ئەڤرۆ نیوز، لەزگین جوقی:
بەرپرسی ھوبا پلان دانانێ ل فەرمانگەھا ژینگەھا دھۆکێ بۆ ئەڤرۆ نیوز دیارکر کو بۆ پاقژ راگرتنا ژینگەھا دھۆکێ مە پیشنیاز کریە سیستەمێ کارکرنا تەکسیان ل سەرانسەری پارێزگەھا دھۆکێ بھێتە گۆھورێن.
فازل رەشید مەحمود، بەرپرسی ھوبا پلان دانانی ل فەرمانگەھا ژینگەھا دھۆکێ بۆ ئەڤرۆ نیوز دیارکر کو پشتی مە دیتی زێدەبوونا ھژمارا ترۆمبێلان لدھۆکێ ئەگەری پیسبوونا ژینگەھی یە لەورا مە داخواز کریە ھاتن وچوونا ترۆمبێلان بھێتە رێکخستن بتایبەتی تەکسی ژمارا کت وجوت بھێتە بکارئینان بۆ ھاتن وچوونی ل دھۆکێ ب مەرەما پتر پاقژ راگرتنا ژینگەھی نوکە ھندەک یەکێن پشکنینا ھەوایی ل دھۆکێ ھاتینە دانان دێ ھندەک ژی ھێنە دانان بۆ زانینیا رێژا پاقژیا ھەوایی دھۆکێ نوکە ژی بەھرا پتریا پیسبوونا ھەوایی و ژینگەھێ ل دھۆکێ بۆ زێدەبوونا ترۆمبێلان ڤەدگەریت.
ئاشکەرا کر کو مە ھەول دایە دەستەیا ھەماھەنگیێ بۆ ژینگەھێ د ناڤبەرا ئەلمانیا و کوردستانێ دا بھێتە دانان بۆ پتر پشڤەبرنا ژینگەھا دەڤەری، پشتی ھژمارەکا ئەندازیارێن فەرمانگەھا ژینگەھا دھۆکێ چووینە وەلاتی ئەلمانیا بۆ مەشقدان وراھێنانی ل سەر ژینگەھی وی وەلاتی ھندەک یەکێن پشکنینا ھەوایی ب دیاری پێشکیشی دھۆکێ کرینە نوکە ژی ئەڤ یەکێن پشکنینی یێ دھێن دی دھۆک وھندەک دەڤەرێن دی ھێنە دانان دووڤ ستاندەرێن جیھانی ژی ھەتا نوکە ھەوایی پارێزگەھا دھۆکێ گەلەک یێ پاقژە.

ئەڤرۆنیۆز، ئەمیر ئەترووشی:

رێڤەبەرێ گشتیێ دیوانا وەزارەتا ناڤخۆ راگەھاند، مە وەکو وەزارەتا ناڤخۆ ب تنێ ٦٠ رۆژ مۆلەت داینە پارزینگەھێن نەقانوونی بۆ ھندێ ھەموو بھێنە داخستن و ئەگەر بریارا مە بجە نەئینن دێ تووشی لێپرسینێ بن.
د. سامی جەلال فقیەدین، رێڤەبەرێ گشتیێ دیوانا وەزارەتا ناڤخۆ تایبەت بۆ ئەڤرۆنیۆز دیار کر، ل ھەرێما کوردستانێ ١٦٤ پارزینگەھێن نەقانوونی ھەنە و مە ب نڤیسارێن فەرمی ھەموو ئەو پارزینگەھێن نەقانوونی ئاگەھدارکرینە کو د ماوەیێ ٦٠ رۆژان دا دەرگەھێ پارزینگەھێن خوە بدائێخن و ھەر پارزینگەھەکا بریارا مە بجھنەئینیت، دێ ھێزێن ناڤخۆ ھنێرینە سەر جھێ وی و دێ پارزینگەھا وی دائێخین و خودانێ وێ ژی دەینە دادگەھێ.
د. سامی ئاشکرا ژی کر کو لیژنەیەک ل وەزارەتا ناڤخۆ ھاتیە پێکئینان بۆ دووڤچوونا داخستنا وان پارزینگەھێن نەقانوونی و ئەڤ ١٦٤ پارزینگەھێن نەقانوونی ل ھەر سێ پارێزگەھێن ھەرێما کوردستانێ ھەنە و گۆت: چو دەلیڤە ب وان پارزینگەھێن نەقانوونی ناھێتە دان بمینن و چو رێ ژی ل بەر وان ناھێنە ڤەکرن ئەڤ جارەکا دی دەستبکاربنەڤە.

ئەڤرۆ نیوز، نیوار محەمەد سەلیم:‏

رێڤەبەریا سەقاناسی و بیڤەلەرزێ ل پارێزگەھا دھۆکێ دیارکر کو ئەڤ سالە 194.4ملم بارانێ ‏بارینە و جوداھیەکا زۆر ل گەل سالا بۆری ھەیە کو ھەتا ڤی دەمی ب تنێ 38.4ملم باریبوون.‏

ئومێد مەعسوم مای، رێڤەبەرێ سەقاناسی و بیڤەلەرزێ ل پارێزگەھا دھۆکێ د داخۆیانیەکێ دا ‏بۆ ئەڤرۆ نیوز گۆت: “رێژا باران بارینێ وەکو ھەڤبەرکی ل گەل سالا بۆری گەلەک باشترە”.‏

گۆتژی: “ل سەنتەرێ پارێزگەھا دھۆکێ ھەتا نھا 194.4ملم بارانێ بارینە و ل سالا بۆری ھەتا ‏ڤی دەمی ب تنێ 34.4ملم بارانێ باری بوون، ئانکو ئەڤ سالە 156ملم بارانێ زێدەتر بارینە”.‏

رێڤەبەرێ سەقاناسی و بیڤەلەرزێ ل پارێزگەھا دھۆکێ ئاشکەرا ژی کر کو ل ھەموو دەڤەرێن ‏پارێزگەھا دھۆکێ رەوشا باران بارینێ گەلەک ژ سالا بۆری باشترە ب رەنگەکی ل قەزا زاخۆ ھەتا ‏نوکە 168.6ملم باران باریە و ل سالا بۆری 39.1ملم باران باریبوو، جوداھی 129.5ملم بارانێ ‏نە.‏

خۆیا کر کو ل قەزا ئاکرێ ژی ھەتا نھا 191ملم بارانێ بارینە و سالا بۆری ب تنێ ھەتا نھا ‏‏10ملم بارانێ باریبوون، جوداھی ژی دبیتە 149.4ملم بارانێ. ل قەزا سێمێلێ ژی ھەتا نھا ‏‏180ملم بارانێ بارینە و ل سالا بۆری 34.8ملم باران باری بوو، جوداھی ژی 145.2ملم بارانێ ‏نە.‏

دەربارەیی ئامێدیێ ژی گۆت: “ھەتا نھا 217ملم بارانێ بارینە و سالا بۆری 86ملم بارانێ ‏باریبوون، جوداھی ژی دبیتە 131ملم بارانێ”.‏

ھەر ب گۆتنا رێڤەبەرێ سەقاناسی و بیڤەلەرزێ ل پارێزگەھا دھۆکێ ل شێخان ژی ئەڤ سالە ‏‏165ملم بارانێ بارینە و سالا بۆری 17ملم باران باریبوون و جوداھی ژی دبیتە 148ملم ‏بارانێ. ل بەردەرەش ژی جوداھیا بارانێ 126 ملم بارانێ نە ب رەنگەکی ئەڤ سالە 158.4ملم ‏بارانێ بارینە و سالا بۆری ژی 32.4ملم بارانێ باریبوون.‏