ئه‌ڤرۆ نيوز:

رێڤەبەرێ نڤێسینگەھا کاروبارێن رەڤاندیان ل دھۆکێ بۆ رۆژناما ئەڤرۆ دیار کر کو تیرۆرستێن داعش ناڤ و ئایینێ ھزار زارۆیێن ئێزدی یێن گوھارتین و ب درندەترین شێوە بۆ کارێن خوە پەقاندنێ مەشقا لەشکەری ب وان دکەن ژ بەر ڤێ چەندێ ئەو داخوازێ ژ ھێزێن ھەڤپەیمانان دکەن رێ یێن خوە یێن تایبەت بۆ ئازادکرنا وان زارۆیێن نوکە دھێنە مەشقدان ل سەربازگەھێن تەلەعفەر و نەینەوا و رەقە بگرنە بەر، چونکی ھەکە ئەڤ ھژمارا زارۆیان نەھێنە ئازادکرن ل پاشەرۆژی دێ مەترسیێ ل سەر ھەموو جیھانێ پەیداکەن.
حسێن کورو قائیدی، رێڤەبەرێ نڤێسینگەھا کاروبارین رەڤاندیان ل پارێزگەھا دھۆکێ ئاشکرا کر کو رێًکخراوا تیرۆرستێن داعش یێ مەشقەکا رێکخستی یا درندانە ب ھزار زارۆیێن ئێزدی ل سێ سەربازگەھێن لەشەکەری ل تەلەعفەر و نەینەوا و رەقە دکەت و گۆت: “ئەڤ ھژمارا زارۆیان ب دو قووناغان دھێنە مەشقدان یا ئێکێ، ل سەر ھزرێن توندەرو و خراب دھێنە پەروەردەکرن و یا دویێ، ل سەر چەوانیا ب کارئینانا چەکی و کارێن توندوتیژیێ و پەقاندنێ دھێنە مەشقدان و سەرەرایی ڤێ چەندێ ناڤ و ئایینێ وان زارۆیان ژی ژ لایێ تیرۆرستێن داعش ڤە ھاتینە گوھۆرین”.
ناڤھاتی ئاماژە دا وێ چەندێ کو پێدڤیە ھێزێن ھەڤپەیمانان رێ یێن خوە یێن تایبەت بۆ ئازادکرنا وان زارۆیێن نوکە ژ لایێ تیرۆرستێن داعش ڤە دھێنە مەشقدان بگرنە بەر، چونکی ھەکە ئەڤ زارۆیە ژ مەشقدانێ ب دووماھی بھێن و ل سەر وان ھزرێن توندرەو بچن دێ مەترسیێ ل سەر ھەموو جیھانێ پەیداکەن ژ بەر ڤێ چەندێ ئەو دەنگێ خوە بۆ ھەموو وەلاتێن جیھانێ بلند دکەن بۆ رزگارکرنا ڤان زارۆیان ھاریکاریا ھەرێما کوردستانێ بکەن و گۆت: “ئەو زارۆیێن د ھێنە مەشقدان ژیێ وان دناڤبەرا پێنج ھەتا 12 سالیێ دانە”.

ھەولێر، قائید میرۆ:
بەرەیێ تورکومانی ھەلویستێ خوە ل دۆر کابینا تەکنۆکرات ئاشکراکر و راگەھاند، ئەگەر چو وەزارەت بەر ب تورکومانا نەکەڤن دەنگی بۆ نادەن.
ئایدن مەعرۆف، ئەندامێ مەکتەبا سیاسیا بەرەیێ تورکومانی بۆ ئەڤرۆ نیۆز گۆت: “حەیدەر عەبادی سەرۆک وەزیرێن عێراقێ چو کەسێن تورکومان بۆ کابینا تەکنۆکرات بەربژێر نەکرینە و پێکھاتا تورکومان ل عيراقێ بەرچاڤ نەھاتیە وەرگرتن، لەوڕا ئەم دژی ئەڤێ کابینا نووینە ل عێراقێ”.
ئایدنی خۆياكر كو هه‌كه‌ بھێت و عەبادی یێ رژدبیت ل سەر ڤێ چەندێ چو پۆستێن وەزاری نەدەتە مللەتێ تورکومان ئەڤە بێگومان پەرلەمانتارێن تورکومان دەنگی بۆ کابینا تەکنۆکرات نادەن، کو ھژمارا وان 12 پەرلەمانتارن.

ئه‌ڤرۆ نيوز:

ل سه‌ر داخوازا 61 نوونه‌ران ئه‌ڤرۆ رۆژا چارشه‌مبى كۆمبوونا نه‌ئاسايى يا جڤاتا نوونه‌رێن عيراقێ دێ هێته‌ ئه‌نجام دان و هه‌ڤپه‌يمانيا ئه‌حرار ژى رادگه‌هينيت كو دێ داخوازا ڤه‌كێشانا باوه‌رێ ژ هه‌رسێ سه‌رۆكاتيان هێته‌ كرن.

بڕياره‌ ئه‌ڤرۆ ده‌مژمێرى 13:00 جڤاتا نوونه‌رێن عيراقێ ل سه‌ر داخوازا 61 نوونه‌ران، روونشتنه‌كا نه‌سايى يا جڤاتا نوونه‌رێن عيراقێ كۆم ببيت و و تێدا دانوستاندن ل سه‌ر كاودانێن نوكه‌ يێن عيراقێ و جڤاتا نوونه‌رێن عيراقێ بهێته‌ كرن.
ئيقبال غورابى، ئه‌ندامێ جڤاتا نوونه‌ران ل سه‌ر هه‌ڤپه‌يمانيا ئه‌حرار د به‌ياننامه‌كێ دا راگه‌هاند كو د كۆمبوونا ئه‌ڤرۆ يا نه‌ئاسايى دا ئه‌و دێ داخوازا ده‌ست ژ كاركێشانا سه‌رۆكاتيا جڤاتا نوونه‌رێن عيراقێ و جڤاتا وه‌زيران و سه‌رۆك كۆمارێ عيراقێ كه‌ن.

هه‌ر د ڤێ به‌ياننامێ دا دايه‌ زانين ژى كو مانگرتنا ئه‌ندامێن جڤاتا نوونه‌ران يێن هه‌ڤپه‌يمانيا ئه‌حرار ئه‌وا دوهى ده‌سپێكرى دێ يا به‌رده‌وام بيت هه‌تا پرۆسا ده‌ست ژ كاركێشانێ ئێك ب ئێك دهێنه‌ ئه‌نجام دان.

ئه‌ڤرۆ نيوز:

ئه‌ڤرۆ سپێدێ و ره‌نگه‌كێ نه‌چاڤه‌رێكرى دا، سه‌رۆكێ ته‌ڤگه‌را سه‌در، موقته‌دا سه‌در، عيراق ب جهـ هێلا و به‌ر ب لوبنان ب رێ كه‌فت، بڕياره‌ ده‌مژمێر 6:00ى ئێڤارى ژى خونيشادانێن به‌فره‌هـ ده‌ست پێ بكه‌ن.

ب گۆره‌ى راگه‌هاندنێن عيراقى، ئه‌ڤرۆ رۆژا چارشه‌مبى رێكه‌فتى 13ى نيسانا 2016ێ دێ خوه‌نيشادانێن به‌رفره‌هـ ژ لايێ لايه‌نگرێن سه‌درى ل عيراقێ هێنه‌ كرن وه‌كو نه‌رازيبوونا به‌رامبه‌ر حوكمه‌تا ته‌كنوكرات يا عه‌بادى ب به‌هانه‌يا وێ چه‌ندێ كو حوكمه‌تا نوو نه‌بوو چاكسازيێ يه‌، به‌لكو ب تنێ بۆ رازيكرنا وايه‌.

دوهى ژى د كۆمبوونا جڤاتا نوونه‌رێن عيراقێ دا، كوتلا ئه‌حرار يا سه‌ر ب ته‌ڤگه‌را سه‌در ڤه‌، بايكوتا روونشتنا جڤاتێ كر وه‌كو نه‌رازيبوون هه‌مبه‌ر ناڤێ كابينا نوو يێن حوكمه‌تا ته‌كنوكرات ب سه‌رۆكاتيا عه‌بادى.

ئه‌ڤرۆ ژى د سه‌ره‌دانه‌كا نه‌چاڤه‌رێ كرى دا، سه‌رۆكێ ته‌ڤگه‌را سه‌در موقته‌دا سه‌در ب رێيا فرۆكخانا نه‌جه‌ف به‌ر ب وه‌لاتێ لوبنانێ ب رێ كه‌فت بێى كو مه‌ره‌ما سه‌ره‌دانێ بهێته‌ دياركرن يان ژى پێشوه‌خت بهێته‌ راگه‌هاندن.