چاڤەڕێ‌ دهێتە كرن ئەڤرۆ دەست ب هەڤڕكیێن وەرزێ‌ نوو یا خولا پیشەكارێن ئیراقێ‌ یا باسكێت بۆلێ‌ ب پشكدارییا 12 یانەیێن كوردستانی و ئیراقی هێنە كرن و هاتینە بەلاڤكرن ل سەر دو كۆما، یانەیا زاخۆ وەكو نوونەرا بەهدینان پشكدارە و د كۆما ئێكێ‌ دایە و دێ‌ پشت گەرمیێ ب گەنجێن باژێرێ‌ خوە و دهۆكێ‌ كەت دگەل یاریزانەكێ‌ خەلكێ‌ مووسلێ‌.
كۆما زاخۆ و یاریێن وێ‌
بڕیارە ئەڤرۆ یاریێن كۆما ئێكێ‌ یا خولێ‌ ب شێوەیێ كۆمڤەبوون دو قووناغ بهێنە كرن، قووناغا ئێكێ‌ ئەڤرۆ دێ‌ ل كەركووكێ‌ بیت، قووناغا دویێ‌ بۆ دەمەكێ‌ دی دێ‌ هێتە دیاركرن، یاریێن تیما زاخۆ دێ‌ بڤی شێوەیی بن
یارییا ئێكێ‌ ئەڤرۆ: زاخۆ- سایبس، دەمژمێر شەشێ‌ ئێڤاری.
یارییا دویێ‌ سوبەهی : زاخۆ – نەفت ئەلشیمال، دەمژمێر شەشی شەڤ.
یارییا سێیێ‌، چارشەمبییا بهێت، زاخۆ- دیفاع ئەلجەوی، دەمژمێر هەشتی شەڤ.
یارییا چارێ‌، پێنجشەمبییا بهێت، زاخۆ -عومال نەینەوا، دەمژمێر شەشی شەڤ.
یارییا پێنجێ‌، ئەینییا بهێت، زاخۆ- غازئەلشیمال، دەمژمێر شەشی شەڤ.
گرێبەستێن هەموویان هاتنە ئیمزاكر
د داخویانیەكێ‌ دا هشیار شەهباز سكرتێرێ‌ یانەیا زاخۆ بۆ ئەڤرۆ گۆت: بۆ وەرزێ‌ ئەڤ سالە د قووناغا ئێكێ‌ یا خولا پیشەكارێن ئیراقێ‌ مە پشت گەرمی ب 90 سەدێ‌ ل سەر گەنجێن باژێرێ‌ خوە كرینە ژ وانا ستێرێ ل سەر ئاستێ‌ ئیراقێ‌ موراد عەلی، زنار هشیار و محەمەد عەلی، هەروەسان فەرید رەعدی و چەند یاریزانێن دی یێن گەنج، ب گشتی 12 یاریزان هاتینە دناڤ ڕێزێن تیمێ‌ دا و گرێبەست دگەل هاتینە ئیمزاكرن كو دێ‌ ب سەركێشییا كادرێ‌ ڕاهێنەرێ‌ یێ باژێرێ‌ زاخۆ بیت ئەوژی جوتیار عەلی ڕاهێنەر و هەر ئێك ژ جەگەرخوین عەلی و شەهاب حەمەد وەكو هاریكارێن وی و نوعمان سالح سەرپەرشتێ‌ تیمێ‌.
هەروەسان ناڤهاتی گۆت: پشت گەرمی ب یاریزانێن باژێرێ‌ خوە ڕامانا وێ‌ هەبوونا باوەریێ ب شیان و ئاستێ‌ وانە و گەشبینن دێ‌ ئەنجامێن سەركەڤتی ب دەستڤە ئینن، ئەم نە بتنێ‌ دێ‌ تیمەكا پشكدار بین د خولێ‌ دا، بەلكو دێ‌ هەڤڕكیێ بۆ ب دەستڤە ئینانا پلێـتەكا دەربازبوونێ‌ بەر ب قووناغا پلەی ئوف چارگۆشەیا زێرین كەن، ب هیڤی نە ب گەهینە ئەڤێ‌ ئارمانجێ‌، سرۆشتیە قووناغا ئێكێ‌ یا كۆمان دێ‌ بیتە تاقیكرنەكا ب زەحمەت، لێ‌ ئەم ڕژدین شەڕی بۆ دەستڤە ئینانا سەركەڤتنان.
ژلایێ‌ خوەڤە جوتیار عەلی ڕاهێنەرێ‌ یانەیا زاخۆ گۆت: هەرچەندە هەڤڕكیێن وەرزێ‌ ئەڤ سالە گەلەك گیرۆبوون و كارتیكرنا نەرێنی ل سەر دەرون و بەرهەڤیێن یاریزانان كرینە، لێ‌ وەكو یانەیا زاخۆ ب هەبوونا كۆمەكا گەنجان مە بەردەوامی دا ڕاهێنانێن خوە ب شێوەیەكێ‌ جودا و بەرنامەیەكێ‌ تایبەت، مە تیمەكا ب خوون گەرم و گەنجێن باژێرێ‌ خوە هەنە، دبیت قووناغا ئێكێ‌ یا ب زەحمەت بیت ژبەركو هەموو تیمێن پشكدار دێ‌ هەڤڕكیێ بۆ سەركەڤتنێ‌ كەن پێخەمەت ب دەستڤە ئینانا ڕێزێن پێشیێ‌ و دەربازبوون بۆ قووناغا پلەی ئۆف، هیڤییا مە ئەوە ل دووڤ بەرنامەیێ مە ب گەهینە ئارمانجا خوە.
هەژی گۆتنێ‌ یە 12 یانە پشكدارن و هاتینە بەلاڤكرن ل سەر دو كۆمان، كۆما ئێكێ‌ پێكهاتیە ژ، زاخۆ، نەفت ئەلشیمال، سایبس، دیفاع ئەلجەوی، عومال نەینەوا و غاز ئەلشیمال، كۆما دویێ‌ پێكهاتینە ژ دیجلە ئەلجامیعە، نەفت میسان، كارەبا، حللە، ئەلیەقزە و حەشت ئەلشەعبی، یاریێن وان ژ 12ێ‌ هەتا 16ێ‌ ڤێ‌ مەهێ‌ بەردەوامبن، كۆمەك ل باژێرێ‌ كەركووكێ‌ و یا دویێ‌ ل بەغدا هێنە كرن، قووناغا دویێ بڕیارە ل 21ێ‌ هەتا 25ێ‌ ڤێ‌ مەهێ‌ بهێنە كرن و چاڤەڕێ‌ دیاركرنا جهی بن، چار یانە ژ هەر كۆمەكێ‌ دێ‌ دەربازبنە قووناغا هەشتێ‌ پلەی ئۆف دێ‌ ل 29 و 30ێ‌ ڤێ‌ مەهێ‌ هێنە كرن.

د نووترین داخویانییا خوە دا یێ‌ ئوسترالی گێرهام ئارنۆلد ڕاهێنەرێ‌ هەلبژارتیێ‌ ئیراقێ‌ دیاركر كو تیما وی شیانێن هەین ژ قووناغا كۆمان یا قارەمانییا كۆپا ئاسیا 2027ێ‌ دەربازبیتە قووناغا دووڤدا، ئەوا بڕیارە ل دەستپێكا سالا بهێت وەلاتێ‌ سعوودیێ‌ مێڤاندارییا وێ‌ بكەت.
ئارنۆلدی گۆت: كۆما مە یا باشە، ئۆسترالیا، تاچاكستان و سانگاپۆرا، مە باوەری ب شیانێن خوە هەیە كو دێ‌ دەربازبتە قووناغا دووڤدا، یارییا بەرانبەر ئۆسترالییا تایبەتمەندیا خوە بۆ من هەیە و یا سەرنجراكێشە، خەلكێ‌ ئۆسترالیا مە لێ‌ د ورەزشێ‌ دا جودایە و دێ‌ پلانێن سەركەڤتنێ‌ بەرانبەر دانینن.

تیما فوتبۆلا یانەیا دهۆك سێ‌ خالێن دی ل سەر بەلانسا ڕێزبەندییا خوە زێدەكرن پشتی د یارییا گەڕا 34ێ‌ ژ خولا ستێرێن ئیراقێ‌ یا فوتبۆلێ‌ شیایی سەركەڤتنەكا ژ هەژی ل سەر یانەیا ئەلقاسم بینیت ب دو گۆلان بەرانبەر گۆلەكێ‌ د یارییا واندا ئەوا ل یاریگەها یانەیا دهۆكێ‌ هاتیە كرن.
خۆشكرنا ڕێزبەندیێ یە
سەركەڤتنا ڤێ‌ گەڕێ‌ بۆ تیما یانەیا دهۆك یا باشبوو و خۆشكرنا ڕێزبەنییا خوە بوویە ئەوا ب شێوەیی بەروەخت ڕێزا نەهێ‌ هاتی ب كۆمكرنا 48 خالان ژ 13 سەركەڤتنان، نەهـ وەكهەڤی و 12 خوسارەتیان هەتا ڤێ‌ گەڕێ‌ یاریزانێن دهۆكێ‌ شیاینە 39 گۆل بینن، لێ‌ ڕێژەیەكا مەزن یا گۆلان ژی ل سەر هاتینە تۆماركرن كو دگەهنە 38 گۆلان، ژلایێ‌ خوەڤە یانەیا ئەلقاسم ئەوا پاشكەڤتنا خوە بۆ پلا نایاب مسۆگەر كری و ئێدی چو هیڤیێن مانا خوە د خولا ستێرێن ئیراقێ‌ دا نەماینە بتنێ‌ چار خال هەنە ل ڕێزا 20 و دووماهیێ‌ دهێت كو ئەوژی ژ چار وەكهەڤییان هاتینە.
مستەفا نەواف گەشبینە
د پرێس كۆنفراسێ‌ رۆژنامەڤانی دا مستەفا نەواف ستێرێ‌ گەنج یێ‌ تیما یانەیا دهۆك گۆت: ل دەستپێكێ‌ پیرۆزە ل جەماوەر و پشتەڤانێن یانەیا دهۆك ئەڤ سەركەڤتنە و دێ‌ بەردەوامبین، تیما ئەلقاسم بێ‌ هیچ ئارمانجەك یان هەڤڕكییەك بۆ ڕێزبەندیێ هاتبوو دناڤ یاریێ دا ژبەركو پێشتر یا پاشڤەچوویە پلا نایاب، لەوما ژی یاریزان بێ‌ گڤاشتن یاری دكرن، ئەڤ سەركەڤتنە بۆ مە گەلەك گرنگ بوویە، ژبەركو دا بشێن ڕێزبەنیێن باشتر وەربگرین، لەوما ژی ڕژدین بۆ یاریێن داهاتی ژی بەردەوامبین و شەڕی بۆ سەركەڤتنان بكەین، یارییا بهێت بەرانبەر مووسلە دڤێت باش خوە بەرهەڤبكەین، ژبەركو ئەو تیما ل یاریگەها مە یاریێن خوە دكەن، ئانكو یاریگەه، بۆ وێ‌ ژی دهێتە هژمارتن.
بۆ زانین ل ئەینییا بهێت یانەیا دهۆك دێ‌ ل یاریگەها خوە بیتە مێڤانا یانەیا مووسل ئەوا یاریگەها دهۆكێ‌ بۆ یاریێن خوە هەلبژارتی، دووڤدا دێ‌ بەر ب بەغدا ڕێكەڤیت و بیتە مێڤانا نەفت، یارییا گەرا 37ێ‌ و بەری دووماهیێ‌ دێ‌ ل یاریگەها خوە یانەیا كارەبا مێڤان كەت و یارییا گەڕا 38ێ‌ و دووماهیێ دێ‌ بیتە مێڤانا یانەیا دیالا و دێ‌ هەڤڕكیێن خولێ‌ ب دووماهی هێت.

تیما یانەیا بەرشەلۆنا شیا د یارییا كلاسیكۆیا ئسپانی دا ل سەر كیستێ‌ ڕیال مەدرید ناسناڤێ‌ وەرزێ‌ ئەڤ سالە یێ‌ خولێ‌ مسۆگەر بكەت بەری ب دووماهی هاتنا هەڤڕكییان ب سێ‌ گەڕان، پشتی ب دو گۆلان بێ‌ بەرانبەر سەركەڤتن ئینایی و خالێن خوە ب گەهینە 91 خالان ب جووداهییا 14 خالان ژ ڕیال مەدرید ئەوا ل ڕێزا دویێ‌ ڕاوەستیایی.

بۆچی ڕیال كەڤت
ل دووڤ شرۆڤەكارێن وەرزشی ل ئیسپانا هندەك ئەگەرێن جودا بۆ كەڤتنا ڕیالێ‌ د خولێ‌ و چامپیۆنزێ‌ دا دیاركرن و بڤی شێوەیی، یا ئێكێ‌ شەڕێ‌ بەردەوام یێ یاریزانان دناڤا چلكگوهۆڕینێ‌ دا كو بوو ئەگەر ناكۆكی پەیدابن، یا دویێ‌ ئاستێ‌ بەرپرسیارەتییا ڕاهێنەرێ‌ تیمێ‌ ئاربێلیۆیی بەرانبەر یاریزانان یێ‌ لاواز بوو، خوسارەتییا ڕیالێ‌ بەرانبەر بەرشەلۆنا د سۆپەر و خولێن ئیسپانیا دا ڕامانا نە بەرهەڤییا دەرۆنی و هێزێ یە بەرانبەر یاریزانێن بەرشەلۆنا ئەوێن شیانێن قەرەبوویا چامپۆنزێ‌ د خولێ‌ و سۆپەرێ‌ دا ڤەكەن.
د رۆژنامەیا ماركا یا ئسپانی دا هاتیە سەرۆكێ‌ یانەیا ریال مەدرید فلۆرنتینۆ پێرێز نەخشەڕیەك بۆ وەرزێ‌ نوو یێ‌ چالاكیێن بهێت دانایە و دهێتە پێشبینیكرن شۆرەشەكا گوهۆڕینان بهێتە كرن و دوور نینە ستێرێن خوە وەكو بێرێنگهام، مباپی و ڤێنێسیۆسی دووربێخن.