د چارچۆڤێ پڕۆژە و كارنامەیا كابینەیا نەهێ یا حكومەتا هەرێما كوردستانێ دا بۆ ئاڤەدانكرن و گەشەپێدانا دەڤەران، دكتۆر عەلی تەتەر، پارێزگارێ دهۆكێ دوهی 18/5/2026 سەرەدانا دەڤەرداریا ئاكرێ كر و بەرێ بنیاتێ پڕۆژەیەكێ نوو یێ ئاكنجیبوونێ و وەبەرهێنانێ دانا.
دكتۆر عەلی تەتەر، پارێزگارێ دهۆكێ د كۆنگرەكێ رۆژنامەڤانی راگەهاند: خۆشحالم كو ل ئاكرێ مە بۆ دانانا بەرێ بنیاتێ پڕۆژەیێ «نیو ئاكرێ» وەكو پڕۆژەیەكێ نوو یێ وەبەرهێنانێ ل دەرگەهێ رۆژئاڤایێ ئاكرێ دهێتە ئەنجامدان كو تەمامكەرێ پڕۆژەیێ سەركەفتی یێ نێرگزلاندە.
دكتۆر عەلی تەتەر گۆت: «پێدڤییە باژێرێ كەڤن ب ڕەسەناتیا خۆ ڤە بهێتە پاراستن د هەمان دەم دا ژی پڕۆژەیێن نوو و سەردەمیانە بۆ خزمەتا وەلاتییان بهێنە ئاڤاكرن».
پارێزگاری جەخت ل سەر وێ یەكێ كر كو ل ژێر سەرپەرشتیا مەسرور بارزانی، سەرۆكێ حكومەتا هەرێما كوردستانێ گرنگیەكا مەزن ب كەرتێ وەبەرهێنانێ هاتیە دان و هەموو ئاسانكاریێن یاسایی و كارگێڕی یێن بلەز بۆ وەبەرهێنەران هاتینە كرن، دا كو بشێن پڕۆژەیێن سەردەمیانە ئەنجام بدەن، ل سەر شێوازێ كاركرنێ ژی ئەڤ پڕۆژەیە ل سەر بنەمایێ هەڤپشكیێ د ناڤبەرا كەرتێ گشتی حكومەت و كەرتێ تایبەت دا دهێنە بجهئینان، ب ڕەنگەكی، كو ئەركێ حكومەتێ دابینكرنا ئەردییە و گەهاندنا خزمەتگوزاریێن سەرەكی یە و ئەركێ وەبەرهێنەری ژی ئاڤاكرنا پڕۆژەیانە ب كوالێتیەكا بلند.
دكتۆر عەلی تەتەر داخواز ژ وەبەرهێنەرێن دەڤەرا ئاكرێ كر كو خۆ پتر ل باژێرێ خۆ بكەنە خودان، ب تایبەت پشتی ئاكرێ وەكو پایتەختێ نەورۆزێ هاتیە ناساندن و پێگەهێ وێ یێ جیهانی و ناڤخۆیی پتر ڕەنگڤەدان دایە ئاكرێ، دیسا حكومەت دێ یا بەردەوام بیت ل سەر بجهئینانا پڕۆژەیێن خزمەتگوزاری یێن پتر و مەزنتر بۆ دەڤەرداریا ئاكرێ‌.
پارێزگارێ دهۆكێ ئاشكرا كر كو ئەو پڕۆژەیێن ژ لایێ كارگێڕی ڤە هاتبوونە داخوازكرن، پتریا وان هاتینە بجهئینان، بەلێ ژ بەر ڕەوشا ئەمنی و هێزێن چەكدار وەكو پێدڤی نەهاتینە ئاڤەدانكرن، ئەگەر پرۆسەیا ئاشتیێ ل دەڤەرێ بهێتە بجهئینان، دێ دەلیڤە بۆ ئەنجامدانا پڕۆژەیێن مەزنتر پتر خۆش بیت.

هەولێر، قائید میرۆ:

وەزیرێ ساخلەمیێ ل حوكمەتا هەرێما كوردستانێ ئاشكرا كر، هەتا نوكە چو حالەتێن ڤایرۆسێ‌ «هانتا» ل هەرێما كوردستانێ نەهاتینە تۆماركرن و دبێژیت: وەزارەتا ساخلەمیێ ل گەل رێكخراوا ساخلەمیا جیهانی چاڤدێریا رەوشێ دكەن.
دكتۆر سامان بەرزنجی، وەزیرێ ساخلەمیێ بۆ رۆژناما ئەڤرۆ دیاركر، پشتی بەلاڤبوونا ڤایرۆسێ‌ «هانتا» ل هندەك وەلاتێن جیهانێ و گۆت: «مە ل هەرێما كوردستانێ بەرهەڤی كرینە و نوكە ئەم ل گەل رێكخراوا ساخلەمیا جیهانی یێ چاڤدێریا رەوشێ دكەین، بەلێ هەتا نوكە چو حالەت ل هەرێما كوردستانێ نەهاتینە تۆماركرن، دیسا مە ل هەموو پارێزگەه و ئیدارەیێن سەربخۆ بەرهەڤیێن باش كرینە بۆ بەرهنگاربوونا ڤایرۆسێ‌ هانتا، لایەنێن پەیوەندیدار یێن حوكمەتا هەرێمێ بەردەوام دووڤچوونا رەوشێ دكەن، ب مەرەما خۆ پاراستنێ».
دكتۆر سامان بەرزنجی گۆت ژی: «ڤایرۆسێ‌ هانتا زێدەتر ب رێیا گیانەوێن قڕكەر، وەكی: مشك و جرجا دهێتە ڤەگوهاستن و پێدڤیە وەلاتی هشیاربن ل دەركەفتنا نیشانێن ئەڤی ڤایرۆسی، چونكی باشترین رێك بۆ بەرهنگاربوونا هەر ڤایرۆسەكی خۆپاراستنە، سالانە ڤایرۆسێ‌ هانتا ل جیهانێ پەیدا دبیت و ل گورەی ئامارێن رێكخراوا ساخلەمیا جیهانی رێژەیا مرنێ ژی یا بلندە».

دهۆك، دلۆڤان ئاكرەیی:

ڕێڤەبەرێ گشتیێ وەبەرهێنانێ ل پارێزگەها دهۆكێ دیاركر، ماستەرپلانەكا تایبەت ب پڕۆژەیێن گەشتیاری بۆ چیایێ زاوا هاتیە دروستكرن، هەڤدەم ماستەرپلانەكا دی ژی بۆ دەڤەرا بەنداڤا دهۆكێ و ئەو كۆڕنیشێ ل وێرێ دهێتە چێكرن، هاتیە ئامادەكرن، ئەڤە ژی دێ بیتە ئەگەرێ ڕێخۆشكرنێ بۆ ئەنجامدانا چەندین پڕۆژەیێن دی یێن گەشتیاری ل دەڤەرێ.
دكتۆر هەڤال سەدیق، ڕێڤەبەرێ گشتیێ وەبەرهێنانێ ل پارێزگەها دهۆكێ بۆ ڕۆژنامەیا ئەڤرۆ گۆت: «ئەم ل دۆر پڕۆژەیێن گەشتیاری یێن چیایێ زاوا، ل گەل لایەنێن پەیوەندیدار كار دكەین، داكو ب شێوازەكێ زۆر ڕێكوپێك بهێنە ڕێكخستن و ل دەڤەرێن ئامێدیێ و سەرسنكێ ژی چەندین پڕۆژەیێن ستراتیژی هەنە؛ مە مۆلەت داینە هندەك ژ وان پڕۆژەیان و ب دووماهی هاتینە، لێ د هەمان دەم دا چەندین پڕۆژەیێن دی یێن گەشتیاری یێن زۆر گرنگ ل بەردەستن، كو كار بۆ هندێ دهێتە كرن ل وان دەڤەران بهێنە بجهئینان».

زاخۆ، دلۆڤان هالۆ:

ب سەرپەرشتیا مشیر محەمەد، دەڤەردارێ زاخۆ و ب ئامادەبوونا هەموو لایەنێن پەیوەندیدار، دوهی 18/5/2026 كۆمبوونەكا تایبەت ل دیوانا دەڤەرداریا زاخۆ هاتە ئەنجامدان ب مەرەما پاراستنا سیمایێ شارستانی یێ‌ زاخۆ و ڕێگریكرن بۆ نەهێلانا دیاردەیا زێدەگاڤیان ل سنۆرێ ئیدارەیا سەربخوە یا زاخۆ.
د كۆمبوونێ دا بڕیارێن توند هاتنەدان، پێدڤیە چاڤدێریكرنەكا توند و دووڤچوونا بەردەوام بۆ هەموو زێدەگاڤیان بهێتە كرن، ب تایبەت ئەو زێدەگاڤیێن دبنە ئەگەرێ بەرتەنگكرنا شۆستە و جاددەیێن گشتی ل سنۆرێ هەر سێ ناوچەداریێن سەر ب دەڤەرداریا زاخۆ ڤە و هەموو باژێڕڤانیان.
د هەمان دەم دا تەكەزی ل سەر وێ چەندێ هاتە كرن، كو ڕێكارێن یاسایی یێن پێدڤی بەرامبەر هەر سەرپێچیكارەكی بهێنە وەرگرتن، و ب چو شێوەیان چاڤنقاندن ل پێشێلكاریان د مافێ‌ گشتی یێ وەلاتیان دا نەهێتە كرن.

هەولێر، قائید میرۆ:

دەڤەردارێ‌ ئاكرێ ئاشكرا كر، ل سالێن بۆری هەژمارەكا پڕۆژەیێن ستراتیژی یێن كەرتێ وەبەرهێنانێ هاتینە ئەنجامدان و دبێژیت: مە ل دۆر خانیێن كەڤن یێن ئاكرێ داخوازەك پێشكەشی سەرۆكایەتیا جڤاتا وەزیران كریە.
دكتۆر دلاوەر بوزۆ، دەڤەردارێ‌ ئاكرێ بۆ رۆژناما ئەڤرۆ دیاركر، ل سالێن بۆری چەندین پڕۆژەیێن خزمەتگوزاری ل دەڤەرا ئاكرێ هاتینە ئەنجامدان و بەردەوام ژی خزمەتگوزاری پێشكێشی وەلاتیان دهێنە كرن و گۆت: «ژ لایێ كەرتێ وەبەرهێنانێ ڤە هندەك پڕۆژەیێن ستراتیژی ل ئاكرێ هاتینە ئەنجامدان، ژ وان ژی: پڕۆژەیێ عەلاوا ئاكرێ، پڕۆژەیێ پیشەسازیا ئاكرێ و نوكە ژی باژێڕێ یاریا دهێتە ئەنجامدان».
ل دۆر خانیێن كەڤن یێن ئاكرێ دكتۆر دلاوەر گۆت: «خانیێن كەڤن یێن ئاكرێ بووینە كەلتوورێ باژێڕێ و هەركەسەكێ بڤێت خانیێ خوە سەخبێر بكەت، دڤێت ل گورەی مەرجێن حوكمەتێ بیت، ئەو ژی لسەر شێوازێ بەرێ بهێتە سەخبێركرن، هەروەسا مە پڕۆژەیەك ژی ل دۆر خانێن كەڤن یێن ئاكرێ دایە سەرۆكایەتیا جڤاتا وەزیران».