جەماوەر و پشتەڤانێن وەرزشی یێن یانەیا دهۆكێ‌ ئەڤرۆ ل دەمژمێر 6:30 بەری مەغرەب چاڤەڕێ‌ پێنگاڤا ئێكێ‌ نە یا تما خوە د خولا ستێرێن ئیراقێ‌ دا بۆ وەرزێ‌ نوو 2026-2027 دەمێ‌ ل یاریگەها خوە مێڤاندارییا یانەیا ئەلغراف یا باشۆرێ‌ ئیراقێ‌ كەت ژ چارچووڤەیێ گەڕا ئێكێ‌ ژ خولێ‌ ئەوا دهێتە پێشبینیكرن هژمارەكا ئێكجار زوور بەرهەڤبن، بڕیارە ئەڤرۆ شورتە ژی یارییا خوە بەرانبەر یانەیا كەربەلا بكەت ئەوا دێ‌ دەمژمێر نەهی شەڤ هێتە كرن.
بیرەوەرییا 16 تەباخێ‌ هاتنا جەماوەری بێ‌ بەرانبەرە
ب هەلكەفتا 16ێ‌ تەباخێ‌ 80یەمین سالیادا دامەزراندنا پارتی دیموكراتی كوردستان، گەنجێ‌ ژێهاتی ئارین مەسرۆر بارزانی پلێتێن یارییا ئەڤرۆ یا یانەیا دهۆك بەرانبەر یانەیا ئەلغرافە ب ستۆیێ خوەڤە گرتیە وەكو دیارییە پێشێشی جەماوەری كرییە، هەر بۆ زانین د یاریێن هەر یانەیێن هەولێر بەرانبەر كارەبا و زاخۆ بەرانبەر غاز ئەلشیمال ژی وەكو دیاری پێشكێشی جەماوەرێن وان كرینە.
بۆ تۆلڤەكرنێ‌ بەرهەڤن
تیما یانەیا دهۆك دێ‌ هێتە دناڤ یاریگەهێ‌ دا ب پشت گەرمییا جەماوەرێ‌ خوە و چاڤێ‌ وێ‌ ل سێ‌ خالانە و تۆلڤەكرنا وەرزێ‌ بۆری یە كو دو جاران بەرانبەری ئێك بووینە و دهۆك نە شیایە ب سەركەڤیت، د یارییا ئێكێ‌ دا ل یاریگەها وێ‌ 4-3 تووشی خوسارەتیێ بوو، لێ‌ د یارییا دویێ دا ب گۆلەكێ‌ وەكهەڤبوو، یارییا ئەڤرۆ بۆ ئەلهۆیێن چیا وەكو تۆلڤەكرنەكێ‌ یە و هزر د سەركەڤتنا ئێكێ‌ دا بكەن.
ڕاهێنەر ب ئۆمێدە
د پرێسكۆنفرانسێ‌ رۆژنامەڤانی دا یەحیا گۆل محەمەد ڕاهێنەرێ‌ تیما یانەیا دهۆكێ‌ گۆت: پێنەڤێت دەستپێكا هەر وەرزەكێ‌ خولێ‌ بۆ هەر یانەیەكێ‌ ب سانەهی نابیت، سەرباری هەموو یانەیان بەرهەڤیێن خوە كرینە و مە ژی ل دووڤ پلانێن خوە بەرهەڤی كرینە، یانەیا ئەلغراف ئێك ژ یانەیێن باشە د خولێ‌ دا، ل وەرزێ‌ بۆری دەستپێكەكا ب هێز هەبوو و هەڤڕكا پێشیێ بوو، یارییا ئێكێ‌ یە و ل یاریگەها مەیە ب ئۆمێدین دلێ‌ جەماوەرێ‌ خوە خوەشبكەین و شادبن بگەهینە سێ‌ خالان.
پێكهاتیێ یانەیا دهۆكێ‌؟
بۆ وەرزێ‌ نوو یێ‌ خولا ستێرێن ئیراقێ‌ تیما یانەیا دهۆك دێ‌ پشت بەستنێ‌ ل سەر پێكهاتییەكێ‌ نووتر ژ وەرزێ‌ بۆری دكەت و بڤی شێوەیی، گۆلپارێزان سەعەد كەمیل، ئەحمەد بەشار، زانا جوزەل، یاریزانان بەیار ئەبۆبەكر، بلند ئازاد، ئەحمەد عەلی، یوسف ئیمام، سیابەند عەگید، ژیار ئیبراهیم، مستەفا نەواف، حەسەن عیماد و سەفا هادی، مەناف یونس، ڕێوان ئەمین، یونس حەموود، مەحموود مەواس، هادی سالح، رەزا ماجی، كارسان دۆسكی، ڕایكار سانتۆس، ئیكۆر هێنریك، سان مستەفا، سینا ئەسەدبەگ، محەمەد ڕەزا و ئاواد ئازاد و ئاسۆ رۆستەم.
ئەو یانەیێن ناسناڤ ب دەستڤە ئیناین.
هەر ژ دەستپێكا خولا فوتبۆلا ئیراقێ‌ ئەوا ل سالا 1974ێ‌ بووی و هەتا وەرزێ‌ بۆری 11 یانەیان شیاینە ناسناڤێ‌ خولا ئیراقێ‌ چو ب ناڤێ‌ نایاب یان ژی ستێرێن ئیراقێ‌ ب دەستڤە ئیناینە و بڤی شێوەیی، زەورا 14 ناسناڤ كو پترترین جاران بوویە قارەمان، جەوییە(9) جاران، شورتە(8) جاران، تەلەبە(5) جاران، هەولێر(4) جاران، ئەلرەشید(3) جاران، دیسان هەر ئێك ژ یانەیێن دهۆك، مینا، سەلاحەدین، جەیش و نەفت ئەلوەست جارەكێ‌ یا ب دەستڤە ئینایی.

چاڤەڕێ دهێتە كرن ئەڤرۆ دێ‌ دەست ب هەڤڕكیێن وەرزێ‌ نوو یا قارەمانییا باسكێت بۆلا ئیراقێ‌ ل سەر ئاستێ‌ كچان ل باژێرێ‌ مووسلێ‌ هێتە كرن، ئەوا دێ‌ ب پشكدارییا 12 یانەیان بیت، كچێن سەنحاریب ژ پارێزگەها دهۆكێ‌ دێ‌ پشكداربیت.
لدۆر ڤێ‌ یەكێ‌ داود ڕەبەن سەرۆكێ‌ یانەیا سەنحاریب بۆ ئەڤرۆ گۆت: بۆ وەرزێ‌ نوو وەكو نوونەرا پارێزگەهێ‌ دێ‌ پشكداریێ د خولا ئیراقێ‌ دا كەین ئەوا 12 یانە پشكدارن و سیستەمێ‌ وێ‌ هاتینە بەلاڤكرن ل سەر چار كۆمان، یاریێن وێ‌ دێ‌ ب شێوەیێ خول ئێك قووناغ هێنە كرن، سەركەڤتیێن هەر كۆمەكێ‌ ئێكسەر دەربازبنە قووناغا چارگۆشەیا زێرن، ئەڤرۆ ل دەمژمێر پێنجی ئێڤاری دێ‌ ئێكەم یارییا خوە بەرانبەر دەربەندیخان كەین، ژبۆ مسۆگەركرنا پلێتا دەربازبوونێ‌ دڤێت چو یارییان خوسارەت نەبین لەوما ژی هەر یارییەك بۆ مە فینالە.
هەروەسان ناڤهاتی گۆت: ئەو تیمێن پشكدار پرانییا وان یاریزانێن خودان شیان هەنە و سەربۆرن ژ وانا ئەكاد، قەرەقووش، غازئەلشیمال، لێ‌ مە ژی ب شێوەیەكێ‌ گەلەك باش خوە بەرهەڤكرییە و پشت گەرمی ب كچێن باژێرێ‌ خوە كریە، ب هیڤییا وێ‌ یەكێ‌ بشێن ئەوا پێدڤی بكەن و ب ناسناڤەكی ژ قارەمانیێ ڤەگەرن.