ئه‌ڤرۆنيوز:

ئێڤاريا ئه‌ڤرۆ چارشه‌مبى 21/11/2018 سه‌رۆك بارزانى گه‌هشته‌ به‌غدا وبرياره‌ ل گه‌ل سه‌رۆك وه‌زيرێن عيراقێ وچه‌ندين به‌رپرسێن عيراقێ كۆم ببيت.

كيفاح مه‌حموود، شيره‌تكارێ رۆژنامه‌ڤانى يێ سه‌رۆك بارزانى بۆ ئه‌ڤرۆنيوز گۆت” سه‌رۆك مه‌سعود بارزانى سه‌رۆكێ پارتى ديموكراتى كوردستان ئه‌ڤرۆ ئێڤارى گه‌هشته‌ به‌غدا كو دهێته‌ هژمارتن سه‌ره‌دانا ئێكێ بۆ به‌غدا پشتى ئه‌نجامدانا ريفراندۆمێ ل 25/9/2017″.

گۆت ژى”سه‌رۆك بارزانى دێ ل گه‌ل عادل عه‌بدولمه‌هدى سه‌رۆك وه‌زيرێن عيراقێ ومحه‌مه‌د حه‌لبووسى سه‌رۆكێ په‌رله‌مانى كۆم بيت، زێده‌بارى هژماره‌كا سه‌رۆك ليستێن په‌رله‌مانى وه‌كو عه‌مار حه‌كيم ونورى مالكى وموقته‌دا سه‌در”.

دياركر ژى كو گرنگترين پرسێن سه‌رۆك بارزانى دێ ل به‌غدا به‌حس كه‌ت مادێ 140 وده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ وپێدڤيا له‌زكرنى دنه‌هێلانا ره‌وشێن نه‌سروشتى ل وان ده‌ڤه‌ران ب تايبه‌ت ل كه‌ركووكێ وشنگالێ وخانه‌قينێ وزڤراندنا ره‌وشا وان وه‌كو به‌رێ، زێده‌بارى به‌حسكرنا به‌هرا هه‌رێما كوردستانێ ژ بودجه‌ى، ديسا پرسێن په‌ترۆلێ وغازێ وپێشمه‌رگه‌ى وبه‌هرا وان ژ رێككه‌فتن وهاريكاريان د پرچه‌ككرنێ ومه‌شقكرنێ دا”.

ئەڤرۆ نیوز:
سەرۆک مەسعود بارزانی ئەڤرۆ ل گەل سەرۆک و ئەندامێن فراکسیۆنا پارتی دیمۆکراتی کوردستان خولا پێنجێ یا پەرلەمانێ کوردستانێ کۆمبوو.
سەرۆک بارزانی د پەیڤەکێ دا رۆناھی خستە سەر دووماھی پێشھاتێن سیاسی یێن کوردستان و عیراق و ریفراندۆم و روودانێن پشتی ریفراندۆمێ و ھەردو ھەلبژارتنێن پەرلەمانێ عیراقێ و کوردستانێ و راگەھاند، پارتی سەرای ھەموو کێشە و گرفتان شیا ببیتە حزبا ئێکێ ل سەر ئاستێ عیراقێ و ئەو سەرکەفتنەکا مەزن بوو بۆ پارتی و فاکتەرێ وێ سەرکەفتنێ بۆ ھەلویستێن پارتی و وەفایا گەلێ کوردستانێ ھەمبەر پارتی ڤەگەڕاند.
سەرۆک بارزانی سوپاسیا گەلێ کوردستانێ کر کو دوبارە باوەری دایە پارتی و ب پێدڤی ژی زانی کو پارتی و ئەندامێن فراکسیۆنا وێ ل پەرلەمانێ کوردستانێ د ئاست باوەریا خەلکی و بەرسڤا وەفا و باوەریا وان ب خزمەتکرنا گەلێ کوردستانێ بدەن و داخواز ژی کر کو وەلاتیان ب گرنگ وەربگرن و د ئێش و ئازارێن وان بگەھین و پەرلەمانتارێن پارتی خوە ژ ھەر جورە موزایەدەکا سیاسی دوور بکەن و ب سادەیی ئارمانجا وان یا سەرەکی کارکرن بیت بۆ گرفتێن وەلاتیان.
ل دۆر کەرکووک و دەڤەرێن کوردستانی یێن دەرڤەی ئیدارا ھەرێمێ، سەرۆک بارزانی دوپاتی ل وێ چەندێ کر کو ئەو رەوشە و سەپاندنا وی واقعێ سەربازی یێ نوکە ل وێ دەڤەرێ ھەی پێدڤیە ب دووماھی بھێت و بەردەوامبوونا وێ ناھێتە قەبوولکرن.

ئەڤرۆ نیوز:
ئەڤرۆ سپێدێ رۆژا چارشەمبی ٢١/١١/٢٠١٨ بەرێز نێچیرڤان بارزانی سەروکێ حکومەتا ھەرێما کوردستانێ پێشوازی ل بەرێز پول گیبارد بالیوزێ کەنەدا ل عیراقێ و نانسی بێرگیرون سەروکا نڤێسینگەھا کەنەدا ل ھەولێر و شاندێ دگەل دا کر.
د کومبونەکا تایبەت دا ناڤبەرا ھەردو لایان دا بالیوزێ کەنەدا خوشحالیا خوە دەربری ب ڤێ سەردانێ بۆ ھەرێما کوردستانێ و پەسنا رولێ ھەرێمێ و ھێزێن پێشمەرگەی کر ل شەرێ دژی تیروستێن داعش زێدەباری کورتیەک لسەر بەرنامە و ھاریکاریێن وەلاتێن خوە بۆ عیراقێ و ھەرێما کوردستانێ دیارکر.
دیسان تەکەز ل سەر رولێ ھەڤسەنگیا رولێ ئافرەتان کر ل سەر ئاستێ ھەرێمێ و پشکداریا وێ د بریار و پرسێن حکومی دا کر.
ژلایێ خوە ڤە سەروکێ حکومەتا ھەرێما کوردستانێ ژی دگەل بالیوزێ کەنەدا بەحس ل بارودوخێ پەنابەر و ئاوارەیان کر ل ھەرێما کوردستانێ، دیسان پرسا پێکئینانا حکومەتا نوو یێ کوردستانێ کر