ئه‌ڤرۆ:

ئه‌ندامه‌كێ مه‌كته‌با سیاسی یا پارتی دیموكراتی كوردستان راگه‌هاند، مووشه‌كبارانكرنا كێلگێن په‌ترۆلی، فشاره‌كه‌ بۆ وێ چه‌ندێ هه‌رێما كوردستانێ ته‌سلیم ببیت.

هشیار زێباری، ئه‌ندامێ مه‌كته‌با سیاسی یا پارتی دیموكراتی كوردستان د پێگه‌هێ خوه‌ یێ تایبه‌ت ل سه‌ر تۆرا جڤاكی یا تویته‌ری به‌لاڤكر” مووشه‌بارانكرنا كێلگێن په‌ترۆلی یێن هه‌رێما كوردستانێ ل هه‌ولێرێ، ناحیا خه‌بات و كومه‌لگه‌ها كۆرمۆر ل ناحیا قادر كه‌ره‌م ل سنوورێ پارێزگه‌ها سلێمانیێ، دووپاتی ل وێ چه‌ندێ دكه‌ تكو هێزێن میلیشیێن به‌غدا جوداهیێ د ناڤبه‌را پارێزگه‌هێن هه‌رێما كوردستانێ دا ناكه‌ن.

زێباری گۆت ژی” ئارمانج ژ مووشه‌كبارانكرنا هه‌رێما كوردستانێ، بۆ وێ ئێكێ یه‌ ته‌سلیم ببین”.

ده‌مه‌كه‌ كیلگێن په‌ترۆلی یێن هه‌رێما كوردستانێ ل پارێزگه‌ها سلێمانیێ و هه‌ولێرێ ب مووشه‌كان دبنه‌ ئارمانج، حوكمه‌تا هه‌رێما كوردستانێ ب رێیا به‌یاننامێن فه‌رمی داخواز ژ به‌غدا دكه‌ت رێگریێ ل وان هێرشان بكه‌ت.

ئه‌ڤرۆ:

بابه‌كر زێباری، شیره‌تكارێ له‌شكریێ سه‌رۆكێ هه‌رێما كوردستانێ راگه‌هاند، داعشێ ل ده‌ڤه‌رێن كوردستانی چالاكیێن خوه‌ گه‌له‌ك به‌رفره‌هكرینه‌ و ل هه‌ر جهه‌كی ده‌لیڤا خوه‌ ببینن گورزێ خوه‌ ددانن، به‌لێ ئه‌وا گرنگ پێشمه‌رگه‌ی سه‌نگه‌ریچن خوه‌ یێن ب هێزكرین، هه‌روه‌سا دبێژیت، حوكمه‌تا ئیراقێ چه‌ندین ساله‌ رێككه‌فتنان ل گه‌ل هه‌رێما كوردستانێ ئه‌نجام دده‌ت، به‌لێ بجهنائینیت.

بابه‌كر زێباری گۆت” لڤینێن داعشێ ب شێوه‌كێ به‌رفرهه‌ ل ده‌ڤه‌رێن كوردستانی یێن هه‌ین و ل هه‌ر جهه‌كی ده‌لیڤه‌ بۆ هه‌بیت گورزێ خوه‌ ددانن، ئه‌گه‌ر نه‌ نه‌راوه‌ستیاینه‌ و گه‌له‌ك د چالاكن ل ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ، به‌لێ سه‌نگه‌رێن پێشمه‌رگه‌ی باش یێن هاتینه‌ ب هێزكرن”.

شیره‌تكارێ له‌شكریێ سه‌رۆكێ هه‌رێمێ گۆتژی” حوكمه‌تا ئیراقێ پێگیری رێككه‌فتنان نابیت و چه‌ندین رێككه‌فتن ل سالا 2016 هاتینه‌ كرن و چه‌ندین كۆمبوون ژی هاتینه‌ ئه‌نجامدان، به‌لێ به‌غدا پێگیر نابیت و هه‌ر جاره‌كێ بیانوویه‌كێ دبینن، چونكه‌ دو لیوایێن هه‌ڤپشك یێن هاتینه‌ به‌رهه‌ڤكرن و هه‌ر سۆزێ دده‌ن بهێنه‌ جهگیركرن، به‌لێ سۆزا خوه‌ بجهنائینن”.

رۆهنكر ژی” هه‌كه‌ ب وی شێوه‌ی ده‌لیڤه‌ ب داعشێ بهێته‌ دان دێ ب هێز بیت و یا گرنگ ئه‌وه‌ ئه‌م ئاگه‌هداری خوه‌ بین و سه‌نگه‌رێن خوه‌ باش ب هێزبكه‌ین و خوه‌ بپارێزین”.

ئه‌ڤرۆ:

ئه‌ندامه‌كێ جڤاتا سه‌ركردایه‌تیا پارتی ل سلێمانیێ – هه‌له‌بجه‌ راگه‌هاند، ره‌وشا ئیراقێ گه‌له‌ك یا خرابه‌ و هه‌كه‌ خرابتر ببیت كه‌س نه‌شێت كونترۆل بكه‌ت.

سه‌باره‌ت هێرشا گرۆپێن چه‌كدار ل سه‌ر كێلگێن په‌ترۆلێ و غازێ ل هه‌رێما كوردستانێ، ئاری هه‌رسین، ئه‌ندامێ جڤاتا سه‌ركردایه‌تیا پارتی ل سلێمانیێ – هه‌له‌بجه‌ گوت” ئه‌وا روودده‌ت حوكمه‌تا ئیراقێ حوكمرانا تاكلایه‌نه‌ نینه‌، چونكه‌ هه‌كه‌ وه‌سابا ئه‌و روودانه‌ نه‌دهاتنه‌ ئه‌نجامدان، وه‌كو هه‌رێما كوردستانێ چه‌ندین جاران بۆ حوكمه‌تا ئیراقێ رۆهنكریه‌، ئه‌و ده‌ڤه‌رێن دكه‌ڤنه‌ د ناڤبه‌را سه‌نگه‌رێن پێشمه‌رگه‌ی و له‌شكرێ ئیراقێ یێن بووینه‌ ڤالاهیا ئه‌منی تێدا هه‌یه‌ و ب له‌شكرێ ئیراقێ و حه‌شدا شه‌عبی كونترۆل ل سه‌ر ناهێته‌ كرن”.

ئاری زێده‌تر دبێژیت” هێرشێن ل سه‌ر هه‌رێما كوردستانێ بۆ وێ مه‌به‌ستێ نه‌، حوكمه‌تا هه‌رێمێ بچه‌میت یان ته‌سلیم بیت به‌رامبه‌ر ئیرادا فاشیزم و داگیركاری، ئه‌ڤه‌ژی چ جاران رووناده‌ت، ئه‌و ده‌مه‌ ب سه‌رڤه‌چوو بشێن ب فه‌وجه‌كێ و فرقه‌كێ و لیوایه‌كێ ده‌ڤه‌رێن كوردستانێ داگیر بكه‌ن، هه‌ر كه‌سه‌كێ بخوازیت مامه‌لێ و دانوستاندنێ ل گه‌ل مه‌ بكه‌ت، دڤێت ل ده‌وروبه‌رێن مێزێ روونیت نه‌كه‌ ب زمانێ فیشه‌كێ باخڤیت”.

وی ئه‌ندامێ جڤاتا سه‌ركردایه‌تیا پارتی ل سلێمانیێ – هه‌له‌بجه‌دیاركر ژی” ئه‌گه‌رێ هێرشێن مووشه‌كی بۆ سه‌ر هه‌رێما كوردستانێ ب گشتی بكارئینانا شێوازێ به‌دیله‌، بۆ بده‌ستڤه‌ئینانا مه‌ره‌مێن سیاسی، دو شێوا زیێن هه‌ین بۆ گه‌هشتن ب مه‌ره‌مێ، ئێك شێوازێ مه‌دێرن و عه‌قلانی كو ب دانوستاندنێ و گفتوگویێ یه‌، رێیا دوویێ ژی ب عه‌نته‌ری و شه‌ری یه‌، ب درێژیا دیرۆكێ هاتیه‌ سه‌لماندن ئه‌ڤه‌ چه‌نده‌ ته‌ ناگه‌هینیته‌ جهێ مه‌به‌ستی، ژبلی مالوێرانیێ چ د دووڤدا ناهێت، ئه‌و جۆره‌ مامه‌له‌كرنه‌ ب جۆره‌كێ دی ئیفلاسا سیاسیه‌، هه‌كه‌ كه‌سه‌ك بخوازیت ب میتودا سیاسی كێشان چاره‌سه‌ربكه‌ت، ده‌ست بده‌ته‌ مووشه‌ك و ئارپیچیان، ئه‌م هه‌م زمانێ ئه‌ره‌بی و هه‌م یێ فارسی ژی دزانین، هه‌كه‌ كه‌سه‌ك بخوازیت دانوستاندنێ ل گه‌ل مه‌ بكه‌ت”.

ل دۆر ڤه‌گوهاستنا ئه‌زموونا شه‌ری و ئالۆزیێن یه‌مه‌نێ بۆ ئیراقێ، ئاری هه‌رسین گوت” ئه‌وا ل یه‌مه‌نێ روودده‌ت، ژبلی مالوێرانیێ هیچ ده‌ستكه‌فته‌ك بۆ خه‌لكی وی وه‌لاتی نه‌بوو، نوكه‌ ئیراق ژ روویێ سیاسی، له‌شكری و ئابووری، د ره‌وشه‌كا خراب دایه‌، هه‌كه‌ ژ وێ خرابتر ببیت، دێ بیته‌ مالوێرانی و و هیچ كه‌سه‌ك نه‌شێت كونترۆل بكه‌ت”.

ناڤبری رۆهنكر ژی” ئه‌وێن خه‌ونان ب ئێكپارچه‌یا ئیراقێ ڤه‌ دبینن، خه‌لكێ ئیراقێ بن یا یێن ده‌وروبه‌ر، دڤێت باش بزانن ب وی جۆرێ سیاسه‌تكرنێ  ب رامانا” ب یه‌مه‌ن كرنا ئیراقێ” هه‌موو تشته‌كی بپارێزیت ئێكپارچه‌یا ئیراقێ ناپارێزیت، له‌وما د وێ باوه‌ریێ دا نینم ئه‌و ئالیێن رۆل د ره‌وشا سیاسی یا یه‌مه‌نێ دا هه‌ی، بخوازن وێ ئه‌زموونا ته‌ه‌حل جاره‌كادی ل ئیراقێ تاقیبكه‌ن، چونكه‌ وه‌كو دبینین یه‌مه‌ن یا مالوێران بووی و یا بوویه‌ جهێ شه‌ر و پێكدادانێن خه‌لكه‌كی كو خه‌لكێ یه‌مه‌ن نینن و تنێ خه‌لكێ یه‌مه‌نێ یێن بووینه‌ قوربانی، هه‌كه‌ هه‌مان تشت ل ئیراقێ روو بده‌ت دێ ئه‌نجامێن وێ مالوێرانی بیت، هه‌رچه‌نده‌ باوه‌رناكه‌م ل ئیراقێ دوباره‌ ببیت”.