دوهی چارشەمبی 15/1/2025، ل سەلاحەدین سەرۆك مەسعود بارزانی پێشوازی ل ڤیكتۆریا تەیلەر، جێگرا هاریكارێ وەزیرێ دەرڤەیێ ئەمریكا كر.
بارەگەهێ بارزانی د بەیاننامەیەكێدا ئاماژە ب وێ چەندێ كر» د دیدارەكێدا بیر و بۆچوون ل دۆر رەوشا سیاسی و ئەمنی و دوماهی پێشهاتێن ئیراقێ و دەڤەرێ وسووریێ هاتنە لێكگوهارتن».
د بەیاننامەیا بارەگەهێ بارزانی دا هاتیە ژی» جێگرا هاریكارێ وەزیرێ دەرڤەیێ ئەمریكا دەستخوەشی ل سەرۆك بارزانی كر بۆ هنارتنا نوونەرێ خوە یێ تایبەت بۆ سووریێ و دیدار ل گەل ئالیێن كوردی یێن سووریێ و دوپاتی ل وێ چەندێ كر كو ئەمریكا هەموو بزاڤان دكەت كو ببیتە ئەگەرێ نێزیكبوونا ئالیێن كوردی و هەروەسا ب دەستڤەئینانا سەقامگیریێ ل سووریێ و دەڤەرێ».
هەر د بەیاننامەیا بارەگەهێ بارزانی دا ئاماژە ب وێ چەندێ هاتیە كرن» د پشكەكا دی یا كۆمبوونێدا پەیوەندیێن حوكمەتا هەرێما كوردستانێ و حوكمەتا ئیراقا فیدرال و بزاڤێن چارەسەركرنا كێشەیان هاتنە گەنگەشەكرن».
بارەگەهێ بارزانی ئەوژی بەلاڤكر» هەر د وێ دیدارێدا شاندێ مێهڤان خوەشحالییا خوە بۆ دانوستاندنێن د ناڤبەرا ئالییان و ب لەزبوونا پێنگاڤان بەر ب دامەزراندنا كابینەیا نوو یا حوكمەتا هەرێما كوردستانێ، راگەهاند».
گەفێن دیاربوونا تیرۆرێ و پێدڤییا پاراستنا سەقامگیرییا ئیراقێ و دەڤەرێ تەوەرێ دی یێ وێ دیدارێ بوون.

ئومێد سەباح، ئەندامێ كۆمیتەیا ناڤەندییا پارتی دیموكراتی كوردستان و ئەندامێ شاندێ دانوستاندكارێ پارتی بۆ گەنگەشێ ل گەل ئالیێن سیاسی یێن كوردستانی و پێكئینانا كابینەیا نوو یا حوكمەتا هەرێما كوردستانێ راگەهاند، شاندێ دانوستاندكارێ پارتی دیموكراتی كوردستان، سەرەدانا بارەگەهێ بەرەیێ گەل ل باژێرێ هەولێرێ كر و ژ ئالیێ لاهور شێخ جەنگی پێشوازی لێ هاتە كرن.
ئومێد سەباح دیاركر ژی» د كۆمبوونێدا بیر و بۆچوون ل دۆر پرسا پێكئینانا كابینەیا نوو یا حوكمەتا هەرێما كوردستانێ هاتنە لێكگوهارتن».
شاندێ دانوستاندكارێ پارتی دیموكراتی كوردستان پێكهاتبوو ژ هشیار زێبارێ، ئەندامێ مەكتەبا سیاسی، پشتیوان سادق ئەندامێ مەكتەبا سیاسی و ئومێد سەباح ئەندامێ كۆمیتەیا ناڤەندی.

مەسرور بارزانی، سەرۆكێ حوكمەتا هەرێما كوردستانێ، ل گەل ڤیكتۆریا تەیلەر، جێگرا هاریكارێ وەزیرێ دەرڤەیێ ئەمریكا، بزاڤێن پێكئینانا كابینەیا نوو یا حوكمەتا هەرێما كوردستانێ و گوهۆڕین و پێشهاتێن رەوشا گشتییا ئیراقێ و سووریێ گەنگەشەكر.
دوهی چارشەمبی 15/1/2025، مەسرور بارزانی، سەرۆكێ حوكمەتا هەرێما كوردستانێ پێشوازی ل ڤیكتۆریا تەیلەر، جێگرا هاریكارێ وەزیرێ دەرڤەیێ ئەمریكا كر و د كۆمبوونەكێدا باس ل پێشڤەبرنا پەیوەندیێن دو ئالییانە و بزاڤێن پێكئینانا كابینەیا نوو یا حوكمەتا هەرێما كوردستانێ و گوهۆڕین و پێشهاتێن رەوشا گشتییا ئیراقێ و سووریێ هاتە كرن.
هەردو ئالی د هەڤڕابوون ل سەر گرنگییا هنارتنا پەترۆلا هەرێما كوردستانێ د زووترین دەمدا، چونكە د بەرژەوەندییا هەموو ئالییەكی دایە و راوەستیانا هنارتنا پەترۆلا هەرێمێ زیانەكا مەزن یا گەهاندییە بۆدججا گشتییا ئیراقێ.
ژ ئالیێ خوەڤە جێگرا هاریكارێ وەزیرێ دەرڤەیێ ئەمریكا، دوپاتی ل گرنگییا پێگەه و رۆلێ هەرێما كوردستانێ وەكو هەڤپشكەكێ وەلاتێ خوە كر.
پشكەكا دی یا دانوستاندنان تایبەت بوو ب پێدڤییا دابینكرنا ماف و شایستەیێن دارایی یێن هەرێما كوردستانێ، ل دۆر ڤێ چەندێ سەرۆكێ حوكمەتا هەرێما كوردستانێ دوپاتكر كو هەرێما كوردستانێ، هەموو پێگیریێن خوە د چارچۆڤەیێ بۆدجەیدا یێن بجهئیناین، لەوما پێدڤییە بەغدا شایستەیێن دارایی یێن هەرێما كوردستانێ وەكو قەوارەیەكێ فیدرالی و دستووری ب هنێریت.
هەر د وێ دیدارێدا، رەوشا گشتییا سووریێ، تەوەرەكێ دی یێ دانوستاندنان بوو، هەردو ئالی د هەڤڕابوون ل سەر پێدڤییا پاراستنا ئاسایش و ئارامییا سووریێ و دەستەبەركرنا مافێن گەلێ كورد و پێكهاتەیێن دی یێن وی وەلاتی.
د دیدارێدا ستیڤ بیتنەر، قۆنسلێ گشتیێ ئەمریكا ل هەرێما كوردستانێ و سكۆت بۆلز هنارتیێ تایبەت یێ وەزارەتا دەرڤەیا ئەمریكا بۆ باكوورێ رۆژهەلاتا سووریێ بەرهەڤ بوون.

مەسرور بارزانی، سەرۆكێ حوكمەتا هەرێما كوردستانێ ل گەل فالح فەیاز، سەرۆكێ دەستەیا حەشدا شەعبی كۆمبوو.
د دیدارەكێدا، دانوستاندن ل دۆر دوماهی پێشهات و گوهۆڕین و رەوشا ئیراقێ و دەڤەرێ ب گشتی هاتە كرن.
هەڤدەم هەردو ئالییان دوپاتی ل گرنگییا پێشڤەبرنا هەماهەنگییا ئەمنی د ناڤبەرا هەرێما كوردستانێ و حوكمەتا فیدرال ژ پێخەمەت پاراستنا ئاسایش و سەقامگیریێ كر.
شاندێ دانوستاندكارێ پارتی ل گەل بەرەیێ گەل كۆمبوو
ئەڤرۆ:
ئومێد سەباح، ئەندامێ كۆمیتەیا ناڤەندییا پارتی دیموكراتی كوردستان و ئەندامێ شاندێ دانوستاندكارێ پارتی بۆ گەنگەشێ ل گەل ئالیێن سیاسی یێن كوردستانی و پێكئینانا كابینەیا نوو یا حوكمەتا هەرێما كوردستانێ راگەهاند، شاندێ دانوستاندكارێ پارتی دیموكراتی كوردستان، سەرەدانا بارەگەهێ بەرەیێ گەل ل باژێرێ هەولێرێ كر و ژ ئالیێ لاهور شێخ جەنگی پێشوازی لێ هاتە كرن.
ئومێد سەباح دیاركر ژی» د كۆمبوونێدا بیر و بۆچوون ل دۆر پرسا پێكئینانا كابینەیا نوو یا حوكمەتا هەرێما كوردستانێ هاتنە لێكگوهارتن».
شاندێ دانوستاندكارێ پارتی دیموكراتی كوردستان پێكهاتبوو ژ هشیار زێبارێ، ئەندامێ مەكتەبا سیاسی، پشتیوان سادق ئەندامێ مەكتەبا سیاسی و ئومێد سەباح ئەندامێ كۆمیتەیا ناڤەندی.

دیدار، دلۆڤان ئاكرەیی:

د. ئەشواق جاف ئەنداما كۆمیتەیا ناڤەندییا پارتی و جێگرا بەرپرسێ مەكتەبا رێكخستنا پارتی ل سلێمانی و حەلەبجە و راپەرین ل دۆر رەوشا نوكە و كۆمبوونێن پارتی ل گەل ئێكەتیێ و ئالیێن دی یێن سیاسی بۆ روژنامەیا
( ئەڤرۆ) گۆت» د دووماهی كۆمبوونێن د ناڤبەرا شاندێن هەڤپشكێن تەكنیكی یێن پارتی و ئێكەتیێدا كو ل هەولێرا پایتەخت هاتینە سازكرن ل سەر رەشنڤیسێ چاوانییا پێكئینانا كابینەیا دەهێ یا حوكمەتا هەرێمێ دانوستاندن هاتینە كرن و د وان كۆمبووناندا ژی بەرنامە و كار و بۆچوونین هەر دوو ئالییان بۆ پێكئینانا كابینەیا داهاتی و پشكێن پارتان و چاوانییا كاركرنا حوكمەتا نوو هاتینە باسكرن و و بەرنامەیەك یێ هاتیە بەرهەڤكرن دناڤا رەشنڤیسەكیدا و كۆمبوونێن چوویدا ژی ل هند خالان ژ هەڤ نێزیك بووینە و دانوستاندن ل سەر خالێن دی دهێتە كرن».
د. ئەشواق جاف ئاماژە ب ناڤەرۆكا رەشنڤیسێ د ناڤبەرا هەردو حزباندا كر كو خالێن چاكسازی و پەیوەندیێن دەرڤە و بەردەوامبوون ب كار و گاڤێن بۆری و كار و ئەركێن وەزارەتێن حوكمەتێ هاتیە كرن و پشتی گەهشتن ب رێككەفتنەكێ دێ شاندێن پارتی و ئێكەتی ژڤانەكی بۆ كۆمبوونا لژنا بلند یا حزبێن خوە دانن و پاشی دێ رەشنڤیسی ئاراستەی مەكتەبێن سیاسیین هەردو حزبان كەن».
ل دۆر ئەنجام و پێشڤەچوونێن كۆمبوونێن هەردو ئالییان دیاركر» ژبەر وێ رەوشا ئالۆز یا نوكە دەڤەر ڤەگرتی و دهێتە پێشبینیكرن ئیراقێ ژی ڤەگریتن گرنگە بەرهەڤی بهێنەكرن ژئالیێ هەرێمێ ڤە بۆ هەر ئەگەرەكی و جهێ دلخوەشیێ ئەوە هەلبژارتنێن خولا شەشێ یا پەرلەمانێ كوردستانێ یێن هاتینە ئەنجامدان و یا مای ژی پێكئینانا حوكمەتا نوو یا هەرێمێیە».
رۆهنكر ژی» پارتی داخازیێن تایبەت مینا پارتەكا سیاسی نینن بەلكو داخازیێن خەلكێ كوردستانێ یێن كرینە بنەما بۆ دانوستاندنان چونكە پارتی د خزمەتا خەلك و كیانێ كوردستانێدایە و هەر پارتەكا دی ژی جودا ژ پارتی كو دووپاتییێ لێ دكەت كو ئێك هەرێم و ئێك پەرلەمان و ئێك حوكمەت و ئێك هێزا پێشمەرگەی و رێك نەدان ب كارێن نەقانوونی و رێگری نەكرن ل خزمەتكرنا هەڤولاتییان بێی جوداهی و پەیداكرنا ئارامی و خوشگوزەرانیێیە بۆ هەڤولاتیان هەكە خالێن دی یێن خزمەتكرنێ بۆ خەلكێ كوردستانێ هەبن دشێن بكەنە بنەما بۆ دانوستاندنان و بحهئینانا ڤان بنەمایان دێ پێگەهێ هەرێما كوردستانێ ل جەم چڤاكێ نیڤدەولەتی ئەوێ بەرف پێشڤە بەت».
سەبارەت چاڤدێرییا هێزێن هەڤپەیمان و ولاتێن زلهێزو چڤاكێ نیڤدەولەتی گۆت» پڕۆسەیا سیاسی ل هەرێما كوردستانێ و ئیراقێ ب هووربینی ژئالیێ وانڤە دهێتە چاڤدێریكرن بۆ میناك دەما حوكمەتا ئیراقێ مافێن پێكهاتەیان پێشێلكری كو د هەلبژارتنێن پەرلەمانێ كوردستانێدا پێكهاتەیان مافێ كۆتا نینە د بەرامبەردا پارتی راگەهاند پشكداریێ د هەلبژارتنەكێدا ناكەت تێدا مافێن پێكهاتەیان بهێتە پێشێلكرن ژ بەركو پارتی بەردەوام ل گەل پاراستنا مافێن پێكهاتەیان بوویە وەكو پێكهاتەیێن رەسەن ل هەرێمێ و ئیراقێ و ژبەر وی پێگەهێ دیپلۆماسی یێ سەروك بارزانی ئاڤاكری و د نوكەدا هەر ئێك ژ سەروكێ هەرێمێ و سەروكێ حوكمەتا هەرێمێ درێژەپێدەرێن وێ رێكێنە یا سەرۆك بارزانی گاڤ بۆ هاڤێتین و ئەو گاڤ د سەركەفتی و ئەرێنی بووینە».
گۆت ژی «د نوكەدا ژبەر وان ئالۆزیین دەڤەر ڤەگرتی ئیراق ژی كەڤتییە دبن باندورا ڤێ رەوشا دروست بووی ژبەر وان هێزێن نەقانوونی یێن نەكونترۆلكری ل ئیراقێ هەین كو لدەف ولاتێن زلهێز و چڤاكێ نیڤدەولەتی د قەبوولكری نینن بەلێ ل ئیراقێ هندەك هێز بۆ دژایەتییا قەوارەیا هەرێما كوردستانێ دروست بووینە و بتنێ كارێ وان دژایەتییا خەلكێ كوردستانێ و كیانێ هەرێمێیە و رۆلەكێ نەرێنی دگێرن و دژی پێكئینانا ب لەز یا حوكمەتا نوو یا هەرێما كوردستانێنە، بەلێ پارتێن سیاسی یێن كوردستانێ د بەردەوامن ددانوستاندناندا بۆ پێكئینانا حوكمەتا نوو».
ل دۆر دیتنا پارتی بۆ درێژكرنەڤەیا ژیێ كۆمسیۆنا هەلبژارتنان ل ئیراقێ گۆت» چەندین جاران ژیێ ڤێ كۆمسیۆنێ یێ هاتییە درێژكرن و ل دووڤ قانوونێن كۆمسیۆنێ گەلێ كوردستانێ ماف یێ هەی نوونەرەك د ناڤا كۆمسیاراندا هەبیت».
سەبارەت ب ژڤانەكێ دیار كری بۆ پێكئینانا حوكمەتێ د. ئەشواق جاف دیاركر» پێكئینانا كابینەیا نوو یا حوكمەتێ دێ كەڤیتە سەر دانوستاندنێن د ناڤبەرا ئالیێن سیاسیدا دهێنە كرن و دڤێت رەوشا نوكە دەڤەر تێدا دبۆریت ل بەرچاڤ بهێتە وەرگرتن، لەوما گرنگە حوكمەت ب لەز بهێتە پێكئینان».

بەیارێ زاویتەیی:

سەرۆکێ پارتا وەلاتپارێزێن کوردستانێ دیار دکەت سەرۆک بارزانی وەکو لیڤەگەرێ کوردان دەست ب بزاڤەکا مەزن بۆ ئێکەتیا هێزێن کوردی ل رۆژئاڤایێ کوردستانێ کریە و ئەو پشتەڤانیێ ل بزاڤێن سەرۆک بارزانی یێن بۆ رۆژئاڤایێ کوردستانێ دکەن.

مستەفا ئۆزچەلیک، سەرۆکێ گشتی یێ پارتیا وەلاتپارێزێن کوردستانێ (PWK) د داخویانیەکێ دا پشتەڤانیا خوە ژ بۆ بزاڤێن سەرۆک بارزانی یێن بۆ ئێکرێزیا کوردێن رۆژئاڤایێ کوردستانێ راگەھاند.
ئۆزچەلیک د پەیامەکێ دا راگەهاند، ئەو پشتەڤانیا بزاڤێن رێزدار سەرۆک مەسعود بارزانی یێن ژ بۆ ئێکرێزیا کوردێن رۆژئاڤایێ کوردستانێ دکەن، ئاشکرا ژى کر کو سەرۆک بارزانی، سەرۆک بارزانی بەری نها ژی گەلەک بزاڤ کرن دا هەر دو جڤاتێن کوردی یێن رۆژئاڤایێ کوردستانێ پرسێن هەی د ناڤبەرا خوە دا چارەسەر بکەن و نها ژی نوونەرێ خوە د. دەربەندی ئەرکدار کریە و ناڤبرى ل حەسەکێ ل گەل فەرماندارێ گشتی یێ ھێزێن سووریا دیموکرات مەزلوم عەبدی و ل قامشلۆیێ ژى ل گەل بەرپرسێن ئەنەکەسێ کۆمبوو و پەیام و هزر و پێشنیازێن سەرۆک بارزانی گەھاندنە ئالییێن پەیوەندیدار.
ناڤهاتی ئەو یەک ژی دیار کر، کو سەرۆک بارزانی د پەیاما خوە دا دیار کریە کو ژ بۆ ئێکرێزیا کوردێن رۆژئاڤایێ کوردستانێ ئامادەیە کو چ ژ دەستێ وی بهێت بکەت، ل گۆری داخۆیانییێن هاتینە راگەهاندن، مەزلوم عەبدی و بەرپرسێن ئەنەکەسێ، پشتەڤانیا خوە ژ بۆ ڤێ بزاڤا سەرۆک بارزانی نیشا داینە و ب ئاوایەکی ئەرێنی پێشوازیا ڤێ بزاڤێ کرینە.
ئۆزچەلیک ئاماژە ب ڤێ یەکێ ژی کر ئەو ھەلوەستێ ئەرێنی یێ مەزلوم عەبدی و بەرپرسێن ئەنەکەسێ بلند دنرخینن و ئەڤ بزاڤا سەرۆک مەسعود بارزانی، جھێ کەیفخوەشیا وانە، بزاڤەکا پیرۆزە و نیشانا ھەست و بیر و باوەری و ھشمەندی و سیاسەتا نەتەوەیی، نشتمانییە، هەروەسا نیشانا بریارداری و سەربۆرەکا دیرۆکییە. ئەم ژ بەر ڤێ بزاڤێ پشتەڤانیا جەنابێ سەرۆک بارزانى دکەین و سەرۆک بارزانی ئەندازیارێ سەرەکى یێ رێککەفتنا دھۆکێ بوو.
ئۆزچەلیک ئەو یەک ژی دیار کر، ئەو د وێ باوەریێ دانە کو سەرۆک بارزانی وەکو لێڤەگەرێ نەتەوەیا ھەموو کوردێن جیھانێ یە و ژ بۆ ئاڤاکرنا ئێکرێزیا ئالیێن کوردی یێن ل رۆژئاڤایێ کوردستانێ و ژ بۆ بدەستخستنا مافێن نەتەوەیی، دیموکراتی یێن گەلێ مە یێ رۆژئاڤایێ کوردستانێ دێ رۆلەکێ دیرۆکی گێریت. ھیڤی و داخوازا مە ژ مەزلوم عەبدی، ژ ھەموو پارتیێن کوردی، دەزگەھێن سڤیل و کەسایەتیێن رۆژئاڤایێ کوردستانێ ئەوە کو، ب ئاوایەکی باش پشتەڤانیا بزاڤا سەرۆک بارزانی بکەن و ل سەر داخوازێن خوە یێن نەتەوەیی، دیموکراتى و نشتیمانی دەملدەست ئێکرێزی و ئێکھەلوەستیێ ئاڤا بکەن و ب ئێک دەست و ب ئێک دل ل گەل شامێ و ل گەل ھەموو ئالیێن پەیوەندیدار دانوستاندنان بکەن. داخواز و ھیڤییا مە ژ ھەموو کوردێن جیھانێ ژی ئەوە کو، ئەو پشتەڤانیا بزاڤا سەرۆک بارزانی بکەن، ژ بۆ ئێکرێزیا خووشک و برایێن مە یێن رۆژئاڤایێ کوردستانێ و ژ بۆ سەرکەفتنا وان ئەم هاریکار و پشتەڤان بین و ئەڤرۆ رۆژا ئێکگرتن و ئێککرێزیا گەلێ کوردستانێ یە.

دوهی سێشەمبی 14/1/2025 ل سەلاحەدین سەرۆك مەسعود بارزانی پێشوازی ل كریستۆفەر بیم، بالیۆزێ كەنەدا ل ئیراقێ كر.
د دیدارێدا بالیۆزێ كەنەدا ل ئیراقێ ئەوچەندە بەرچاڤكر كو وەلاتێ وی ب گرنگیڤە دنێریتە پەیوەندیێن خوە ل گەل هەرێما كوردستانێ ودێ بەردەوام بیت د بەرفرەهكرن و پێشڤەبرنا وان پەیوەندییان. هەروەسا بالیۆزێ كەنەدا ل ئیراقێ پیرۆزباهییا سەركەفتنا هەلبژارتنێن پەرلەمانێ كوردستانێ ل ئۆكتۆبەرا 2024 ل سەرۆك بارزانی كر كو د سەقایەكێ ئارام و ب پشكدارییا رێژەیەكا مەزن یا خەلكی هاتنە ئەنجامدان و ب پڕۆسەیەكا نموونەیی هەژمارت.
هەر د وێ دیداریدا سەرۆك بارزانی سوپاسییا حوكمەتا كەنەدا كر كو د شەڕێ داعشێدا هاریكارییا هێزا پێشمەرگێ كوردستانێ كر و دوپاتی ژی ل بەرفرەهكرنا پەیوەندیێن هەردو ئالییان كر.
پەیوەندیێن حوكمەتا هەرێما كوردستانێ و حوكمەتا ئیراقا فیدرال و رەوشا سیاسی و ئەمنییا دەڤەرێ و سووریێ و مەترسییا دیاربوونا تیرۆرێ تەوەرەكێ دی یێ ڤێ كۆمبوونێ بوون و گرێدای ب رەوشا سووریێ و چارەنڤیسێ گەلێ كورد ل وی وەلاتی، سەرۆك بارزانی ئاماژە ب دیرۆكا وێ نەهامەتیێ و بێ بەهربوونێ كو ل سووریێ ب سەر گەلێ كورد دا هاتی و بۆ وێ چەندێ كارەسات و نەهامەتی دژی گەلێ كورد دوبارە نەبن، دوپاتی ل پێدڤییا ئێكڕێزییا ئالیێن كوردی ل سووریێ كر.

پەیڤدارێ سەرۆكایەتییا هەرێما كوردستانێ راگەهاند، بۆ هەموو ئالییەكی یا رۆهن بووی كو حوكمەتا هەرێما كوردستانێ پێگیریێن خوە ب زەلالی یێن ب جهئیناین، هەڤدەم باس ل وێ چەندێ ژی كر، بۆ دەستپێكرن ب هنارتنا پەترۆلێ پێرابوونێن باش یێن هاتینە هاڤێتن.
دلشاد شەهاب، پەیڤدارێ سەرۆكایەتییا هەرێما كوردستانێ د داخۆیانییەكا رۆژنامەڤانیدا راگەهاند» بۆ دەستپێكرنا هنارتنا پەترۆلا هەرێما كوردستانێ پێرابوونێن باش یێن هاتینە هاڤێتن، هەروەسا ل دۆر وان پرسێن ماین، هەموو ئالی د هەڤڕابوون ل سەر وێ چەندێ پێدڤییە د دەمەكێ نێزیكدا كۆمبوون د ناڤبەرا تیما حوكمەتا هەرێما كوردستانێ و حوكمەتا فیدرال بهێنە ئەنجامدان».
پەیڤدارێ سەرۆكایەتییا هەرێما كوردستانێ دیاركر ژی كو ل كۆمبوونێن سەرۆكێ هەرێما كوردستانێ ل بەغدایێ ل گەل ئالیێن سیاسی بۆ هەموو ئالییان هاتە رۆهنكرن، هەرێما كوردستانێ یا بەرهەڤە و هەموو پێگیریێن خوە كو رێككەفتن ل سەر هاتیە كرن و ب گۆڕەی قانوونێ ل ستوویێ هەرێمێ نە، هەموو وەكو خوە ژ ئالیێ حوكمەتا هەرێمێ ڤە یێن هاتینە ب جهئینان ب زەلالییەكا تمام و هەموو پێگیریێن خوە بەرانبەر بڕیاران و قانوونا بۆدجەی یان ژی رێككەفتنان یێن ب جهئیناین.
دلشاد شەهاب ئاماژە ب وێ چەندێ ژی كر» ئالیێن سیاسی و محەمەد شیاع سودانی، سەرۆك وەزیرێن ئیراقێ د رژدن ل سەر وێ چەندێ دڤێت ژ نوكە و وێڤە ئەو كۆمبوون دناڤبەرا تیما حوكمەتا هەرێما كوردستانێ و تیما حوكمەتا فیدرال بهێنە ئەنجامدان و بەردەوام بۆ هەبیت».
ئاماژە كر ژی» پێرابوونێن باش یێن هاتینە وەرگرتن بۆ دەستپێكرنا هنارتنا پەترۆلا هەرێما كوردستانێ، چونكە راوەستیانا هنارتنا پەترۆلا هەرێما كوردستانێ بۆ ئەگەرێ زیانەكا مەزن بۆ گەنجینەیا ئیراقێ».

د بەردەوامییا سەرەدانا خوە دا بۆ بەغدایێ، نێچیرڤان بارزانی، سەرۆكێ هەرێما كوردستانێ چەندین دیدار و كۆمبوون ل گەل چەندین بەرپرسێن بلند یێن دەولەتی و ئالیێن سیاسی یێن ئیراقی ئەنجامدان.
هەر ل درێژییا دیدار و كۆمبوونێن خوە دا ل بەغدا، نێچیرڤان بارزانی، سەرۆكێ هەرێما كوردستانێ ل گەل دادوەر فایق زێدان، سەرۆكێ جڤاتا دادوەری ل ئیراقێ كۆمبوو.
سەرۆكایەتییا هەرێما كوردستانێ د بەیاننامەیەكێدا گۆت» د كۆمبوونێدا بیر و بۆچوون ل دۆر رەوشا ئیراقێ ب گشتی لێكگوهارت و گرنگییا رۆلێ دەستهەلاتا دادوەری ل چارەسەركرنا كێشەیێن وەلاتی، ب تایبەتی ژی كێشەیێن دناڤبەرا حوكمەتا فیدرال و حوكمەتا هەرێما كوردستانێ دا، هاتنە گەنگەشەكرن».
نێچیرڤان بارزانی دوپاتی ل سەر گرنگییا رۆلێ جڤاتا دادوەری ل ئیراقێ بۆ پەیداكرنا دادپەروەریێ و چارەسەركرنا ناكۆكییان ب پشتبەستنێ ب دستووری و قانوونێن كارپێكری، كر. ب شێوەیەكی كو خزمەتا بەرژەوەندی و سەقامگیرییا وەلاتی بكەت.
سەرۆكێ هەرێمێ سوپاس و پێزانین بۆ رۆلێ جڤات و دەستهەلاتا دادوەریێ ل ئیراقێ د پشتەڤانی و سەرئێخستنا هەلبژارتنێن پەرلەمانێ كوردستانێ دوپاتكر و كار و رۆلێ كۆمسیۆنا بلند یا سەربخوە یا هەلبژارتنان ل ئیراقێ بلندهەلسەنگاند. هەروەسا داخوازكر دەستهەلاتا دادوەری رۆلێ خوە د دابینكرنا ماف و شایستەیێن دارایی یێن هەرێما كوردستانێ بگێریت.
ژ ئالیێ خوەڤە فایق زێدان دوپاتی ل سەر گرنگییا سەروەرییا قانوونێ د چارەسەركرنا پرسێن نیشتمانی كر. هەروەسا ئاماژە ب وێ چەندێ كر كو دەستهەلاتا دادوەری هەردەم بزاڤێ دكەت فاكتەرەك بیت بۆ نێزیكبوونا د ناڤبەرا ئالیێن جودا و چارەسەركرنا كێشەیان.
هەر د چارچۆڤەیێ سەرەدانا خوە دا بۆ بەغدا، نێچیرڤان بارزانی، سەرۆكێ هەرێما كوردستانێ، ل گەل هادی عامری، ئەمیندارێ گشتیێ رێكخراوا بەدر كۆمبوو.
سەرۆكایەتییا هەرێمێ بەلاڤكر» د كۆمبوونەكێدا، هاریكارییا سیاسی و ئەمنی د ناڤبەرا هەولێرێ و بەغدایێ هاتە گەنگەشەكرن و باس ل گرنگییا كارێ هەڤپشك بۆ بەرهنگاربوونا وان ئاستەنگێن بۆ ئیراقێ پەیدابووین، ل دۆر ڤێ چەندێ دوپاتی ل سەر ب هێزكرنا دانوستاندنێ د ناڤبەرا هەموو ئالیێن سیاسی كر بۆ ب دەستڤەئینانا بۆچوونەكا نیشتمانییا هەڤپشك كو خزمەتا سەقامگیریێ و پێشكەفتنا وەلاتی بكەت».
دیاركر ژی» هەروەسا هەردو ئالی د هەڤڕابوون ل سەر گرنگییا بەردەوامییا هاریكارییا هەڤپشك و هەماهەنگیێ دناڤبەرا ئالیێن ئیراقی بۆ پەیداكرنا تەباییێ و ب هێزكرنا گیانێ نیشتمانی و دەربازكرنا ناكۆكییان ب شێوەیەكی كو بەرژەوەندییا گەلێ ئیراقێ ب هەموو پێكهاتەیێن خوەڤە بهێتە پاراستن».
سەرۆكایەتییا هەرێمێ دیاركر ژی» دوماهی پێشهاتێن رەوشا دەڤەرێ، ب تایبەتی گوهۆڕینێن سووریێ، ل گەل چەند پرسێن دی یێن جهێ گرنگییا هەڤپشك، تەوەرەكێ دی یێ كۆمبوونێ بوو.
ل درێژییا بەرنامەیێ سەرەدانا خوە دا بۆ بەغدا، نێچیرڤان بارزانی، سەرۆكێ هەرێما كوردستانێ ل گەل عەمار ئەلحەكیم، سەرۆكێ باسكێ حیكمە یێ نیشتمانی كۆمبوو.
ب گۆڕەی بەیاننامەیەكا سەرۆكایەتییا هەرێما كوردستانێ» د كۆمبوونەكێدا، گرنگییا ب هێزكرنا تێكگەهشتنا نیشتمانی د ناڤبەرا ئالیێن سیاسی یێن ئیراقی و پێدڤییا كارێ هەڤپشك هاتە گەنگەشەكرن بۆ دەستەبەركرنا پشكدارییا هەموو پێكهاتەیێن وەلاتی د پڕۆسەیا سیاسی و ب رێڤەبرنا كاروبارێن وەلاتیدا. سەبارەت ڤێ چەندێ هەردو ئالید هەڤڕابوون ل سەر گرنگییا پێگیریێ ب دستووری وەكو بنەمایەك بۆ چارەسەركرنا پرسێن ناكۆكی ل سەر و ب دەستڤەئینانا دادپەروەریێ د ناڤبەرا پێكهاتەیێن وەلاتیدا».
د بەیاننامەیا سەرۆكایەتییا هەرێما كوردستانێ دا هاتیە ژی» هەروەسا هەردو ئالییان دوپاتی ل سەر گرنگییا ئێكخستنا بزاڤان كر بۆ دەربازكرنا ئاستەنگێن سیاسی و ئابووری یێن ل پێشبەری وەلاتی، ل گەل دوپاتكرنێ ل سەر ئاڤاكرنا بۆچوونەكا ئێكگرتی كو پشتەڤانییا سەقامگیری و پێشكەفتنا ئیراقێ بكەت» .
سەرۆكایەتییا هەرێمێ دیاركر ژی» ل تەوەرەكێ دی یێ كۆمبوونێ، باس ل پێشهاتێن دەڤەرێ هاتە كرن و دوپاتی ل پێشڤەبرنا هاریكاری و هەماهەنگییا هەڤپشك یا ئالیێن سیاسی كر بۆ بەرهنگاربوونا ئەنجامێن وان پێشهاتان ل سەر وەلاتی».
هەر ل بەغدایێ، نێچیرڤان بارزانی، سەرۆكێ هەرێما كوردستانێ ل گەل شێخ خەمیس خەنجەر، سەرۆكێ هەڤپەیمانییا سیادە كۆمبوو.
سەرۆكایەتییا هەرێما كوردستانێ د بەیاننامەیەكێ دا راگەهاند» د كۆمبوونەكێدا گرنگییا ب هیچزكرنا هەڤپشكییا نیشتمانی د ناڤبەرا هەموو پێكهاتەیێن گەلێ ئیراقێ دا گەنگەشەكر، هەروەسا دوپاتی ل سەر پێدڤییا پاراستنا مافێن هەموویان و دەستەبەركرنا پشكدارییا وان د ژیانا سیاسی و ب رێڤەبرنا وەلاتیدا كر».
ب گۆڕەی بەیاننامەیا سەرۆكایەتییا هەرێمێ» هەردو ئالییان بیرو بۆچوون ل دۆر ئاستەنگێن نوكە ل پێشبەری ئیراقێ لیكگوهارتن، هەروەسا گرنگییا ب هێزكرنا دانوستاندنێ د ناڤبەرا ئالیێن جودا دا بۆ دەربازكرنا ناكۆكییان و ب دەستڤەئینانا سەقامگیریێ و گەشپێدانێ، ب پێدڤی زانی».
دوماهی پێشهاتێن دەڤەرێ و كاریگەرییا وان ل سەر ئیراقێ و گرنگییا هەماهەنگییا هەڤپشك بۆ بەرهنگاربوونا ئاستەنگان، ئالییەكی دی یێ كۆمبوونێ بوو.
هەر ل درێژییا دیدار و كۆمبوونێن خوە ل بەغدایێ، نێچیرڤان بارزانی، سەرۆكێ هەرێما كوردستانێ ل گەل قەیس خەزعەلی، ئەمیندارێ گشتیێ عەسائیب ئەهلولحەق كۆمبوو.
سەرۆكایەتییا هەرێمێ د بەیاننامەیەكێدا دیاركر» هەردو ئالییان دوپاتی ل سەر گرنگییا ب هێزكرنا هاریكاریێ دناڤبەرا هەموو ئالیێن ئیراقی كر بۆ پارارستنا ئاسایش و سەقامگیرییا وەلاتی، هەروەسا پێدڤییا كارێ هەڤپشك بۆ پاراستنا ئیراقێ ژ كاریگەریێن رەوشا دەڤەرێ گەنگەشەكر».
هەروەسا دیاركر ژی» هەردو ئالی د هەڤڕابوون ل سەر پێدڤییا دوورئێخستنا ئیراقێ ژ ململانێیێن دەڤەرێ و دوپاتی ل سەر گرنگییا ئێكڕێزییانیشتمانی كر بۆ بەرهنگاربوونا ئاستەنگێن ناڤخوەیی و دەرەكی.
هەر د بەردەوامییا سەرەدانا خوە دا بۆ بەغدایێ، نێچیرڤان بارزانی، سەرۆكێ هەرێما كوردستانێ ل گەل عەبدولسادە ئەلفرێجی، ئەمیندارێ گشتیێ هەڤپەیمانییا نەهج یا نیشتمانی كۆمبوو.
د دیدارەكێدا، هەردو ئالییان رەوشا گشتییا ئیراقێ گەنگەشەكر و داكۆكی ل سەر گرنگییا ب هێزكرنا هاریكارییا سیاسی كر، ب شێوەیەكی كو هاریكارییا ب دەستڤەئینانا سەقامگیریێ و پێشكەفتنێ ل ئیراقێ بكەت.
هەردو ئالییان باس ل دوماهی پێشهاتێن دەڤەرێ و ئەنجامان كر و د هەڤڕابوون ل سەر پێدڤییا پێشڤەبرنا هاریكاریێ د ناڤبەرا ئالیێن سیاسیدا بۆ برهنگاربوونا ئاستەنگان.

ل ئێڤارییا رۆژا ئیكشەمبی 12-1-2025، نێچیرڤان بارزانی، سەرۆكێ هەرێما كوردستانێ گەهشتە بەغدایێ و پشتی گەشهتنا وی پشكداری د كۆمبوونا هەڤپەیمانییا ب رێڤەبرنا دەولەتێدا كر كو وێ هەڤپەیمانیێ حوكمەتا ئیراقێ ب سەرۆكایەتییا محەمەد شیاع سودانی پێكئینایە، هەروەسا سەرۆكێ هەرێما كوردستانێ ل گەل محەمەد شیاع سودانی، سەرۆك وەزیرێن ئیراقێ و مەحمود مەشهەدانی، سەرۆكێ جڤاتا نوونەرێن ئیراقێ كۆمبوو، هەروەسا چەندین دیدار ل گەل بەرپرسێن بلند یێن ئیراقی ئەنجامدان.
د كۆمبوونا هەڤپەیمانییا ب ڕێڤەبرنا دەولەتێ دوپاتی ل پێدڤییا پشتەڤانییا هەموو ئالییان بۆ ب جهئینانا بەرنامەیێ حوكمەتێ د هەموو واراندا هاتە كرن
نێچیرڤان بارزانی، سەرۆكێ هەرێما كوردستانێ پشكداری د كۆمبوونا هەڤپەیمانییا ب رێڤەبرنا دەولەتێدا كر كو ب بەرهەڤبوونا محەمەد شیاع سودانی، سەرۆك وەزیرێن ئیراقا فیدرال و د. مەحمود ئەلمەشهەدانی، سەرۆكێ جڤاتا نوونەرێن ئیراقێ ب رێڤەچوو.
سەرۆكایەتییا هەرێما كوردستانێ ل دۆر كۆمبوونا هەڤپەیمانییا ب رێڤەبرنا دەولەتێ ب پشكدارییا سەرۆكێ هەرێما كوردستانێ د بەیاننامەیەكێدا بەلاڤكر» نێچیرڤان بارزانی، سەرەرای دوپاتكرنێ ل ماف و شایستەیێن قانوونی و دستووری یێن هەرێما كوردستانێ، رۆلێ محەمەد شیاع سودانی، سەرۆك وەزیرێن ئیراقێ بلند هەلسەنگاند كو ل دەمێ سالا بۆری كاركریە بۆ تێكگەهشتنا هەولێرێ – بەغدایێ و هیڤی خواست هەموو پرس ب دانوستاندنێ بهێنە چارەسەركرن».
سەرۆكایەتییا هەرێمێ دیاركر ژی» د كۆمبوونێدا، دوپاتی ل پێدڤییا پشتەڤانییا هەموو ئالییان بۆ ب جهئینانا بەرنامەیێ حوكمەتێ د هەموو واراندا هاتە كرن، هەروەسا پشتەڤانی ل چاكسازیێن دارایی و ئابووری یێن حوكمەتێ هاتە كرن، دوپاتی ژی هاتە كرن كو هیچ هەلویستەكێ سیاسی د پرسا مووچەیێن فەرمانبەرێن هەرێما كوردستانێدا نینە، ژ بلی پرسێن تەكنیكی، كو د شیاندایە ب رێكا دانوستاندنێ و تێكگەهشتنێ، چارەسەری بۆ بهێتە دیتن».
ئاماژە كر ژی» كۆمبوونا هەڤپەیمانییا ب رێڤەبرنا دەولەتێ داخوازكر ئیراق ب جۆرەكی رەفتارێ ل گەل ئاستەنگ و روودانێن دەڤەرێ و نێڤدەولەتیدا بكەت كو بەرژەوەندییا ئیراقێ بپارێزیت و ژ ململانێ و قەیرانان بهێتە دوورئێخستن، هەروەسا باس ل رەوشا سووریێ هاتە كرن و بەرهەڤییا ئیراقێ بۆ پشتەڤانیێ ل گەلێ سووریێ هاتە دوپاتكرن» .
نێچیرڤان بارزانی و سودانی: پێگیریێن د ناڤبەرا هەردو حوكمەتاندا ب باشترین رێك بهێنە رێكخستن
هەر د چارچۆڤەێ سەرەدانا خوە دا بۆ بەغدایێ، نێچیرڤان بارزانی، سەرۆكێ هەرێما كوردستانێ ل گەل محەمەد شیاع سودانی، سەرۆك وەزیرێن ئیراقێ كۆمبوو، سەرۆكایەتییا هەرێما كوردستانێ ل دۆر وێ كۆمبوونێ بەلاڤكر» دانوستاندن ل سەر پێشهاتێن نوو ل سەر ئاستێ ئیراقێ و دەڤەرێ هاتە كرن، هەروەسا دوپاتی ل پێدڤییا پشتەڤانیكرنا حوكمەتا فیدرال و سەرئێخستنا ب جهئینانا بەرنامەیێ حكومی هاتە كرن، ب شێوەیەكێ كو خواستێن هەڤوەلاتییان ل سەرانسەری وەلاتی ب دەستڤەبینیت».
سەرۆكایەتییا هەرێما كوردستانێ دیاركر ژی» دانوستاندن ل سەر پرسێن خزمەتگوزاریێن پەیوەندیدار ب بەرژەوەندیێن هەڤوەلاتییان هاتە كرن و باشترین رێك بۆ رێكخستنا پێگیریێن د ناڤبەرا حوكمەتا فیدرال و حوكمەتا هەرێما كوردستانێ، ب گۆڕەی بنەمایێن دستووری و قانوونی، هاتنە گەنگەشەكرن».
ب گۆڕەی بەیاننامەیا سەرۆكایەتییا هەرێمێ» نێچیرڤان بارزانی و سودانی دوپاتی ل سەر گرنگییا هاریكاری و هەماهەنگییا هەڤپشك د ناڤبەرا هەموو هێز و ئالیێن سیاسی كر بۆ بەرهنگاربوونا ئاستەنگان ل وەلاتی، ب شێوەیەكی كو بەرژەوەندییا هەموو پێكهاتەیێن گەلێ ئیراقێ ب دەستڤەبینیت و چەسپاندنا ئاسایشێ و سەقامگیریێ و سەروەرییا نیشتمانی ب هێز بكەت».
نڤیسینگەها رۆژنامەڤانییا سەرۆك وەزیرێن ئیراقێ ل دۆر كۆمبوونا نێچیرڤان بارزانی و سودانی بەیاننامەیەك بەلاڤكر و تێدا دیاركر» د كۆمبوونێدا، سەرۆكێ هەرێما كوردستانێ باس ل باشترین رێك بۆ رێكخستنا پێگیریێن د ناڤبەرا هەردو حوكمەتێن فیدرالی و هەرێما كوردستانێ هاتە كرن كو ب گۆڕەی دستووری و ئەوا د قانوونا بۆدجەیا گشتیدا بڕیار ل سەر هاتییە دان».
نڤیسینگەها رۆژنامەڤانییا سودانی دیاركر ژی» د كۆمبوونێدا باس ل پێشهاتێن ناڤخوەیی و دەڤەرێ هاتە كرن و دوپاتی ل گرنگییا پشتەڤانییا حوكمەتا فیدرالی و سەرئێخستنا وی هاتە كرن د جهئینانا كارنامەیا حوكمەتێدا، ب شێوەیەكی كو خواستا هەڤوەلاتییان ل سەرانسەری وەلاتی ب جهبینیت».
نێچیرڤان بارزانی ل دۆر پرسا مووچەی بۆ مەحمود مەشهەدانی: رۆلێ خوە ببینن
نێچیرڤان بارزانی، سەرۆكێ هەرێما كوردستانێ دوهی دوشەمبی 13/1/2025 ل بەغدا ل گەل مەحمود مەشهەدانی، سەرۆكێ جڤاتا نوونەرێن ئیراقێ كۆمبوو و پەیوەندیێن هەولێرێ ل گەل دەستهەلاتێن فیدرالی هاتە گەنگەشەكرن و دوپاتی ل گرنگییا ب هێزكرنا هاریكاریێ بۆ چارەسەركرنا كێشەیێن هەلاویستی ب گۆڕەی دستوورێ ئیراقێ، هاتە كرن، هەردو ئالی ژی د هەڤڕابوون ل سەر پێدڤییا پێشڤەبرنا هاریكارییا هەڤپشك، ب شێوەیەكی كو هاریكارییا سەقامگیریێ و گەشەكرنێ ل وەلاتی بكەت.
نێچیرڤان بارزانی دوپاتی ل سەر گرنگییا رۆلێ جڤاتا نوونەران د ب هێزكرنا دیالۆگا نیشتمانی و دەستەبەركرنا دادپەروەریێ و ئێكسانیێ بۆ هەموو پێكهاتەیێن گەلێ ئیراقێ و چارەسەركرنا كێشەیێن وەلاتی، ب تایبەتی كێشەیێن هەولێرێ- بەغدایێ، كر. ل درۆر وێ چەندێ سەرۆكێ هەرێما كوردستانێ داخواز ژ سەرۆكێ جڤاتا نوونەرێن ئیراقێ كر» د راستڤەكرنا قانوونا بۆدجەیا فیدرال بۆ سالا 2025 رۆلێ خوە ببینن، ب جۆرەكی كو دادپەروەری د دەستەبەركرنا ماف و شایستەیێن دارایی یێن هەرێما كوردستانێ بكەت، ب تایبەتی پرسا دابینكرنا مووچەیێن مووچەخۆرێن هەرێما كوردستانێ، وەكو هەموو ئیراقێ».
د تەوەرەكێ دی یێ كۆمبوونێدا، هەردو ئالییان رەوشا دەڤەرێ و گوهۆڕینێن سووریێ گەنگەشەكرن و دوپاتی ل سەر گرنگییا هەماهەنگیێ د ناڤبەرا هەموو ئالییان بۆ بەرهنگاربوونا ئاستەنگان كر.
سەرۆكێ هەرێمێ و سەرۆككۆمارێ ئیراقێ دوپاتیێ ل دابینكرنا مووچەیێن فەرمانبەرێن هەرێمێ دكەن
هەر دوهی دوشەمبی 13/1/2025 سەرۆكێ هەرێما كوردستانێ ل بەغدا ل گەل د. عەبدولەتیف رەشید، سەرۆككۆمارێ ئیراقا فیدرال كۆمبوو و هەردو ئالییان رەوشا سیاسی، ئەمنی و ئابوورییا وەلاتی، پەیوەندیێن د ناڤبەرا دەستهەلاتێن فیدرالی و هەرێما كوردستانێ و دووماهی پێشهاتەیێن دەڤەرێ گەنگەشەكرن.
هەردو ئالییان دوپاتی ل گرنگییا بەردەوامییا دانوستاندنا ئالیێن پەیوەندیدارێن هەرێما كوردستانێ و دەستهەلاتێن فیدرالی، دەربازكرنا خالێن ناكۆكی ل سەر ب گۆڕەی قانوونێ و دستووری و دابینكرنا شایستە و مووچەیێن فەرمانبەران و خانەنشینێن هەرێما كوردستانێ كر. سەبارەت ڤێ چەندێ هەردو ئالی د هەڤڕا بوون ل سەر گرنگییا سەرەدانێن د ناڤبەرا ئالیێن بەرپرس یێن حوكمەتا فیدرال و حوكمەتا هەرێما كوردستانێ بۆ تێكگەهشتنا هەڤپشك و ب هێزكرنا بنەمایێن دیالۆگا ئاڤاكەر و كارا بۆ چارەسەركرنا كێشەیان و دەربازكرنا بەربەستان.
نێچیرڤان بارزانی داكۆكی ل پێدڤییا دابینكرنا شایستەیێن دارایی یێن هەرێما كوردستانێ ژ ئالیێ حوكمەتا فیدرالی كر، دوپاتكر ژی كو تێكگەهشتن و چارەسەركرنا كێشەیان، هاریكارییا ب هێزكرنا پەیوەندیێن هەردو ئالییان دكەت، هەروەسا سوپاسییا بزاڤێن سەرۆككۆماری كر بۆ دووڤچوونا پرسێن هەولێرێ- بەغدایێ.
نێچیرڤان بارزانی و سەرۆكێ دادگەها فیدرال: ناكۆكی ل سەر بنەمایێ دستووری بهێنە چارەسەركرن
نێچیرڤان بارزانی، سەرۆكێ هەرێما كوردستانێ ل بارەگەهێ دادگەها فیدرالی ل گەل جاسم محەمەد عەبود، سەرۆكێ دادگەها فیدرالییا ئیراقی كۆمبوو. سەرۆكایەتییا هەرێمێ بەلاڤكر» نێچیرڤان بارزانی سوپاسی و پێزانین بۆ رۆلێ گرنگ یێ دادگەها فیدرالی د ئەنجامدان و سەرئێخستنا هەلبژارتنێن پەرلەمانێ كوردستانێ و هاریكاری د چارەسەركرنا پرسێن دناڤبەرا هەولێرێ و بەغدایێ دا ب تایبەتی ژی د پرسێن مووچەی و شایستەیێن دارایی دوپاتكر، هەروەسا رۆلێ دادگەهێ ل پاراستنا پڕۆسەیا دیموكراسی ل وەلاتی، بلند هەلسەنگاند».
بەلاڤكر ژی» هەردو ئالییان دوپاتی ل سەر پێدڤییا هاریكارییا د ناڤبەرا دەستهەلاتێن دادوەری و دەزگەهێن فیدرالی و هەرێمیدا كر بۆ چارەسەركرنا ناكۆكییان ل سەر بنەمایێ قانوونی و دستووری ب جۆرەكی كو ب هێزكرنا سەقامگیرییا نیشتمانی و پاراستنا سەروەرییا قانوونێ، دەستەبەر بكەت».
نێچیرڤان بارزانی و مالكی: پێدڤییە تێكگەهشتن و دیالۆگا سیاسی د ناڤبەرا ئالیێن ئیراقیدا هەبیت
هەر د چارچۆڤەیێ كۆمبوونێن خوە دا ل بەغدا، دوهی دوشەمبی 13/1/2025، نێچیرڤان بارزانی، سەرۆكێ هەرێما كوردستانێ ل گەل نوری مالكی، سەرۆكێ هەڤپەیمانییا دەولەتا قانوونێ كۆمبوو.
سەرۆكایەتییا هەرێمێ بەلاڤكر» د كۆمبوونێدا ب هێزكرنا هەڤپشكییا نیشتمانی و چارەسەركرنا پرسێن هەلاویستی د ناڤبەرا هەولێرێ و بەغدایێ ب گۆڕەی دستوورێ ئیراقێ هاتە گەنگەشەكرن، هەردو ئالی د هەڤڕابوون ل سەر گۆنگییا پێگیریبوونێ ب دستووری بۆ بدەستڤەئینانا مافێن هەموو پێكهاتەیێن ئیراقێ».
دیاركر ژی» نێچیرڤان بارزانی و نوری مالكی د هەڤڕابوون ل سەر پێدڤییا تێكگەهشتنێ و ب هێزكرنا دیالۆگا سیاسی د ناڤبەرا هێز و ئالیێن ئیراقی و ئێكستنا بزاڤان بۆ بەرهنگاربوونا ئاستەنگێن ل پێشبەری وەلاتی».
د تەوەرەكێ دی یێ كۆمبوونێدا باس ل پێشهاتێن دەڤەرێ، ب تایبەتی رەوشا سووریێ هاتە كرن، هەروەسا رۆناهی ئێخستە سەر ئەگەر و كارتێكرنێن رەوشا رۆژهەلاتا ناڤین ل سەر ئیراقێ و دەڤەرێ و ل دۆر ڤێ چەندێ داكۆكی ل سەر گرنگییا كارێ هەڤپشك بۆ پاراستنا ئارامی و سەقامگیرییا وەلاتی هاتە كرن.
نێچیرڤان بارزانی و عەبادی داكۆكیێ ل پێدڤییا كارێ هەڤپشك بۆ چارەسەركرنا پرسێن نیشتمانی دكەن
هەر ل بەغدا نێچیرڤان بارزانی، سەرۆكێ هەرێما كوردستانێ ل گەل د. حەیدەر عەبادی ، سەرۆكێ هەڤپەیمانییا نەسر كۆمبوو. د دیدارەكێدا باس ل ب هێزكرنا هاریكاریێ د ناڤبەرا هەولێرێ و بەغدایێ هاتە كرن، هەروەسا داكۆكی ل پێدڤییا كارێ هەڤپشك هاتە كرن بۆ چارەسەركرنا پرسێن نیشتمانی، ب شێوەیەكی كو سەقامگیرییا وەلاتی و مافێ هەموو پێكهاتەیێن دابین بكەت.
ل دووماهی تەوەرێ كۆمبوونێ هەردو ئالییان دووماهی پێشهاتێن دەڤەرێ و چەند پرسێن دی گەنگەشەكرن.
نێچیرڤان بارزانی و موسەنا سامەرائی راستڤەكرنا قانوونا بودجەی گەنگەشە دكەن
ل درێژییا كۆمبوونێن وی ل بەغدا، نێچیرڤان بارزانی، سەرۆكێ هەرێما كوردستانێ ل گەل موسەننا سامەرائی، سەرۆكێ هەڤپەیمانییا عەزم یا سوننی كۆمبوو، د دیدارەكێدا هەردو ئالییان باس ل رەوشا سیاسیی وەلاتی و چاوانییا ب هێزكرنا پەیوەندیێن حوكمەتا ئیراقا فیدرال و حوكمەتا هەرێما كوردستانێ كر ب شێوەیەكی هاریكارییا سەقامگیرییا ئیراقێ بكەت و كارێ هەڤپشك بۆ چارەسەركرنا كێشەیان پێشڤەببەت.
هەردو ئالییان رۆناهی ئێخستە سەر پرسا راستڤەكرنا قانوونا بۆدجەی و دوپاتی ل سەر پێدڤییا پاراستنا مافێن هەموو پێكهاتەیێن ئیراقێ و دەستەبەركرنا ئێكسانیێ د ناڤبەرا واندا كر، ب شێوەیەكی كو پێكڤەژیانا ئاشتییانە ب هێزبكەت و گیانێ دادپەروەریێ وەكو د دستوورێ ئیراقێدا هاتی، بەرجەستە بكەت.