دهۆك، نه‌وزاد هلۆری:

ئه‌ندامه‌كا كۆنگره‌یێ‌ 14 یێ پارتی دیموكراتی كوردستان ڕاگه‌هاند، د كۆنگره‌یێ‌ 14ێ‌ پارتی دا ڕێژه‌یا پشكداریا ئافره‌تان د پرۆسه‌یا ده‌نگدانێ‌ یا تایبه‌ت ب هه‌لبژارتنا  كومێتا ناڤه‌ندی یا نوو ژی دا ب رێژه‌یه‌كا به‌رچاڤ هه‌مبه‌ر كۆنگره‌یێن به‌رێ‌ زێده‌بویه‌، ئه‌ڤ چه‌ندێ ژی دێ‌ ڕه‌نگڤه‌دانه‌كا هه‌ری باش د پێشڤه‌برنا ئافره‌تان دا د پرۆسه‌یا سیاسی دا كه‌ت.

جوان رۆژبه‌یانی، ئه‌نداما كۆنگره‌یێ‌ 14ێ‌ یێ پارتی دیموكراتی ل كوردستان گوت” پێگه‌هێ‌ پارتی و بهێزبوونا وێ‌ دڤی ده‌می دا پێدڤیه‌كا هه‌ری گرنگه‌ بۆ پاراستنا قه‌وارێ‌ هه‌رێما كوردستانێ‌ و ده‌ستكه‌فتنێن وێ‌”.

ئاماژه‌كر ژی”ژبه‌ر چه‌ندین ئاریشه‌یێن هه‌رێمی و نێڤده‌وله‌تی و شه‌ڕ و ئالۆزی و قه‌یرانێن كو ب سه‌ر جیهانێ و ئیراقێ و هه‌رێما كوردستانێ‌ دا هاتین، پارتی نه‌شیا دده‌مێ خوه‌ دا كۆنگره‌ی بگێریت، به‌لێ‌ سوپاس بۆ خودێ‌ جاره‌كا دی پارتی كۆنگره‌یێ‌ خوه‌ ئه‌نجام دا ڤه‌ و سوپاسیا هه‌موو ئه‌ندامێن كۆنگره‌ی دكه‌ین وهیڤی دكه‌ین كۆنگره‌ ژ هه‌موو ئالیه‌كی ڤه‌ یێ سه‌ركه‌فتی بیت”.

زێده‌تر گۆت” د ڤی كۆنگره‌ی دا  چه‌ندین گوهۆڕین ل په‌یكه‌ر و سیاسه‌تا پارتی دیموكراتی كوردستان دا هاتینه‌كرن كو د به‌رژوه‌ندییا پارتی و گه‌لێ‌ كوردستانێ‌ دایه‌، ئێك ژ وان گوهۆڕینان بلندگرنا ڕێژه‌یا پشكداریا ئافره‌تایه‌ بۆ ڕێژه‌یا 15% كو ئه‌ڤ چه‌نده‌ ژی گاڤه‌گا باشه‌ و دێ‌ خزمه‌ته‌كا باشتر بۆ ڕه‌وشا ئافره‌تان كه‌ت ب تایبه‌ت پشكداریا ئافره‌تێ د كارێ‌ سیاسی دا ل هه‌رێما كوردستانێ‌، هه‌روه‌سا د كۆنگره‌ی دا ئه‌ندام و سه‌ركرده‌یێن باش و نایاب دێ هێنه‌ دیاركرن كو ب شێوه‌یه‌كێ‌ باشتر و ڕێكخستی كار بكه‌ن”.

جوانێ دیاركر ژی كو ده‌نگدان ل سه‌ر هه‌لبژارتنا ئه‌ندامێن كومێته‌یا ناڤه‌ندی یا پارتی بشێوه‌یه‌كێ سه‌ركه‌فتی هاته‌ ئه‌نجامدان  وپارتی دیتنه‌كا به‌رفرهه‌ بۆ هه‌موو سكته‌رێن سیاسی یا هه‌ی و ڤه‌خواندنه‌كا باشتر بۆ ڕه‌وشا سیاسی لسه‌ر ئاستێ‌ كوردستانێ و جیهانێ‌ یا هه‌ی، له‌وما بهێزبونا پێگه‌هێ‌ پارتی ئانكو پاراستنا قه‌وارێ‌ هه‌رێما كوردستانێ‌ و ده‌ستكه‌فتنێن وێ‌”.

دیدار، نیوار محمه‌دسه‌لیم:

ئه‌ندامێ‌ كۆنگره‌یێ‌ 14ێ‌ یێ‌ پارتی دیموكراتی كوردستان، یوسف سه‌بری، د دیداره‌كێ‌ دا بۆ رۆژنامه‌یا (ئه‌ڤرۆ) باس ل گێران و گرنگیا كۆنگره‌یێ‌ 14 یێ پارتی ل پارێزگه‌ها دهۆكێ‌ دكه‌ت و دیاركر كو ژئالیێ مه‌عنه‌وی و ئابووری ڤه‌ گرنگیا خوه‌ بۆ پارێزگه‌ها دهۆكێ‌ یا هه‌ی و ئاماژه‌كر كو گوهۆڕینێن به‌رچاڤ ژی دێ‌ هێنه‌ كرن و دێ ئۆرگانه‌كا تایبه‌ت هێته‌ دامه‌زراندن بۆ سه‌رپه‌رشتیكرنا ڕێكخستنا حزبی ل پارێزگه‌هان. گه‌شبینیا خوه‌ ژی ب گێرانا كۆنگره‌یێ 14 ل دهۆكێ‌ و پشكداریا رێژا گه‌نج و ژنان به‌رچاڤكر و دبێژیت یا ژ هه‌موویان گرنگتر سه‌رپه‌رشتیكرنا ئێكسه‌ر یا سه‌رۆك بارزانی یه‌.

ئه‌ڤرۆ: ب دیتنا ته‌ گێرانا كۆنگره‌یێ‌ پارتی ل پارێزگه‌ها دهۆكێ‌ چ گرنگیا خوه‌ هه‌یه‌؟

یوسف سه‌بری: گێرانا كۆنگره‌ی ل دهۆكێ گرنگیه‌كا مه‌عنه‌وی و مادی ژی یا هه‌ی، حزبه‌كا وه‌كو پارتی كو ئه‌ڤه‌ ٧٦ سالن ‏چاره‌نڤیسێ كوردستانێ ب سیاسه‌ت و خه‌بات و ستراتژییه‌تا خوه‌ ڤه‌ گرێدای و د ڤێ خه‌باتێ دا دهۆك ناڤه‌ندا پارتی و ده‌ڤه‌را هه‌ره‌ ‏گرنگا كوردستانێ بوویه‌ لێ بۆ جارا ئێكێ یه‌ پارتی ل دهوكێ كۆنگره‌ی دگێریت له‌وما وه‌كو كریاره‌ك سیمبوله‌ك د دیرۆكێ دا ‏دهێته‌ توماركرن و ژ ئالیێ مادی ژی ڤه‌ بێگومان دێ ڕه‌وشا دهوكێ ژ هه‌موو ئالیان ڤه‌ پتر ل به‌رچاڤ هێته‌ وه‌رگرتن و نها ژی ب ‏هزاران كه‌س ژ خه‌لكێ كوردستانێ ل دهوكێ د به‌رهه‌ڤن و خزمه‌تگوزاریێن گه‌له‌ك باش ل دهۆكێ هاتینه‌ ئه‌نجامدان و خه‌لكه‌كێ زۆر ‏ب ڕه‌وشا دهوكێ ئاگه‌هدار بوون و ل پاشه‌ڕوژێ دا ژی دێ گه‌شت گوزارا دهۆكێ ڤه‌ژه‌نه‌كا باش ب خوه‌ ڤه‌ بینیت .

ئه‌ڤرۆ: ب ڕه‌نگه‌كێ‌ گشتی گێرانا ڤان جۆره‌ كۆنگره‌یان چ گرنگیا خوه‌ هه‌یه‌؟

یوسف سه‌بری: كۆنگره‌ ‏بۆ حزبێن سیاسی وه‌ك بلندترین ده‌سه‌لات دهێنه‌ ناساندن و ژ ئالیێ یاسایی ڤه‌ ب (چێكه‌ر و خولقینه‌ر) دهێنه‌ زانین، ‏چونكو حزبێن سیاسی ب كۆنگره‌یان ره‌وایه‌تیا سیاسی وه‌ردگرن و ب درێژاهیا ژیانا خوه‌ یا سیاسی ژی ب كۆنگره‌یان خوه‌ نوو ‏دكه‌ن و خوه‌ دگه‌ل ده‌م و جهان دگونجینن. له‌وما كۆنگره‌ هه‌م بلندترین ده‌سته‌لاتا حزبێن سیاسی یه‌ و هه‌م ژی ڕوودانه‌كا گه‌له‌ك گرنگه‌ د ‏ژیانا پارتایه‌تیێ دا.

ئه‌ڤرۆ: تو دبێژی ل سه‌ر ئاستێ‌ په‌یڕه‌و و پرۆگرامی گوهۆڕینێن مه‌زن بهێنه‌ كرن؟

یوسف سه‌بری: بێگومان دێ گوهۆڕینێن ئه‌رێنی و بنگه‌هین هێنه‌ كرن، پروگرام ده‌ڕبرینێ ژ دیتن و جیهان بینیا هه‌ر ‏حزبه‌كا سیاسی دكه‌ت و فه‌لسه‌فه‌یا سیاسی یا حزبێ د پروگرامێ حزبێ دا خوه‌یا دبیت، پارتی د پروگرامێ خوه‌دا دێ دیتن و پلانا ‏خوه‌ یا سیاسی بۆ چه‌ند سالێن داهاتی دارێژیت و ل گۆر وێ جیهان بینیێ سیاسه‌تێ كه‌ت، په‌یڕه‌وێ ناڤخوه‌ ژی ده‌ربڕینێ ژ ئۆرگانێن ‏حزبی و شیوازێ ڕێكخستنا حزبی و په‌یوه‌ندیا ئه‌ندام و كادران دیار دكه‌ت و په‌یكه‌رێ حزبێ د په‌یڕه‌وی دا  دیار دبیت. دێ ‏هنده‌ك گوهۆڕین د شێوازێ ڕێكخستنا حزبی و په‌یكه‌رێ پارتی ژی هێنه‌ كرن كو دێ ڕه‌نگڤه‌دانه‌كا زۆر ل سه‌ر شێوازێ ‏په‌یكه‌ر و ڕێكخستنا  پارتی هه‌بیت.

ئه‌ڤرۆ: تو پێشبینی دكه‌ی كو په‌یكه‌رێ پارتی گوهۆڕین ب سه‌ر دا بهێن و تایبه‌ت لسه‌ر ئاستێن بلند و هه‌كه‌ به‌لێ‌، چاوان؟

یوسف سه‌بری: به‌لێ دێ گوهۆڕین ب سه‌ر په‌یكه‌رێ حزبی دا هێن، وه‌كو د بابه‌تێ پله‌یا جێگرێ سه‌روكێ ‏پارتی دا و هه‌روه‌سان دێ هنده‌ك ئۆرگانێن ئاست بلند كو گرێدای ب سه‌رۆكێ پارتی ڤه‌بن هێنه‌ دامه‌زراندن و لسه‌ر ئاستێ پارێزگه‌هان ‏ژی دێ ئۆرگانه‌كا تایبه‌ت هێته‌ دامه‌زراندن بۆ سه‌رپه‌رشتیكرنا ڕێكخستنا حزبی ل پارێزگه‌هێ دا.

ئه‌ڤرۆ: دهێته‌ گۆتن كو لسه‌ر ئاستێ‌ كه‌سان ژی گوهۆڕینێن مه‌زن دێ‌ دروست بن، بۆچوونا ته‌ ل دۆر ڤێ‌ چه‌ندێ‌ چیه‌؟

یوسف سه‌بری: دێ گوهۆڕین ‏هه‌بن لێ ب باوه‌رم دێ سێ نفش د ناڤا سه‌ركردایه‌تیا پارتی دا هه‌بن ئێك، هه‌ڤته‌مه‌ن و هه‌ڤخه‌باتێن سه‌رۆك بارزانی كو ‏خودان ئه‌زمونه‌كا زۆرن، دو، هنده‌ك ژ سه‌ركردایه‌تیا نها كو خودان ڕۆل و كاریگه‌ری بووینه‌، سێ‌، كۆمه‌كا باش ژ كادرێن گه‌نج و ب ‏تایبه‌ت ژن دێ خوه‌ ل سه‌ركردایه‌تیێ و جهێن بلندێن ده‌سته‌لاتێ دا بینن.

ئه‌ڤرۆ: خه‌لك ب هیڤیا وێ‌ چه‌ندێ‌ یه‌ پشتی كۆنگره‌ی گوهۆڕینێن مه‌زن یێن ئیداری و حزبی دروست ببن، ئه‌رێ‌ ئه‌ڤ چه‌نده‌ دێ‌ هێته‌ دیتن؟

یوسف سه‌بری: بێگومان پارتی حزبا ده‌سته‌لاتێ یه‌ و هه‌ر ‏گوهۆڕینه‌كا دناڤا پارتی دا دێ ڕه‌نگڤه‌دان هه‌بیت لسه‌ر ژیان و ئابوور و سیسته‌مێ حوكمڕانیا هه‌رێما كوردستانێ ژی، پشتی ‏كۆنگره‌ی دێ ئه‌ڤ گوهۆڕینه‌ د ڕوویێ وێ یێ ئه‌رێنی دا ڕه‌نگڤه‌دانه‌كا باش هه‌بیت و ژ هه‌موو ئالییه‌كێ ڤه‌ دێ ڕه‌وش به‌ر ب باشتربوونێ ڤه‌چیت. گوهۆڕینێن حزبی ژی به‌رئه‌نجامه‌كێ سروشتیێ هه‌ر كۆنگره‌یه‌كێ یه‌ و دێ هه‌بن.

ئه‌ڤرۆ: ب چ تشتێ‌ ڤی كۆنگره‌یی تو گه‌له‌ك یێ‌ گه‌شبینی؟

یوسف سه‌بری: ب گرێدانا وی ل دهۆكێ‏، ب نوونه‌راتیا ڕێژه‌یه‌كا مه‌زن یا گه‌نجێن خودان باوه‌رنامه‌ و خودان شیان د ناڤا كۆنگره‌ی دا، ب ڕێژه‌یا ٢٥٪‏ ژ ئافره‌تان د ناڤا ‏كۆنگره‌ی دا، ژ هه‌موویان ژی مه‌زنتر، ب سه‌رپه‌ره‌شتیا رژد و كاریگه‌را سه‌رۆك بارزانی ب خوه‌ لسه‌ر كۆنگره‌ی گه‌شبینم كو ‏دێ ئه‌نجامێن گه‌له‌ك باش هه‌بن.

ئه‌ڤرۆ:

سه‌رۆكێ هه‌رێما كوردستانێ ڕاگه‌هاند، نابیت زۆنێن كه‌سك و زه‌ر هه‌بن، پێدڤیه‌ زۆنا كوردستان هه‌بیت. ل دۆر سه‌رۆك وه‌زیرێن نووی ێ ئیراقێ، دیاركر، هه‌ژی وێ چه‌ندێ یه‌ كو پشته‌ڤانی لێ بهێته‌ كرن و داخواز دكه‌ت ده‌لیڤه‌ پێ بهێته‌ دان بۆ وێ چه‌ندێ هنده‌ك ژ وان كێشه‌یێن ل ئیراقێ هه‌ین، چاره‌سه‌ریان بۆ ببینیت.

نێچیرڤان بارزانی، سه‌رۆكێ هه‌رێما كوردستانێ، د كڤانێ پشكداریێ د دیدارا (مێری) دا ل هه‌ولێرێ، گوت” نابیت زۆنێن كه‌سك و زۆر هه‌بن، پێدڤیه‌ زۆنا كوردستان هه‌بیت، ئه‌ز گه‌له‌ك دژی بكارئینانا وان ده‌سته‌واژامه‌”.

سه‌باره‌ت كێشه‌یێن د ناڤبه‌را پارتی و ئێكه‌تیێ دا، نێچیرڤان بارزانی، گوت” وه‌سا یێ ڕه‌شبین نینم بێژم كێشه‌یێن پارتی و ئێكه‌تی ناهێنه‌ چاره‌سه‌ركرن، به‌لێ ئه‌و یا گرنگه‌ كا چاوان ل هه‌ڤدو دنێرن، پێدڤیه‌ هه‌ردو ئالی دانپێدانێ ب شاشیێن خوه‌ بكه‌ن و بگه‌هینه‌ تێكگه‌هه‌شتنه‌كا هه‌ڤپشك”.

سه‌باره‌ت بڕێڤه‌نه‌چوونا هه‌لبژارتنێن په‌رله‌مانێ كوردستانێ د ده‌مێ خوه‌ دا، سه‌رۆكێ هه‌رێما كوردستانێ گوت” گه‌له‌ك بزاڤ هاتنه‌ كرن هه‌لبژارتن د ده‌مێ خوه‌ دا بهێنه‌ ئه‌نجامدان، به‌لێ مخابن ئالیێن سیاسی لسه‌ر تشتێن گه‌له‌ك بێ ڕامان نه‌گه‌هشتنه‌ ئه‌نجامه‌كی، سه‌رۆكایه‌تیا په‌رله‌مانی ژی نه‌دخواست ده‌مێ په‌رله‌مانی بهێته‌ درێژكرن”.

ل دۆر ڕه‌وشا ئه‌منی ل ئیراقێ، نێچیرڤان بارزانی گوت” هه‌كه‌ ڕه‌وشا ئه‌منی یا ئیراقێ تێكبچیت، ل هه‌رێما كوردستانێ ژی دێ تێكچیت، هیڤیدارم ئیراق و هه‌رێما كوردستانێ وانه‌یان ژ قۆناغێن بۆری وه‌ربگرن”.

سه‌رۆكێ هه‌رێما كوردستانێ ئاماژه‌كر” مام جه‌لالی و سه‌رۆك بارزانی ئه‌وا دشیانێن وان دابوو بۆ ڤێ ئیراقێ كر” گوت ژی” سه‌قامگیریا ئیراقێ گرێدای ب هه‌رێما كوردستانێ ڤه‌یه‌، هه‌كه‌ هه‌رێما كوردستانێ ژ ڕوویێ سیاسی ڤه‌ یا سه‌قامگیر بیت، ئه‌ڤه‌ ده‌ستكه‌فت و سه‌ركه‌فتنه‌ بۆ به‌غدا، مه‌رجێ ئێكێ یێ سه‌قامگیریا ئیراقێ ژی چاره‌سه‌ركرنا كێشه‌یێن ل گه‌ل هه‌رێما كوردستانێ یه‌”.

نێچیرڤان بارزانی به‌رچاڤكر” بۆ به‌غدا باشتره‌ كێشه‌یێن خوه‌ ل گه‌ل هه‌رێما كوردستانێ چاره‌سه‌ر بكه‌ت و هه‌ولێر ژی داخوازا چاره‌سه‌ركرنا كێشه‌یان ب گۆره‌ی دستووری دكه‌ت”.

گوت ژی” هه‌تا نوكه‌ ئه‌و سیسته‌مێ ئیراقێ بڕێڤه‌دبه‌ت چیه‌؟ ئایا ناڤه‌ندیه‌، فیدرالیه‌، ئه‌وا د دستووری دا پێناسه‌ بۆ هاتیه‌ كرن، فیدرالیه‌، پرسیار بۆ به‌غدا ئه‌وه‌، ئایا ب ڕاستی سیسته‌م فیدرالیه‌؟ به‌رسڤ یا ساده‌یه‌ كو نه‌خێره‌. گه‌له‌ك مخابن هه‌تا نوكه‌ عه‌قلیه‌ته‌كا ناڤه‌ندی یا بهێز ئیراق بڕێڤه‌دبر”.

ڕۆهنكر” به‌ری سالا 2003 مه‌ حوكمه‌ت و پێشمه‌رگ و پۆلیس هه‌بوون، ئه‌مریكا گوته‌ مه‌ ئیراقه‌كا نوو یا په‌یدا بووی، بدیتنا من پێدڤیه‌ ژ نوو ده‌ستپێبكه‌ین، دره‌نگ ژی نینه‌”.

ئه‌وژی گوت” سه‌رۆك وه‌زیرێن نوكه‌ یێ ئیراقێ هه‌ژی وێ چه‌ندێ پشته‌ڤانی لێ بهێته‌ كرن و هاریكاریا وی بهێته‌ كرن، بۆ وێ چه‌ندێ چاره‌سه‌ریان بۆ گرفتێن ئیراقێ ببینیت، هه‌كه‌ ئه‌م هه‌موو هاریكاریا هه‌ڤدو بكه‌ین و پشتبه‌ستنێ ب دستووری بكه‌ین، دێ كێشه‌ چاره‌سه‌ر بن”.

خویاكر” حوكمه‌تا محه‌مه‌د شیاع سودانی پشته‌ڤانیه‌كا باش ژ ئالیێ شیعه‌ و كوردان و سوننه‌یان ڤه‌ یا هه‌ی، كو یا جودایه‌ ژ حوكمه‌تێن پێشتر، چاڤه‌ڕانیا مه‌ ژی بۆ چاره‌سه‌ركرنا كێشه‌یان ژ ڤی سه‌رۆك وه‌زیرێن ئیراقێ، جوداتره‌، ئیراق یا د قۆناغه‌كا ڤه‌گوهاستنێ دا، ئه‌ڤ حوكمه‌تا ئیراقێ ب ئێك ژ دووماهی ده‌لیڤێن خوه‌ دزانین بۆ چاره‌سه‌ركرنا كێشه‌یێن د ناڤبه‌را به‌غدا و هه‌رێما كوردستانێ دا”.

خویاكر ژی” ژ سالا 2004 ێ  وێڤه‌ هه‌ر حوكمه‌ته‌كا ل ئیراقێ هاتبیته‌ پێكئینان، هیچ ده‌قه‌كێ نڤیسای دناڤبه‌را به‌غدا و هه‌رێمێ نه‌بوو ، به‌لێ نوكه‌ بۆ جارا ئێكێ یه‌ ڕێككه‌فتنه‌كا ئیمزاكری یا هه‌ی”.

سه‌باره‌ت نه‌بوونا دستووری ل هه‌رێما كوردستانێ، نێچیرڤان بارزانی گوت” دبیت ل پاشه‌ڕۆژێ دادگه‌ها فیدرالی بڕیاره‌كێ دژی هه‌رێما كوردستانێ ده‌ربكه‌ت و بێژیت، بۆچی هه‌وه‌ دستوور نینه‌؟ هیڤیدارم د وی ده‌مێ په‌رله‌مانی ژیێ خوه‌ درێژكری، بشێت ببینه‌ خودان دستوور”.

ئێكگرتنا هێزێن پێشمه‌رگێ كوردستانێ ته‌وه‌ره‌كێ دی یێ ئاخڤتنێن سه‌رۆكێ هه‌رێما كوردستانێ بوو، ل دۆر وێ چه‌ندێ گوت” كارێ باش یێ هاتیه‌ كرن، ئه‌و دووپاتیا هه‌ڤپه‌یمان ل دۆر ئێكگرتنا هێزێن پێشمه‌رگه‌ی دكه‌ن، بۆ دلسۆزیا وانه‌ بۆ هه‌رێما كوردستانێ، پرۆسه‌ ب سیستی یا بڕێڤه‌دچیت”.

نێچیرڤان بارزانی داخوازا لێبۆرینێ ژ ئێزدیان و خه‌لكێ شنگالێ كر و گوت” ئه‌وا مه‌ بۆ وان كری، ئه‌ركێ مه‌یه‌، ژبه‌ر ئایینێ خوه‌ وه‌سا ب سه‌رێ وان هات، كو ب درێژیا دیرۆكێ چه‌ندین فه‌رمان دژی وان هاتینه‌ ئه‌نجامدان، برینا ئێزدیان گه‌له‌ك یا كویره‌، نابیت پرسا ئێزدیان وه‌كو كارتا فشارا سیاسی بهێته‌ بكارئینان، ئه‌وان ته‌حه‌مولا هه‌موو نه‌خوه‌شیان كریه‌، ئه‌و دخوازن ب ئاشتیانه‌ ل گه‌ل هه‌موو پێكهاته‌یێن دی بژین، له‌وما ڕێككه‌فتنا شنگالێ د ناڤبه‌را هه‌رێما كوردستانێ و به‌غدا هاتیه‌ ئه‌نجامدان، پێدڤیه‌ ئه‌وا د ڕێككه‌فتنا شنگالێ دا ئاماژه‌ بۆ هاتیه‌ كرن بهێته‌ بجهئینان”.

ئه‌ڤرۆ:

مه‌كته‌با سیاسی یا پارتی دیموكراتی كوردستان، د ڕۆهنكرنه‌كێ‌ دا ڕادگه‌هینیت، حزبا كاك جه‌عفه‌ر شێخ مسته‌فا ژ ترسا دۆڕاندنا هه‌لبژارتنان، كێشه‌ بۆ هه‌لبژارتنێن په‌رله‌مانێ كوردستانێ‌ دروست كرینه‌، ژبه‌ر ڤی ئه‌گه‌رێ‌ ژی هه‌لبژارتن هاتنه‌ پاشخستن.

ده‌قێ رۆهنكرنا مه‌كته‌با سیاسی یا پارتی دیموكراتی كوردستان:

جه‌عفه‌ر شێخ مسته‌فا، جێگری سه‌رۆكێ هه‌رێمێ‌، د چافپێكه‌فتنه‌كێ دا ل گه‌ل كه‌نالێن حزبا خوه‌، بۆ خۆشرینكرنێ‌ و خوه‌ده‌رخستنێ ژ وێ‌ پشگوه هاڤێتنا كو ئه‌و تووشبوویێ‌، كۆمه‌كا گۆتن و بۆچوونێن كو دته‌با نینین ل گه‌ل دید و بۆچوونێن وی یێن ڤان چه‌ند سالێَن دووماهیێ ده‌ربڕین. بێ ئومێدی ژ ئه‌نجامێ سیاسه‌تا نه‌ ڕۆهن و دوور ژ پره‌نسیپێن پاراستنا به‌رژه‌وه‌ندیێن بلند یێن نه‌ته‌وی و نیشتمانی یێن حزبا كاك جه‌عفه‌ر شێخ مسته‌فا، پشتگوهخستنا ڕێككه‌فتنان و قه‌بوولنه‌كرنا ئه‌نجامێن هه‌لبژارتنانه‌، خه‌لك بێ ئومێد بوویه‌، چونكه‌ ئێكه‌تی گرنگیێ‌ ناده‌ته‌ پێشه‌رۆژا ڤێ‌ هه‌رێمێ‌، چونكو پێ چێنابیت كێشه‌ و گرفتێن ناڤخوه‌یێن یێن حزبا خوه‌ پێ چاره‌سه‌ر بكه‌ن، د پرسین ئه‌رێ چاوا دێ‌ پێ چێبیت كێشه‌یێن كوردستانێ‌ چاره‌سه‌ر بكه‌ن؟.

ئه‌م د كاك جه‌عفه‌ر و هه‌ڤالێن وی دگه‌هین كو دخوازن سه‌رنجا ئه‌ندام و كادرێن حزبا خوه‌  ل سه‌ر كێشه‌یێن ناڤخوه‌یی لابده‌ن، ب دروستكرنا ئاڵۆزیێ د پڕۆسه‌یا سیاسی یا كوردستانێ‌ دا.

خه‌لك بێ ئومێد بوویه‌، چونكو حزبا كاك جه‌عفه‌ر ژ ترسا دۆڕاندنا هه‌ڵبژارتنان كێشه‌ بۆ هه‌لبژارتنێن په‌رله‌مانێ كوردستان دروست كرینه‌، ب ڤی ئه‌گه‌ری هه‌لبژارتن گیرۆبووینه‌.

هه‌كه‌ باس ل خرابیا ڕه‌وشا هه‌رێمێ‌ و ململانێ دكه‌ی و ته‌ ترسا لێكترازانێ‌ هه‌یه‌، چونكو هێشتا حزبا ته‌ چه‌مكێ هه‌ڤڕكیێ و دوژمناتیێ ژێك جودا نه‌كرینه‌، به‌رژه‌وه‌ندیا حزبا خوه‌ خستیه‌ له‌سه‌ر به‌رژه‌وه‌ندیا گه‌ل و نیشتیمان و ده‌ستكه‌فتێن ڤێ‌ هه‌رێمێ‌، كو ب خه‌باتێ‌ و ب خوینێ‌ بده‌ستڤه‌هاتینه‌، بۆ زانینا كاك شێخ، ئه‌ندامێن مه‌كته‌با سیاسی و سه‌ركردایه‌تیا پارتی گه‌له‌ك ژ وێ‌ ئێكێ‌ مه‌زنتره‌ و ب پێگیریكرن كو بچنه‌ ئالیێ كه‌سه‌كێ دیتر گازندێ بكه‌ن، یان باسێ پارتیا خوه‌ بكه‌ن، به‌لكو پێگیریا هه‌ڤالان ب مه‌رجه‌عیه‌تا حزبێ‌ و پارتایه‌تیێ هند یا ب هێزه‌ كو هێرش و گۆتنێن هه‌وه‌ و گۆتنێن نه‌شرین ل به‌رانبه‌ر حزبا ته‌ و كه‌سایه‌تیێ وێ‌ باس ناكات.

ڕه‌وش و شرۆڤه‌كرنا ڕه‌وشا هه‌وه‌ بۆ هه‌وه‌ د راگه‌هاندنێن نه‌ڤه‌شارتی دا، ئه‌م دزانین ئه‌و هه‌لویستێ‌ ته‌ و حزبا ته‌ ژ به‌ر چیه‌؟. ئه‌رێ خه‌لكێ كوردستانێ‌ ڤێ‌ قه‌بوول دكه‌ن، ل ڕۆژا ڕۆهن و ل به‌رچاڤێن هه‌موویان وه‌لاتیێ ڤێ‌ هه‌رێمێ‌ بهێته‌ تیرۆركرن و حوكمه‌ت و داموده‌زگه‌هێن په‌یوه‌ندیدار و دادگه‌ه پشتگوه بكه‌ن؟ ئه‌رێ جه‌ماوه‌رێ خۆڕاگرێ سلێمانیێ ئه‌وێ‌ خوه‌سه‌پاندنێ‌ و بێسه‌روبه‌ریا ژ حوكمڕانیا ل وێ‌ ده‌ڤه‌رێ‌ هه‌ی،‌ قه‌بوول دكه‌ن؟

ژ ته‌ و هنده‌ك ژ هه‌ڤالێن ته‌ دپرسین بۆچی هنده‌ ته‌نگاڤ بووینه‌ ژ داخوزاكرنا دادگه‌هێ‌ بۆ ڕاده‌ستكرنا چه‌ند كه‌سان كو د داخوازكرینه‌ بۆ ڤه‌كۆلینا بابه‌تێ تیرۆرا وه‌لاتیه‌كێ ڤێ‌ هه‌رێمێ‌ و د هه‌موو ئاسته‌كی دا ده‌ستپێكرن ب هێرش و تێكدانا ڕه‌وشێ؟

ئه‌م ل مه‌كته‌با سیاسی و سه‌ركردایه‌تیا پارتی بێهنا مه‌ فه‌ره‌هبوویه‌ لسه‌ر به‌رسڤنه‌دانا كۆمه‌كا نه‌راستیان و گوتنێن چێكری، به‌لێ‌ بێهنفره‌هیێ‌ ژی سنوورێن خوه‌ یێن هه‌ین.

ئه‌ڤرۆ:

سه‌رۆكێ هه‌رێما كوردستانێ، نێچیرڤان بارزانی، ل هه‌ولێرێ پێشوازی ل ماكسیم روبین، كۆنسولێ نوو یێ وه‌لاتێ رووسیا ل هه‌رێما كوردستانێ كر.

سه‌رۆكێ هه‌رێما كوردستانێ سه‌ره‌رای پیرۆزباهیێن ده‌ستبكاربوونێ ل ماكسیم روبین وه‌كو كۆنسولێ نوو یێ رووسیا ل هه‌رێما كوردستانێ، هه‌موو پشته‌ڤانیه‌ك بۆ سه‌رخستنا ئه‌ركێ وی و خواستا هه‌رێما كوردستانێ بۆ پێشڤه‌برنا په‌یوه‌ندیان ل گه‌ل وه‌لاتێ رووسیا ده‌ڕبری.

ب گۆڕه‌ی به‌یاننامه‌یه‌كا سه‌رۆكایه‌تیا هه‌رێما كوردستانێ، د كۆمبوونێ دا په‌یوه‌ندیێن د ناڤبه‌را هه‌رێما كوردستانێ و رووسیا هاتنه‌ باسكرن، كۆنسولێ نوو یێ رووسیا خوه‌شحالیا خوه‌ ب ده‌ستبكاربوونێ ل هه‌رێما كوردستانێ نیشادا و ئاماژه‌ ب په‌یوه‌ندیێن دێرین د ناڤبه‌را هه‌رێما كوردستانێ و رووسیا دا كر و هیڤی خواست ب پشته‌ڤانیا ئالیێن په‌یوه‌ندیدار ل هه‌رێما كوردستانێ، بشێت په‌یوه‌ندیێن هه‌ردو ئالیان به‌ر ب پێشڤه‌ ببه‌ت.