ئه‌ڤرۆ:

مه‌كته‌با سیاسی یا پارتی دیموكراتی كوردستان د كۆمبوونه‌كێ دا چه‌ندین پۆستێن بلند ئێكلاكرن و ب ڤی شێوه‌یی ل سه‌ر ئه‌ندامێن مه‌كته‌با سیاسی و كۆمیته‌یا ناڤین هاتنه‌ به‌لاڤكرن:

په‌یڤدارێ پارتی / مه‌حموود محه‌مه‌د

پشكێن مه‌كته‌با سیاسی:

ڕێبوار یه‌لدا/ به‌رپرسێ پشكا هه‌لبژارتنان

هێمن هه‌ورامی/ به‌رپرسێ پشكا ڕێكخستنێ

جه‌عفه‌ر ئیبراهیم/ پشكا په‌یوه‌ندیان

چنار سه‌عه‌د/ پشكا دیراسات و ڤه‌كۆلینان

سالار عوسمان/ پشكا ڕه‌وشه‌نبیری و ڕاگه‌هاندن

زاگرۆس فه‌تاح/ پشكا كارگێری و دارایی

هیوا ئه‌حمه‌د مسته‌فا/ به‌رپرسێ پشكا ڕێكخراوێن جه‌ماوری و پیشه‌یی

ئاراس حه‌سۆ/ به‌رپرسێ پشكا وه‌به‌رئێنانێ

ئامینا زكری/ به‌رپرسا ده‌سته‌یا چاڤدێریێ و دووڤچوونێ

سه‌ربه‌ست له‌زگین/ به‌رپرسێ مه‌كته‌با ڕێكخستنا پارێزگه‌ها هه‌ولێرێ

پشتیوان سادق/ به‌رپرسێ مه‌كته‌با ڕێكخستنا پارێزگه‌ها دهۆكێ

عه‌لی حسێن/ به‌رپرسێ مه‌كته‌با ڕێكخستنا پارێزگه‌ها سلێمانیێ

نه‌وزاد هادی/ به‌رپرسێ مه‌كته‌با ڕێكخستنا پارێزگه‌ها نه‌ینه‌وا

كه‌مال كه‌ركووكێ/ به‌رپرسێ مه‌كته‌با ڕێكخستنا پارێزگه‌ها كه‌ركووكێ

فوئاد حسێن/ به‌پرسێ مه‌كته‌با ڕێكخستنا پارێزگه‌ها به‌غدا

هه‌ولێر، قائید میرۆ:

ل حه‌فتیا بۆری نێچیرڤان بارزانی، سه‌رۆكێ هه‌رێما كوردستانێ سه‌ره‌دانه‌كا فه‌رمی بۆ به‌غدا ئه‌نجامدابوو و لگه‌ل چه‌ندین به‌پرسێن بلند یێن ئیراقی كۆمببوو، شیره‌تكاره‌كێ  سه‌رۆكێ حوكمه‌تا هه‌رێما كوردستانێ ژی ئاشكرا دكه‌ت كو سه‌ره‌دانا نێچیرڤان بارزانی بۆ به‌غدا دێ كاریگه‌ری ل سه‌ر په‌یوه‌ندیێن هه‌رێمێ و ئیراقێ هه‌بیت و ڕادگه‌هینیت، بزاڤێن سه‌رۆك بارزانی بوونه‌ ئه‌گه‌رێن پێكئینانا حوكمه‌تا نوو یا ئیراقێ و پێدڤیه‌ به‌غدا پێگیریێ ب سۆزێن خوه‌ ل به‌رامبه‌ر هه‌رێما كوردستانێ بكه‌ت.

دژوار فائیق، شیره‌تكارێ سه‌رۆكێ حوكمه‌تا هه‌رێما كوردستانێ و سه‌رۆكێ بۆردا ماده‌یێ 140 بۆ ڕۆژنامه‌یا (ئه‌ڤرۆ) گوت” پێكئینانا حوكمه‌تا ئیراقێ گه‌له‌ك ده‌م ڤه‌كێشا، به‌لێ ب هاریكاریا سه‌رۆك بارزانی حوكمه‌تا نوو ل ئیراقێ هاته‌ پێكئینان، چونكه‌ پشته‌ڤانیا سه‌رۆك بارزانی بۆ هێڤێنێ ڕێككه‌فتنا ئالیێن ئیراقی ل دۆر پێكئینانا حوكمه‌تا نوو، ئه‌ڤه‌ژی ده‌ستكه‌فته‌كێ گه‌له‌ك مه‌زن بوو بۆ گه‌لێ كوردستانێ و سه‌رۆك بارزانی ب تایبه‌ت، ژ به‌ر كو سه‌رۆك بارزانی هه‌رده‌م بزاڤ كرینه‌ بۆ نێزیككرنا ئالیێن سیاسی یێن ئیراقی، دیاره‌ حوكمه‌تا نوو یا ئیراقێ مفا ژ هه‌ڤڕكیێن به‌رێ وه‌رگرتیه‌، به‌ری نوكه‌ ئاریشه‌یێن زۆر د ناڤبه‌را به‌غدا و هه‌رێما كوردستانێ دا هه‌بوون، به‌لێ حوكمه‌تا ڤێجارێ مفا ژ ڤان ناكۆكیێن د ناڤبه‌را  هه‌ردو ئالیان وه‌رگرتیه‌، ده‌ستهه‌لاتدارێن نوكه‌ یێن ئیراقێ یێن گه‌هشتینه‌ وێ ڕاستیێ بێی پارتی و سه‌رۆك بارزانی حوكمه‌ت ل ئیراقێ یا سه‌ركه‌فتی نابیت، ئاریشه‌یێن هه‌رێما كوردستانێ ل گه‌ل به‌غدا هه‌ین هه‌موو ئاریشه‌یێن دستوورینه‌، حوكمه‌تا ئیراقێ بڕیار دایه‌ به‌رپه‌ره‌كێ نوو ڤه‌كه‌ت و ب گۆره‌ی دستووری دێ ئاریشه‌یێن دگه‌ل حوكمه‌تا هه‌رێما كوردستانێ هێنه‌ چاره‌سه‌ركرن، سه‌رۆك وه‌زیرێن ئیراقێ ژی ڕاگه‌هاندیه‌، لژنه‌یێن تایبه‌ت ب ماده‌یێ ١٤٠ یێ دستوروی ڤه‌ دێ هێنه‌ كاراكرن، پاره‌ بۆ قه‌ره‌بووكرنا خه‌لكی دێ هێته‌ مه‌زاختن، هه‌روه‌سا د ده‌مێ شه‌ش هه‌یڤاندا قانوونا په‌ترۆلی و غازێ كو مه‌زنترین ئاریشه‌یه‌ د ناڤبه‌را به‌غدا و هه‌رێما كوردستانێ دا دێ هێته‌چاره‌سه‌ركرن، كو ئه‌م باوه‌رین ده‌ركرنا قانوونا په‌ترۆل و غازێ دێ گه‌له‌ك ئاریشه‌یان چاره‌سه‌ركه‌ت، ئه‌ز نابێژم سه‌دێ سه‌د ئاریشه‌یێن مه‌ دگه‌ل به‌غدا دێ هێنه‌ چاره‌سه‌ركرن، به‌لێ تێكگه‌هشتن دناڤبه‌را به‌غدا و هه‌ولێرێ دا یا هه‌ی د ناڤا به‌رنامێ حوكمه‌تا ئیراقێ ژی هاتیه‌”.

دژوار فائیقی پتر گوت” سه‌ره‌دانا نێچیرڤان بارزانی، سه‌رۆكێ هه‌رێما كوردستانێ بۆ به‌غدا ژی دێ كاریگه‌ری هه‌بن ل سه‌ر په‌یوه‌ندیێن هه‌رێما كوردستانێ و به‌غدا، نێچیرڤان بارزانی ب وێ چه‌ندێ هاتیه‌ نیاسین دیبلۆماتكاره‌كێ سه‌ركه‌فتیه‌، ڕۆله‌كێ مه‌زن ژی بۆ نێزیككرنا ئالیێن سیاسی یێ هه‌ی، بێگومان سه‌ره‌دانا سه‌رۆكێ هه‌رێمێ تمامكه‌رێ ڤێ سیاسه‌تا سه‌رۆك بارزانی و ڤێ تێكگه‌هشتنێ یه‌ یا كو ب سه‌رۆكایه‌تیا سه‌رۆك بارزانی هاتیه‌كرن، ئه‌م پێشبینیێن باش دكه‌ین بۆ سه‌ره‌دانا نێچیرڤان بارزانی بۆ به‌غدا، هێدی هێدی ئاریشه‌ دێ ب گۆره‌ی دستووری هێنه‌ چاره‌سه‌ركرن و سه‌ره‌دانا سه‌رۆكێ هه‌رێما كوردستانێ بۆ به‌غدا دێ هێزه‌كا دی ده‌ته‌ سه‌ره‌دانا شاندێ هه‌رێما كوردستانێ بۆ به‌غدا، هه‌تا دێ نێزیكبوونێن زۆرتر هه‌بن د ناڤبه‌را هه‌ردو ئالیان دا، ل سالێن بۆری ژی ئه‌ڤ ڕاستیه‌ خویا بوویه‌ د ده‌مێ هه‌بوونا ئاریشه‌یان دا هه‌موو جاره‌كێ نێچیرڤان بارزانی سه‌ره‌دانا به‌غدا كریه‌ و وی ڕۆله‌كێ مه‌زن یێ هه‌ی بۆ چاره‌سه‌ركرنا ئاریشه‌یان، ئومێده‌ك په‌یدابوویه‌ ئاریشه‌ بهێنه‌ چاره‌سه‌كرن، ب مه‌رجه‌كی ڕێ ل  ده‌ستێوه‌ردانێن ده‌ره‌كی بهێته‌ گرتن، خه‌لكێ ئیراقێ و كوردستانێ د ده‌مێ نوكه‌ دا چاڤه‌ڕێی بجهئینانا وان سۆزایه‌ یێن د ده‌مێ پێكئینانا حوكمه‌تا نوو یا ئیراقێ دا داینه‌ خه‌لكی بۆ چاره‌سه‌ركرنا ئاریشه‌یان، ئه‌م چاڤه‌ڕێ دكه‌ین بزانین به‌غدا دێ پێگیریێ ب سۆزێن خوه‌ كه‌ت یان ژی وه‌كو سالێن بۆری خوه‌ ڤه‌ددزیت دیسان، ته‌پ نوكه‌ یا ل مه‌یدانا ئیراقێ ، ئه‌ز یێ گه‌شبینم ب وێ چه‌ندێ دێ ڕێككه‌فتنا د ناڤبه‌را به‌غدا و هه‌رێما كوردستانێ كه‌ڤیته‌ دبیاڤێ بجهئینانێ دا، به‌لێ یا دیار نینه‌ دێ چه‌ند ڤه‌كێشیت”.

ئه‌ڤرۆ:

په‌یڤدارێ پارتی دیموكراتی كوردستان، مه‌حموود محه‌مه‌د، ڕادگه‌هینیت، چاره‌سه‌ریا كێشه‌یان ب ڕێیا له‌شكری نابیت و پێدڤیه‌ كێشه‌ ب دانوستاندنێ بهێنه‌ چاره‌سه‌ركرن.

مه‌حموود محه‌مه‌د، په‌یڤدارێ پارتی دیموكراتی كوردستان گوت” هیچ ده‌مه‌كی تانك و وتۆپ و فرۆكه‌ و مووشه‌كان كێشه‌ چاره‌سه‌ر نه‌كرینه‌، پێدڤیه‌ ب دانوستاندنێ و تێكگه‌هشتنێ ئه‌و كێشه‌یێن هه‌ین بهێنه‌ چاره‌سه‌ركرن”.

دیاركر ژی” مه‌ ڕێز ل ده‌وروبه‌رێن خوه‌ گرتیه‌، بزاڤێ دكه‌ین ئاسایشا وان نه‌كه‌ڤیته‌ د مه‌ترسیێ دا”.

په‌یڤدارێ پارتی ئاشكراكر ژی” ئالیێن كوردی ل پارچێن دی یێن كوردستانێ یێن هاتینه‌ ئاگه‌هداركرن كو نابیت ئاخا هه‌رێما كوردستانێ بۆ هێرشكرنێ ل سه‌ر وه‌لاتێن ده‌وروبه‌ر بهێته‌ بكارئینان و مه‌ داخواز ژ ئالیێن كوردی ژی كریه‌ ڕێزێ ل هه‌رێما كوردستانێ بگرن و نه‌بنه‌ كێشه‌ بۆ هه‌رێما كوردستانێ و هێجه‌تان نه‌ده‌نه‌ ده‌ستێ وه‌لاتێن ده‌وروبه‌ر بۆ هێرشكرنێ ل سه‌ر هه‌رێما كوردستانێ”.

ل ڤێ دووماهیێ جڤاتا ئاسایشا نیشتمانی یا ئیراقی، ب سه‌رۆكایه‌تیا محه‌مه‌د شیاع سودنی سه‌رۆك وه‌زیرێن ئیراقێ كۆمببوو و تێدا بڕیار هاتبوو دا هێزێن زێده‌تر یێن زێره‌ڤانێن سنووری بهێنه‌ هنارتن بۆ خالێن سفر یێن سنووری وئێمناهیا سنووری بهێته‌ كونترۆلكرن و ڕێگری ل هه‌ر گرژیه‌كا ئه‌منی بهێته‌ كرن”.

سه‌باره‌ت ب به‌لاڤكرنا هێزێن زێره‌ڤانێن سنووری ل ده‌ڤه‌رێن سنووری، په‌یڤدارێ پارتی گوت” ئه‌و هێزه‌ هه‌ر هه‌مان ئه‌و هێزن كو ل هه‌رێما كوردستانێ وه‌كو زێره‌ڤانێن سنووری هاتینه‌ پێكئینان، به‌لێ دبیت زێده‌تر بهێنه‌ ڕێكخستن و هه‌ژمارا وان بهێته‌ زێده‌كرن”.

د پشكه‌كا دی یا داخۆیانیا خوه‌ دا، مه‌حموود محه‌مه‌د باسێ ده‌ستنیشانكرنا به‌رپرسێن پشك و ئۆرگانێن پارتی كر و گوت” خاله‌ته‌كا ئاساییه‌ كه‌سه‌كێ خه‌لكێ هه‌ولێرێ ل دهۆكێ ئه‌ركێ حزبی بڕێڤه‌ببه‌ت و گوت” پارتی حزبه‌كا كوردستانیه‌، حزبا هه‌موو ده‌ڤۆك و ده‌ڤه‌رانه‌، هه‌ر به‌رپرسه‌ك ل كیرێ پشێت خزمه‌تێ بكه‌ت دێ هنێریته‌ وێرێ، جوداهیێ د ناڤبه‌را ده‌ڤه‌ران دا ناكه‌ت”.

ل دۆر پشكداریا پارتی ل كۆمبوونا ئالیێن سیاسی كو ژ ئالیێ ئێكه‌تیێ ڤه‌ داخوازا ئه‌نجامدانا وێ هاتیه‌ كرن، گوت” ئه‌م یێن د قۆناغا پشتی كۆنگره‌ی دا و مژوولی تمامكرنا كارێن كۆنگره‌یێ 14 یێ پارتی نه‌”.

ڕۆهنكر ژی” كۆنگره‌ی ڕاسپارده‌ یێن هه‌ین و پشتی بجهئینانا وان دێ چینه‌ سه‌ر كارێ ئاسایی یێ خوه‌، هێشتا ڕاسپارده‌  تمام نه‌بووینه‌ و هه‌كه‌ تمام بوون دێ ده‌ست ب كۆمبوونان كه‌ین”.

هه‌روه‌سا باسێ په‌یوه‌ندیێن هه‌ولێرێ و به‌غدا كر وگوت” ئه‌م ل گه‌ل حوكمه‌تا نوو ل سه‌ر كارنامه‌یه‌كێ یێن ڕێككه‌فتین، كارنامه‌یێ هنده‌ك ئه‌رك یێن خستینه‌ سه‌ر مه‌ هه‌ردو ئالیان، سه‌رۆكێ هه‌رێما كوردستانێ، نێچیرڤان بارزانی، ل هه‌فتیا بۆری سه‌ره‌دانا به‌غدا كربوو بۆ دووڤچوونا وان پرسێن كو د ناڤبه‌را به‌غدا و هه‌ولێرێ دا هه‌ین”.

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، پێشوازی ل كریستیان تۆرنینگ بالیۆزێ نووی ێ وه‌لاتێ دانیمارك ل ئیراقێ كر.

سه‌رۆكێ حوكمه‌تا هه‌رێمێ، پیرۆزباهیا ده‌ستبكاربوونێ ل بالیۆزێ دانیمارك كر و هیڤیا سه‌ركه‌فتنێ د ئه‌ركیچن وی دا بۆ خواست و به‌رهه‌ڤیا هه‌رێما كوردستانێ بۆ پێشڤه‌برنا په‌یوه‌ندیان ل گه‌ل دانیمارك دووپاتكر.

بالیۆزێ دانیمارك، سه‌ره‌رای سوپاسیا ئالیێن په‌یوه‌ندیدارێن حوكمه‌تا هه‌رێما كوردستانێ بۆ هاریكاری و هه‌ماهه‌نگیان باش ل گه‌ل بالیۆزخانه‌یا وه‌لاتی وی، ئاماژه‌ ب گرنگیا پێگه‌هێ هه‌رێما كوردستانێ ل ئیراقێ و ده‌ڤه‌رێ كر و خواستا وه‌لاتێ خوه‌ ژی بۆ پێشڤه‌برنا په‌یوه‌ندیان ل گه‌ل هه‌رێما كوردستانێ دووپاتكر.

گرنگیا پاراستنا ئاسایش و سه‌قامگیریا هه‌رێما كوردستانێ و چاكسازیێن كابینه‌یا نه‌هێ یا حوكمه‌تا هه‌رێمێ، ته‌وه‌ره‌كێ دی یێ دانوستاندنێن دیدارێ بوون.

ئه‌ڤرۆ:

حوكمه‌تا هه‌رێما كوردستانێ د به‌یاننامه‌یه‌كێ دا سه‌باره‌ت هێرشێن ئیرانێ بۆ سه‌ر هه‌رێما كوردستانێ ڕادكه‌هینیت، پێشێلكاریێن به‌رده‌وام یێن سه‌روه‌ریا ئیراقێ و هه‌رێما كوردستانێ ژئالیێ ئیرانێ ڤه‌ هیچ بیانوویه‌ك بۆ نینه‌.

حوكمه‌تا هه‌رێما كوردستانێ د به‌یاننامه‌یا خوه‌ دا ب توندترین شێوه‌ هێرشا ڤێ دووماهیێ یا كۆمارا ئیسلامی یا ئیرانێ بۆ سه‌ر هه‌رێما كوردستانێ شه‌رمزار دكه‌ت.

هه‌روه‌سا د به‌یاننامه‌یا حوكمه‌تا هه‌رێما كوردستانێ دا هاتیه‌” پێشێلكاریێن به‌رده‌وام یێن سه‌روه‌ریا ئیراقێ و هه‌رێما كوردستانێ ژ ئالیێ ئیرانێ ڤه‌، پێشێلكرنه‌كا ئاشكرا یا قانوون و ڕێنمایێن نێڤده‌وله‌تی و په‌یوه‌ندیێن جێرانیێ یه‌” .

حوكمه‌تا هه‌رێما كوردستانێ داخواز ژ كۆمارا ئیسلامی یا ئیرانێ دكه‌ت، ڤێ هه‌وا ل دژی هه‌رێما كوردستانێ ڕابگریت، چونكه‌ سه‌قامگیری، چو جاران ب ڕێیا توندوتیژیێ بده‌ستڤه‌ ناهێت”.

ل دووماهیا به‌یاننامه‌یا خوه‌ دا، حوكمه‌تا هه‌رێما كوردستانێ، داخواز ژ دۆست و هه‌ڤپشكێن خوه‌ د حوكمه‌تا فیدرالی و نه‌ته‌وه‌یێن ئێكگرتی و جڤاكێ نێڤده‌وله‌تی ب گشتی دكه‌ت، كو هه‌لویسته‌كێ ڕۆهن به‌رامبه‌ر هێرشێن به‌رده‌وام یێن ئیرانێ هه‌بیت.

دهێته‌ زانین ل سپێده‌ییا ڕۆژا دوشه‌مبیا بۆری، ئیرانێ ب ڕێیا فرۆكه‌یێن درۆن و مووشه‌كان چه‌ند كه‌مپێن ئاكنجیبوونێ و باره‌گه‌هێن حزبێن ڕۆژهه‌لاتا كوردستانێ ل هه‌رێما كوردستانێ كرنه‌ ئارمانج.

ئه‌ڤرۆ:

ڕێكخراوا نه‌ته‌وه‌یێن ئێكگرتی و ئه‌مریكا و بریتانیا هێرشێن ڤێ دووماهیێ یێن كۆمارا ئیسلامی یا ئیرانێ بۆ سه‌ر هه‌رێما كوردستانێ ب توندی شه‌رمزاركرن و داخواز دكه‌ن ب زووترین ده‌م ئه‌ڤ پێشێلكاریێن ئیرانێ بۆ سه‌ر ئاخا هه‌رێما كوردستانێ و ئیراقێ بهێنه‌ ڕاوه‌ستاندن.

ڕێكخراوا نه‌ته‌وه‌یێن ئێكگرتی به‌یاننامه‌یه‌ك ل دۆر هێرشێن سه‌ر هه‌رێما كوردستانێ به‌لاڤكر و تێدا ڕادگه‌هینیت، پێدڤیه‌ هێرشێن به‌رده‌وام و پێشێلكرنا سه‌روه‌ریا ئیراقێ بهێنه‌ ڕاگرتن.

تیما نه‌ته‌وه‌یێن ئێكگرتی ل ئیراقێ د به‌یاننامه‌یه‌كێ دا سه‌باره‌ت هێرشێن وه‌لاتێن ده‌وروبه‌ر بۆ سه‌ر هه‌رێما كوردستانێ و ئیراقێ دبێژیت” پێدڤیه‌ هێرشێن دووباره‌ و پێشێلكرنا سه‌روه‌ریا ئیراقێ بهێنه‌ ڕاگرتن، ئه‌ڤ كاره‌ گرژیان زێده‌تر لێ دكه‌ن و كاره‌ساتان ژی ب دووڤ خوه‌ دا دئینن”.

نه‌ته‌وه‌یێن ئێكگرتی دیاركر ژی” تاكه‌ ڕێ بۆ ئێكلاكرنا كێشه‌یێن ده‌ره‌كی یێن وه‌لاتێن ده‌وروبه‌ر بكارئینانا ئامرازێن دبلۆماسیه‌”.

ژ ئالیێ خوه‌ڤه‌ جه‌نه‌رال (مایكل ئێرێك) فه‌رمانده‌یێ هێزێن ئه‌مریكی ل ڕۆژهه‌لاتا ناڤین هێرشێن له‌شكرێ پاسدارێن ئیرانێ بۆ سه‌ر هه‌رێما كوردستانێ شه‌رمزاركر و د تویته‌كی دا ڕاگه‌هاند” هێرشا مووشه‌كی و درۆنی یا ئیرانێ بۆ سه‌ر ئاخا هه‌رێما كوردستانێ شه‌رمزار دكه‌ین”.

وی فه‌رماندێ ئه‌مریكی  هێرشێن ئیرانی ب نه‌قانوونی هه‌ژمارتن و ئاماژه‌كر كو وان هێرشان ژیانا وه‌لاتیێن خستیه‌ د مه‌ترسیێ دا و سه‌روه‌ریا ئیراقێ پێشێلكریه‌. هه‌روه‌سا دیاركر ژی كو هێرشێن ژ وی جۆری سه‌قامگیریا ئیراقێ و ڕۆژهه‌لاتا ناڤین دئێخیته‌ د مه‌ترسیێ دا.

كونسۆلێ گشتیێ بریتانیا ژی ل هه‌ولێرێ، دیڤید هینت، سه‌باره‌ت هێرشێن دووباره‌ یێن ئیرانێ بۆ سه‌ر هه‌رێما كوردستانێ د په‌یامه‌كێ دا به‌لاڤكر، ل به‌رامبه‌ر ڤێ ده‌ستدرێژیێ دێ بریتانیا ل گه‌ل هه‌رێما كوردستانێ ڕاوه‌ستیت.

دیاركر ژی” جاره‌كادی ئاكنجیێن هه‌رێما كوردستانێ تووشی هێرشه‌كا مووشه‌كی وفرۆكه‌یێن بێفرۆكه‌ڤان دبن ژئالیێ له‌شكرێ پاسدارێن ئیرانێ ڤه‌”.

گوت ژی” ل هه‌یڤا ئیلۆنا ئه‌ڤ ساله‌ ژ ئه‌گه‌رێ هه‌مان هێرشان ب كێمی 12 كه‌سان ژیانا خوه‌ ژده‌ستدا و هه‌ژماره‌كا مه‌زن ژی بریندار و ئاواره‌ بوون”.

كونسۆلێ گشتیێ بریتانیا ل هه‌ولێرێ دووپاتكر ژی كو بریتانیا ل به‌رامبه‌ر ڤێ ده‌ستدرێژیا بێ بیانوو دێ ل گه‌ل هه‌رێما كوردستانێ د ڕاوه‌ستیت. ل دووماهیێ ژی گوت” په‌یاما مه‌ یا ڕۆهنه‌ ب ڕاوه‌ستن”.

هه‌روه‌سا هه‌ڤپه‌یمانیا نێڤده‌وله‌تی یا دژی داعشێ هێرشێن ئیرانی بۆ سه‌ر ئاخا هه‌رێما كوردستانێ شه‌رمزار دكه‌ت و ئاماژه‌ كر كو ئه‌و هێرش سه‌قامگیریا هه‌رێما كوردستانێ دئێخیته‌ د مه‌ترسیێ دا.

ماتیو مه‌كفارله‌ین، فه‌رماندێ هێزێن هه‌ڤپه‌یمانیا نێڤده‌وله‌تی دژی داعشێ د به‌یاننامه‌یه‌كێ دا گوت” به‌رده‌وامین ل سه‌ر شه‌رمزاركرنا ڤان هێرشان كو بنپێكرنا سه‌روه‌ریا ئاخا ئیراقێ یه‌ هه‌روه‌سا ڤان هێرشان ژیانا خه‌لكێ سڤیل دئێخیته‌ د مه‌ترسیێ دا و ئه‌ڤ جۆره‌ هێرشه‌ ئاسایش و سه‌قامگیریا هه‌رێما كوردستانێ دئێخنه‌ د مه‌ترسیێ دا.

ئه‌ڤرۆ، عه‌زیز هه‌ورامی:

بڕیاره‌ ل ڕۆژێن داهاتی و پشتی كۆنگره‌یێ 14 یێ پارتی دیموكراتی كوردستان ب سه‌ركه‌فتیانه‌ ب دووماهی هاتی، شانده‌كێ بلند یێ پارتی دیموكراتی كوردستان سه‌ره‌دانا ئالیێن سیاسی ل هه‌رێما كوردستانێ بكه‌ت، كو ل ده‌ستپێكێ دێ ل گه‌ل ئێكه‌تی نیشتمانی كوردستان كۆمبیت، ژ ئالیێ خوه‌ڤه‌ به‌رپرسه‌كێ بلند یێ ئێكه‌تی نیشتمانی كوردستان ژی دبێژیت، ژ بلی ڕێككه‌فتنێ ل گه‌ل پارتی مه‌ هیچ ڕێیه‌كا دی نینه‌ و ده‌رگه‌هێ ئێكه‌تیێ بۆ دانوستاندنێ ل گه‌ل پارتی دیموكراتی كوردستان یێ ڤه‌كریه‌.

سه‌عدی ئه‌حمه‌د پیره‌، ئه‌ندامێ مه‌كته‌با سیاسی یا ئێكه‌تی نیشتمانی كوردستان بۆ ڕۆژنامه‌یا (ئه‌ڤرۆ) گوت” بۆ جارا ئێكێ نینه‌ ئه‌و جۆرێن ناكۆكیێ د ناڤبه‌را پارتی دیموكراتی كوردستان و ئێكه‌تی نیشتمانی كوردستان دا دروست دبن، دو حزب ل سیسته‌مه‌كێ فره‌ حزبی دیموكراسی دڤێت ئه‌و تشته‌ هه‌بیت، به‌لێ نابیت كاریگه‌ریێ بكه‌ته‌ سه‌ر حوكمه‌تێ ل ده‌مێ بڕیار دهێنه‌ دان، به‌لكو پێدڤیه‌ د ئێكده‌نگ بن بۆ چاره‌سه‌ركرنا كێشه‌یان”.

سه‌عدی پیره‌ دبێژیت ژی” ئه‌و بزاڤێن دهێنه‌ ئه‌نجامدان بۆ ب دووماهیئینانا ناكۆكیان ب چوونا شاندێ پارتی دیموكرایت كوردستان بۆ لایێ ئێكه‌تیێ، وه‌كو بافل تاله‌بانی گوتی، ده‌رگه‌هێ ئێكه‌تیێ یێ ڤه‌كریه‌، ب پشتراستی ڤه‌ ب نه‌فه‌سه‌كا نوو و به‌رنامه‌یه‌كێ نوو و ب شێوه‌یه‌كێ باش ب دانوستاندنان دووماهیێ ب كێشه‌یان بینن”.

خویاكر ژی” یێ گه‌شبینم كو هه‌ردو ئالیان شیانێن وێ چه‌ندێ یێن هه‌ین كێشه‌یان چاره‌سه‌ربكه‌ن، هه‌روه‌سا پارتی و ئێكه‌تیێ هیچ ڕێیه‌كا دی لبه‌رده‌م نینه‌ ژ بلی ڕێككه‌فتنێ، ژ بلی وی چه‌ندێ ژی هه‌ردو ئاللیان دو سه‌ركردایه‌تیێن هه‌لبژارتی یێن هه‌ین كو هه‌ست ب به‌رپرسیاره‌تیا نیشتمانی و نه‌ته‌وی دكه‌ن، د ڕه‌وشه‌كا هه‌ستیار یا وه‌كو ئه‌ڤرۆ، ب پشتراستی ڤه‌ لبه‌رچاڤ وه‌رگرتنا به‌رژه‌وه‌ندیێن بلند یێن گه‌لێ كورد دێ گه‌هنه‌ ئه‌نجامه‌كێ باش”.

بڕیاره‌ ل چه‌ند ڕۆێن داهاتی مه‌كته‌با سیاسی یا پارتی دیموكراتی كوردستان شانده‌كێ بلند پێكبینیت و سه‌ره‌دانا هه‌موو ئالیێن سیاسی یێن كوردستانی بكه‌ت ژ وان ژی ئێكه‌تی نیشتمانی كوردستان، پارتی د به‌یاننامه‌یا ئێكه‌مین كۆمبوونا  كۆمیته‌یا ناڤین دا پشتی ب دووماهی هاتنا كۆنگره‌یێ 14 ڕاگه‌هاندبوو دێ به‌رپه‌ره‌كێ نوو ل گه‌ل ئالیێن سیاسی یێن كوردستانی ڤه‌كه‌ت.