ئه‌ڤرۆ نیوز:
لیژنا حوكمه‌تا هه‌رێما كوردستانێ بۆ دانوستاندنێ ل سه‌ر بودجا سێ سالێن حوكمه‌تا عیراقێ ل به‌غدایه و دێ ئه‌ڤرۆ ده‌ست ب دانوستاندان كه‌ن.
زاگرۆس فه‌تاح بریكارێ وه‌زاره‌تا پلاندانانا حوكمه‌تا هه‌رێما كوردستانێ كۆ سه‌رۆكاتیا لژنا هه‌رێمێ بۆ بودجێ راگه‌هاند مه‌به‌ستا سه‌ره‌دانا مه بۆ دانانا بنه‌مایێ ستراتیژیێ بودجا عیراقێ یه د ناڤا وان دا ژی بودجه و شایسته‌یێن دارایی یێن هه‌رێمێ، بكارخستنا پرۆژه‌یێ چاكسازییا كارگێری و دارایی ل عیراقێ، گرنگیا ئه‌ڤێ لژنا هه‌ڤ پشك ئه‌وه كۆ خه‌ملاندن بۆ بودجا سێ سالێن بهێت یێن عیراقێ ئێته‌كرن و بنه‌مایێ خواست و پێدڤیێن سێكته‌ران دهێنه ده‌ست نیشانكرن و ماف و شایسته‌یێن دارایی یێن هه‌رێمێ تێدا بهێنه چه‌سپاندن.
بریكارێ وه‌زاره‌تا پلاندانانا حوكمه‌تا هه‌رێمێ ئه‌و چه‌نده ژی راگه‌هاند: پشكداریكرنا هه‌رێما كوردستانێ دڤێ لژنه‌یێ دا پشتی ئه‌وێ چه‌ندێ هات، كۆ وه‌زاره‌تا دارایی و ئابووری یا عیراقێ ل سه‌ر بنه‌مایێ یاسایا دارایی یا عیراقێ دڤێت بودجه‌یا سێ سالین بهێت به‌رهه‌ڤ بكه‌ت و داخاز ژ هه‌رێما كوردستانێ كریه بۆ پشكداریكرن ل دانانا بنه‌مایێ ستراتیژیێ بودجا عیراقێ و كوردستانێ.
ئه‌ڤرۆ نیوز:
رێڤه‌به‌رێ گشتی یێ دیوانا وه‌زاره‌تا ساخله‌میێ راگه‌هاند ڤایرۆسێ كورونایێ ب شێوه‌یه‌كێ به‌رچاڤ به‌ربه‌لاڤ بوویه، ژماره‌یا توشبوویێن ڤایرۆسی زۆر زێده‌تره ژ وێ ئه‌ڤا دهێته ده‌ست نیشانكرن، به‌لێ ژ ده‌ڤه‌ره‌كێ بۆ ده‌ڤه‌ره‌كا دی جوداهی هه‌یه.
خالس قادر رێڤه‌به‌رێ گشتی یێ دیوانا وه‌زاره‌تا ساخله‌میا حوكمه‌تا هه‌رێما كوردستانێ راگه‌هاند: نوكه هه‌رێما كوردستانێ ل قوناغا به‌لاڤبوونا به‌رفره‌هبوونا ڤایرۆسی یه و ب ئاوایه‌كی زۆر به‌ربه‌لاڤ بوویه، به‌لێ ژ جهه‌كی بۆ جهه‌كێ دی جودایه، نوكه ره‌وش ل هه‌ولێرێ باشه و ل چاڤ سێ هه‌فتیێن بوری ل دهۆكێ به‌ره‌ڤ زێده‌بوونێ كریه، ل سلێمانیێ پشتی بۆ ده‌مه‌كی باش بوو نوكه ده‌ستپێكا زێده‌بوونێ یه، ژماره‌یا مریێن ڤایرۆسێ كورونایێ هه‌تا نوكه نێزیكی ستانداردێن جیهانی یه كۆ كێمتره ژ 3% ئه‌ڤێن ل نه‌خوشخانه‌یان هاتینه توماركرن، چونكو ژماره‌كا زۆر زێده‌تر ژ وێ چه‌ندێ هاتینه جه‌ست نیشانكرن و ل مال چاره‌سه‌ریێ وه‌ردگرن چونكو زۆر به‌ر به‌لاڤ بوویه.
خالس قادر رێڤه‌به‌رێ گشتی یێ دیوانا وه‌زاره‌تا ساخله‌میا حوكمه‌تا هه‌رێما كوردستانێ ئه‌و چه‌نده ژی راگه‌هاند: تانوكه هه‌ڤكاریێن كۆ ژلایێ رێكخراوا ساخله‌میا جیهانی و وه‌زاره‌تا ساخله‌میا عیراقێ دگه‌هنه ده‌ستێ وه‌زاره‌تا ساخله‌میا هه‌رێمێ وه‌كو پێدڤی نینن، چونكو فشار زۆرن ب تایبه‌تی ل ئه‌ڤان دو هه‌یڤان ژماره زۆر تر بوویه، به‌ری هنگی هه‌ڤكاری بۆ دهاتن، نوكه‌ژی هه‌ماهه‌نگی ل گه‌ل وه‌زاره‌تا ساخله‌میا عیراقێ و رێكخراوا ساخله‌میا جیهانی ئه‌و هه‌ڤكاریێن دهێنه پێشكێشكرن ل ئاسێ پێدڤی دا نینن.
ئه‌ڤرۆ نیوز:
لگۆری دوماهی ئامارێن توشبوویێن ڤایرۆسێ كورونایێ ل جیهانێ گه‌هشته 25 ملیۆن و 390 هزار و 791 كه‌سان.
لگۆری ئامارێن دهێنه به‌لاڤكرن ل سه‌ر ئاستێ جیهانێ، ئه‌ڤرۆ ژماره‌یا توشبوویێن كورونایێ گه‌هشتیه 25 ملیۆن و 390 هزار و 791 كه‌سان و ژ ئه‌ڤێ ژماره‌یێ ژی هه‌شت سه‌د و 50 هزار و 630 كه‌سان گیانێ خوه ژ ده‌ست دایه.
ل سه‌ر ئاستێ جیهانێ ئه‌مریكا زۆرترین رێژه‌یا توشبوویێن ڤایرۆسێ كورونایێ تێدا هاتیه توماركرن و گه‌هشتیه شه‌ش ملیۆن و 173 هزار و 328 كه‌سان و 187 هزار و 225 كه‌سان ژی گیانێ خوه ژ ده‌ست دایه.
ڤایرۆسێ كورونایێ نه‌خوشیه‌كا كوژه‌كه و ل هه‌یڤا 12 یا سالا بوری ل باژێرێ ئوهان یا چینێ سه‌رهلدایه و نوكه ل زێده‌تری 210 وه‌لاتان به‌لاڤ بوویه.
ئه‌ڤرۆ نیوز:
رێڤه‌به‌راتیا پولیسێن پارێزگه‌ها دهۆكێ د راگه‌هاندنه‌كێ دا به‌لاڤكریه كۆ تێدا هاتیه رێڤه‌به‌رێ به‌رێ یێ پولیسێن دهۆكێ ب ئه‌گه‌رێ كورونایێ گیانێ خوه ژ ده‌ست دایه.
ئه‌ڤرۆ 31/8/2020 لیوا وه‌عدولا محه‌مه‌د رێڤه‌به‌رێ یێ پولیسێن پارێزگه‌ها دهۆكێ ب ئه‌گه‌رێ كورونایێ گیانێ خوه ژ ده‌ستدا، به‌ریا چه‌نده‌كی كورێ وی یێ گه‌نج هه‌ر ب ڤایرۆسێ كورونایێ گیانێ خوه ژ ده‌ست دابوو.
ئەڤرۆ نیوز:
شاندەکێ جڤاتا سووریا دیموکرات کو وەکو بالێ سیاسی یێ هێزێن سووریا دیموکرات دهێتە نیاسین سەرەدانا روسیا کریە و دهێتە چاڤەرێکرن کو ل گەل سیرگێی لاڤرۆڤ وەزیرێ دەرڤە یێ روسیا کۆمبن و روسیا داخواز ژ شاندێ جڤاتا سووریا دیموکرات کریە کو ل دۆر رێککەفتنا پەترۆلێ یا ل گەل ئەمریکا پتر رۆنکرنێ بدەنە وان.
هەژی ئاماژەپێدانێ یە کو روسیا و تورکیا بەری نها دژبەریا خوە ل هەمبەر رێککەفتنا پەترۆلێ یا د ناڤبەرا رێڤەبەریا خوەسەر و ئەمریکا دا دیار کربوون.
ئه‌ڤرۆ نیوز:
وه‌زاره‌تا بازرگانیا عیراقێ راگه‌هاند پشكا ئاهێن خوارنێ یا هه‌یڤانه یا وه‌لاتیان ژ به‌رهه‌مێ ناڤخویی دهێته دابینكرن و هێنه پارڤه‌كرن.
محه‌مه‌د حه‌نون په‌یڤدارێ وه‌زاره‌تا بازرگانیا عیراقێ راگه‌هاند وه‌زاره‌ت ژ دابینكرنا كه‌ره‌سته‌یێن فورما ئاهێن خوارنێ پشت به‌ستنێ ل سه‌ر به‌رهه‌مێن ناڤخویی دكه‌ت، ئه‌و ژی ئاره و برنج و شه‌كر و زه‌یتا خوارنێ 100% به‌رهه‌مێن خومالی نه، ئار و برنج ژ جوتیاران هاتیه كرین و هه‌موو ئه‌و كه‌ره‌سته‌یێن به‌رهه‌مێ ناڤخویی نه و ب هیری پشكنین بۆ هاتیه‌كرن.
په‌یڤدارێ وه‌زاره‌تا بازرگانیا عیراقێ ئه‌و چه‌نده ژی دازانین داخاز ژ وه‌لاتیان كر هه‌كه هه‌ست كر ئه‌و كه‌ره‌سته‌یێن وه‌ردگرن حراپن یان مه‌رجێن ساخله‌میێ تێدا نینن، ده‌ملده‌ست فه‌رمانگه‌هێن چاڤدێریكرنێ ئاگه‌هدار بكه‌ن ژ ئه‌وان رێ و ئاوایێن یاسایی پێدڤی بكار بینن هه‌مبه‌ر ئه‌وی كه‌س و وه‌كیلی.
ئه‌ڤرۆ نیوز: له‌زگین جوقی:
رێڤه‌به‌رێ گشتی یێ ساخله‌میا پارێزگه‌ها دهۆكێ دیاركر ئه‌ڤرۆ 30/8/2020ێ ساخله‌میا جیهانی ب كوژمێ 270 هزار دۆلاران هاریكاری پێشكیشی ساخله‌میا دهۆكێ كرن.
د. نزار عسمه‌ت، رێڤه‌به‌رێ گشتی یێ ساخله‌میا پارێزگه‌ها دهۆكێ دیاركر ئه‌دهه‌م ئیسماعیل، نوونه‌رێ رێكخراوا ساخله‌میا جیهانی ل عێراقێ سه‌ره‌دانا پارێزگه‌ها دهۆكێ كریه دگه‌ل پارێزگه‌رێ دهۆكێ كومبوونه‌ك ئه‌نجامدایه وسه‌ره‌دانا نه‌خۆشخانێن دهۆكێ كر بۆ هایداربوون ل سه‌ر ره‌وشا دهۆكێ وسوبه‌هێ ژی 31/8/2020ێ دێ سه‌ردانا نه‌خۆشخانا هیڤی یا زارۆكان كه‌ت، هارێكارێ پیشكیشی ساخله‌میا دهۆكێ كرن كو مه چه‌ندێن ئارمانج دگه‌ل رێكخراوا ساخله‌میا جیهانی هه‌نه بهینه بجه بۆ رووبه‌رووبوونا قه‌یرانا نه‌خاسمه نۆكه ده‌مێ په‌یدابوونا كۆرۆنایێ ژی به‌رده‌وام پشته‌ڤانیا ساخله‌میا دهۆكێ كریه زێده‌بارێ نه‌خۆشێن دایك و زارۆكان كاره‌كێ مه‌زن بۆ خه‌لكێ دهۆك ئه‌نجامدایه وچه‌ندێن كه‌ره‌ستێن خۆپاراستنێ و ته‌خت وهارێكاریێن هه‌مه جۆر یێن ته‌ندروستی پێشكیشی ساخله‌میا دهۆكێ كرینه.
تاڤبری ئه‌و چه‌نده ژی ئاشكه‌را كر ئه‌ڤرۆ هارێكاریه‌كا تایبه‌ت بۆ نه‌خۆشخانا لالاڤ ئینایه بۆ كۆرۆنایێ ئه‌وژی ئامیرێن گرنگ یێن ساخله‌میێ پێشكیشی مه كرینه ئه‌وژی ته‌ختێن چاڤدێریا چر وپێدڤیێن دگه‌لدا دێ بنه پشته‌ڤانیی بۆ چاره‌سه‌ركرنا نه‌خۆشێن كۆرۆنایێ ل دهۆكێ.
ئه‌دهه‌م ئیسماعیل نوونه‌رێ رێكخراوا ساخله‌میا جیهانی ل عێراقێ دیاركركو ره‌وشا دهۆكێ ژ گه‌له‌ك پارێزگه‌هان باشتر ئه‌م دشیێن بیژین رێژا مرنێ ب نه‌خۆشیا كورۆنایێ ل دهۆكێ گه‌له‌ك كێمه هه‌مبه‌ر هه‌موو پارێزگه‌هێن هه‌رێما كوردستانێ و عیراقێ ئه‌م به‌رده‌وام دێ هه‌ڤكاری و پشته‌ڤانیا ساخله‌میا دهۆكێ كه‌ین بۆ رووبه‌رووبوونا هه‌موو قه‌یرانان.
نيشاندان