ئەڤرۆ نيوز:
پشتی چەندین گۆتگوتک ھاتینە کرن کو پۆستێ جێگرێ پارێزگارێ دھۆکێ دێ دەنە موسلمانێن زاخۆ، ئەندامەکێ مەسیحیێ ئەنجومەنێ پارێزگەھا دھۆکێ دیار کر کو ھێشتا ئەڤ پۆستە بۆ چو ئالیان نەھاتیە ئێکلاکرن.
فارس یوحەنا ئەندامێ ئەنجومەنێ پارێزگەھا دھۆکێ ل سەر لیستا کلدانی سریانی ئاشووری بۆ ئەڤرۆ دیار کر کو ھەتا نھا پۆستێ جێگرێ پارێزگارێ دھۆکێ ئێکلا نەبوویە نە بۆ لیستا وان و نە بۆ چو لیستێن دی و گۆت: “ھیچ تشتەکێ رەسمی ل دۆر ڤی پۆستی نەھاتیە”.
ئەندامێ ئەنجومەنێ پارێزگەھا دھۆکێ خویا کر ژی وەکو پێکھاتێ مەسیحی دخوازن کو ئەڤ پۆستە بۆ وان بیت، چونکی پشتی ڤێ خولا ئەنجومەنێ پارێزگەھێ چ پۆستێن ئیداری بۆ وان نەھاتینە دیارکرن و گۆت “ئەم خوە ب مەغدور دزانین و بلا وەکی ئالیێن دی مەژی ھندەک پۆست ھەبن، چونکی پرانیا مەسیحیێن کوردستانێ یێن رەسەن ل پارێزگەھا دھۆکێ نە”.

ئەڤرۆ نيوز:
ئەندامەکێ سەرکرداتیا پارتی دیمۆکراتی کوردستان راگەھاند، دەمێ بزاڤا گۆڕان دروست بووی ب نەھجێ ئۆپۆزسیۆنێ دروست بوو، لەورا نەشێت ببیتە حوکمەت، کو ھاتیە ناڤ حوکمەتێ نەشیا ب نەفەسەکا حوکمەتداریێ کار بکەت و گۆت:(ئەم نوکە ژی نابینین نیازا خێرێ د گۆڕان دا ھەبیت بۆ ڤێ رەوشا کوردستانێ).
عەلی تەتەر دوپات ژی کر، کو گۆڕان نەشێت و خوە ل بەر وێ چەندێ ناگریت و سروشتێ وان ژی یێ وەسایە حوکمەتداریێ نەکەن، نوکە نوکە ژی نەشێت ل گەل حوکمەتێ ب رێڤە بچیت، راگەھاندن و کاردێن خوە و فراکسیۆن و سەرۆکێ پەرلەمانی کۆنترۆل بکەن، باشترە ببیتە ئۆپۆزسیۆن، د دەمەکی دا فازل میرانی سکرتێرێ مەکتەبا سیاسی یێ پارتی د کۆمبوونەکێ دا گۆتبوو، دەست نادەت گۆڕان ھەتا دەمژمێر دو د حوکمەتێ دا بیت و پشتی دویێ ببیتە ئۆپۆزسیۆن، یان دڤێت حوکمەت بیت یان ئۆپۆزسیۆن.
عەلی تەتەر بۆ باسنیوز دیار کر، رێککەفتنا گۆڕان و ئێکەتیێ جۆرەکێ سستیێ بۆ چارەکرنا کێشێن ھەرێما کوردستانێ دورستکریە و گۆت:(رەنگە دلێ خەلکەکی ب وێ چەندێ خۆشکربیت کو رێککەفتنا گۆڕان و ئێکەتیێ پالدەرەک بیت بۆ چارەکرنا کێشان، لێ ئەز وەسا دبینم ئێکەتی و گۆڕان نەشێن بگەھنە رێککەفتنەکا ئێکلاکەر، ب تایبەت کو گۆڕان ژ ئەنجامی بەرئێکچوونا ئێکەتیێ دروست بیە، لەورا گۆڕان گەل ئێکەتیێ ھەتا دووماھیێ نابەتە سەری، ب تایبەتی ژ بەر ئاۆزیێن ڤێ دووماھیێ یێن راگەھاندنێن ھەردو ئالیان.

ئه‌ڤرۆ نيوز:

وه‌زاره‌تا خواندنا بلند و ڤه‌كولينێن زانستى ل حوكمه‌تا هه‌رێما كوردستانێ راگه‌هاند كو ماوێ زانكۆلاين هاته‌ درێژكرن و قوتابيێن 12ى ئاماده‌ى دشێن فۆرمێ بۆ وه‌رگرتنێ ل زانكۆ و په‌يمانگه‌هان پڕ بكه‌ن.

وه‌زاره‌تا ناڤبرى ئه‌ڤرۆ د راگه‌هاندنه‌كێ دا كو دانه‌ك بۆ ئه‌ڤرۆ نيوز ره‌وانه‌كريه‌، ئاماژه‌ ب وێ چه‌ندێ كريه‌ كو ئه‌وان بڕيار دايه‌ ده‌مێ زانكۆلاين بۆ 48 ده‌مژمێرێن دى درێژ بكه‌ن كو دكه‌ته‌ ده‌مژمێر 12ى شه‌ڤا پێنجشه‌مب ل سه‌ر ئه‌ينى دا كو ئه‌و قوتابيێن هه‌تا نوكه‌ خه‌مسارى كرى و فورمه‌ پڕ نه‌كرين ژ وه‌رگرتن زانكۆ و په‌يمانگه‌هان نه‌هێنه‌ بێ به‌هر كرن.
ته‌كست ل سه‌ر وێ چه‌ندێ ژى كريه‌ كو ئه‌ڤه‌ دووماهى ده‌رفه‌ته‌ بۆ ده‌رچوويێن 12ى ئاماده‌ى و پشتى ڤى به‌روارى ب چو ره‌نگه‌كى ماوێ زانكۆلاين ناهێته‌ درێژكرن.