ئەڤرۆ نیوز:
رێڤەبەرێ پاسەپۆرتان ل دھۆکێ راگەھاند، ژ بەر وێ قەرەبالغا کەفتیە رێڤەبەریا پاسەپۆرتان، بزاڤ ژ لایێ پارێزگەرێ دھۆکێ و رێڤەبەریا گشتی و وەزارەتا نافخوە ھاتینە کرن و شیاین رازیبوونا بەغدا ب دەست خوەڤە بینین نڤیسینگەھەکا دی بھێتە ڤەکرن و دیارکری ژی کو ھەتا نوکە د ڤان ھەیڤێن بووری دا(504,298) پاسەپۆرت ھاتینە چێکرن.
نەوزاد مەجید سلێمان، رێڤەبەرێ پاسەپۆرتان ل پارێزگەھا دھۆکێ بۆ ئەڤرۆ ئاشکەرا کر، ب ھزارەھا خەلکی پاسەپۆرت چێکرینە و نەھاتیە پاسەپۆرتا خوە وەربگرن و ھەتا نوکە نێزیکی نیڤ ملیون پاسەپۆرتان ھاتینە چێکرن، ژ بلی وان کەسا ئەوێن ل دھۆکێ دەرچووین، بەلێ ھاتنا ئاوارەیان بۆ پارێزگەھا دھۆکێ ئەگەرەک بوو ل رێڤەبەریا پاسەپۆرتان ببیتە سرا و ئەم ئێکەم رێڤەبەری بووین ل سەرانسەری عیراقێ مە سرا نەھێلای ل سالا 2011 مە سرانە نە ھێلایە، ھندەک رۆژان پێنچ ھزار دھاتن و ناچار دبووین خشتەکی درۆست بکەین بکەینە سرا دیسان ئەو کەسێن ماوێ پاسەپۆرتا وان نەمای دھێن و پاسەپۆرتێن خوە نوو دکەنەڤە، چونکو ماوێ پاسپۆرتێ ھەشت سالن و ئەگەرێ سیێ د ناڤبەرا کەرکوک و بەغدادا ھەشت کیلو مەترا (کێبل زاویەک) ھەیە و ئاریشەک کەتیە د وی کێبلی دا و تۆر کێم بوویە و ئەگەر د بەرێ دا مە رۆژانە 700 پاسەپۆرت مە ب رێڤەدبرن، نوکە ئەم 600 پاسەپۆرتا ب رێڤەدبەین.
رێڤەبەرێ پاسەپۆرتان دیارکر ژی، ژ بەر وێ قەرەبالغا کەفتیە رێڤەبەریا پاسەپۆرتا ھەول دبەردەوام ھاتینە دان ژ لایێ پارێزگەرێ دھۆکێ و رێڤەبەریا گشتی و وەزارەتا نافخوە و شیاین رازیبوونا بەغدا ب دەست خوەڤە بینین و نڤیسینگەھەکا دی بھێتە ڤەکرن ل پارێزگەھا دھۆکێ و مە ئاڤاھی گرتیە و ئەم نوکە تێدا کاردکەین و دڤێت ئەو ئاڤاھیە ل دووڤ مەرجێن بەغدا بھێنە چێکرن و دھێتە پێشبینیکرن ھەتا دو ھەیڤێن دی ئەو ئاڤاھیە ب دووماھی بھێت و گۆت: ئەو ئاڤاھیێ نوکە ئەم تێڤە گەلەک یێ بچووکە و بۆ رێڤەبەریا پاسەپۆرتان نەھاتیە چێکرن، بەلکو یێ رێڤەبەریا پەیوەندیان بوویە و ئاریشا سەرەکی ئەوە مە ھۆل نینن وەلاتی تێدا بھێنڤەدانێ بکەن ھەتا کارێ وان ب رێڤە دچیت.
ناڤبری گۆت ژی: ھەموو کەس دھێن داخوازا چێکرنا پاسەپۆرتان دکەن، ل وی دەمی نەچاردبین کیژ کەس ژ ھەموویان پێدڤیترە پاسەپۆرتێ بۆ وی کەسی چێدکەین، وەکو نەخۆش و قوتابی و بازرگان و شاندێن فەرمی و گەلەک کەس دھێن بۆ گەشت و گۆزارێ پاسەپۆرتێ چێدکەن ئەم پاسەپۆرتێ بۆ وان ژی چێدکەین و رۆژێ 100 پاسەپۆرتان بۆ ئاوارەیان چێ دکەین و ئەوێن مینپت ژی بۆ خەلکێ دھوکێ نە و ھەتا نوکە (504,298) پاسەپۆرت ھاتینە چێکرینە.
زێدەتر گۆت: قانوونا کەسێ پاسەپۆرتا خوە بەرزەکری ھاتیە بجھئینانو نوکە کەفتیە د بوارێ جێبەجێکرنێ دا و دادگەە ل دھۆکێ یە و دشێن کارێ خوە ب رێڤە ببەن و ھەتا نوکە چو ئاریشە نەبووینە و رێڤەبەریا مە ئێکەم رێڤەبەریە سێ (شەفتا) دەوامێ دکەین.
ل دووماھیێ رێڤەبەرێ پاسەپۆرتان نەوزاد مەجید گۆت: ئەو کەسێ کار ب پاسەپۆرتێ نەبیت، بلا نوکە نەھێت ھەتا نڤیسینگەھا دی دھێتە ڤەکرن و ھەتا ھینگێ سرا نامینیت و دێ نۆرمال ب رێڤەچیت.

ئه‌ڤرۆ نيوز:

ھەر سال ل دووماھیا وەرزێ پاییزێ و ل دەستپێکا وەرزێ زڤستانێ و ب تایبەتی ل دەمێ باران و بەفربارینێ و شەڤێن تاری، نێچیرڤانێن کەوان و گیانەوەرێن کویڤی ڤێ چەندێ بۆ خوە بدەلیڤە دبینن و ب جارەکێ قەستا چیا و کێریان دکەن ل دەڤەرێن سنۆری بۆ گرتن و کوشتنا کەو و گیانەوەرێن دی یێن کویڤی، شەڤانە خەلک رێژەیەکا مەزن یا کەو و گیانەوەرێن دی یێن کویڤی دکوژن، ھەکە ب ڤی رەنگی نێچیر یا بەردەوام بیت، دێ گیانەوەرێن کویڤی گەلەک کێم بن. بەرواری بالا، زنار تۆڤی:
نێچیرڤانەکێ نەڤیا ناڤێ خوە بۆ رۆژناما ئەڤرۆ ئاشکرا بکەت دبێژیت: ئەڤە ماوەیەکێ درێژە ئەو و چەند ھەڤالەک شەڤانە دچنە شەڤیاران و ھەر شەڤ ئەو چەندین کەو و گیانەوەرێن دی یێن کویڤی دکوژن، ھەتا نوکە وان ب تنێ پتری 90 کەوان کوشتینە، جار ب جفتان و جاران ژی ئەو تۆران چێدکەن و ب سەر کەوان دا دگرن و کۆمێن کەوان پێکڤە د میننە دبن تۆران دا و ھەر جار ژمارەکا مەزن یا کەوان ئەو ب ساخی دگرن.
گۆت ژی: گرتن و کوشتنا کەوان بۆ وان گەلەکا ب ساناھیە ب شەڤێ، چونکی ئەو ب رۆژێ جھێن کەوان دەست نیشان دکەن و ب شەڤێ کارێ وان ب ساناھی دکەڤیت و ب لاوێتان دچنە کەوان و ھندەکان ب تۆران دگرن و جاران ب جفتان دکوژن. وی نێچیرڤانی زێدەتر گۆت: ل ڤی دەمی سالێ خەلک ب شەڤان دمیننە ل چیای بۆ کوشتنا پەزێن کویڤی و ل ڤان ھەر دو ھەیڤێن بۆری ل دۆرێن پتری 45 پەزێن کویڤی و ب سەدان کەو ژ لایێ نێچیرڤانان ڤە ھاتینە کوشتن، لەورا مە کارێ خوە کریە نێچیر و ئەم بۆ خوە زەوقێ ژ ڤی کاری دبینین و ئەم نەشێن چ جاران بھێلین. سەعەد سەلیم وەلاتیەکێ دی یە دبێژیت:ل دەڤەرێن چیایی و گوندێن بەردایی یێن ل سەر سنۆری گیانەوەرێن کویڤی گەلەک قەست دکەنێ و ڤێ چەندێ وەکریە کو خەلک قەستا چیا و وان گوندێن بەردایی بکەن بۆ مەرەما نێچیرێ، لەورا پێدڤیە جھێن شۆلەژێ رێ ل بەر دیاردا کوشتنا کەو و گیانەوەرێن کویڤی بگرن و ھەر کەسێ ڤی کاری دکەت بھێتە سزادان و زیندانکرن،چونکو نوکە گەلەک ژ خەلکێ کارێ خوە کریە نێچیر و ب شەڤێ دچنە شەڤیاران و ھەر گیانەوەرێ بکەڤیتە بەر سنگێ وان ئەو نێچیر دکەن، لەورا گەلەک جاران ب شەڤێ مرۆڤ دبینیت کو چیا و دول و نھال پری لاوێتن و ئەو کەس ھەمی نێچیرڤانن. گۆت ژی: دڤێت رادەیەک بھێتە دانان و ئێدی خەم ژڤی بابەت بھێتە خوارن و نەھێلن گیانەوەرێن کویڤی ب تایبەتی کەو بھێنە کوشتن، ژ بەر کو سرۆشتێ وەلاتێ مە ب گیانەرەرێن کویڤی یێ جوانە و ھەکە ئەو ژی نەمان و ھاتنە قرکرن، مرۆڤی گوە ل دەنگێ کەوان نابیت و خەلک دێ بێ بار بن ژ دیتنا وان گیانەوەران،دێ زیانەکا مەزن گەھیتە ڤی سامانێ نەتەوەیی، چونکی گیانەوەرێن کویڤی پشکەکا گرنگن ژ پێکھاتەیا وەلاتێ مە.