قەیس وەیس:

بڕیارە ئەڤرۆ شەش یاریێن دی ژ چارچووڤەیێ‌ هەڤڕكیێن گەڕا هەشتێ‌ یا خولا پلا سێیێ‌ یا ئیراقێ‌ بۆ یارییا فوتبۆلێ‌ ل سەر ئاستێ‌ هەردو كۆمان بهێنە كرن، یانەیا ئاكرێ‌ تاكە نوونەرا پارێزگەهێ‌ یە د كۆما ئێكێ‌ دا دێ‌ ل كەركووكێ‌ بیتە مێڤانا یانەیا شەباب ئەلدۆر ل دەمژمێر چارێ‌ ئێڤاری، یانەیا ئاكرێ‌ سەرێ‌ لیستا كۆما خوە دهێت ب كۆمكرنا 12 خالان و دەربازبوونا خوە یا ئێكسەر بۆ خولا پلا دو یا ئیراقێ‌ مسۆگەر كرییە، یانەیا شەباب ئەلدۆز ل ڕێزا حەفتێ‌ و دووماهیێ‌ دهێت ب ئێك خال.
لدۆر بەرهەڤیێن تیما ئاكرێ‌ سوهەیب عەلی ئەندامێ‌ كارگێرییا یانەیێ‌ دیاركر تیما وان ژ هەر لایەكی ڤە یا بەرهەڤە بۆ یارییا ئەڤرۆ و ب مۆرالەكا بلند و ئامادەباشییەكا تەمام كریە، سوپاس بۆ خودێ چو یاریزانێن هنگافتی د ناڤ ڕێزێن تیما مە دا نینە و بەرهەڤن بۆ ب دەستڤەئینانا سێ خالێن یارییێ چیتە د ناڤ یاریگەها هەڤڕكا خۆ دا.
ناڤهاتی گۆتژی: هەرچەندە ئارمانجا سەرەكی یا یانەیێ د ڤی وەرزی دا بگەهیتە خولا پلە دو یا ئیراقێ بەلێ ئەنجامێن نایاب یێن ئاكرێ و سەركەفتنێن ل دووف ئێك،هیڤیێن جەماوەری پتر لێ كرینە سەركەفتنا د یارییا ئەڤرۆ دا دێ بیتە پێنگاڤەكا گرنگ بۆ پتر دلخۆشكرنا پشتەڤانێن یانەیێ و نێزیكبوون ل ناسناڤی، هەمی دەمان پشتەڤانێن ئاكرێ د دلێ دەستەیا كارگێری و یاریزانان دانە ئەم دێ د یاریگەهێ دا جەنگین دا كو وان دلخۆش بكەین، هەروەسا جەماوەری پشتڕاست دكەن وەكۆ چەوا هەتا نوكە كار بۆ ناسناڤی كریە بۆ قووناغێن بهێت ژی دێ ب هەمی هێزا خۆ شەڕی ل سەر ناسناڤی كەن.
پەیڤدارێ یانەیێ ئاشكراكر: ل دۆر سیستەمێ بڕێڤەچوونا خولێ دیار بوو كو هەتا ئەڤی وەرزی یاری ب شێوازێ كۆمەڵە هاتینە ئەنجامدان بەلێ هێشتا دیار نینە كا وەرزی داهاتی دێ ب چ شێواز بیت ل دۆر قۆناغا بهێت ژی هەتا نوكە هیچ ڕێكەفتەكا فەرمی بۆ دەسپێكرنا وێ نەهاتیە دیاركرن.

د دیدارەكێ‌ دا كوڕێ‌ باژێرێ‌ سێمێلێ‌ و یاریزانێ‌ یانەیا شورتە یا بەغدایی ڕێوان ئەمین دیار كر دوورئێخستنا وی ژ یاریێ‌ ب كارتا سۆر جهێ‌ حێبەتیێ دانایە و بڕیارا دادڤانی ب شاش بەرانبەر خوە هژمارتییە، ئەڤچەندە هات د یارییا تیما وان دا بەرانبەر یانەیا نەفت میسان د خولەكا 90+4ێ‌ دا ب كارتا سۆر هاتیە دوورئێخستن ئەوا یاری ب دو گۆلان وەكهەڤی ب دووماهی هاتی.
زێدەتر ڕێوان ئەمین گۆت: سەیرە دادڤانەكێ‌ نێڤدەولەتی بیت ئەو حالەتێ‌ چێبووی د ناڤ یاریگەهێ‌ دا بكەتە كارتا سۆر كو ددەمەكی دا یاریزانێ‌ یانەیا نەفت میسان دەستێ‌ من ب سەرۆچاڤێن وی نە كەڤت بوو بتنێ‌ نێزیكی مللێ‌ وی بوویە لێ‌ ب شێوەیەكێ‌ سەرسۆرمان و شانوگەری خۆ ئێخستە ئەردی و دەستێ‌ خوە ل دەفێ‌ خو دانا، ئەڤچەندە ژی بوویە جهێ‌ دلگرانییا هەموو پشتەڤانان كو دادڤان سەرباری چوویە پێش ڤارێ‌ لێ‌ یێ‌ ڕژد بوو كارتا سۆر بەرانبەری من بلند كر.
هەروەسان ناڤهاتی گۆت: هەموو شرۆڤەكارێن وەرزشی و شارەزایێن فوتبۆلێ‌ دوباتی ل سەر غەدر ل من هاتیە كرن و ژ هەژی كارتا سۆر نەبوویمە دبیت یا زەر ل دووڤ شرۆڤەكاران، لێ‌ بۆ من سەرنجراكێش بوو دادڤانەكێ‌ نێڤدەولەتی و بڕیارەكا بڤی شێوەیی بدەت، لەوما ژی مە داخواز كرییە ئەو كارتە بهێتە لادان.

شاهۆ فەرید:

ب فەرمی فدراسیۆنا باسکێت بۆلا ئیراقێ ژڤانێ خول و کۆپا ئیراقێ بۆ وەرزێ ئەڤ سالە ب شێوەیەکێ جودا دەستنیشانکر، پشتی د دووماهی کۆمبوونا خوە گەنگەشە ل سەر چاوانییا برێڤەبرنا وەرزێ نوو هاتە کرن کو ددەمەکی دا چو گڤاشتن ل سەر یاریزان و یانەیان نەهێتە کرن.
د داخویانیەکا تایبەت دا د.عەلی محەمەد ئەندامێ فدراسیونا باسکێت بۆلا ئیراقێ بۆ رۆژنامەیا ئەڤرۆ گۆت: بڕیار هاتەدا دویێ ئەیارا بهێت دەست ب چالاکیێن خوە بکەین و ئێکەم پێنگاڤ پشککێشان بۆ وەرزێ نوو یێ خولا پێشەکاران بهێتەکرن ل ئاڤاهیێ لژنا ئۆلمپیا ئیراقێ کو ب پشکدارییا ١٢ یانەیان پشتی ڕازیبوون ل سەر پشکداریا هەردو تیمێن سابێس و عومال نەینەوا، ئەڤ چەندە ژی وەکو دەلیڤەیەکە بۆ یانەیان بهێنە دناڤ خولا پیشەکاران و بەرفرەهکرنا ئاستێ ڤێ یاریێ.
ژلایەکێ دووڤە ناڤهاتی گۆت: ل دووڤ سیستەمێ ئەڤ سالە کو دێ جوا بیت ژ وەرزێن بۆری ژبەر کێمییا دەمی و کاودانێن نە چاڤەرێکری، هەر یانەیەکێ مافێ هەی چار یاریزانێن ئاستێ پیشەکاران بۆ بلندکرنا ئاستێ تیمێ و هەڤرکیێ بکەن، هەروەسان خول دو قووناغان دێ هێتەکرن، قووناغا ئێکی ژ ١٢ هەتا ١٦ مەها ئەیارێ هێنەکرن، تیم دێ هێنە بەلاڤکرن لسەر دو کومان، کوما ئێکی دێ یاریێن خوە ل باژێرێ کەرکووکێ کەن و یا دویی ل باژێرێ بەغدا کەن، قووناغا دویێ یا خولێ ژی ٢١ هەتا ٢٥ هەمان مەهـ بیت لێ جهێ یاریا هێشتا نە هاتیە دەستنیشانکرن.
د. عەلی گۆت: هەر یانەیەکا خوە ڤەکێشیت ژ خولا پێشەکارا بۆ وەرزێ ٢٠٢٥ – ٢٠٢٦ بەری راکێشانا تیروپشکی، پێرابوونێن یاسایی دێ ل بەرامبەر وێ تیمێ ئەنجامدان، لدووڤ لیستا سزادانێ ماددەیا ئەلیف دەقێ نڤیسارێ ئاماژەدایە پێ هەر یانەکا بەری دەستپێکرنا تیروپشکی خوە ڤەکێشیت دێ پاشڤەچیتە خولا پلەیا ئێک ، هەروەسان بڕیار لسەر یاریا کوپایێ ژی هاتەدان، یاریی دناڤبەرا تیما دیجلە ئەلجامعە و دیفاع ئەلمەدنی ل نەهێ ئەیارا بهێت ل پایتەختێ ئیراقێ بەغدا هێتە کرن.

ئەڤرۆ ل دەمژمێر 10ی شەڤ چاڤ هەموو دێ‌ بەر ب یاریگەها باخچەیێ‌ شازە ل پایتەختێ‌ فرەنسا پاریس چن، ژبۆ دیتنا ئێك ژ ب هێزترین یاریێن گەڕا پێش دووماهییا چامپیۆنز لیگ پاریس سانجێرمان خودانێن ئەردی بەرانبەر مێڤانا وێ‌ یانەیا بایرن میۆنخ یا ئەلمانی ژ چارچووڤەیێ‌ گەڕا ئێكێ‌ یا چوونێ‌ ژ قارەمانییا یانەیێن ئۆرۆپا قارەمانێن خولا چامپیۆنز لیگ.
ئارمانجا تۆلڤەكرنێ‌ و حەزا خوە سەپاندنێ‌
یانەیا پارێسی دێ‌ هێتە دناڤ یاریگەهێ‌ دا ب پشت گەرمی ب یاریگەهـ و پشتەڤانێن خوە و دێ‌ بزاڤێ‌ كەت ئەوێ‌ گرێیا فینالا 2020ێ‌ ڤەكەت دەمێ‌ بایرنێ‌ شیایی تووشی خوسارەتیێ‌ بكەت و ناسناڤی ب دەستخوەڤە بینیت، یانەیا فرەنسی دێ‌ پشت بەستنێ‌ ب ستێرێن خوە عوسمان دیمبلی هەلگرێ‌ تەپا زێری 2025ێ‌، یێ‌ جورجستانی خیفیتچا كفارتسخیلیا و برادلی باركۆلا، ڤیتینیا، جواو تێڤێز، ڤابیان رۆیو، ئەشرەف حەكیم و ماركینۆس.
ژلایێ‌ خوەڤە یانەیا بایرن میونخ دێ‌ ب چەكێ‌ هێز و مۆرالەكا بلند هێتە دناڤ یاریگەهێ‌ دا، ئەوا ب هژمارە د دیدارێن دناڤبەرا واندا هەشت سەركەڤتن بەرانبەر شەش سەركەڤتن بۆ پاریسێ‌ بووینە، بایرنا ئەڤ سالە ژ هەموو لایەكی ڤە یا بەرهەڤە بۆ ناسناڤی باشترین ئاست و ئەنجام هەنە، خودان پێكهاتییەكێ‌ ب هێز هەیە ژ یێ‌ ئەنگلتەرایێ‌ هاری كین، مایكل ئولیسێ، لویس دیاز، سێرجی غنابری، جەمال موسیالا، جواو كیمیچ و گۆلپارێزێ‌ خودان شیان مانوێل نویر.
ب فیركا دادڤانێ‌ سویسری
لژنەیا دادڤانان ل فدراسیۆنا فوتبۆلا ئۆرۆپا دادڤانێ‌ سویسری ساندرۆ شیرێر هەلبژارت بۆ بڕێڤەبرنا یاریێ‌، دادڤانێن ئیسپانی ئەنخێل نیفادۆ، جوادالوبێ‌ ئیۆسۆ دادڤانێن هاریكار.

د ڕاپۆرتەكا رۆژنامەڤانی دا یا پەیچێ‌ The Athletic هاتیە بەلاڤكرن پشتی كۆمپانیەكا بازاركرنا گشتی پێشتری مەهەكێ‌ كۆمەكا تكێتێن چوونا ژوورا یاریگەهێ‌ بۆ یارییا فینالا مۆندیالا جیهانی 2026ێ‌ كری بوون كو ل ئاستێ‌ پەلۆكێن نمرە ئێك ئەوا دێ‌ ل یاریگەها میتلایڤ ل ویلایەتا نیۆجێرسی ئەوا دێ‌ ل 19ێ‌ تەمووزا بهێت هێتە كرن، د نوكە دا ئێك تكێت ب دو ملیۆن و 300 هزار دۆلاران دانایە بەر فرۆتنێ‌.
هەروەسان دیاركر، هەر دناڤا یاریگەهێ‌ دا هندەك تكێت دی هەنە كۆ پەلۆكێن وان دكەڤنە بەرانبەری وان ل لایێ‌ دی یێ یاریگەهێ‌ بۆ ئێك كەس بتنێ‌ ب 16 هزار دۆلاران هاتیە فرۆتن، هەرچەندە فدراسیۆنا فوتبۆلا جیهانێ‌ مایتیكرنێ‌ دڤێ‌ بوهایی دا ناكەت ژبەركو ل ئەمریكا یا یاسایی یە لێ‌ بۆ فرۆتنا هەر تكێتەكێ‌ ڕێژەیا 15% وەردگریت.