رێباز حەملان، هاریكارێ سەرۆكێ حوكمەتا هەرێما كوردستانێ د داخۆیانییەكا رۆژنامەڤانی دا راگەهاند، «پێشتر ل سەر وی بنگەهی كا دێ چەوا حوكمەتا هەرێما كوردستانێ بەرەڤ پێشڤەچیت رێككەفتن هەبوویە، ب تنێ ل سەر چەند پۆستێن بلند رێككەفتن نەهاتیە كرن». هەروەسا ب دوور ژی زانی كو ل ڤان نێزیكان چو كۆمبوون د ئاستێن بلند دا د ناڤبەرا پارتی و ئێكەتیێ دا بۆ پێكئینانا حوكمەتێ بهێنە ئەنجامدان.
رێباز حەملان ئاماژە ب وێ چەندێ دا «ئەو ئاخڤتنێن ل سلێمانیێ ل سەر بابەتێ پێكئینانا حوكمەتێ دهێنە كرن، ل دەرڤەی وان دانوستاندنانە یێن كو پێشتر هاتینە كرن». و ئاشكرا ژی كر، «پارتی دیموكراتی كوردستان دانوستاندنێن سەرەكی ل گەل ئێكەتییا نیشتیمانییا كوردستانێ كرینە ب پێی بەركەفتێ كورسیێن وان و پتر ژی پۆست بۆ هاتینە دەستنیشان كرن، لێ ئەو نوكە باسێ ئینانە پێش یا هندەك لیستێن دی دكەن، ئەڤە ژی د چارچۆڤەیێ وان دانوستاندنان دا نەبوویە یێن ل گەل پارتی هاتینە كرن.»
دەربارەی پاشەڕۆژا پرۆسەیێ ژی دیار كر، «هەكە بڤێت حوكمەت بهێتە پێكئینان، دێ پێتڤی بیت ڤەگەڕنە سەر بنگەهێ رێككەفتنان. هەكە بابەتێ وێ چەندێ ژی بهێتە باسكرن كو ژ ڤێ پتر بهێتە پاشئێخستن و هەلبژارتن بهێنە دووبارە كرن، پارتی دیموكراتی كوردستان ئەڤ جارە گەلەك ژ جاران پتر یا بەرهەڤە بۆ دووبارەكرنا هەلبژارتنان ب رێكا كۆمسیۆنا بلند یا ئیراقێ».

پەیڤدارێ فراكسیۆنا پارتی ل جڤاتا نوونەرێن ئیراقێ دوپات دكەت، كو هەبوونا وان د جڤاتێ دا ب رامانا هەبوونا كوردان دهێت د وی دەزگەهی دا، و بەرنامەیێن وان ژی خزمەتا هەموو ئیراقێ دكەن. دبێژیت ژی: حوكمەتا ئیراقێ شیانێن پاراستنا ئاسایشا وەلاتیێن خۆ و هەرێما كوردستانێ نینن.
دانەر عەبدولغەفار، پەیڤدارێ فراكسیۆنا پارتی ل جڤاتا نوونەرێن ئیراقێ، راگەهاند: «بڕیار بوو دوهی ئێكشەمبی شاندەكێ جڤاتا نوونەرێن ئیراقێ سەرەدانا هەرێما كوردستانێ بكەت بۆ كۆمبوونێ ل گەل پارتی، لێ ژبەر ئێكلاینەبوونا بەربژارێ پۆستێ سەرۆكێ وەزیران سەرەدان هاتە پاشئێخستن».
هەمان دەم دبێژیت: ئەم رێزێ ل دەستپێشخەرییا شاندا جڤاتا نوونەرێن ئیراقێ دگرین. دوپاتی ل سەر وێ چەندێ ژی كر كو، هەبوونا پارتی د جڤاتا نوونەرێن ئیراقێ دا ب رامانا هەبوونا كوردان دهێت د دەزگەهێن وی وەلاتی دا.
دەربارەی دابەشكرنا پۆستان و پرسا وەكهەڤیێ، پەیڤدارێ فراكسیۆنا پارتی رۆهنكر، كو پارتی لد دەستپێكێ پێداگیر نەبوو ل سەر وەرگرتنا پۆستێ سەرۆككۆماری، لێ رەوشا روودانان و سەرەدەریكرنا ل گەل پۆستێن دی دیار دكەت كو «ئەم بەرەڤ ئاراستەیەكێ دچین كو بالانسا پێكهاتەیان ل وەلاتی ل بەرچاڤ ناهێتە وەرگرتن».
د پشكەكا دی یا ئاخفتنێن خۆ دا، پەیڤدارێ فراكسیۆنا پارتی بەرسڤا وان تۆمەتان دا كو ددانە پاڵ كوردان و گۆت: «د دەستپێكێ دا ئالیێن سیاسی یێن ئیراقێ وەسا بەلاڤ دكر كو كورد ئەگەرێن پەككەفتنا پرۆسەیا سیاسی یا ئیراقێ نە، لێ نوكە هەموو دبینن كو ئالی د ناڤبەرا خۆ دا ل سەر پۆستێ سەرۆكێ وەزیران پێكناهێن. بۆ هەموویان رۆهن بوویە كو كێشە ل دەف كوردان نینە، بەلكو كێشەیا سەرەكی د ناڤا (چارچۆڤەیێ هەماهەنگیێ) دایە كو نەشێن ل سەر بەربژارەكێ رێكبكەڤن».
دانەر عەبدولغەفار هۆشداری دا ژ تێكچوونا بنەمایێن دەولەتداریێ ل ئیراقێ و دوپات كر: «بنەمایێن هەڤپشكی و وەكوهەڤیێ د وی وەلاتی دا نەماینە، هەروەسا د ناڤ هەموو دەزگەهێن ئیراقێ دا هەڤسەنگی نەماینە و رێز ل مافێن پێكهاتەیان ناهێتە گرتن، ئەڤە ژی دەستپێكەكا مەترسیدارە ل سەر پاشەڕۆژا وەلاتی».
گۆت ژی: پارتی دیموكراتی كوردستان هەردەم دوپاتیێ ل سەر بجهئینانا دەستووری دكەت و ئەو بەرنامە و ستراتیژییا هەیی بۆ خزمەتا هەموو ئیراقێ یە، نەك تنێ هەرێما كوردستانێ».
ناڤبری درۆناهیئێخستە سەر رەوشا خراب یا ئیراقێ وەلاتی و راگەهاند: «ئیراق ژئالیێ دارایی و ئەمنی ڤە د رەوشەكا گەلەك دژوار دایە؛ حوكمەت نەشێت وەلاتیێن خۆ بپارێزیت و شیانێن پاراستنا هەرێما كوردستانێ ژی نینن، كو رۆژانە ب درۆن و مووشەكان هێرش دهێنە سەر».

زنار تۆڤی:

ئەندامەكێ جڤاتا نوونەرێن ئیراقێ ئاشكرا كر كو فراكسیۆنا پارتی دیموكراتی كوردستان ل جڤاتا نوونەرێن ئیراقێ بایكۆتا روونشتنان كریە، و نوكە زۆربەیا فراكسیۆن و لیستێن ئیراقی دخوازن پارتی ڤەگەریتەڤە ناڤ جڤاتا نوونەران. ناڤهاتی ئاماژە ب وێ چەندێ ژی كر كو پێدڤی بوو ئەو لایەنە پێشتر ل سەر وێ چەندێ د ئاگەهدار بان كو نابیت مەزنترین دەزگەهێ یاسادانانێ بۆ ململانێیێن سیاسی بهێتە بكارئینان.
د. زیرەك زێباری، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان ل بەغدا، گۆت: «نوكە پترییا فراكسیۆنێن جڤاتا نوونەران تێگەهشتینە كو بكارئینانا پرەنسیپێ ‹زۆرینەیێ› بۆ ئێكلاكرنا پۆستێ سەرۆككۆمارێ ئیراقێ و ململانێیێن سیاسی، پێگەهێ جڤاتا نوونەران ئێخستییە ژێر پرسیارێ.»
زێدەتر گۆت: «هەر هێزەكا بڤێت ب زۆرینەیا سیاسی جڤاتا نوونەران بڕێڤە ببەت دێ تووشی شكەستنێ بیت، چونكی ل دووماهییێ پشكەك ژ پۆستێن ئیراقێ پشكێن پێكهاتەیانە و نابیت ب زۆرینەیا سیاسی بڕیار ل سەر بهێتە دان. لەوما پشتی بكارئینانا ڤێ زۆرینەیێ بۆ پۆستێ سەرۆككۆماری، پارتی بایكۆتا جڤاتا نوونەران كر، داكو ئالی تێبگەهن كو پشتگوهخستنا لهەڤهاتنێ‌، باوەرییا سیاسی د ناڤبەرا هێزان دا ژ ناڤ دبەت و كاریگەرییەكا خراپ ل سەر پرۆسەیا سیاسی دروست دكەت.»
د. زیرەك زێباری دیار كر ژی كو پترییا حزب و فراكسیۆنان بڕیار دایە سەرەدانا پارتی دیموكراتی كوردستان بكەن داكو پارتی د بڕیارا خۆ یا بایكۆتێ دا بچیتەڤە. وی گۆت ژی: «پێدڤی بوو وان ئالییان بەری هەلبژارتنا سەرۆككۆماری هزر ل وێ چەندێ كربا كو ئاڤاكرنا باوەریێ د ناڤبەرا ئالیێن سیاسی دا كارەكێ گەلەك مەزنە و نابیت ب سادەیی یاری پێ بهێتە كرن. ئەڤ جۆرە ململانێیە دبیتە ئەگەرێ دروستبوونا نەهەڤسەنگییا سیاسی؛ هەكە ئەڤرۆ پارتی بایكۆت كر، دبیت سوبەهی هێزێن دی ژی هەمان هەلوەست هەبیت، ئەڤە ژی دێ پرۆسەیا سیاسی ل ئیراقی ئیفلیج كەت».