، کورد ژی ھەڤپەیمان بوون د شەرێ دژی داعشێ دا، ئەڤ چەندە ژی حوکمەتێن وەلاتێن رۆژئاڤای دئێخن بەرامبەر بژاردێن ب زەحمەت ل دۆر شەرێ عەفرینێ”.
بەلاڤکر ژی” دبیت کوردێن تورکیا ڤێ بەھنگاریا کوردی ل وی شەری ب دەلیڤە بزانن و ئەڤ ھەژموونا بەردەوام بۆ نەتەوا کوردی دێ ل عیراقێ و ئیرانێ ژی رۆھن بیت و یاخیبوونا کوردی یا مەزنتر دژی وەلاتێن ئەو تێدا نە ل دەرڤەی چارچۆڤێ شیانایە و لڤینا کوردی یا پێشبینی کری د ناڤ ھەر چار وەلاتان دا ئەنجامێن وێ دبیت دپێشبینی کری نەبن، لەوما پێدڤیە ل سەر وەلاتێن رۆژئاڤا ئارمانجێن خوە دیار کەن کا وان ب دروستی دڤێت چ بدەستڤەبینن بەری شەر بگەھیتە قۆناغەکا دی کو د بەرژەوەندیا یێن دی دابیت.
ئهڤرۆ نيوز:
پەرلەمانێ عێراقێ بڕیاردایە 12ی ھەیڤا گولانا داھاتی ھەلبژارتنێن پەرلەمان و جڤاتا پارێزگەھێن عێراقێ بھێنە ئەنجامدان، نوونەرێن کوردان ژی ل پەرلەمانێ عێراقێ ئاماژە بوێ چەندێ دکەن، ئەو ل گەل پاشخستنا پڕۆسا ھەلبژارتنان بووین، ژبەر کو ھێشتا ھژمارەکا گەلەک یا وەلاتیێن عێراقی ئاوارەنە و دێ ئاستەنگ بۆچێبن ددەمێ ھەلبژارتنان دا، مامۆستایەکێ زانکۆیێ ژی دبێژیت، باشترە کورد ل کەرکووک و خورماتوو ھەلبژارتنان بایکۆت بکەن.
بێریڤان خەیلانی،پەرلەمانتارا کورد ل پەرلەمانێ عێراقێ بۆ رۆژناما ئەڤرۆ گۆت: راستە پەرلەمانی بڕیار لدۆر ژڤانێ ھەلبژارتنان دەرکریە و دێ ددەمێ خوەدا ل رۆژا 12ی ھەیڤا گولانا داھاتی ھێنە ئەنجامدان، بەلێ ئەم ل گەل پاشخستنا پڕۆسا ھەلبژارتناندابووین بۆ دەمێ سالەکێ یان شەش ھەیڤان، ھەتا کۆتلەیێن عەرەبێن سونی پڕۆژەیەکی بۆ ڤێ مەرەمێ پێشکەشی پەرلەمانی کر، ئەڤە ددەمەکی دایە پەرلەمانی چو دەستھەڵات نینە ھەلبژارتنان پاشپێخیت، چونکی ل گوڕ دستوورێ عێراقێ دڤێت د دەمێ چوار سالاندا ھەلبژارتن بھێنە ئەنجامدان، بەھانەیا کۆتلەیێن سونی ئەڤە بۆ دگۆتن پتریا خەلکێ مە ھێشتا ئاوارەیە و ڤەنەگەڕیایە سەر مال و حالێن ددەمێ رێڤەچوونا پڕۆسا ھەلبژارتنان دێ ئاریشە بۆ پەیدا بن، بەلێ
پەرلەمانی ھەر بڕیارا خوە دەرکرن ددەمێ خوەدا ھەلبژارتن بھێنە ئەنجامدان.
بێریڤان خەیلانی گۆتژی” داخوازا عەرەبێن سونە بەرۆڤاژی داخوازا عەرەبێن شیعەیە، ھندی کوردن پتریا مە دگەل پاشخستنێ بووین، ژبەرکو ھێشتا دەڤەرێن ل کەرکووک و دیالە و مووسل داگیرکرینە، عەرەبێن شیعە وەسا دبینن دڤێت ھەلبژارتن ددەمێ خوەدا رێڤەبچن وانژی ئەجێندایێن خوە ھەنە بۆ ھەلبژارتنان.
ژلایێ خۆڤەژی دکتۆر خەلیل ئیسماعیل مامۆستایێ زانکۆیێ بۆ رۆژناما ئەڤرۆ گۆت: ب درێژاھیا دیرۆکێ ھەر دەمێ حوکمەتا عێراقێ یا لاۆازبیت داخوازا دانوستانانکریە ل کوردان و بەرۆڤاژی ھەردەمێ عێراق یا بھێزبیت ئەڤە ھێرشکریە سەر ھەرێما کوردستانێ، لەوڕا نوکە پێدڤیە کورد ھەموو پێکڤە بایکۆتا ھەلبژارتنێن عێراقێ ل کەرکووکێ بکەن، ژبەرکو پشکداریا کوردان د ھەلبژارتناندا ل دەڤەرێن داگیرکری دێ زیانێن مەزن بۆ کوردان ھەبن، راستە ھەگەر پشکداریێ نەکەن دێ کۆرسیێن کوردا کێمتر بن، بەلێ نابیت ھەمبەر زیانێن مەزن یێن پاشە ڕۆژێ ئەم بۆ بدەستڤەئینانا چەند کۆرسیەکان پشکداری ھەلبژارتنان بکەین،بەغدا خوە ب سەرکەفتی دزانیت و دخوازیت کورد و عەرەبێن سونە بینیت بن دەستێ خوە.
دکتۆر خەلیل ئیسماعیل دیارکر” دەڤەرێن کوردستانی ددەمێ نوکەدا داگیرینە و بەغدا دێ ھێزێن سەربازی د پڕۆسا ھەلبژارتناندا بکارئینیت، بتایبەتی ل کەرکووک و خورماتوو، فەرەژی ھەموو لیستێن کوردی ئێک بگرن و بڤی شێوەیێ نوکە نەچنە پڕۆسا ھەلبژارتنان، ئاریشامە تنێ بۆ چوار سالێن داھاتی نینە ل دەڤەرێن کەرکووکێ بەلکۆ بۆ پاشەڕۆژێ دێ عێراق پیلانێن مەترسیدار بکارئنیت.
فرۆکێن روسیا و سووریێ د ناڤبەرا باژێرکێن سامادا و ئەل ئەیس ھێرشی تانک و ترۆمبێلێن سەربازی یێن تورکیا کرن کو دخواستن خوە بگەھیننە ھەوارا رێکخستنا تیرۆرستیا ئەلنوسرا و ئەحرار شام کو ئەڤ دەە رۆژن رژێما ئەسەد ل دژی وان کۆمێن تیرۆرست ئۆپەراسیۆنەکا سەربازی دایە دەستپێ کرن.
دەولەتا تورکیا ھێرشێن دژوار دکەتە سەر باژێرک و گوندێن سەر ب کانتۆنا عەفرینێ و وەلاتیێن سڤیل بۆمبەباران و تۆپباران دکەت و د رۆژا خوە یا ١١ دا ژی ھێزێن یەپەگێ بەرخوەدانیەکا مەزن ل دژی ئۆپەراسیۆنا داگیرکرنێ یا تورکیا و تیرۆرستێن سوپایێ ئازاد دکەن و د شەرێ رۆژا ١١ دا ھێزێن کوردی شیان گوندێن ھەمام و قەستەلێ دوبارە ئازاد بکەن و ٣٩ سەربازێن تورک و تیرۆرستێن سوپایێ ئازاد بکوژن و ٢٣ کەس ژی بریندار کرن و شەرڤانەکی کورد ژی د شەرێ قەستەلێ دا جانێ خوە ژ دەست دا.
د ڤێ مژارێ دا رۆنی ئازاد رۆژنامەڤانێ کورد ل عەفرینێ راگەھاند کو دەولەتا تورکیا ب ھەموو ھێزا خوە یا ئەسمانی و ئەردی و ب تەکنیکێن خوە یێن پێشکەڤتی ھێرشێن دژوار دکەتە سەر گوند و باژێرکێن عەفرینێ و ھەتا نھا د ناڤا ١١ رۆژان دا ژ سەدی زێدەتر وەلاتیێن سڤیل ژ ئەنجاما ھێرشێن فرۆکێن تورکیا جانێ خوە ژ دەست داینە و نێزیکی ٢٠٠ کەس ژ وەلاتیێن سڤیل ژی کو پرانیا وان ژن و زارۆنە بریندار بووینە و گۆت: (دەولەتا تورکیا بۆمبێ ناپالم یێ قەدەغەکری ل باژێرکێ راجۆ و جندریسێ بکار ئیناینە و ل ھەمبەر ھێرشێن دژوار یێن تورکیا و تیرۆرستێن سەر ب وێ ڤە، شەرڤانێن کورد ب کەمین و ھێرشێن ژ نێزیک ڤە دربێن گران ل تورکیا ددەن و ھەتا نھا ژ بلی چار گوندێن سەر سنور چ دەڤەرەک عەفرینێ نەکەڤتیە دەستێ تورکیا و ھژمارا کوشتیێن تورکیا گەلەک زێدەنە).
رۆنی راگەھاند ژی کو نھا د ناڤبەرا کانتۆنا کۆبانێ و عەفرینێ دەریێ ھاتن و چوونێ ڤەبوویە و ھێزێن کوردی دشێن ھەم ھەڤکاریا خۆراک و ھەم ژی ھەڤکاریا سەربازی بگەھیننە عەفرینێ و د رەوشا نھا دا ب ھزاران ھێزێن نوو یێن یەپەگێ و ھێزێن سووریا دیمۆکراتیک گەھشتینە عەفرینێ و گۆت: (فەرماندارێن یەپەگێ و ھێزێن سووریا دیمۆکراتیک ئەڤ دو رۆژ بوون کۆمبوونان ساز دکرن بۆ باشتر پاراستنا عەفرینێ و ڤەکرنا بەرەیەکی دی یێ شەری ل دژی تورکیا و تیرۆرستێن سەر ب وێ ڤە و د ڤێ چارچۆڤێ دا ئەم چاڤەرێ دکەین کو د رۆژێن داھاتی دا یەپەگە و ھێزێن سووریا دیمۆکراتیک ئۆپەراسیۆنا ئازادکرنا باژێرکێن باب و عەزازێ بدەنە دەستپێ کرن و بارێ سەر عەفرینێ سڤک بکەن و د رەوشا نھا دا یەپەگە و
ھێزێن سووریا دیمۆکراتیک ب ئاسانی دشێن ھاتن و چوونێ د ناڤبەرا کانتۆنێن رۆژئاڤا دا بکەن و ئەو یەک دەستێ یەپەگێ ب ھێز کریە).
رۆنی ئازاد ھەروەسا راگەھاند ژی کو رژێما ئەسەد ژی ئۆپەراسیۆنا رزگارکرنا ئدلیبێ ژ دەستێ تیرۆرستێن ئەلنوسرا و ئەحرار شام دژوار کریە و دەولەتا تورکیا خواست خوە بگەھینیتە ھەوارا تیرۆرستان و نێزیکی سەد تانک و ترۆمبێلێن سەربازی و چەک و تەقەمەنی و چەکداران بگەھینیتە باژێرکێ ئەل ئەیس و ل ھەمبەر دا فرۆکێن شەری یێن روسیا و سووریێ ھێرشی تانکێن تورکیا کرن و ئەو نەچار کرن کو پاشڤە ڤەگەرن.
ئهڤرۆ، رهوان نهێلى
پشتى داخوازكارێ گشتى ل دهۆكێ داخوازا ڤهكرنا رێیا خزمهتگوزارى یا ههمبهر ئۆتێلا ركسۆس كرى، ئهڤرۆ باژێرڤانیا دهۆك و كارگێریا ئۆتێلێ گههشتنه چارهكا ناڤنجى و رێ دێ هێته ڤهكرن كو رهنگه سوبه یان دوسبه ب فهرمى بهێته ڤهكرن.
رۆژناما ئهڤرۆ بوچوونا لایهنێ بهرپرس ل دۆر ڤێ كێشێ وهرگرتیه، سوبه چاڤهرێى بن كو چارهسهریهكا ناڤنجى بۆ كێشێ هاتیه دیتن و رۆژناما ئهڤرۆ هوردهكارى بهلاڤ كرینه.
ئهڤرۆنيوز:
تایبەمەندا نەخۆشیێن چهرمى نوشدار (سنور سوبحى) دياركر كو جهێ نینوکان يێ (زەلالە) و د بن نینوکێ دا هژمارەکا مەزن یا دەماران يێن ههين.
زێدهتر گۆت “ژ بەر کو خوینا مرۆڤی ب رەنگێ سوره ، لەورا ھەردەم دبن نینوکان ڤە، رەنگێ خوینێ دیار دبیت و ئەڤ دیاردەیە ژى تشتەکێ نورمالە”.
تایبەمەندا نەخۆشیێن چهرمى بۆ نوش نیوز گۆت ژی “ههكه دبن نینوکا کەسەکێ ئەو سوراتی نەبیت، ل وی دەمی تشتەکێ نورمال نینە، چونكى ل بن ھەر نینوکەکێ پتر ژ (١٠٠) دەمار يێن ههين و ھەر دەمارەك ژوان کارەکێ گرنگ دكهت و قەبارێ ھەر دەمارەکێ گەلەک یێ بچووکە”.
ديار كر كو پتریا وان کەسێن نینوکێن وان پان، رەنگێ سور زوو ب زوو دیار ناکەت، بهلێ ھەر جھێ مەترسیێ نینە.
ئاماژه دا كو پشتى ژن ل مال کارێ خوه یێ رۆژانە يێ مالێ ئەنجام ددەن، فەرە پشتی کارێ وان ب دووماھی دھێت ئەو دەستێن خوه ھشک بکەن و ھندەک کرێمان ب کار بینن، دا کو پیستێ وان و نینوکێن وان ژ ھەر نەخوهشیەکێ و مەترسیەکێ دوور بکەڤن.
ئهڤرۆ نیوز:
نێزیكی سهج تانكێن سوپایێ توركیا ب رێبهرییا ههیههت تهحریر ئهلشام كو ب بهرهیی نوسره دهێته نیاسین و سهر بقاعیده ڤه یه، بهر ب حهلهبێ ڤه ل باكۆرێ سووریێ دچن.
د ڤیدیۆیهكێ دا كو كهنالهكێ نێزیكی ههیههت تهحریر ئهلشام بهلاڤ كرییه تانكێن سوپایێ توركیا د گهل ترومبێلێن ئهلنوسره دهێنه دیتن.
دوهی ژی وان تانكێن توركیا بزاڤ كربوو رێیا خوه بۆ نێزیك حهلهبێ بكهن كو بن كۆنترۆلا رژێمێ دایه لێ فرۆكهیێن رۆسیا رێ پێ نهدابوو و نهچاركربوون ڤهگهرنه ڤه.
ئهڤرۆنيوز:
حوكمهتا ههرێما كوردستانێ سهبارهت وان فهرمانبهرێن پشتگيرى بۆ دهێته دروستكرن ژلايێ وهزارهتان ڤه بۆ فهرمانگهها پهيوهنديێن دهرڤه ب مهرهما وهرگرتنا ڤێزا، بريارهك دهركر.
ل دووڤ بهلگهنامهكا فهرمى يا سهرۆكاتيا جڤاتا وهزيرێن ههرێما كوردستانێ داخوازا وهرگرتنا چهندين پێرابوونان كريه ل دهمێ داخوازكرنا ڤيزا ژلايێ فهرمانبهران ڤه.
دوێ بهلگهنامێ دا هاتيه” هژمارهك ژوان فهرمانبهرێن كو ب ئهگهرێن جودا جودا ژلايێ وهزارهت وفهرمانگههان پشتگيرى بۆ دهێته دروستكرن بۆ فهرمانگهها پهيوهنديێن دهرڤه، ب مهرهما وهرگرتنا ڤيزێ، پشتى دگههنه وان وهلاتان داخوازا مافێ پهنابهريێ يان ئاكنجيبوونێ دكهن، ڤێ چهندێ ژى كاريگهريا مهزن ل سهر ناڤ وناڤبانگيا ههرێما كوردستانێ ودامودهزگهێن وێ كريه”.
جڤاتا وهزيرێن ههرێما كوردستانێ دووپاتى كريه كو ل دهمێ پێدانا پشتگيريێ بۆ وهرگرتنا ڤيزێ، پێدڤيه فهرمانگهه گهلهك پێرابوونان وهرگرن، ل دۆر وان پێرابوونان هاتيه” ل دهمێ داخوازكرنا ڤيزێ، گهشتكرنا وهلاتان بۆ فهرمانبهرێن وهزارهت ودامودهزگههێن حوكمهتێ، پێدڤيه پشتى پشت راستيێ ژ راستى ودروستى ومهرهما داخوازكهري ڤيزێ، د ڤى رهوشێ دا زێدهتر رهوشا نهخوهشيێ ل بهر چاڤ بهێته وهرگرتن”.
ئهو چهنده ژى هاتيه رۆهنكرن، ههكه داخوازكهرێ ڤيزێ بۆ نهخوهشيێ وبوارێ مرۆڤايهتيێ بيت، پێدڤيه فهرمانبهر سۆزنامهكا فهرمى ويا پشت راستكرى ژلايێ فهرمانگههێن دادنڤيسى پێشكێش بكهت ودڤێت فهرمانبهر دوێ سۆزنامێ دا ب رۆهنى ئاماژێ ب ناڤێ وى وهلاتى بكهت يێ كو دڤێت بچيتێ، ل گهل ئهگهرێ چوونێ وسۆزێ بدهت كو پشتى ب دووماهى ئينانا كارێ خوه ل وى وهلاتى، بهرێ ب دووماهى هاتنا دهمێ ڤيزا خوه، دێ زڤريته ههرێما كوردستانێ وب چو شێوهكى داخازا مافێ پهنابهريێ وئاكنجيبوونێ ل وى وهلاتێ دچيتێ نهكهت.
جڤاتا وهزيران دياركريه، ئهو كهسێ وێ سۆزنامێ بدهت وپاشى پێگير نهبيت دێ تووشى سزاين قانوونى يێن توند بيت، ديسا ئاگههداريا ههموو وهزارهت وفهرمانگههێن ههرێمێ كريه كو پێگيريێ ب ڤى بابهتى بكهن.
نيشاندان